ពលករចំណាកស្រុកចំនួន ៣០នាក់នៅក្នុងចំណោមពលករសរុប ៦៥នាក់ បានវិលត្រឡប់មកដល់ប្រទេសកម្ពុជា វិញហើយ នៅថ្ងៃទី១២ ខែធ្នូ ឆ្នាំ២០១១ ពីប្រទេសឥណ្ឌូនេស៊ី ក្រោយពីត្រូវបានសង្គ្រោះដោយអាជ្ញាធរនគរបាលឥណ្ឌូនេស៊ី (Indonesia) តាមសំណើរបស់ក្រសួងការបរទេសកម្ពុជា ពីការជួញដូរកំលាំងពលកម្ម និងការជួញដូរមនុស្សកន្លងមក។
ពលករឈ្មោះ មាស សំអឿន អាយុ ២៥ឆ្នាំ មកពីខេត្តសៀមរាប ដែលទើបមកដល់ប្រទេសកម្ពុជាវិញ នៅឯអាកាសយានដ្ឋានអន្តរជាតិភ្នំពេញ នៅថ្ងៃទី១២ ខែធ្នូ បាននិយាយប្រាប់អ្នកកាសែតថា លោករីករាយណាស់បានមកដល់ប្រទេសកម្ពុជាវិញ៖ «គេធ្វើបាប... គេវាយ។ ...ចាញ់បោកគេ»។
ពលករម្នាក់ទៀតឈ្មោះ ខាន់ ឈួន អាយុ ៣០ឆ្នាំ មកពីខេត្តសៀមរាប បាននិយាយថា លោករីករាយគ្មានអ្វីប្រៀបបានទេ៖ «ត្រេកអរបានមកដល់ស្រុកខ្មែរវិញ បានមកជួបបងប្អូនវិញ។ ខ្ញុំទៅចាញ់បោកគេ គេថា គេនាំទៅរកការងារស្រាលៗ ទៅតាមគេ គេយកទៅឲ្យចុះទូក។ គ្មានប្រាក់ជាប់ខ្លួនបានរត់មកវិញ»។
ពលករទាំងនោះត្រូវបានក្រុមនគរបាលប្រឆាំងការជួញដូរមនុស្ស បានអមដំណើរនៅពេលចេញពីអាកាសយានដ្ឋានអន្តរជាតិភ្នំពេញ ដឹកតាមរថយន្ត ឆ្ពោះទៅកាន់អគ្គស្នងការដ្ឋាននគរបាលជាតិ។
អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជននៃអគ្គស្នងការដ្ឋាននគរបាលជាតិ លោកឧត្ដមសេនីយ៍ត្រី ជីវ ផល្លី និងសាកសួរចំលើយធ្វើកំណត់ហេតុ ដើម្បីស្រាវជ្រាវចាប់ខ្លួនមេខ្យល់លក់កំលាំងពលកម្ម និងជួញដូរមនុស្ស៖ «មេខ្យល់ដែលគាត់បានស្គាល់អត្តសញ្ញាណនោះ គឺយើងសុំឲ្យគាត់មានកិច្ចសហការល្អ ហើយផ្ដល់ព័ត៌មានជូនសមត្ថកិច្ចជំនាញ ដើម្បីយើងអនុវត្តតាមនីតិវិធី ហើយយើងចង់ស្វែងរកចាប់ខ្លួនមេខ្យល់ហ្នឹង ដើម្បីផ្ដន្ទាទោសតាមផ្លូវច្បាប់»។
អ្នកនាំពាក្យក្រសួងការបរទេសកម្ពុជា លោក កុយ គួង បានមានប្រសាសន៍ថា ក្រសួងការបរទេសបន្តដោះស្រាយពលករដែលនៅសេសសល់មួយចំនួនទៀត៖ «នៅសល់ ៥នាក់ហ្នឹង ក្រសួងការបរទេសកម្ពុជា និងស្ថានទូតកម្ពុជា នៅឥណ្ឌូនេស៊ីនោះ កំពុងតែបន្តសហការជាមួយអង្គការ IOM ដើម្បីបញ្ជូនអ្នកដែលនៅសេសសល់ ពលរដ្ឋយើងរងគ្រោះចំនួន ៥នាក់ទៀតហ្នឹង មកកម្ពុជាវិញ នៅពេលឆាប់ៗខាងមុខនេះ»។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ចុះថ្ងៃទី៦ ខែធ្នូ កន្លងទៅនេះ បានឲ្យដឹងថា ពលករចំណាកស្រុកចំនួន ៦៥នាក់នោះ ត្រូវបានមេខ្យល់បោកបញ្ឆោតឲ្យធ្វើជាកម្មករនេសាទលើទូកថៃ ជាច្រើនខែមកហើយ។
ពលករទាំងនោះត្រូវបានអាជ្ញាធរប្រទេសឥណ្ឌូនេស៊ី បានចាប់ឃាត់ខ្លួនពីបទចូលនេសាទខុសច្បាប់នៅខេត្តម៉ាគូលូ (Makulu) នៃប្រទេសឥណ្ឌូនេស៊ី៕