កម្ពុជាធ្វើសមយុទ្ធយោធាបាញ់គ្រាប់កាំភ្លើងពិតនៅបាត់ដំបង
2010.09.24
កាំភ្លើងធំធុន ១០០មីលីម៉ែត្រ ត្រូវបានដាក់តាំងត្រៀមបើកយុទ្ធនាការធ្វើសមយុទ្ធយោធាបាញ់គ្រាប់កាំភ្លើងពិត នៅស្រុករតនៈមណ្ឌល ខេត្តបាត់ដំបង នៅថ្ងៃទី២៣ ខែកញ្ញា ឆ្នាំ២០១០។
កម្មសិក្សាការីមកពីបណ្ដាលអង្គភាពចំណុះយោធភូមិភាគ៥ ចំនួន ២២៦នាក់ បានធ្វើលំហាត់សមយុទ្ធយោធាកាលពីព្រឹកថ្ងៃព្រហស្បតិ៍ ទី២៣ ខែកញ្ញា ឆ្នាំ២០១០ ដោយបានធ្វើការបាញ់គ្រាប់កាំភ្លើងត្បាល់ធុន ១០០មីលីម៉ែត្រ កាំភ្លើងការពារអាកាសធុន ២៣មីលីម៉ែត្រ និង ៣៧មីលីម៉ែត្រ ដែលជាគ្រាប់កាំភ្លើងពិតអស់ជាច្រើនពាន់គ្រាប់។
ការអនុវត្តលំហាត់បាញ់គ្រាប់កាំភ្លើងពិតនេះ គឺបានធ្វើឡើងនៅក្នុងទីលានជាក់ស្ដែងក្នុងភូមិសាស្ត្រភ្នំវែង ភូមិជីនាងក្រោម ឃុំត្រែង ស្រុករតនៈមណ្ឌល ខេត្តបាត់ដំបង ដើម្បីបង្ហាញពីសមត្ថភាពនាយទាហាន ពលទាហានជំនាញកាំភ្លើងការពារអាកាស កាំភ្លើងត្បាល់ បន្ទាប់ពីបានធ្វើការហ្វឹកហ្វឺនអស់រយៈពេលបីខែរួចមក។
នាយឧត្ដមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិខ្មែរ បានមានប្រសាសន៍ថា ការធ្វើលំហាត់សមយុទ្ធយោធា គឺដើម្បីពិនិត្យមើលគុណភាពកាំភ្លើងចាស់ៗ ដែលនៅសេសសល់ និងស្របពេលដែលកម្មសិក្សាការីជាង ២០០នាក់ទើបបានបញ្ចប់វគ្គហ្វឹកហ្វឺនជំនាញការពារអាកាស និងជំនាញអាវុធគាំទ្រ។
លោក ទៀ បាញ់ ថ្លែងថា ៖ «ខ្ញុំឃើញថា វាមិនមែនជាការបង្ហាញសាច់ដុំទេ គឺជាការបង្ហាញឲ្យឃើញប្រសិទ្ធភាពក្នុងការការពារបូរណភាពទឹកដីរបស់ខ្លួន។ ជាធម្មតាវាត្រូវតែមានអ្វីៗខ្លះដើម្បីឲ្យវាគ្រប់ប្រសិទ្ធភាពរបស់វា នៅពេលមានការចាំបាច់ត្រូវបំពេញ»។
លោក ពៅ សុខា នាយរងសេនាធិការ និងជាមេបញ្ជាការកងទ័ពជើងគោក បានមានប្រសាសន៍បញ្ជាក់ពីយុទ្ធវិធីក្នុងពេលធ្វើលំហាត់សមយុទ្ធយោធាដូច្នេះថា ៖ «ទី១ គឺយើងបាញ់សញ្ញាគោលដៅ ទី២ គឺយើងបាញ់គាំទ្រកម្ទេចខ្មាំងវាយស្ទាក់ ទី៣ គឺវាយគាំទ្រឲ្យកម្លាំងថ្មើរជើង យើងវាយបក ទី៤ យើងបាញ់កម្ទេចទីតាំងខ្លាំង ហើយក្នុងចម្ងាយបាញ់នេះ គឺយើងបាញ់ចម្ងាយ ២ពាន់ម៉ែត្រ ហើយនៅលើចម្ងាយបាញ់របស់វា មានប្រសិទ្ធភាព ៤.៧៥០ម៉ែត្រ»។
ការអនុវត្តលំហាត់បាញ់គ្រាប់កាំភ្លើងពិតខាងជំនាញអាវុធគាំទ្រ បានប្រើប្រាស់កាំភ្លើងត្បាល់ធុន ១០០មីលីម៉ែត្រ ខាងជំនាញការពារអាកាសបានប្រើប្រាស់កាំភ្លើងធុន ២៣មីលីម៉ែត្រ និងកាំភ្លើងធុន ៣៧មីលីម៉ែត្រ។
នៅក្រោយការបាញ់ក្រុមមន្ត្រីយោធាបានប្រកាសពីលទ្ធផលដូច្នេះថា ៖ «បាញ់សម្ដែងកាំភ្លើង ២៣មីលីម៉ែត្រអស់ ២.៣៥៤គ្រាប់ កាំភ្លើង ៣៧មីលីម៉ែត្រ បាញ់ចំនួន ២០៩គ្រាប់ កាំភ្លើងត្បាល់ ១០០មីលីម៉ែត្របាញ់អស់ ១៤៨គ្រាប់ ចំណាត់ថ្នាក់រួមល្អ លទ្ធផលអាវុធការពារអាកាសល្អ កាំភ្លើងត្បាល់ ១០០មីលីម៉ែត្រ ទទួលបានលទ្ធផលល្អ»។
វគ្គហ្វឹកហ្វឺនជំនាញការពារអាកាសជំនាញអាវុធគាំទ្រ និងលំហាត់យុទ្ធវិធីបាញ់គ្រាប់ពិតនេះ គឺស្របពេលដែលរាជរដ្ឋាភិបាលកម្ពុជា កំពុងអនុវត្តយ៉ាងសកម្មនូវកម្មវិធីនយោបាយយុទ្ធសាស្ត្រចតុកោណជំហានទី២ អាណត្តិទី៤ សំដៅកែទម្រង់លើគ្រប់វិស័យ ជាពិសេសលើវិស័យកងទ័ព៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ