មនុស្ស២៥នាក់ស្លាប់ក្នុងប្រតិបត្តិការបង្ក្រាបក្រុមបាតុករនៅក្រុងបាងកក
2010.05.16
អ្នកយកព័ត៌មានរបស់វិទ្យុអាស៊ីសេរីប្រចាំការនៅប្រទេសថៃ រាយការណ៍ឲ្យដឹងថា ការចុះបង្ក្រាបខ្លាំងធ្វើឡើងតាំងពីយប់ថ្ងៃទី១៣ ខែឧសភា ឆ្នាំ២០១០នេះមក បណ្ដាលឲ្យមានមនុស្សស្លាប់ និងរបួស ក្នុងនោះរបួសអ្នកសារព័ត៌មាន ៥នាក់។ កងសន្តិសុខថៃត្រូវបានគេប៉ាន់ប្រមាណថា អាចមានដល់ ៥០០នាក់បង្កប់ខ្លួនក្នុងក្រុមបាតុករអាវក្រហម ដើម្បីតាមចាប់បាតុករចំនួន ៤០នាក់។ បាតុករទាំង ៤០នាក់នោះ ត្រូវបានចាប់បញ្ជូនទៅឲ្យក្រុមប៉ូលិស តែក្រុមប៉ូលិសទាំងនោះជានិច្ចកាលមាននិន្នាការគាំទ្រក្រុមបាតុករអាវក្រហម។
ស្ថានភាពចុងក្រោយកាលពីថ្ងៃសៅរ៍ គឺក្រុមបាតុករអាវក្រហមទាំងនោះដែលប្រឆាំងនឹងរដ្ឋាភិបាលថៃ មានការខឹងសម្បានឹងបណ្ដាញសារព័ត៌មានជាច្រើន នៅពេលដែលបាតុករចាត់ទុកថា ពួកអ្នកសារព័ត៌មានលម្អៀងទៅខាងរដ្ឋាភិបាលថៃ។ អ្នកសារព័ត៌មានជាច្រើនបានដូរទីតាំងតាមយកព័ត៌មាន ដែលនៅពីក្រោយទីឈរជើងរបស់ក្រុមបាតុករ ប្ដូរទៅកាន់មន្ទីរពេទ្យយោធា។ ឃើញដូច្នោះមេដឹកនាំបាតុករបានស្នើឲ្យក្រុមអ្នកសារព័ត៌មានវិលត្រឡប់មកកន្លែងដើមវិញ ដោយគេជឿថា អាជ្ញាធរថៃនឹងមិនបង្ក្រាបពួកគេទេ បើក្រុមអ្នកសារព័ត៌មាននៅក្បែរនោះ។ គឺក្រុមបាតុករចង់យកអ្នកសារព័ត៌មានធ្វើជារនាំងជួយការពារ។
ក្រុមអង្គការឃ្លាំមើលសិទ្ធិមនុស្សនៅប្រទេសថៃមើលឃើញថា ការប្រើកម្លាំងអាវុធរបស់អាជ្ញាធរថៃលើក្រុមបាតុករអាវក្រហម ជាការសមហេតុសមផលខ្លះដែរ ក្នុងគ្រាដែលបាតុករថៃទាំងនោះចាប់ផ្ដើមអំពើហិង្សា។ ក៏ប៉ុន្តែថា ការប្រើមធ្យោបាយហិង្សាបង្ក្រាបបណ្ដាលឲ្យមានមនុស្សស្លាប់ដូច្នោះ គឺគេពុំអាចទទួលយកបានទេ។ តែនាយករដ្ឋមន្ត្រីថៃ លោក អាភីស៊ិត វេតឆាឈីវ៉ាក់ មានប្រសាសន៍កាលពីយប់ថ្ងៃសៅរ៍ថា បាតុករអាវក្រហមខ្លះបានញុះញង់ស្ថានការណ៍ចង់ឲ្យកើតជាសង្គ្រាមស៊ីវិល៕