សភា​សម្រេច​កាត់​ប្រាក់​ខែ​មូរ​សុខហួរ​ដើម្បី​សង​ជំងឺ​ចិត្ត​ហ៊ុន​សែន

រដ្ឋ​សភា​បាន​សម្រេច​ចិត្ត​ជា​ចុង​ក្រោយ​កាត់​ប្រាក់​ខែ​តំណាង​រាស្ត្រ​របស់​លោក​ស្រី មូរ សុខហួរ ទៅ​តាម​ការ​ស្នើ​សុំ​របស់​តុលាការ​ក្រុង​ភ្នំពេញ ដើម្បី​យក​លុយ​ទៅ​សង​ជំងឺ​ចិត្ត លោក​នាយក​រដ្ឋមន្ត្រី ហ៊ុន សែន។
ដោយ យន់ សាមៀន
2010-07-30
អ៊ីម៉ែល
មតិ
Share
បោះពុម្ព
ពី​ឆ្វេង: តំណាង​រាស្ត្រ​គណបក្ស សម រង្ស៊ី លោក​ស្រី មូរ សុខហួរ និង​លោក​នាយក​រដ្ឋមន្ត្រី ហ៊ុន សែន
ពី​ឆ្វេង: តំណាង​រាស្ត្រ​គណបក្ស សម រង្ស៊ី លោក​ស្រី មូរ សុខហួរ និង​លោក​នាយក​រដ្ឋមន្ត្រី ហ៊ុន សែន
RFA Photo

សមាជិក​គណៈកម្មាធិការ​អចិន្ត្រៃយ៍​រដ្ឋ​សភា លោក ជាម យៀប បាន​ប្រាប់​វិទ្យុ​អាស៊ី​សេរី នៅ​ថ្ងៃ​សុក្រ ទី​៣០ កក្កដា ថា រដ្ឋ​សភា​សម្រេច​កាត់​ប្រាក់​ខែ​របស់​លោកស្រី មូរ សុខហួរ ចំនួន ៨​លាន​រៀល​ក្នុង​រយៈ​ពេល ២​ខែ គឺ​ខែ​កក្កដា និង​សីហា ដើម្បី​យក​ប្រាក់​ទាំង​នោះ​ទៅ​សង​ជំងឺ​ចិត្ត លោក ហ៊ុន សែន។

លោក ជាម យៀប បញ្ជាក់​ថា ប្រាក់​ខែ​លោក​ស្រី​តំណាង​រាស្ត្រ មូរ សុខហួរ មាន​ចំនួន​ប្រហែល ៨​លាន​រៀល ហើយ​រដ្ឋ​សភា​ត្រូវ​កាត់​ប្រាក់​ខែ​ពាក់​កណ្ដាល​ក្នុង​មួយ​លើក​ៗ។

ចៅក្រម​តុលាការ​ក្រុង​ភ្នំពេញ​កាល​ពី​ថ្ងៃ​ទី​២០ កក្កដា បាន​ស្នើ​ឲ្យ​រដ្ឋ​សភា​រឹប​អូស​ប្រាក់​ខែ​លោក​ស្រី មូរ សុខហួរ បន្ទាប់​ពី​លោក​ស្រី​មិន​ព្រម​បង់​ប្រាក់​ពិន័យ​តុលាការ។ តុលាការ​បាន​សម្រេច​កាត់​ឲ្យ​លោក​ស្រី មូរ សុខហួរ ចាញ់​ក្តី​ករណី​បរិហារ​កេរ្តិ៍ លោក ហ៊ុន សែន ដោយ​ត្រូវ​សង​ជំងឺ​ចិត្ត លោក ហ៊ុន សែន ចំនួន ៨​លាន​រៀល និង​ប្រាក់​ពិន័យ​ព្រហ្មទណ្ឌ​ចំនួន ៨​លាន ៥​សែន​រៀល។

ការ​កាត់​ប្រាក់​ខែ​អ្នក​តំណាង​រាស្ត្រ​នេះ ត្រូវ​បាន​ទទួល​រង​ការ​រិះគន់​ពី​សំណាក់​មន្ត្រី​គណបក្ស​ប្រឆាំង និង​អង្គការ​សង្គម​ស៊ីវិល​នៅ​កម្ពុជា ថា​ជា​ការ​បំបិទ​សិទ្ធិ​ផ្នែក​បញ្ចេញ​មតិ​របស់​អ្នក​តំណាង​រាស្ត្រ។

លោក ជាម យៀប បាន​បដិសេធ​ការ​ចោទ​ប្រកាន់​ដែល​ថា ការ​កាត់​ប្រាក់​ខែ​ជា​គាប​សង្កត់​ផ្នែក​នយោបាយ។ លោក​ថា ទោះ​បី​ជា​បទបញ្ជា​ផ្ទៃ​ក្នុង​របស់​រដ្ឋ​សភា មិន​អនុញ្ញាត​រដ្ឋ​សភា​កាត់​ប្រាក់​ខែ​តំណាង​រាស្ត្រ​ក៏​ដោយ។ សភា​ត្រូវតែ​កាត់​ប្រាក់​ខែ ដើម្បី​ឆ្លើយ​តប​ទៅ​នឹង​សំណើ​របស់​តុលាការ។

លោកស្រី មូរ សុខហួរ មាន​ប្រសាសន៍​នៅ​ថ្ងៃ​សុក្រ​ដែរ​ថា លោកស្រី​មិន​យល់​ព្រម​ចំពោះ​ការ​កាត់​ប្រាក់​ខែ​នេះ​ទេ ហើយ​លោក​ស្រី​នៅតែ​មិន​បង់​ប្រាក់​ពិន័យ​ចំនួន ៨​លាន ៥​សែន​រៀល​ទៀត​ទៅ​រតនាគារ​ជាតិ​ដដែល។ លោក​ស្រី​បន្ថែម​ថា លោក​ស្រី​ជា​ជន​រងគ្រោះ​នៃ​ការ​បរិហារ​កេរ្តិ៍ ប៉ុន្តែ​ដោយ​តុលាការ​នៅ​ក្រោម​អំណាច​រដ្ឋាភិបាល លោក​ស្រី​ក្លាយ​ទៅ​ជា​ជន​ល្មើស​ទៅ​វិញ។

នាយក​ប្រតិបត្តិ​គណៈកម្មាធិការ​ដើម្បី​ការ​បោះ​ឆ្នោត​ដោយ​សេរី និង​យុត្តិធម៌​នៅ​កម្ពុជា លោក គល់ បញ្ញា មាន​ប្រសាសន៍​នៅ​ថ្ងៃ​សុក្រ ទី​៣០ កក្កដា ថា ការ​កាត់​ប្រាក់​ខែ​តំណាង​រាស្ត្រ មូរ សុខហួរ វា​ប្រសើរ​ជាង​ការ​ចាប់​ដាក់​គុក ប៉ុន្តែ​ការ​កាត់​ប្រាក់​ខែ​នេះ​ជា​ការ​ប៉ះ​ពាល់​ដល់​សិទ្ធិ​បញ្ចេញ​មតិ​របស់​អ្នក​តំណាង​រាស្ត្រ។ លោក​ថា រដ្ឋ​សភា​មិន​បាន​បកស្រាយ​បទបញ្ជា​ផ្ទៃ​ក្នុង​របស់​ខ្លួន​ឲ្យ​ត្រឹមត្រូវ ម្ដង​ថា អាច​ប្រាក់​ខែ​បាន ម្ដង​ថា មិន​អាច​កាត់​ប្រាក់​ខែ​អ្នក​តំណាង​រាស្ត្រ​បាន។

លោក​ថា អ្នក​តំណាង​រាស្ត្រ​អាច​មាន​សិទ្ធិ​បញ្ចេញ​មតិ ហើយ​ការ​បញ្ចេញ​មតិ​នេះ​មិន​ត្រូវ​ទទួល​រង​ការ​ចោទ​ប្រកាន់​ពី​បទ​បរិហារ​កេរ្តិ៍។

អង្គការ​សហ​ប្រជាជាតិ​ទទួល​បន្ទុក​ផ្នែក​សិទ្ធិ​មនុស្ស បាន​ហៅ​ការ​កាត់​ទោស​លោកស្រី មូរ សុខហួរ ថា​ជា​ការ​ធ្លាក់​ចុះ​នៃ​សិទ្ធិ​បញ្ចេញ​មតិ​នៅ​កម្ពុជា៕

ព័ត៌មាន (3)
Share

អ្នក​អាន​អនាមិក

HUN SEN is always right. No surprise that is what a dictator all about. He is above the law.

Jul 31, 2010 05:39 PM

អ្នក​អាន​អនាមិក

The court of justice in Cambodia this time never makes clear about any provision of the law when they make the sentence which is related to the powerful persons.They are making the innocent people become crazy because we cannot understand which is right which is wrong who is really right, who is really wrong.

Jul 30, 2010 01:56 PM

អ្នក​អាន​អនាមិក

She have plenty of money to pay Hun Sen, but it is politic. Hun Sen don't need money, It's politic.

Jul 30, 2010 04:53 AM

គេហទំព័រ​ទាំងមូល