វិធានការណ៍នេះត្រូវបានអនុវត្តន៍នៅឆ្នាំ២០១១ កន្លងទៅនេះ និងបន្តនៅឆ្នាំ២០១២ នេះទៀត និង នៅឆ្នាំក្រោយៗទៀត ដោយសារមានវិបត្តិនៅប្រទេសអ៊ីរ៉ង់ និងមជ្ឈិមបូព៌ា ដែលជាប្រទេសផលិត ប្រេង កំពុងជះឥទ្ធិពលអាក្រក់មកដល់ប្រទេសកម្ពុជាដែរ។
វិបត្តិទាំងនោះ គឺសហរដ្ឋអាមេរិក ចក្រភពអង់គ្លេស ប្រទេសបារាំង ប្រទេសជប៉ុន និងប្រទេសមួយចំនួនទៀត កំពុងតែឈប់ទិញប្រេងឥន្ធនៈ ពីប្រទេសអ៊ីរ៉ង់ នៅឆ្នាំ២០១១ និងឆ្នាំក្រោយៗទៀត ដើម្បីដាក់ទណ្ឌកម្មសេដ្ឋកិច្ចលើប្រទេសអ៊ីរ៉ង់នេះ ឲ្យឈប់បន្តកម្មវិធីផលិតអាវុធនុយក្លេអ៊ែរ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក គាត ឈន់ និងជាឧបនាយករដ្ឋមន្ត្រី បានមានប្រសាសន៍ប្រាប់អ្នកកាសែត នៅក្រសួងពាណិជ្ជកម្ម នៅថ្ងៃទី១២ ខែមីនា ឆ្នាំ២០១២ ថា បញ្ហាប្រេងនេះ គឺមិនមែនមានតែប្រទេសកម្ពុជាមួយទេ ដែលរងឥទ្ធិពល។ វាជាបាតុភូតមួយនៅលើឆាកអន្តរជាតិ ធ្វើឲ្យប្រទេសទាំងអស់សុទ្ធតែរងគ្រោះ ៖ «ហើយខំទប់ណាស់រាល់ថ្ងៃបានបានដូចថា លំនឹងប៉ុណ្ណឹងដែរ។ យើងខិតខំសន្សំសំចៃវិញ...សំចៃហើយបង្វែរឲ្យបានជាអតិបរមាការប្រើប្រាស់ប្រេងឥន្ធនៈ សម្រាប់កសិកម្ម ...ដើម្បីអ្វី ?...ដើម្បីថា មួយលីត្រ នៃប្រេងឥន្ធនៈ ដែលយើងនាំចូលមក …ប្រើប្រាស់ខាងសេដ្ឋកិច្ចឲ្យបានកាន់តែច្រើន បង្កើនផលិតភាពរបស់យើងឲ្យបានកាន់តែខ្ពស់ ហើយនិងបង្កើននូវការប្រកួតប្រជែងរបស់យើងឲ្យបានកាន់តែខ្លាំង»។
កសិករឈ្មោះ ខៀវ ដារ៉ារស្មី អាយុ ៣៧ឆ្នាំ នៅស្រុកភ្នំក្រវ៉ាញ ខេត្តពោធិ៍សាត់ ដែលប្រកបមុខរបរដាំដំឡូងមី និងធ្វើស្រែបាននិយាយថា លោកកំពុងតែព្រួយបារម្ភយ៉ាងខ្លាំងនៅពេលនេះ ដោយសារប្រេងឥន្ធនៈឡើងថ្លៃខ្ពស់។ លោកតែងតែប្រើប្រាស់ម៉ាស៊ីនគោយន្ត ដើម្បីភ្ជួររាស់ និង ដឹកជញ្ជូនផលិតផលកសិកម្ម ៖ «សំណូមពរឲ្យខាងរដ្ឋាភិបាលយើងសព្វថ្ងៃហ្នឹង ...ធ្វើយ៉ាងណាឲ្យប្រេងម៉ាស៊ូតហ្នឹងបានចុះថ្លៃបន្តិចទៅ ...ដើម្បីឲ្យកម្មករ និងកសិករយើងងាយក្នុងការរកទទួលទានណាបង ...ពីព្រោះសព្វថ្ងៃហ្នឹង ប្រេងសាំងកាន់តែឡើងទៅៗ ...ប្រេងម៉ាស៊ូត ប្រេងឡាន ...ថ្លៃឡានអីហ្នឹង កាន់តែថ្លៃទៅៗ ...អីចឹងធ្វើឲ្យប្រជាពលរដ្ឋ កាន់តែលំបាក កាន់តែខ្លាំងឡើងៗ»។
តំណាងរាស្ត្រ គណបក្សសម រង្ស៊ី លោក សុន ឆ័យ បានមានប្រសាសន៍ប្រតិកម្មថា ហេតុផលនៃការឧបត្ថម្ភទុនដោយស្ងាត់ៗ ដើម្បីធ្វើឲ្យតម្លៃប្រេងសាំងនៅឋិតថេរនោះ គឺលោកមិនអាចទទួលយក បានទេ ដោយសារគ្មានតម្លាភាព ៖ «រាជរដ្ឋាភិបាលត្រូវតែបន្ថយការយកពន្ធថែមទៀត ឲ្យតិចជាងហ្នឹងទៅទៀត ។ ការយកពន្ធកាន់តែតិច ...មិនមែនមានន័យថា រដ្ឋាភិបាលបាត់ចំណូលទេរដ្ឋាភិបាល នៅតែបានចំណូលដដែលទេ ...ក៏ប៉ុន្តែកុំឲ្យពលរដ្ឋយើងវេទនាខ្លាំងពេក ...ឲ្យសេដ្ឋកិច្ចយើងមានលទ្ធភាព ប្រកួតប្រជែងនិងប្រទេសជិតខាង។ ហើយកាត់បន្ថយនូវការរត់ពន្ធផង»។
គេបានសង្កេតឃើញថា តម្លៃប្រេងសាំងប្រភេទស៊ុបពែរ (Super) នាពេលបច្ចុប្បន្ននេះ គឺ ៥៨៥០រៀល ក្នុងមួយលីត្រ។ តម្លៃប្រេងសាំងប្រភេទធម្មតា (Regular) គឺ ៥៥៥០រៀលក្នុងមួយលីត្រ និង តម្លៃប្រេងម៉ាស៊ូត (Diesel) គឺ ៥២៥០រៀលក្នុងមួយលីត្រ ប្រៀបធៀបនិងឆ្នាំមុន គឺមានតម្លៃជាង ៤០០០រៀលក្នុងមួយលីត្រ។
តាមការបញ្ជាក់ពីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក គាត ឈន់ បានឲ្យដឹងថា ប្រទេសកម្ពុជា ត្រូវការនាំចូលប្រេងឥន្ធនៈពីបរទេសចំនួនជាង ១លានតោនក្នុងមួយឆ្នាំៗ ដើម្បីផ្គត់ផ្គង់តម្រូវការប្រើប្រាស់នៅប្រទេសកម្ពុជា៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។