នាយកដ្ឋាននយោបាយ និងកិច្ចការបរទេសនៃក្រសួងការពារជាតិ មានផែនការប្រែសម្រួលសៀវភៅនេះទៅជាភាសាអង់គ្លេស ដើម្បីចែកជូនដល់ស្ថានទូតបរទេសនានានៅកម្ពុជា និងនៅបរទេស។
មន្ត្រីជាន់ខ្ពស់ក្រសួងការពារនៅថ្ងៃទី២ ខែធ្នូ ឆ្នាំ២០១១ បានចេញផ្សាយលើកដំបូងនូវសៀវភៅចំនួនជាង ៥.០០០ក្បាល ស្ដីពីនយោបាយឈ្នះៗរបស់លោកនាយករដ្ឋមន្រ្តី ហ៊ុន សែន ដែលបានបញ្ចប់សង្គ្រាមស៊ីវិលជាង ៣ទសវត្សនៅកម្ពុជា។
សៀវភៅនេះគឺមានកម្រាស់ចំនួន ៥០០ទំព័រ ជាភាសាខ្មែរ និពន្ធដោយប្រធាននាយកដ្ឋាននយោបាយ និងកិច្ចការបរទេសនៃក្រសួងការពារជាតិ លោកឧត្ដមសេនីយ៍ឯក ណឹម សុវត្ថិ តាំងពីឆ្នាំ ២០០៣មក ក្រោមមូលនិធិពីលោកនាយករដ្ឋមន្រ្តី ហ៊ុន សែន។ លោកបានចែកសៀវភៅនេះដល់ដៃអ្នកកាសែតមុនគេដោយមិនយកកម្រៃ។
ប្រធាននាយកដ្ឋាននយោបាយ និងកិច្ចការបរទេសនៃក្រសួងការពារជាតិ លោកឧត្ដមសេនីយ៍ឯក ណឹម សុវត្ថិ បានមានប្រសាសន៍ប្រាប់អ្នកកាសែតថា សៀវភៅនេះលាតត្រដាងអំពីយុទ្ធសាស្ត្រដ៏ប៉ិនប្រសព្វ និងគំនិតស៊ីជម្រៅក្នុងបញ្ចប់សង្គ្រាមស៊ីវិលរបស់ក្រុមឧទ្ទាមខ្មែរក្រហមនៅកម្ពុជា៖ «ទិដ្ឋភាពដែលបានបង្ហាញនៅក្នុងនេះ គ្រាន់ជាកម្រិតមួយ កម្រិតចំហមួយដែលវិភាគជូន ហើយនៅជម្រៅនៃការអនុវត្ត គឺជ្រៅមែនទែន»។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ បានមានប្រសាសន៍ថា សៀវភៅនេះជាមេរៀនប្រវត្តិសាស្ត្រមួយដល់ក្មេងៗជំនាន់ក្រោយទៀត៖ «អាចរំលឹកនូវទំនាស់រវាងកម្ពុជា ជាមួយវៀតណាម និងឡាវផង ជម្លោះនឹងប្រទេសអាស៊ាន នៅពេលដែលមានចម្បាំង គឺពីឆ្នាំ១៩៧៩ ទៅដល់ឆ្នាំ១៩៩១»។
ទាក់ទងនឹងបញ្ហានេះដែរ សាស្ត្រាចារ្យវិទ្យាសាស្ត្រនយោបាយនៃសកលវិទ្យាល័យខេមរៈ លោកបណ្ឌិត សុខ ទូច បានមានប្រសាសន៍ថា កម្ពុជាមានសន្តិភាពពេញលេញហើយ៖ «និយាយពីការផ្ដួលរំលំរចនាសម្ព័ន្ធរបស់ខ្មែរក្រហម យើងទទួលបានជោគជ័យ។ ក៏ប៉ុន្តែអ្វីដែលទាក់ទងទៅលើបញ្ហាដោះស្រាយនៅក្នុងផ្ទៃក្នុងរបស់កម្ពុជា យើងនៅមានច្រើនសេសសល់។ ទី១ បញ្ហាទំនាស់ដីធ្លី នៅតែជាជំងឺដ៏ក្ដៅគគុក មិនរកដំណោះស្រាយបានជោគជ័យទេ»។
នយោបាយឈ្នះៗដើម្បីបញ្ចប់សង្គ្រាមស៊ីវិលរបស់ក្រុមឧទ្ទាមខ្មែរក្រហមនោះ ត្រូវបានផ្ដួចផ្ដើមដោយលោកនាយករដ្ឋមន្ត្រី ហ៊ុន សែន តាំងពីទសវត្សឆ្នាំ១៩៩០ មក ដោយសារតែសង្គ្រាមស៊ីវិលនៅតែបន្ត ក្រោយពីការបោះឆ្នោតសកលលើកដំបូងនៅឆ្នាំ១៩៩៣ រៀបចំដោយអ៊ុនតាក់ ប៉ុន្តែមិនបានបញ្ចប់ភ្លើងសង្គ្រាមនៅកម្ពុជា។
ចំណែកឯអ្នកអនុវត្តនយោបាយនេះ គឺមានមេបញ្ជាការនៃកងយោធពលខេមរភូមិន្ទកម្ពុជា ដូចជា រដ្ឋមន្ត្រីក្រសួងការពារជាតិ លោក ទៀ បាញ់ លោក ប៉ុល សារឿន លោក ព្រាប តាន់ និងបញ្ជាការយោធាមួយចំនួនទៀត។
នយោបាយនេះចាប់ផ្ដើមអនុវត្តនៅភ្នំឱរ៉ាល់ ខេត្តកំពង់ស្ពឺ នៅខេត្តប៉ៃលិន នៅស្រុកម៉ាឡៃ និងនៅស្រុកអន្លង់វែង នៅឆ្នាំ១៩៩៤ និងឆ្នាំ១៩៩៦ កន្លងមក រហូតដល់ភ្លើងសង្គ្រាមបានចប់ជាស្ថាពរនៅឆ្នាំ១៩៩៩ ក្រោយពីមានធ្វើសមាហរណកម្មនៃកងទ័ពខ្មែរក្រហម ជាមួយកងទ័ពរដ្ឋាភិបាល ប្រកបដោយជោគជ័យ៕