អាជ្ញាធរប៉ៃលិនប្រកាសឲ្យឈប់គាស់យកកំណប់នៅវត្តរតនសោភ័ណ
2010.08.21
គេហទំព័រវត្តរតនសោភ័ណ នៅខេត្តប៉ៃលិន
មន្ត្រីជាន់ខ្ពស់ខេត្តប៉ៃលិនឲ្យដឹងថា ក្រុមអាជ្ញាធរខេត្តប៉ៃលិន ផ្អាកការជីកកកាយដីរកកំណប់ នៅក្រោមដីជាប់ខឿនរបងវត្តរតនសោភ័ណ ដោយគ្មានថ្ងៃកំណត់ បន្ទាប់ពីព្រះសង្ឃជាច្រើនអង្គ ដែលគង់នៅក្នុងវត្តរតនសោភ័ណ ហៅវត្តកោងកាងនោះ បានធ្វើការប្រឆាំងជំទាស់ជាមួយក្រុមអាជ្ញាធររួចមក។
លោក អ៊ី ឈាន អភិបាលខេត្តប៉ៃលិនបានមានប្រសាសន៍បញ្ជាក់កាលពីថ្ងៃសៅរ៍ ទី២១ ខែសីហា ឆ្នាំ២០១០ ថា ការប្រកាសមិនឲ្យបន្តជីករកកំណប់របស់អាជ្ញាធរខេត្តប៉ៃលិន គឺដោយសារមានការតវ៉ាពីក្រុមព្រះសង្ឃ និងការដឹងមិនច្បាស់លាស់ថា មានកំណប់ ឬអត់ ៖ «លោកប្រកាន់រឿងអ៊ីចឹង ហើយយើងកុំឲ្យប៉ះពាល់ការពិតព្រះសង្ឃមិនត្រូវទៅប៉ះពាល់រឿងអ៊ីចឹងទេ យើងអ្នកការពារទាំងផលប្រយោជន៍ សំខាន់គឺរឿងសន្តិសុខព្រះសង្ឃទេ ពីព្រោះសង្ឃគឺមិនត្រូវពាក់ព័ន្ធរឿងអ៊ីចឹង ប៉ុន្តែដល់លោកអ៊ីចឹងហើយ យើងកុំឲ្យមានកង្វល់ឈឺក្បាលវិលមុខអី រក្សាហ្នឹងទៅ»។
កាលពីថ្ងៃសៅរ៍ ទី៧ ខែសីហា ព្រះសង្ឃជាច្រើនអង្គ ដែលគង់នៅក្នុងវត្តរតនសោភ័ណ ស្ថិតនៅក្នុងក្រុងប៉ៃលិន បានទូងស្គរ វ៉ៃជួង លើកគ្នាឈរខាងក្រៅរបងវត្ត និងហ៊ុមព័ទ្ធទីកន្លែងកប់កំណប់ ប្រឆាំងមិនឲ្យក្រុមអាជ្ញាធរមូលដ្ឋានចូលជីកកំណប់ ស្ថិតនៅទិសនិរតីជាប់ខឿនព្រះវិហារនៃវត្តរតនសោភ័ណ។
លោក អ៊ី ឈាន អភិបាលខេត្តប៉ៃលិនបានបញ្ជាក់ដូច្នេះថា ៖ «ការរៀបចំ គឺបំណងដូចខ្ញុំបានជម្រាបអ៊ីចឹង ទី១ ដោះអារម្មណ៍ឲ្យជ្រះស្រឡះទាំងអស់ ទី២ បើពិតប្រាកដទេ បានទេ យើងរាយការណ៍ជូនទៅលើ ពីព្រោះខ្ញុំអត់មានលាក់បាំង ហើយខ្ញុំមិននៅផង»។
ក្រុមព្រះសង្ឃជិត ១០០អង្គ បានប្រឆាំងមិនឲ្យម្ចាស់កំណប់ និងក្រុមអាជ្ញាធរជីកដីរកកំណប់ជាប់ខឿនព្រះវិហារ នៃវត្តរតនសោភ័ណនោះទេ ដរាបនាពួកគេគ្មានលិខិតអនុញ្ញាតជាផ្លូវការពីមន្ត្រីថ្នាក់លើ។ កងកម្លាំងអាជ្ញាធរចម្រុះ ប៉េអិម ប៉ូលិស និងទាហានការពារព្រំដែនរាប់រយនាក់ ត្រូវបានគេដាក់ពង្រាយការពារមិនឲ្យប្រជាពលរដ្ឋចូលទៅពិនិត្យមើលទីតាំងកប់កំណប់នោះទេ។
ព្រះតេជគុណ ញឹម សុធន ព្រះចៅអធិការវត្តរតនសោភ័ណមានថេរដីកាថា ក្រោយពីកើតមានបញ្ហាខាងលើ ខាងវត្តអារាម មានគម្រោងដោះស្រាយ និងកំពុងធ្វើការពិភាក្សាគ្នាជាមួយគណៈសង្ឃ ដើម្បីធ្វើយ៉ាងណា ដើម្បីមានសេចក្ដីស្ងប់ស្ងាត់របស់ព្រះសង្ឃដែលគង់នៅក្នុងវត្ត ៖ «អ្វីដែលនៅក្នុងវត្ត សុទ្ធតែជារបស់រដ្ឋទេ មិនមែនជារបស់បុគ្គលណាមួយទេ ហើយបើយើងនិយាយពីវិន័យ នៅក្នុងសាសនាគេហៅថា របស់គរុភណ្ឌ»។
លិខិតចុះការបរិច្ឆេទកាលពីថ្ងៃទី១ ខែឧសភា ឆ្នាំ២០១០ មួយច្បាប់ ដែលវិទ្យុអាស៊ីសេរីទទួលបាន បានបញ្ជាក់ថា ម្ចាស់កំណប់នោះមានឈ្មោះ សុខ សុខា អាយុ៤៧ឆ្នាំ មានទីលំនៅភូមិ១៣ សង្កាត់ទួលគោក ខណ្ឌទួលគោក ក្រុងភ្នំពេញ។
លោក សុខ សុខា បានស្នើសុំជីកកំណប់ជាទ្រព្យរបស់ខ្លួន ដែលបានកប់រក្សាទុកក្នុងទីតាំងវត្តរតនសោភ័ណ ស្ថិតនៅភូមិវត្ត សង្កាត់ប៉ៃលិន ក្រុងប៉ៃលិន ខេត្តប៉ៃលិន។ លោក សុខ សុខា ដែលអះអាងជាម្ចាស់កំណប់នោះ បានបញ្ជាក់ក្នុងលិខិតថា កំណប់នោះលោកបានកប់កាលពីសម័យសង្គ្រាម ប៉ុន្តែមិនបានបញ្ជាក់កាលបរិច្ឆេទច្បាស់លាស់ទេ។
ក្រុមអ្នកភូមិបានជឿថា នៅក្នុងដីជាប់របងខឿនព្រះវិហារនៃវត្តរតនសោភ័ណនោះ ពិតជាមានកំណប់ ព្រោះកន្លងទៅថ្មីៗ នេះ មានមនុស្សបានយកម៉ាស៊ីនរ៉ាវរកកំណប់នៅទីនោះ ប៉ុន្តែអ្នកភូមិខ្លះទៀតជឿថា មិនមានកំណប់កប់នៅទីនោះទេ។ ចំណែកអាជ្ញាធរខេត្ត និងក្រុមព្រះសង្ឃក៏មិនទាន់បានធ្វើការសន្និដ្ឋានច្បាស់លាស់ដូចគ្នា ថាតើនៅទីនោះមានកំណប់ ឬក៏អត់៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ