ជនភៀសខ្លួន Rohingya នៅកម្ពុជាខ្វះស្បៀង
2010.06.21
ជនភៀសខ្លួនរូហ៊ីងយ៉ា (Rohingya) ដែលប្រឈមនឹងការកាត់ទោសពីបទឆ្លងដែនខុសច្បាប់ចូលប្រទេសថៃ កាលពីខែមករា ឆ្នាំ២០០៩
ជនជាតិភាគតិចកាន់សាសនាឥស្លាម រូហ៊ីងយ៉ា នៃប្រទេសភូមា ចំនួន ៣២នាក់ កំពុងស្វែងរកសិទ្ធិជ្រកកោននៅប្រទេសកម្ពុជា បន្ទាប់ពីពួកគេមកដល់កាលពីខែមករាកន្លងទៅនេះ។
ជនជាតិភាគតិចរូហ៊ីងយ៉ា ទាំង៣២នាក់នេះ កំពុងជួបវិបត្តិខ្វះស្បៀងអាហារនៅភ្នំពេញ ខណៈពេលដែលពួកគេកំពុងរងការសម្រេចចិត្តរបស់រដ្ឋាភិបាលកម្ពុជា ពីការផ្ដល់សិទ្ធិជ្រកកោននេះ។
អង្គសិទ្ធិមនុស្សអន្តរជាតិ Amnesty International បានរកឃើញថា ជនជាតិភាគតិចរូហ៊ីងយ៉ារបស់ភូមា រស់នៅខេត្តរាក់ខិន ភាគខាងលិចរបស់ភូមា បានទទួលរងការរំលោភសិទ្ធិមនុស្សពីអាជ្ញាធរភូមា ហើយសិទ្ធិសេរីភាពរបស់ពួកគេ ត្រូវបានរឹតត្បិត និងភាគច្រើនមិនត្រូវបានផ្ដល់សញ្ជាតិភូមា។
លោកស្រី គ្រីសស្ទីនា ផ្លានាស (Christina Planas) ទីប្រឹក្សាអង្គការសហប្រជាជាតិទទួលបន្ទុកជនភៀសខ្លួន បានមានប្រសាសន៍នៅថ្ងៃច័ន្ទ ទី២១ ខែមិថុនាថា ជនភៀសខ្លួនត្រូវបានសម្ភាសន៍ដោយរដ្ឋាភិបាលរួចហើយ។ អង្គការសហប្រជាជាតិទទួលបន្ទុកជនភៀសខ្លួន បានជួយសម្រួលការសម្ភាសន៍របស់ពួកគេ។លោកស្រីថា អង្គការសហប្រជាជាតិនឹងផ្ដល់ជំនួយទៅដល់ពួកគេ ប្រសិនបើគេមានតម្រូវការចាំបាច់។
សារព័ត៌មានកាលាដាន ផ្សាយកាលពីថ្ងៃច័ន្ទ ទី៧ ខែមិថុនានេះថា ជនជាតិភាគតិចរូហ៊ីងយ៉ារបស់ភូមាចំនួន៣២នាក់ កំពុងជួបវិបត្តិខ្វះស្បៀងអាហារនៅភ្នំពេញ ខណៈពេលដែលពួកគេកំពុងរង់ចាំការសម្រេចចិត្តរបស់រដ្ឋាភិបាលកម្ពុជា ពីការផ្ដល់សិទ្ធិជ្រកកោននេះ។
សារព័ត៌មានដដែលនេះបានសម្ភាសន៍ជនភៀសខ្លួនម្នាក់ ឈ្មោះ Mohamad Tayub ថាប្រសិនបើគ្មានជំនួយម្ហូបអាហារទេ ពួកគេនឹងស្លាប់។ ពួកគេកំពុងស្នាក់នៅខណ្ឌឫស្សីកែវទាំង៣២នាក់។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍នៅថ្ងៃច័ន្ទ ទី២១ ខែមិថុនានេះថា លោកមិនបានដឹងថា ជនភៀសខ្លួនទាំងនោះ កំពុងស្នាក់នៅប្រទេសកម្ពុជាទេ។ លោកបន្ថែមថា ប្រសិនបើមានការសុំសិទ្ធិជ្រកកោនមែននោះ រដ្ឋាភិបាលនឹងពិនិត្យមើលសំណើនេះ។
សហរដ្ឋអាមេរិក បានសម្រេចចិត្តផ្អាកជំនួយយោធាមកដល់កម្ពុជា ដើម្បីសម្ដែងការជំទាស់ទៅនឹងរដ្ឋាភិបាលកម្ពុជា ដែលបានចាប់បញ្ជូនដោយបង្ខំនូវជនជាតិភាគតិចចិន អ៊ុយហ្គរ៍ (Uighur) ប្រមាណ ២០នាក់ កាលពីចុងខែធ្នូ ឆ្នាំ២០០៩ កន្លងទៅ ប្រគល់ឲ្យប្រទេសចិនវិញ នៅគ្រាដែលជនជាតិភាគតិចចិនទាំងនោះ កំពុងតែសុំសិទ្ធិជ្រកកោនផ្នែកនយោបាយពីអង្គការ UNHCR ក្នុងប្រទេសកម្ពុជា៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ