អត្រាអ្នកកើតជំងឺរបេងនៅកម្ពុជាថយចុះ
2010.07.31
មន្រ្តីក្រសួងសុខាភិបាលផ្នែកកម្ចាត់រោគរបេង បានឱ្យដឹងថា អត្រាកើតជំងឺរបេងនៅក្នុងប្រទេសកម្ពុជា បានថយចុះគួរឱ្យកត់សំគាល់ នៅក្នុងរយៈពេលប៉ុន្មានឆ្នាំចុងក្រោយនេះ។
ព័ត៌មាននេះ ត្រូវបានថ្លែងឡើងដោយប្រធានមជ្ឈមណ្ឌលជាតិកម្ចាត់រោគរបេង និងហង់សិនកម្ពុជា គឺលោកវេជ្ជបណ្ឌិត ម៉ៅ តាន់អ៊ាង ក្នុងអំលុងពេលប្រកាសបើកសិក្ខាសាលាស្ដីពីការចាប់ផ្ដើមស្រាវជ្រាវអត្រាប្រេវ៉ាឡង់ជំងឺរបេងលើកទី២របស់ខ្លួន នៅថ្ងៃសុក្រ ទី៣០ កក្កដា ឆ្នាំ២០១០។ លោកវេជ្ជបណ្ឌិត ម៉ៅ តាន់អ៊ាង បានឱ្យដឹងថា ចំនួនករណីជំងឺរបេងបានថយចុះប្រមាណជិត៣០០ករណី ក្នុងចំណោមពលរដ្ឋមួយសែននាក់ នៅចន្លោះពីឆ្នាំ១៩៩០ មកដល់ឆ្នាំ២០០៧ ៖ «អត្រាប្រេវ៉ាឡង់នៃជំងឺរបេងគ្រប់សណ្ឋាន បានធ្លាក់ចុះពីកម្រិត ៩២៨ ក្នុងចំណោមប្រជាជន១សែននាក់ នៅឆ្នាំ១៩៩០ បានធ្លាក់មកនៅចំនួន៦៦៥ ករណីក្នុងចំណោមប្រជាជន១សែននាក់ នៅឆ្នាំ២០០៧»។
លោកបន្តទៀតថា នៅក្នុងផែនការប្រយុទ្ធនឹងជំងឺរបេង ៥ឆ្នាំបន្ត មជ្ឈមណ្ឌលជាតិកម្ចាត់រោគរបេង និងហង់សិនប្រទេសកម្ពុជា សង្ឃឹមថានឹងអាចឃើញចំនួនករណីជំងឺរបេងថយចុះ២០០ករណីបន្ថែមទៀត គឺមកនៅត្រឹម ៤៦៤នាក់ ក្នុងចំណោមពលរដ្ឋ១សែននាក់ តាមរយៈការស្រាវជ្រាវរបស់ខ្លួនលើអត្រាកើតជំងឺរបេង ក្នុងប្រទេសកម្ពុជា នៅឆ្នាំ២០១៥។
នាយកកម្មវិធីអង្គការក្រៅរដ្ឋាភិបាលជួយប្រយុទ្ធនឹងជំងឺរបេង ហៅកាត់ថា TBCAP លោកស្រីវេជ្ជបណ្ឌិត Jamhoih Tonsin ថ្លែងថា ប្រទេសកម្ពុជា ជាប្រទេសដែលមានបន្ទុកជំងឺរបេងខ្ពស់មួយ ក្នុងចំណោមប្រទេសចំនួន២២ ដែលមានបន្ទុកជំងឺរបេងខ្ពស់បំផុតក្នុងពិភពលោក។ លោកស្រីវេជ្ជបណ្ឌិតមានប្រសាសន៍ថា ដើម្បីវាយតម្លៃអំពីការព្យាបាលជំងឺរបេងកន្លងមក និងដើម្បីឱ្យសម្រេចទិសដៅកាត់បន្ថយចំនួនករណីឆ្លងរបេងនៅឆ្នាំ២០១៥ ឱ្យនៅត្រឹមពាក់កណ្ដាលនៃចំនួនករណីកាលពីឆ្នាំ១៩៩០ ប្រទេសកម្ពុជា គឺចាំបាច់ត្រូវពឹងផ្អែកព័ត៌មាន ពីការស្រាវជ្រាវអត្រាកើតជំងឺរបេងលើកទី២របស់ខ្លួន។
ក្រោមការឧបត្ថម្ភគាំទ្រដោយទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ហៅកាត់ថា JICA មជ្ឈមណ្ឌលជាតិកម្ចាត់រោគរបេង និងហង់សិនប្រទេសកម្ពុជា គ្រោងនឹងធ្វើការស្រាវជ្រាវអត្រាកើតជំងឺរបេងលើកទី២ របស់ខ្លួន ចំនួន៧ខែ ដោយចាប់ផ្ដើមនៅចុងឆ្នាំ២០១០ និងដើមឆ្នាំ២០១១ ខាងមុខនេះ។
លោកវេជ្ជបណ្ឌិត ម៉ៅ តាន់អ៊ាង មានប្រសាសន៍ថា នៅប្រទេសកម្ពុជាបច្ចុប្បន្ន សេវាប្រយុទ្ធនឹងជំងឺរបេងមាននៅគ្រប់មណ្ឌលសុខភាព និងមន្ទីរពេទ្យបង្អែកប្រមាណមួយពាន់កន្លែង ហើយការព្យាបាលវិញ ត្រូវក្រសួងសុខាភិបាលផ្ដល់ជូនពលរដ្ឋដោយឥតគិតថ្លៃ៕