ពលរដ្ឋចោទមន្ត្រីនគរបាលចរាចរណ៍ថា ទទួលសំណូក
2010.04.18
សកម្មភាពនគរបាលចរាចរណ៍ចាប់ឃាត់ម៉ូតូដែលមិនដាក់កញ្ចក់ និងម្ចាស់មិនពាក់មួក នៅលើវិថីព្រះនរោត្តម នាថ្ងៃទី៥ សីហា ២០០៩។
បុរសម្នាក់ឈ្មោះ តោ សំអាត ជាប្រជាពលរដ្ឋរស់នៅសង្កាត់មនោរម្យ ខណ្ឌ៧មករា មានប្រសាសន៍ឲ្យវិទ្យុអាស៊ីសេរីដឹងនៅព្រឹកថ្ងៃទី១៨ ខែមេសាថា រូបគាត់ត្រូវបានរថយន្តបុកឲ្យរងរបួសជាទម្ងន់ កាលពីថ្ងៃទី០១ ខែមេសា នៅក្បែរផ្សារកណ្ដាល ក្រុងភ្នំពេញ នៅគ្រាដែលរូបគាត់កំពុងជិះម៉ូតូនៅតាមផ្លូវ។
ជនរងគ្រោះបន្តថា បច្ចុប្បន្ន ម៉ូតូរបស់គាត់ ត្រូវបានមន្ត្រីនគរបាលចរាចរណ៍ យកទៅរក្សាទុកនៅស្នងការដ្ឋាននគរបាលចរាចរណ៍ជើងគោក អស់ពេលជាងពីរសប្ដាហ៍មកហើយ ប៉ុន្តែរថយន្តបង្កគ្រោះថ្នាក់ មិនត្រូវបានមន្ត្រីនគរបាលឃាតទុក រងចាំធ្វើការដោះស្រាយ ជូនរូបគាត់ ជាអ្នករងរបួសធ្ងន់ និងខូចខាតម៉ូតូនោះទេ។
ពលរដ្ឋរូបនេះ បានចោទមន្ត្រីនគរបាលចរាចរណ៍កាន់សំណុំរឿងករណីគ្រោះថ្នាក់ចរាចរណ៍របស់ គាត់ថា បានទទួលសំណូកអ្វីមួយ ពីករណីគ្រោះថ្នាក់ចរាចរណ៍នេះ។
ជនរងគ្រោះធ្វើសំណូមពរដូច្នេះ ៖ «ចាំលេខឡានវា ដាក់ផ្លាកភ្នំពេញ ២ J៩៩៩៨ ពណ៌មាសប្រាក់។ នគរបាលចរាចរណ៍មកដល់អត់និយាយអីជាមួយខ្ញុំម្ចាស់ម៉ូតូផង មកដល់លើកម៉ូតូខ្ញុំ ដាក់ឡើងឡានទៅតែម្ដង។ រួមមិនដឹងនិយាយជាមួយឡានយ៉ាងម៉េច ខ្ញុំស្មានថា យកឡានទៅប៉ុស្តិ៍ វាអត់យកទៅប៉ុស្តិ៍ ហើយលែងឡានឲ្យទៅបាត់។ ខ្ញុំចង់សំណូមពរឲ្យអាស៊ីសេរីជួយស្រែក សួរឲ្យខ្ញុំថា មូលហេតុអី បុកម៉ូតូ បានជាមិនយកឡានចូល បែរជាយកតែម៉ូតូចូល។ រួចខុសត្រូវយ៉ាងម៉េច ត្រូវយកចូលទាំងពីរដោះស្រាយ សង្ស័យឡានហ្នឹងវាសិះសុះជាមួយ នគរបាលបានលុយ ហើយមិនយកឡានទៅ»។
មន្ត្រីនគរបាលកាន់សំណុំរឿងគ្រោះថ្នាក់ចរាចរណ៍ ដែលពលរដ្ឋចោទប្រកាន់ មានប្រសាសន៍ដោយស្នើមិនឲ្យវិទ្យុអាស៊ីសេរីបញ្ចេញឈ្មោះ ឲ្យដឹងថា ករណីគ្រោះថ្នាក់ចរាចរណ៍រវាងរថយន្ត និងម៉ូតូ ដែលមានជនរងគ្រោះឈ្មោះ តោ សំអាត រូបលោកនឹងរកដំណោះស្រាយជូនជនរងគ្រោះ ក្នុងពេលដ៏ឆាប់នាដើមសប្ដាហ៍ខាងមុខ នៅក្រោយពិធីបុណ្យចូលឆ្នាំបានបញ្ចប់។
មន្ត្រីនគរបាលចរាចរណ៍ មានប្រសាសន៍ថា ៖ «ឥឡូវចាបចូលឆ្នាំ ហើយពួកខ្ញុំខំព្យាយាមដែរ ចំពោះបញ្ហាហ្នឹង! ពួកខ្ញុំនឹងព្យាយាមតើបង!ខ្ញុំមិនដែលថា ទុកឲ្យនៅអ៊ីចឹងទេបងណា៎!»។
សាក្សីម្នាក់ មានមុខងារជាមន្ត្រីនគរបាលក្រសួងមហាផ្ទៃ ដែលបានដឹង ឮករណីគ្រោះថ្នាក់ចរាចរណ៍ បានស្ដីបន្ទោសចំពោះភាពមិនប្រក្រតី ដែលសមត្ថកិច្ចចរាចរណ៍ឃាត់តែម៉ូតូនៃភាគីម្ខាងទុក ប៉ុន្តែមិនឃាតរថយន្តរបស់ភាគីម្ខាងទៀតទុកដូចគ្នា ដើម្បីដោះស្រាយនោះឡើយហើយ ថា នេះជាករណីគួរឲ្យសង្ស័យមួយ រវាងម្ចាស់រថយន្តបង្កហេតុ និងមន្ត្រីនគរបាល ដែលកាន់សំណុំរឿងករណីគ្រោះថ្នាក់ចរាចរណ៍នេះ។
សាក្សីដដែលបន្តថា ករណីគ្រោះថ្នាក់ចរាចរណ៍នេះ ចង់មិនចង់ មន្ត្រីនគរបាលបានឃុបឃិតគ្នា ឲ្យសំណូកលុយកាក់ ជាថ្នូរមិនរក្សារថយន្តទុក ដើម្បីធ្វើការដោះស្រាយ ៖ «ខ្ញុំថា ខូចមកពីប៉ូលិសហ្នឹងតែម្ដង។ ខ្ញុំធ្វើប៉ូលិសដែរ ខ្ញុំដឹងថា ប៉ូលិសហ្នឹងខូចតែម្ដងមែនតើ! ខ្ញុំចេះតែឆ្ងល់ថា មិនទាន់ដោះស្រាយចង់ផងមូលហេតុអី ឲ្យឡានចេញ ហើយឃាត់ម៉ូតូទុក? ខ្ញុំឆ្ងល់កន្លែងហ្នឹង!»។
ទោះយ៉ាងនេះក្ដី ពលរដ្ឋដែលអះអាងថា ខ្លួនជាជនរងគ្រោះ បានធ្វើការអំពាវនាវដល់សមត្ថកិច្ចនគរបាលចរាចរណ៍គ្រប់ជំនាញ ត្រូវរក្សាវិជ្ជាជីវៈរបស់ខ្លួន ឲ្យបានត្រឹមត្រូវ និងស្នើកុំមើលឃើញប្រាក់ជាធំ ដើម្បីរក្សាមុខមាត់មន្ត្រីនគរបាលដែលស្អាតស្អំ។
ពេលបច្ចុប្បន្ននេះ មន្ត្រីនគរបាលចរាចរណ៍នៃប្រទេសកម្ពុជា ដែលបានឈរជើងតាមគោលដៅនានា នាទីក្រុងភ្នំពេញ ត្រូវបានសាធារណៈជន ចោទប្រកាន់ថា បានប្រើអំណាច តួនាទី របៀបផ្ដាច់ការ និងកំពុងប្រើសិទ្ធិអំណាច ដែលមានចែងក្នុងច្បាប់ ហួសដែនកំណត់ ជាពិសេសទាក់ទងការផាកពិន័យរថយន្ត ឬម៉ូតូ នៅតាមទីសាធារណៈ មានកាយវិការក្រអឺតក្រទម ប្រើពាក្យសំដីអសុរោះ និងដាក់ពង្រាយកម្លាំង មានសកម្មភាពបង្កការភ័យខ្លាចដល់ពលរដ្ឋធ្វើដំណើរឆ្លងកាត់៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ