ប្រជាពលរដ្ឋតវ៉ានឹងគម្រោងធ្វើសួនច្បារនៅច្រាំងទន្លេសាប
2010.08.29
ក្រុមប្រជាពលរដ្ឋប្រមាណជាជិត២០០០គ្រួសារ រស់នៅសង្កាត់ទួលសង្កែ និងសង្កាត់ឫស្សីកែវ ខណ្ឌឫស្សីកែវ នៅថ្ងៃអាទិត្យ ទី២៩ ខែសីហា បាននាំគ្នាប្រមូលស្នាមដៃ ដើម្បីដាក់ញត្តិទៅលោកនាយករដ្ឋមន្ត្រី ហ៊ុន សែន ដើម្បីសុំកម្មសិទ្ធិរស់នៅស្របច្បាប់កាន់កាប់ដីធ្លី និងផ្ទះសម្បែងពួកគាត់ បន្ទាប់ពីពួកគាត់បានទទួលសេចក្ដីជូនដំណឹងពីសាលាខណ្ឌឫស្សីកែវ ដែលបានដាក់ឱសានវាទឲ្យរុះរើលំនៅឋានក្នុងរយៈពេល១០ថ្ងៃនោះ។
ប្រជាពលរដ្ឋរស់នៅភូមិឃ្លាំងសាំង និងសង្កាត់ឫស្សីកែវ លោក ហួត បានីន បានថ្លែងថា ប្រជាពលរដ្ឋក្នុងភូមិរបស់លោកបាននាំគ្នាផ្ដិតស្នាមមេដៃ ដើម្បីដាក់ញត្តិទៅលោកនាយករដ្ឋមន្ត្រី ហ៊ុន សែន និងស្ថាប័នពាក់ព័ន្ធនានាមួយចំនួនទៀត ពីបញ្ហាផ្ទះសម្បែង ដែលសាលាខណ្ឌឫស្សីកែវតម្រូវឲ្យរុះរើ ដើម្បីស្ថាបនាសួនច្បារសាធារណៈនៅតាមបណ្ដោយច្រាំងទន្លេសាប។
នៅក្នុងសេចក្ដីជូនដំណឹងរបស់សាលាខណ្ឌឫស្សីកែវ ស្ដីពីគម្រោងស្ថាបនាសួនច្បារសាធារណៈនៅតាមបណ្ដោយច្រាំងទន្លេសាប ពីគល់ស្ពានជ្រោយចង្វាដល់មុខឃ្លាំងប្រេងឥន្ធនៈសូគីម៉ិចឫស្សីកែវ ចុះថ្ងៃទី២៣ ខែសីហា បានជូនដំណឹងដល់ម្ចាស់រោងចក្រ សហគ្រាស សិប្បកម្ម អាជីវកម្មដែលមានទីតាំងតាមបណ្ដោយផ្លូវជាតិលេខ៥ ក្នុងភូមិផ្សារតូច សង្កាត់ទួលសង្កែ ភូមិសាមគ្គី ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ សាលារាជធានីបានតំរូវឲ្យធ្វើការរុះរើចេញរយៈពេល១០ថ្ងៃ។
ប្រជាពលរដ្ឋម្នាក់ ឈ្មោះ វុទ្ធី ដែលផ្ទះរបស់គាត់ប៉ះពាល់ដែរនោះ បានបន្ទោសថា អាជ្ញាធរខណ្ឌ និងរាជធានីមិនដែលបានពិគ្រោះជាមួយប្រជាពលរដ្ឋឡើយពីបញ្ហានេះ ហើយបែរជាមានសេចក្ដីជូនដំណឹងឲ្យប្រជាពលរដ្ឋរុះរើសំណង់យ៉ាងតក់ក្រហល់យ៉ាងនេះទៅវិញ។
ទាក់ទងទៅនឹងសេចក្ដីជូនដំណឹងនេះ អភិបាលរងខណ្ឌឫស្សីកែវ លោក កូប ស្លេះ បានបដិសេធមិនធ្វើអត្ថាធិប្បាយឡើយ ហើយលោកបានបង្វែរសំណួរនេះទៅឲ្យខាងកំពង់ផែស្វយ័តក្រុងភ្នំពេញវិញ។
មន្ត្រីកំពង់ផែស្វយ័តក្រុងភ្នំពេញម្នាក់ បានឲ្យដឹងថា បញ្ហានេះជាសមត្ថកិច្ចរបស់សាលារាជធានីភ្នំពេញ ដែលយោងតាមសេចក្ដីជូនដំណឹងរបស់ទីស្ដីការគណៈរដ្ឋមន្ត្រី ឆ្នាំ២០០៨ ដែលថា តំបន់ប្រជាពលរដ្ឋរស់នៅនោះ ជាតំបន់គ្រោះថ្នាក់ ដោយសារបាក់ច្រាំងទន្លេជារៀងរាល់ឆ្នាំ។
នាយខុទ្ទកាល័យសាលារាជធានីភ្នំពេញ លោក នួន សុមេធ ដែលទទួលបន្ទុកកិច្ចការនេះ បានបដិសេធមិនផ្ដល់សម្ភាសន៍ឡើយ។
ប្រភពពីប្រជាពលរដ្ឋឲ្យដឹងថា ពួកគេគ្រោងយកញត្តិ និងស្នាមមេដៃនៅក្នុងសប្ដាហ៍នេះ ដាក់ទៅលោកនាយករដ្ឋមន្ត្រី ហ៊ុន សែន និងស្ថាប័នពាក់ព័ន្ធមួយចំនួនទៀត សុំសិទ្ធិរស់នៅស្របច្បាប់៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ