មន្រ្តីបក្សសមរង្ស៊ីព្រមានអាជ្ញាធរនៅស្វាយរៀងកុំឲ្យគំរាមសកម្មជន
2010.01.20
១៩-មករា-១០: តំណាងរាស្រ្ដគណបក្សសមរង្ស៊ី ចុះសួរសុខទុក្ខក្រុមគ្រួសារលោកស្រី មាស់ ស្រី និងលោក ព្រំ ជា ដែលជាប់ឃុំនៅក្នុងពន្ធនាគារខេត្តស្វាយរៀង។
គេបានឃើញមានអាជ្ញាធរមូលដ្ឋាន មានដូចជានគរបាលចរាចរណ៍ កងរាជអាវុធហត្ថនិងកម្លាំងប៉ូលិសស្លៀកពាក់ស៊ីវិលជាច្រើននាក់ បានឈរនិងតាមដានសកម្មភាពរបស់ក្រុមតំណាងរាស្រ្តគណបក្សប្រឆាំងសមរង្ស៊ីដែលបានចុះទៅភូមិកោះក្បានកណ្តាល ឃុំសំរោង ស្រុកចន្រ្ទា ខេត្តស្វាយរៀង កាលពីថៃ្ង១៩ មករានេះ។
ក្រុមតំណាងរាស្រ្តនៃគណបក្សប្រឆាំងសមរង្ស៊ី រាប់ទាំងលោក អេង ឆៃអ៊ាង ផងដែរនោះ បានព្រមាននិងបណ្តេញភ្នាក់ងារស៊ើបការសម្ងាត់ដែលកំពុងតាមដានស្តាប់ការសួរសុខទុក្ខនៅផ្ទះរបស់គ្រួសាររបស់លោកស្រី មាស ស្រី ដូច្នេះថា ៖ «យ៉ាងហោចណាស់ក៏យើងប្រាប់អត្តសញ្ញាណថា ខ្ញុំមកពីខាងនេះ ខាងនោះ គេមិនដែលមកធ្វើអ៊ីចឹងទេ សម័យឥឡូវគឺជាសម័យសេរី ប្រជាធិបតេយ្យពហុបក្ស អ៊ីចឹងហើយមនុស្សម្នាក់ៗគេមានសេរីភាពក្នុងក្របខណ្ឌនៃច្បាប់។ ឃើញខេត្តស្វាយរៀងនេះមួយ អាជ្ញាធរហាក់បីដូចជាប្រើរបៀបមួយដើម្បីបំភិតបំភ័យប្រជាពលរដ្ឋ។ លោកប៉ូលិសប្រាប់ទៅថា ខ្ញុំ អេង ឆៃអ៊ាង តំណាងរាស្រ្ដគណបក្សសមរង្ស៊ី ខ្ញុំសំណូមពរសូមឲ្យអាជ្ញាធរគួរណែនាំទៅមន្រ្តីរាជការទាំងអស់ដែលស៊ីប្រាក់ខែប្រជាពលរដ្ឋ ប្រាក់ខែរបស់រាស្រ្ដហ្នឹង គួរធ្វើការងារឬសកម្មភាពបម្រើប្រជាពលរដ្ឋ ជាជាងការបង្ហាញនូវភាពភ័យខ្លាច ខ្ញុំសំណូមពរអ៊ីចឹង»។
មេប៉ុស្តិ៍នគរបាលរដ្ឋបាលផ្នែកសន្តិសុខនៅក្នុងឃុំសំរោង ស្រុកចន្រ្ទា ខេត្តស្វាយរៀង គឺលោក ម៉ៅ ទ្បាញ់ ដែលកំពុងតែឈរតាមដានមើលសកម្មភាពយ៉ាងម៉ត់ចត់ បានមានប្រសាសន៍ប្រាប់វិទ្យុអាស៊ីសេរីនៅទីនោះថា ៖ «ខ្លាចមានបញ្ហាអីខ្ញុំរាយការណ៍ទៅថ្នាក់ដឹកនាំរបស់ខ្ញុំ ខ្លាចមានបញ្ហា ចង់ឲ្យសន្តិសុខបានល្អ អត់រញ៉េរញ៉ៃទេ ដើម្បីឲ្យរដ្ឋអំណាចគេដឹងច្បាស់ កុំឲ្យមានអសន្តិសុខ»។
ជំទប់ទី២នៃឃុំសំរោង ស្រុកចន្រ្ទា ខេត្តស្វាយរៀង លោក ពៅ ភាព ដែលបានទៅតាមដាននោះផងដែរបានមានប្រសាសន៍ថា ៖ «តាមទស្សនៈរបស់ខ្ញុំថា ជារឿងល្អ ដើម្បីផ្ដល់កម្លាំងចិត្តឲ្យគាត់ ជារឿងត្រឹមត្រូវណាស់ ដើម្បីយើងបានមកសួរសុខទុក្ខដល់ផ្ទះសម្បែងរបស់គាត់»។
ភរិយារបស់លោក ព្រំ ជា លោកស្រី ឈឿង សារិន បានថែ្លងថា លោកស្រីត្រូវគេលើកទឹកចិត្តដោយសារការមកសួរសុខទុក្ខនេះ។
លោកស្រី ឈឿង សារិន បានឲ្យដឹងដូច្នេះ ៖ «អរគុណចំពោះគាត់ដែលជួយផ្ដល់កម្លាំងចិត្តឲ្យខ្ញុំ»។
ការមកសួរសុខទុក្ខរបស់ក្រុមតំណាងរាស្រ្តនៃគណបក្សប្រឆាំងសមរង្ស៊ីចំនួន២៥រូបនោះ បានធ្វើទ្បើងក្រោយពីបានសួរសុខទុក្ខលោកស្រី មាស ស្រី និងលោក ព្រំ ជា នៅក្នុងគុកខេត្តស្វាយរៀង កាលពីថ្ងៃ១៩ មករានេះ។ ក្រោយមកទៀត ក្រុមតំណាងរាស្រ្តដដែលនោះបានទៅពិនិត្យមើលបង្គោលតម្រុយព្រំដែនលេខ១៨៥ ដែលប្រភពបានអះអាងថា ភាគីវៀតណាមបានដឹកថ្មនិងខ្សាច់គ្រោងចាក់គ្រឹះនាពេលឆាប់ៗនេះនៅលើដីស្រែរបស់លោក ព្រំ ជា នោះ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ