អាជ្ញាធរខ្មែរថៃជំរុញល្បឿនបោះបង្គោលព្រំដែនដើម្បីបើកច្រកថ្មី
2010.05.28
ក្មេងស្រីអូសរទេះផ្លែឈើខណៈម្ដាយរុញពីក្រោយ ចេញពីទឹកដីថៃតាមច្រកជាំស្រងាំ ក្នុងស្រុកអន្លង់វែង ខែត្រឧត្ដរមានជ័យ។
អាជ្ញាធរខេត្តបន្ទាយមានជ័យ និងខេត្តស្រះកែវថៃ បានជំរុញឲ្យគណៈកម្មាធិការព្រំដែនថ្នាក់ជាតិខ្មែរ-ថៃ ចុះធ្វើការកំណត់បង្គោលព្រំសីមា តាមបណ្ដោយព្រំដែន ខ្មែរ-ថៃ ឲ្យបានឆាប់ ដើម្បីឈានទៅដល់ការបើកច្រកទ្វារតំបន់ព្រំដែនថ្មីមួយ នៅចុងឆ្នាំ២០១០ នេះ ដើម្បីសម្រួលដល់ការឆ្លងកាត់ព្រំដែនរបស់ប្រជាជាតិ នៃប្រទេសទាំងពីរ (កម្ពុជា-ថៃ)។
មន្ត្រីនាំពាក្យសាលាខេត្តបន្ទាយមានជ័យ លោក អ៊ុក កែវរតន: បានមានប្រសាសន៍ នៅថ្ងៃសុក្រ ទី២៨ ខែឧសភាថា អាជ្ញាធរខ្មែរ-ថៃ នៃខេត្តទាំងពីរ មានសុឆន្ទៈដូចគ្នា ក្នុងការជំរុញឲ្យមានការបើកច្រកតំបន់ព្រំដែន ត្រង់ចំណុចបង្គោលព្រំដែនលេខ៤៣ ជាប់ខេត្តបន្ទាយមានជ័យ និង ខេត្តស្រះកែវថៃ ឲ្យបានឆាប់។
លោកមានប្រសាសន៍បន្តថា ៖ «ក្នុងភាគីខេត្តទាំងពីរ គាត់ចង់បានលឿនដូចគ្នា ឯកឧត្ដមអភិបាលខេត្តស្រះកែវ គាត់ថា គាត់ឯកភាព គាត់ចង់ ព្រោះរឿងហ្នឹងអូសបន្លាយពេលយូរហើយ ដូច្នេះគាត់ចង់បានការងារ និងឲ្យបានឆាប់ ក៏ប៉ុន្តែដោយឧបសគ្គសភាពការប្រទេសគាត់ក៏ដូចជាថ្នាក់លើរបស់គាត់ ទាមទារឲ្យគណៈកម្មការព្រំដែនថ្នាក់ជាតិទាំងសងខាង ទាំងពីរប្រទេស និងកំណត់ព្រំសីមាឲ្យបានច្បាស់លាស់»។
ប្រធានគណៈកម្មាធិការជាតិព្រំដែនរដ្ឋាភិបាលខ្មែរ លោក វ៉ា គឹមហុង មិនទាន់អាចទាក់ទងសុំការបញ្ជាក់ជុំវិញការទាមទារឲ្យមានការកំណត់បង្គោលសីមា រវាងកម្ពុជាថៃ ឲ្យបានច្បាស់លាស់ខាងលើនេះទេ។ ចំណែកឯភាគីថៃ ក៏មិនអាចទាក់ទងសុំការបញ្ជាក់បានដែរ។
ប៉ុន្តែអភិបាលខេត្តបន្ទាយមានជ័យ លោក អ៊ុង អឿន ដែលបានដឹកនាំគណៈប្រតិភូខ្មែរ ជួបប្រជុំជាមួយអាជ្ញាធរខេត្តស្រះកែវថៃ កាលពីថ្ងៃពុធ ទី២៦ ខែឧសភា បានមានប្រសាសន៍ថា ការបើកច្រកតំបន់ព្រំដែន ខាងលើនេះ ស្ថិតនៅក្នុងការគិតគូររបស់អាជ្ញាធរខេត្ត ហើយការឈូសឆាយអាចចាប់ផ្ដើមឡើងនារដូវប្រាំងចុងឆ្នាំ២០១០
លោកបន្តថា ៖ «យើងមិនទាន់សម្រេចទេ យើងត្រូវសុំទៅរដ្ឋាភិបាលសិន យើងពិភាក្សាគ្នា ទាល់តែរដូវប្រាំង បានធ្វើ ឥឡូវរដូវភ្លៀង ប្របិចៗ»។
មេឃុំអូរបីជាន់ លោក សុង មឿន បានមានប្រសាសន៍ថា ការបើកច្រកតំបន់ព្រំដែនខាងលើនេះ គឺអាចជួយសម្រួលការដោះដូរកសិផល រវាងប្រទេសទាំងពីរ និងអាចជួយប្រជាពលរដ្ឋឲ្យមានការងារធ្វើច្រើនថែមទៀត។
លោកមានប្រសាសន៍បន្តថា ៖ «ប្រសិនបើកច្រកហ្នឹងចេញមក ប្រជាពលរដ្ឋគាត់មានការងារធ្វើច្រើន ខ្ញុំជឿថា វាអាចនឹងមានជីវភាពធូរធារ មិនតែប៉ុណ្ណោះ ប្រជាពលរដ្ឋក្រៅឃុំក្រៅស្រុក និងរួមយ៉ាងច្រើនកុះករ ក្នុងការប្រកបមុខរបរនៅកន្លែងនេះ ផលប្រយោជន៍ផ្ដល់ច្រើនណាស់ ខ្ញុំរៀបរាប់វាមិនអស់»។
ច្រកតំបន់ព្រំដែន ដែលគ្រោងបើកថ្មីនេះ គឺមានទីតាំងស្ថិតនៅចំណុចបង្គោលព្រំដែន៤៣ ក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ (កម្ពុជា) ទល់មុខភូមិណូនម៉ាក់មុន អនុស្រុកគោកសួង ខេត្តស្រះកែវ ប្រទេសថៃ។ រដ្ឋាភិបាលខ្មែរ និងរដ្ឋាភិបាលថៃ កាលពីខែសីហា ឆ្នាំ២០០៩ កន្លងទៅ ក៏បានចេញសេចក្ដីថ្លែងការណ៍រួមគ្នា នៅក្នុងកិច្ចប្រជុំមួយ នៅទីក្រុងបាងកក ប្រទេសថៃ ដោយយល់ព្រមឲ្យមានការបើកច្រកតំបន់ខាងលើនេះបន្ថែមទៀត ក្នុងចំណោមច្រកតំបន់ និងច្រកអន្តរជាតិជាច្រើនទៀត រវាងព្រំដែនប្រទេសកម្ពុជា និងប្រទេសថៃ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ