សម​រង្ស៊ី​នឹង​មិន​ចូល​ស្រុក​បើ​ពលរដ្ឋ​២​នាក់​មិន​ត្រូវ​បាន​ដោះ​លែង

លោក សម រង្ស៊ី ប្រធាន​គណបក្ស​ប្រឆាំង​ថ្លែង​ថា លោក​នឹង​មិន​វិល​ត្រឡប់​ចូល​ប្រទេស​កម្ពុជា​វិញ​ទេ ដរាប​ណា​អ្នក​ស្រុក ២​នាក់​ដែល​ត្រូវ​តុលាការ​ខេត្ត​ស្វាយរៀង​កាត់​ទោស​ដាក់​គុក​មិន​ទាន់​បាន​ដោះ​លែង​តាម​ការ​ស្នើ​សុំ​របស់​លោក​ទេ​នោះ។
ដោយ ឡេង ម៉ាលី
2010.01.29
សម រង្ស៊ី ៣០៥ ២៨-មករា-២០១០: សន្និសីទ​តាម​រយៈ​វីដេអូ​របស់​លោក សម រង្ស៊ី ប្រធាន​គណបក្ស​សមរង្ស៊ី នា​ទីស្នាក់ការ​គណបក្ស ក្នុង​រាជធានី​ភ្នំពេញ
RFA/Leng Maly

ការ​ថ្លែង​របស់​លោក សម រង្ស៊ី បាន​ធ្វើ​ឡើង​តាម​រយៈ​សន្និសីទ​សារព័ត៌មាន​ពី​ប្រទេស​បារាំង​នៅ​ព្រឹក​ថ្ងៃ​ទី​២៨ ខែ​មករា ឆ្នាំ​២០១០​នេះ។

លោក សម រង្ស៊ី បាន​បញ្ជាក់​ថា ៖ «ខ្ញុំ​មិន​ទាន់​វិល​ត្រឡប់​ទៅ​ប្រទេស​កម្ពុជា​វិញ​ទេ។ ខ្ញុំ​សុំ​ឲ្យ​ដោះ​លែង​អ្នក​ដែល​ត្រូវ​ជាប់​គុក​នោះ លោក ព្រំ ជា ហើយ​អ្នក​ស្រី មាស ស្រី ដោះ​លែង​គាត់​សិន។ បើ​ខ្ញុំ​ចូល​ទៅ​គេ​ចាប់​ខ្ញុំ​ដែរ បើ​ជាប់​គុក​ទាំង​អស់​គ្នា​តើ​បាន​ប្រយោជន៍​អី? អ្នក​ណា​ជួយ​អ្នក​ណា​កើត! បើ​គេ​ចាប់​ដាក់​គុក​ទាំង​អស់​គ្នា។ តែ​ឥឡូវ​ខ្ញុំ​ថា ដោះ​លែង​ពួក​គាត់​សិន​ទៅ អ៊ីចឹង​ទៅ​បាន​ខ្ញុំ​ចូល​ទៅ​ឲ្យ​គេ​ចាប់!»

លោក សម រង្ស៊ី ត្រូវ​តុលាការ​ខេត្ត​ស្វាយរៀង​កាត់​ទោស​កំបាំង​មុខ​ដាក់​គុក​រយៈពេល ២​ឆ្នាំ និង​ពិន័យ​ជា​ប្រាក់ ៨​លាន​រៀល កាល​ពី​ថ្ងៃ​ទី​២៧ មករា​កន្លង​ទៅ ពី​បទ​ចោទ​ថា បាន​បំផ្លាញ​ទ្រព្យ​សម្បត្តិ​សាធារណៈ​និង​ញុះញង់​ឲ្យ​មាន​ការ​រើសអើង​ពូជ​សាសន៍។ ការ​កាត់​ទោស​នេះ​ដោយសារ​តែ​លោក សម រង្ស៊ី ជាមួយ​នឹង​ប្រជាពលរដ្ឋ​នៅ​ខេត្ត​ស្វាយ​រៀង​មួយចំនួន​ទៀត បាន​ដក​បង្គោល​តម្រុយ​ព្រំដែន​លេខ​១៨៥ រវាង​ប្រទេស​កម្ពុជា​និងវៀតណាម កាល​ពី​ខែ​តុលា ឆ្នាំ​២០០៩។

នៅ​ក្នុង​សន្និសីទ​សារព័ត៌មាន​នា​ព្រឹក​ថ្ងៃ​ទី​២៨ ខែ​មករា លោក សម រង្ស៊ី ថ្លែង​ថា បង្គោល​តម្រុយ​ព្រំដែន​លេខ​១៨៤, ១៨៥, ១៨៦ និង ១៨៧ សុទ្ធ​តែ​ជា​បង្គោល​រំលោភ​ចូល​ទឹក​ដី​ខ្មែរ​ពី​សំណាក់​ប្រទេស​វៀតណាម ដោយ​សំអាង​លើ​ការ​វាស់វែង​របស់​លោក។ លោក​គ្រោង​នឹង​ប្រើ​ឯកសារ​ពី​ការ​វាស់វែង​នេះ​ជា​ភស្តុតាង​សម្រាប់​ប្តឹង​ទៅ​សហគមន៍​អន្តរជាតិ​និង​អង្គការ​សហ​ប្រជាជាតិ។

ឆ្លើយ​តប​នឹង​បញ្ហា​នេះ លោក​ទេស​រដ្ឋមន្រ្តី​ទទួល​បន្ទុក​បេសកកម្ម​ពិសេស និង​ជា​ប្រធាន​គណៈកម្មាធិការ​ចម្រុះ​កិច្ចការ​ព្រំដែន​កម្ពុជា គឺ​លោក វ៉ា គឹមហុង មាន​ប្រសាសន៍​ថា ៖ «ប្រើ​ឯកសារ​ក្លែង​បន្លំ រួច​មក​ចោទ​គណៈកម្មការ​ព្រំដែន​ថា បោះ​ត្រង់​នេះ ត្រង់​នោះ! អា​ហ្នឹង​ជា​ការ​មិន​ពិត! ដោយ​ចេតនា​ឬ​អចេតនា ខ្ញុំ​មិន​ដឹង​ទេ​ក្នុង​ការ​គាត់​ចុច​ទីតាំង​បង្គោល​ទាំង​៤ នៅ​លើ​ផែនទី​ដែល​វា​ជា​ផែនទី​ត្រឹមត្រូវ។ ខ្សែ​ព្រំដែន​គិត​ថា​វា​ត្រឹមត្រូវ​ចុះ ប៉ុន្តែ​ថា អ្វី​ដែល​គាត់​ចុច​លើ​ទីតាំង​នៅ​លើ​ផែនទី​ហ្នឹង​វា​ខុស! គាត់​ចុច​ខុស​ដោយ​ចេតនា ឬ​ក៏​គាត់​ចុច​ខុស​ដោយ​អចេតនា ដោយ​គាត់​ល្ងង់​ខ្លៅ បើ​គាត់​ល្ងង់​ខ្លៅ​ទេ គួរ​សិក្សា​រៀន​សូត្រ​ពី​អ្នក​ចេះ​ដឹង សួរ​ខាង​គណៈកម្មការ​ព្រំដែន​ទៅ កុំ​ពឹង​បរទេស​ដែល​មិន​ដឹង​កិច្ចការ​ហ្នឹង​ឲ្យ​ច្បាស់លាស់!»

ទាក់ទង​នឹង​រឿង​ក្តី​របស់​លោក លោក សម រង្ស៊ី មាន​ប្រសាសន៍​ថា លោក​នឹង​មិន​រវល់​ជាមួយ​នឹង​តុលាការ​ខេត្ត​ស្វាយរៀង​ទេ ដោយ​លោក​ចាត់ទុក​ថា​ជា​តុលាការ​លេង​សើច។

ចំពោះ​ការ​កាត់​ទោស​ឲ្យ​លោក​ជាប់​គុក ២​ឆ្នាំ ជាមួយ​នឹង​កសិករ ២​រូប​ទៀត លោក សម រង្ស៊ី ថ្លែង​ថា មិន​មែន​ជា​រឿង​ធំដុំ​ទេ រឿង​កាត់​ដី​ឲ្យ​បរទេស​គឺ​ជា​រឿង​ធំដុំ។ លោក​បន្ត​ថា បង្គោល​តម្រុយ​ព្រំដែន​នោះ​ជា​បង្គោល​ខុស​ច្បាប់ និង​បង្គោល​ឈ្លានពាន​ទឹក​ដី​ខ្មែរ។ លោក​ថា ពលរដ្ឋ​ខ្មែរ​មាន​សិទ្ធិ​ដក​ចេញ បើ​គ្មាន​ការ​អនុញ្ញាត​ពី​ម្ចាស់​ដី។

លោក វ៉ា គឹមហុង មាន​ប្រសាសន៍​ផ្តាំ​ទៅ​លោក សម រង្ស៊ី ថា ការ​ប្រើប្រាស់​ឯកសារ​ដែល​លោក​បង្កើត​ឡើង​បន្លំ​មតិ​មហា​ជន​អាច​នឹង​ត្រូវ​ចោទ​ប្រកាន់​ផ្សេង​ទៀត ហើយ​ស្នើ​ឲ្យ​លោក សម រង្ស៊ី ទុក​ចិត្ត​គណៈកម្មាធិការ​ព្រំដែន​ជាតិ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។