លោក មឿង សុន មានប្រសាសន៍ប្រាប់វិទ្យុអាស៊ីសេរីថា លោកបានផ្តួចផ្តើមធ្វើពិធីរាប់បាត្រដែលគ្រោងនឹងធ្វើនៅថ្ងៃអាទិត្យស្អែកនេះ នៅឯសួនច្បារខាងមុខវត្តបទុមវតី ក្នុងក្រុងភ្នំពេញ គឺបាននិមន្តព្រះសង្ឃសរុប ១៩២អង្គ ក្នុងនោះក៏មានសម្តេចព្រះសង្ឃរាជ បួរ គ្រី និងសម្តេចព្រះមហាសុមេធាធិបតី នន្ទ ង៉ែត គ្រោងនឹងនិមន្តទៅចូលរួមផងដែរ។
លោក មឿង សុន បញ្ជាក់ថា លោកបានដាក់លិខិតសុំទៅសាលាក្រុងភ្នំពេញ តាំងពីថ្ងៃទី១៨ ខែវិច្ឆិកា ខែមុននេះមកម៉្លេះ ប៉ុន្តែអភិបាលក្រុងភ្នំពេញ ទើបតែផ្តល់លិខិតឆ្លើយតបនៅថ្ងៃសុក្រម្សិលមិញនេះ ដោយបានណែនាំឲ្យលោកដាក់ពាក្យសុំការអនុញ្ញាតពីក្រសួងធម្មការនិងក្រសួងមហាផ្ទៃវិញ។
លោក មឿង សុន មានប្រសាសន៍យ៉ាងដូច្នេះថា ៖ «ហេតុអីបានយើងធ្វើហ្នឹង ពីព្រោះយើងយល់ថា សព្វថ្ងៃហ្នឹង នៅប្រទេសជិតខាងយើង ជាពិសេសប្រទេសសៀមកំពុងតែមានវិបត្តិផ្ទៃក្នុង ហើយគេបានបញ្ជូនកងទ័ពមកជិតព្រំដែនយើង ហើយមួយរយៈកន្លងមក កងទ័ព[សៀម]ក៏បានបង្កើតអំពើហិង្សាជាមួយកងទ័ពខ្មែរយើង ធ្វើឲ្យបាត់បង់អាយុជីវិតយុទ្ធជនយើង។ មិនតែប៉ុណ្ណោះ ក៏មានវិបត្តិសេដ្ឋកិច្ចពិភពលោកទៀតផង ហេតុដូច្នេះបានអង្គការមូលនិធិទ្រទ្រង់អារ្យធម៌ចង់បង្កើតកម្មវិធីរាប់បាត្រសុំសេចក្ដីសុខសន្តិភាពនៅថ្ងៃស្អែកនេះ តែខ្ញុំមានការសោកស្ដាយដោយសារសាលាក្រុង បានឆ្លើយតបលិខិតដែលយើងស្នើសុំតាំងពីថ្ងៃទី១៨ ខែវិច្ឆិកា ព្រឹកមិញ យើងបានទទួលលិខិតនេះ នៅថ្ងៃសៅរ៍ ហើយយើងត្រូវតែលុបកម្មវិធីនេះនៅពេលចុងក្រោយ ... ក៏ប៉ុន្តែយើងនឹងព្យាយាមធ្វើកម្មវិធីនេះដដែល យើងនឹងធ្វើនៅថ្ងៃទី១៤»៕