មន្ត្រីរដ្ឋាភិបាលខ្មែរថ្លែងថា អង្គការអន្តរជាតិបានរួមចំណែកច្រើនដល់ការស្ថាបនាប្រទេសកម្ពុជាឡើងវិញ ហើយកម្ពុជា ពិតជាត្រូវការការចូលរួមពីស្ថាប័នអង្គការអន្តរជាតិទាំងនោះបន្ថែមទៀត ដើម្បីជំរុញល្បឿនអភិវឌ្ឍប្រទេសកម្ពុជា តទៅមុខទៀត។
លោក កុយ គួង ជាអនុរដ្ឋលេខាធិការក្រសួងការបរទេសនិងសហប្រតិបត្តិការអន្តរជាតិ និងជាមន្ត្រីនាំពាក្យរបស់ក្រសួងផង ថ្លែងថា អង្គការអន្តរជាតិមួយចំនួនមានវត្តមាននៅប្រទេសកម្ពុជា និងបានធ្វើការដើម្បីជួយពលរដ្ឋខ្មែរចាប់តាំងពីឆ្នាំ ១៩៧៩ មកម្ល៉េះ។
លោក កុយ គួង បានថ្លែងដូច្នេះ ៖ «តាំងពី ១៩៧៩ ដោយផ្ដោតទៅលើកម្មវិធីផ្ដល់ជំនួយមនុស្សធម៌ ជំនួយសង្រ្គោះបន្ទាន់ដល់ជនភៀសខ្លួន និងជនរងគ្រោះដោយសាររបបខ្មែរក្រហម»។
មន្ត្រីរដ្ឋាភិបាលបានឲ្យដឹងថា អង្គការអន្តរជាតិដែលចង់បំពេញការងារនៅក្នុងប្រទេសកម្ពុជា គឺតម្រូវឲ្យចុះបញ្ជីនៅក្រសួងការបរទេសនិងសហប្រតិបត្តិការអន្តរជាតិ ហើយអង្គការក្រៅរដ្ឋាភិបាលក្នុងស្រុក គឺតម្រូវឲ្យចុះបញ្ជីនៅក្រសួងមហាផ្ទៃ។
លោក កុយ គួង ថ្លែងឲ្យដឹងថា បច្ចុប្បន្នមានអង្គការអន្តរជាតិចំនួន ៤៥២ស្ថាប័ន បានចុះបញ្ជីនៅក្រសួង។ ជាមួយគ្នានេះ នៅកម្ពុជា មានអង្គការក្រៅរដ្ឋាភិបាលក្នុងស្រុកជាង ២.០០០ស្ថាប័នទៀត ដែលបានចុះបញ្ជីនៅក្រសួងមហាផ្ទៃ ដើម្បីអាចបំពេញការងាររបស់ខ្លួននៅក្នុងប្រទេសកម្ពុជា។ នេះបើតាមការគូសបញ្ជាក់ពីលោកឧត្តមសេនីយ៍ឯក ខៀវ សុភ័គ ជាអគ្គលេខាធិការក្រសួងមហាផ្ទៃ និងជាមន្ត្រីអ្នកនាំពាក្យក្រសួងផងនោះ។
លោក កុយ គួង ថ្លែងបន្តទៀតថា ដោយមើលឃើញថា កម្ពុជាធ្លាប់ជាប្រទេសមួយដែលរងគ្រោះដោយសារសង្គ្រាម ហើយធនធានមនុស្សត្រូវបាត់បង់នាអំឡុងរបបខ្មែរក្រហមនោះ អង្គការអន្តរជាតិភាគច្រើនបានធ្វើការងាររបស់ខ្លួនដោយផ្តោតជាសំខាន់លើវិស័យសុខុមាលភាពសង្គម។
លោក កុយ គួង បានថ្លែងបន្តដូច្នេះ ៖ «សុខុមាលភាពសង្គមនេះ គឺផ្ដោតទៅលើសង្គមកិច្ច សុខាភិបាល អប់រំ បរិស្ថាន កសិកម្ម អភិវឌ្ឍជនបទ និងការបណ្ដុះបណ្ដាលវិជ្ជាជីវៈផ្សេងៗទៀត។ ចំណុចទី២ គឺការងារពង្រឹងនីតិរដ្ឋ និងអភិបាលកិច្ចល្អ។ ចំណុចនេះមានន័យថា អង្គការមិនមែនរដ្ឋាភិបាលអន្តរជាតិ គឺគេបានផ្ដោតទៅលើការផ្ដល់សេវាពិគ្រោះយោបល់ផ្នែកច្បាប់ ការបណ្ដុះបណ្ដាលផ្នែកច្បាប់ ការកសាងសមត្ថភាពរបស់មន្រ្តីអនុវត្តច្បាប់ របស់រាជរដ្ឋាភិបាល និងសង្គមស៊ីវិល និងការពង្រឹងនយោបាយវិមជ្ឈការ ខេត្ត ស្រុក ខណ្ឌ ។ល។ និង ។ល។»។
ចំណែកឯលោកឧត្តមសេនីយ៍ឯក ខៀវ សុភ័គ ក៏បានថ្លែងទទួលស្គាល់ដែរថា អង្គការអន្តរជាតិគឺពិតជាបានរួមចំណែកយ៉ាងសំខាន់ដល់ការអភិវឌ្ឍកម្ពុជា ទោះការជួយនោះលើវិស័យណាក៏ដោយ ៖ «ប្រទេសយើងទើបតែនឹងរួចផុតពីសង្រ្គាម រួចផុតពីរបបប្រល័យពូជសាសន៍ បើសិនជាពុំមានដៃគូអភិវឌ្ឍន៍ទេ ក៏យើងមិនអាចទទួលបាននូវលទ្ធផលដូចបច្ចុប្បន្នហ្នឹងដែរ វាអាចតិចជាងហ្នឹង អ៊ីចឹងវាជាការរួមចំណែករបស់ដៃគូអភិវឌ្ឍន៍យើងដែរ។ ហើយបណ្ដាប្រទេសផ្សេងៗគាត់ធ្វើការផ្ដល់ថវិកាតាមរយៈភ្នាក់ងារអភវិឌ្ឍន៍ហ្នឹង ដូចជា UNDP, SIDA ដូចជា DFID ដូចជាអង្គការច្រើនផ្សេងៗទៀត»។
លោកឧត្តមសេនីយ៍ឯក ខៀវ សុភ័គ ថ្លែងបន្តថា កម្ពុជាក៏នៅត្រូវការការចូលរួមពីអង្គការអន្តរជាតិទាំងនោះតទៅទៀតនៅឡើយ ៖ «មិនចាំបាច់តែប្រទេសកំពុងអភិវឌ្ឍន៍ទេ សូម្បីតែប្រទេសដែលកំពុងអភិវឌ្ឍន៍ហើយហ្នឹង ក៏ត្រូវការកិច្ចប្រតិបត្តិការអន្តរជាតិហ្នឹងដែរ ដូច្នេះខ្ញុំយល់យើងត្រូវការគ្នាតែរហូតហ្នឹងនៅក្នុងសកលភាវូបនីយកម្មនេះ។ យើងត្រូវការគ្នា ពឹងផ្អែកគ្នាទៅវិញទៅមក មិនអាចប្រទេសណាមួយធ្វើកិច្ចការងារអ្វីតែឯងបានទេ»។
របាយការណ៍របស់រដ្ឋាភិបាលខ្មែរបានបង្ហាញថា នៅប្រទេសកម្ពុជា មានពលរដ្ឋប្រមាណ ៨០% ធ្វើកសិកម្ម ហើយកម្ពុជា ក៏នៅមានពលរដ្ឋចំនួន ៣០% កំពុងរស់នៅក្រោមបន្ទាត់នៃភាពក្រីក្រនៅឡើយ ។
រហូតមកទល់បច្ចុប្បន្ន កម្ពុជាក៏នៅត្រូវការជំនួយឧបត្ថម្ភពីដៃគូអភិវឌ្ឍន៍អន្តរជាតិ ក្នុងទឹកប្រាក់រវាងពី ៦០០លានដុល្លារ ទៅ ១.០០០លានដុល្លារអាមេរិកក្នុងមួយឆ្នាំ ដើម្បីបំពេញបន្ថែមសម្រាប់ចំណាយក្នុងខ្ទង់ថវិកាជាតិ។
តំណាងរាស្ត្រមួយរូបនៃគណបក្សសមរង្ស៊ី ដែលជាបក្សប្រឆាំងធំមួយក្នុងរដ្ឋសភាជាតិ បានថ្លែងទទួលស្គាល់អំពីតួនាទីនៃអង្គការអន្តរជាតិទាំងនោះ ថាបានរួមចំណែកលើកកម្ពស់ជីវភាពពលរដ្ឋខ្មែរ និងបានជួយស្តារប្រទេសកម្ពុជា។ ក៏ប៉ុន្តែតំណាងរាស្ត្រគណបក្សសមរង្ស៊ី គឺលោក សុន ឆ័យ ថ្លែងថា ជំនួយអន្តរជាតិមួយ ចំនួនមិនបានដល់ដៃពលរដ្ឋដែលត្រូវការពិតប្រាកដនៅឡើយទេ ហើយដែលទាមទារឲ្យអង្គការអន្តរជាតិទាំងឡាយដែលកំពុងជួយកម្ពុជា ត្រូវពិនិត្យមើលឡើងវិញអំពីប្រសិទ្ធភាពនៃថវិកាជំនួយរបស់ខ្លួន។
លោកតំណាងរាស្ត្រ សុន ឆ័យ ថ្លែងបន្តថា ក្រៅពីការជួយផ្នែកវិស័យសុខភាព និងការអភិវឌ្ឍជនបទ មានវិស័យសំខាន់ពីរទៀតដែលស្ថាប័នអង្គការអន្តរជាតិទាំងឡាយត្រូវតែរួមចំណែកធ្វើឲ្យប្រសើរឡើង គឺជំរុញការកែទម្រង់វិស័យអភិបាលកិច្ចល្អ និងអភិវឌ្ឍវិស័យអប់រំ។
លោក សុន ឆ័យ មានប្រសាសន៍ដូច្នេះ ៖ «ទី១ ត្រូវពង្រឹងស្ថាប័នជាតិហ្នឹងឲ្យវារឹងមាំឡើង ដូចជាសភា ដូចជាខាងរដ្ឋបាលអីៗហ្នឹង...។ មួយទៀត គឺគេយកលុយនោះមួយចំនួនគេធ្វើខ្លួនគេ បើគេធ្វើបានគឺជួយលើវិស័យអប់រំ និងហ្វឹកហ្វឺនចំណេះដឹងបច្ចេកទេស ដើម្បីជួយឲ្យពលរដ្ឋមានលទ្ធភាពបង្កើតផលិតផលខ្លួនឯង ដូចយើងថា ស៊ូឲ្យសន្ទូចកុំឲ្យត្រី។ ដល់ពលរដ្ឋមានចំណេះ មានជំនាញ អាចរកជីវភាពបានទៅ វាឈប់រំពឹងអំណោយអីពីពួកអ្នកផ្ដាច់ការហ្នឹង គឺសង្គមផ្លាស់ខ្លួនវា»។
ទាក់ទិនការជំរុញការកែទម្រង់វិស័យអភិបាលកិច្ចល្អនៅកម្ពុជា លោកតំណាងរាស្ត្រ សុន ឆ័យ ថ្លែងថា បើគ្មានអភិបាលកិច្ចល្អទេ ការអភិវឌ្ឍនឹងត្រូវរាំងស្ទះ ហើយពលរដ្ឋខ្មែរនឹងនៅជាចំណាប់ខ្មាំងនៃភាពក្រីក្របន្តទៀត។
លោក សុន ឆ័យ បានថ្លែងបន្តដូច្នេះ ៖ «សភាយើងលេងសុទ្ធតែបក្សទាំងអស់ហើយ បក្សប្រឆាំងអត់មានសិទ្ធិនិយាយស្ដី សួរនាំហ្នឹង Check and balance គឺវាចប់ពីហ្នឹងទៅ Corruption វាក្រោយទេ កាលណាតែយើងមានគេហៅថា System of government។ វាអត់ System យើងមិនដឹងជាយកក្បួនអីមកគ្រប់គ្រងប្រទេស អត់ដឹងទាំងអស់តែម្ដង វាស្រេចតែនឹងបុគ្គលចាត់ចែងបក្សពួក ហើយសភាអត់ហ៊ានសួររដ្ឋាភិបាល នាយករដ្ឋមន្រ្តីមិនដែលមកឆ្លើយនៅសភា រួចរដ្ឋមន្រ្តីនីមួយៗនៅក្រាញរាប់សិបឆ្នាំទៅ ហ្នឹងហើយបានវាដោះស្រាយ Poverty អត់កើត»។
មន្ត្រីក្រសួងការបរទេសខ្មែរបានឲ្យដឹងថា រហូតមកទល់ពេលនេះ គឺមានអង្គការចំនួន ១០ ក្នុងចំណោមអង្គការអន្តរជាតិចំនួន ៤៥២ ដែលបានបង្កើតកម្មវិធីការងាររបស់ខ្លួន ទាក់ទងនឹងវិស័យអភិបាលកិច្ចល្អនេះ ហើយគេក៏មិនអាចដឹងអំពីចំនួនថវិកាសរុប ដែលអង្គការអន្តរជាតិទាំងអស់បានជួយសម្រាប់ការអភិវឌ្ឍប្រទេសកម្ពុជានោះទេ។
លោកតំណាងរាស្ត្រ សុន ឆ័យ ថ្លែងបន្ថែមថា អង្គការអន្តរជាតិទាំងឡាយក៏គួរសហការធ្វើការងារជាមួយផ្នែកឯកជនផងដែរ ដើម្បីធានាប្រសិទ្ធភាពនៃប្រាក់ជំនួយ និងជំរុញល្បឿននៃការអភិវឌ្ឍកម្ពុជា៕