មន្ត្រីទូតថៃទៅជួបជនជាតិថៃ២នាក់ ដែលកំពុងជាប់ពន្ធនាគារខេត្តព្រះវិហារ
2011.06.06
ទីប្រឹក្សាអមស្ថានទូតថៃប្រចាំប្រទេសកម្ពុជាមួយរូប បានឱ្យដឹងថា គេទើបតែបានធ្វើដំណើរទៅកាន់ខេត្តព្រះវិហារ ដើម្បីជួបសាកសួរសុខទុក្ខបុរសជនជាតិថៃ ២ នាក់ ដែលកំពុងជាប់ឃុំនៅក្នុងពន្ធនាគារខេត្តនោះ បន្ទាប់ពីតុលាការបានចោទប្រកាន់ជនទាំងពីរពីបទធ្វើអន្តោប្រវេសន៍ខុសច្បាប់ចូលមកក្នុងទឹកដីខ្មែរ និងប្រើប្រាស់អាវុធខុសច្បាប់ផង។ តុលាការបានសម្រេចឱ្យឃុំខ្លួនជនជាតិថៃទាំង ២ ជាបណ្ដោះអាសន្នក្នុងពន្ធនាគារតាំងតែពីអំឡុងខែមិថុនាឆ្នាំ ២០១០ មក។
លោក សរ៉ាចាក់ ប៉ូរ៉ាណៈសំរីទ្ធ មានប្រសាសន៍នៅព្រឹកថ្ងៃចន្ទទី ៦ ខែមិថុនាថា លោកបានជួបបុរសជនជាតិថៃទាំង ២ នាក់នោះ ហើយសុខភាពរបស់គេ គឺល្អប្រសើរ។ ប៉ុន្តែ ដំណើររបស់លោកទៅជួបពួកគេ បានត្រឹមតែសាកសួរសុខទុក្ខប៉ុណ្ណោះ គឺមិនមានធ្វើអន្តរាគមន៍ណាមួយជួយឱ្យរួចផុតពីការចោទប្រកាន់បានទេ។
លោក សរ៉ាចាក់ ប៉ូរ៉ាណៈសំរីទ្ធ ៖ «យើងគោរពច្បាប់ទាំងអស់របស់ប្រទេសកម្ពុជា។ ប៉ុន្តែ យើងត្រូវការបញ្ជាក់ឱ្យបានច្បាស់លាស់ទៅលើបុរសជនជាតិថៃ ២ នាក់ ដែលកំពុងជាប់ពន្ធនាគារខេត្តព្រះវិហារនោះថា គ្រាន់តែជាប្រជាពលរដ្ឋធម្មតា ដែលបានឆ្លងដែនខុសច្បាប់ជាមួយកាំភ្លើងបាញ់សត្វ និងសម្ភារៈមួយចំនួនទៀតប៉ុណ្ណោះ។ ប៉ុន្តែ ពួកគេត្រូវបានទទួលរងការចោទប្រកាន់ធ្ងន់ធ្ងរ។ យើងចង់បានការយោគយល់ពីរដ្ឋាភិបាល និងពីតុលាការផងដែរនៅក្នុងរឿងនេះ»។
លោក ហុង គឹមជី ប្រធានពន្ធនាគារខេត្តព្រះវិហារ មានប្រសាសន៍ថា ជាលើកទី ២ ហើយដែលគេបានឃើញមន្ត្រីស្ថានទូតថៃ បានចូលទៅសួរសុខទុក្ខបុរសជនជាតិថៃ ២ នាក់ ដែលកំពុងជាប់ឃុំនោះ ៖ «គេយកមី យកអីមកឱ្យជនជាតិថៃ២នាក់ហ្នឹង។ អត់មានសំណូមពរអីទេ។ គេគ្រាន់តែសួរសុខទុក្ខ ហើយគេត្រឡប់ទៅវិញ»។
បុរសជនជាតិថៃ ២ នាក់ ម្នាក់ឈ្មោះ ថងដែង ណាក់ឡា អាយុ ៥០ ឆ្នាំ និងម្នាក់ទៀតឈ្មោះ ហ៊ីង អះណា អាយុ ៤០ ឆ្នាំ ជាអ្នកស្រុកណាមឃុន ខេត្តអ៊ូប៊ុនរ៉ាតថានីរបស់ថៃ ត្រូវបានទាហានខ្មែរចាប់ខ្លួន កាលពីវេលាថ្ងៃត្រង់ថ្ងៃទី ៣១ ខែឧសភា ឆ្នាំ ២០១០ កន្លងទៅ នៅភាគខាងលិចច្រកអានសេះនៃស្រុកជាំក្សាន្ត ខេត្តព្រះវិហារ ក្នុងពេលដែលជនទាំងពីរបានលបលួចចូលក្នុងព្រំដែនខ្មែរប្រដាប់ដោយអាវុធម៉ាក ការ៉ាប៊ីន (Carabine) ចំនួន ២ ដើម និងមានគ្រាប់គីប ដែលអាចបង្កឱ្យផ្ទុះគ្រោះថ្នាក់ចំនួន ១៥០ គ្រាប់ជាប់ខ្លួនផង។
កាលពីថ្ងៃទី ៦ ខែមិថុនាឆ្នាំ ២០១០ មន្ត្រីតុលាការខេត្តព្រះវិហារ បានចោទប្រកាន់បុរសជនជាតិថៃទាំង ២ នាក់ ពីបទធ្វើអន្តោប្រវេសន៍ខុសច្បាប់ចូលមកក្នុងទឹកដីខ្មែរ និងបានប្រើប្រាស់អាវុធខុសច្បាប់ផង។ តុលាការបានសម្រេចឱ្យឃុំខ្លួនអ្នកទាំងពីរនោះជាបណ្ដោះអាសន្នក្នុងពន្ធនាគារ។
តួលេខត្រួសៗ បានឱ្យដឹងថា ចាប់តាំងពីអំឡុងខែមិថុនាឆ្នាំ ២០១០ រហូតដល់ខែមិថុនាឆ្នាំ ២០១១ នេះ យ៉ាងហោចណាស់មានបុរសជនជាតិថៃចំនួន ៥ នាក់ហើយ ត្រូវកងការពារព្រំដែនខ្មែរនៃខេត្តឧត្តរមានជ័យ និងខេត្តព្រះវិហារ ចាប់ខ្លួនបញ្ជូនទៅតុលាការពីបទឆ្លងដែនចូលក្នុងទឹកដីខ្មែរខុសច្បាប់៕