មេដឹកនាំថៃ៖ ការរំលាយក្រុមបាតុករអាវក្រហមជាដំណោះស្រាយប្រសើរ
2010.05.16
ព័ត៌មានពីភ្នាក់ងារវិទ្យុអាស៊ីសេរីនៅទីក្រុងបាងកកបានរាយការណ៍នៅរសៀលថ្ងៃអាទិត្យ ទី១៦ ឧសភានេះ ថា មជ្ឈមណ្ឌលសម្រាប់ដោះស្រាយស្ថានភាពអាសន្នបានប្រកាសថា មជ្ឈមណ្ឌលនឹងបញ្ជូនក្រុមចរចាមួយចំនួនដែលមានប៉ូលិស និងអង្គការក្រៅរដ្ឋាភិបាល ទៅបញ្ចុះបញ្ចូលក្រុមបាតុករអាវក្រហម ជាពិសេសស្ត្រី និងកុមារ ឲ្យត្រឡប់ទៅផ្ទះសម្បែងវិញ ឲ្យបានមុនម៉ោង ៣រសៀល នៅថ្ងៃច័ន្ទ ទី១៧។
អតីតភរិយារបស់អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ ដែលត្រូវទម្លាក់ពីអំណាច បានចាកចេញពីប្រទេស ហើយកូនៗរបស់លោកក៏នឹងចាកចេញដែរ។
លោកឧត្ដមសេនីយ៍ ឆាវ៉ាលីត យុងឆៃយុទ្ធ អតីតទីប្រឹក្សាគណបក្សប្រឆាំងឈ្មោះ ភឿថៃ បានចាកចេញទៅប្រទេសចិន។
លោកនាយករដ្ឋមន្ត្រីថៃ អាភីស៊ិត វេតឆាឈីវ៉ាក់ បានថ្លែងក្នុងសន្និសីទសារព័ត៌មានមួយ កាលពីថ្ងៃទី១៥ ឧសភា ថា ការសម្រេចចិត្តរបស់រដ្ឋាភិបាលពេលនេះ គឺជាចម្លើយត្រឹមត្រូវទៅនឹងអ្វីដែលបានកើតឡើងក្នុងសង្គម។ ការរំលាយក្រុមអាវក្រហមជាមួយនឹងការគ្រោះថ្នាក់តិចតួច គឺជាដំណោះស្រាយប្រសើរបំផុត ដើម្បីធានាសន្តិសុខ និងភាពត្រឹមត្រូវយូរអង្វែង។ នៅពេលណាចប់ក្រុមបាតុករអាវក្រហម ទំនាស់ទាំងអស់ក៏ត្រូវចប់ដូចដែលបានគូសវាសក្នុងផែនទីត្រីវិស័យ ដែលលោកបានស្នើឡើង។ ពេលនេះការរំលាយក្រុមអាវក្រហម គឺជាដំណោះស្រាយប្រសើរបំផុតសម្រាប់ប្រទេស និងប្រជាជន៕