បណ្ដុះបណ្ដាលមគ្គទេសក៍ទេសចរណ៍កម្រិតខ្ពស់នៅសៀមរាប
2010.07.24
ទេសចរបរទេសដើរនៅក្នុងបរិវេណប្រាសាទបាពួន ក្នុងខែត្រសៀមរាប កាលពីថ្ងៃ៣ តុលា ២០០៩។
មន្ត្រីជាន់ខ្ពស់របស់ក្រសួងទេសចរណ៍នៃប្រទេសកម្ពុជា បានចុះហត្ថលេខាលើពិធីសារព្រមព្រៀងលើកដំបូង កាលពីព្រឹកថ្ងៃទី២៣ ខែកក្កដា ជាមួយសាលាបង្រៀនផ្នែកសណ្ឋាគារ និងទេសចរណ៍ឯកជននៅខេត្តសៀមរាប (ប៉ូលឌុយប៊្រូល) ដែលនាយកសាលាជាជនជាតិបារាំង ដោយឲ្យសាលានោះទទួលបណ្ដុះបណ្ដាលជំនាញខាងមគ្គុទ្ទេសក៍ទេសចរណ៍ លំដាប់កម្រិតខ្ពស់ក្នុងការសាកល្បងរយៈពេល២ឆ្នាំ ដើម្បីយកធនធានមនុស្ស និងជំនាញសម្រាប់បម្រើការលើវិស័យសេវាកម្មទេសចរណ៍ខ្មែរ។
លោក ថោង ខុន រដ្ឋមន្ត្រីក្រសួងទេសចរណ៍នៃប្រទេសកម្ពុជា ដែលបានអញ្ជើញចូលរួមជាសាក្សីនៃការចុះហត្ថលេខាលើពិធីសារព្រមព្រៀង រវាងមន្ត្រីរបស់លោក និងសាលាឯកជនបណ្ដុះបណ្ដាលជំនាញសណ្ឋាគារ និងទេសចរណ៍នោះ បានមានប្រសាសន៍កាលពីព្រឹកថ្ងៃសុក្រ ទី២៣ ខែកក្កដាថា ប្រទេសកម្ពុជា គឺមានតំបន់ទេសចរណ៍ជាច្រើន ដែលកំពុងត្រូវការទាក់ទាញភ្ញៀវទេសចរណ៍បរទេស ឲ្យចូលមកបន្ថែមទៀត ដែលកម្ពុជាត្រូវការផលិតសមត្ថភាព, ធនធានមនុស្សលើជំនាញទេសចរណ៍ជាច្រើនផ្នែក ក្នុងការបម្រើផ្នែកឧស្សាហកម្មទេសចរណ៍នៅក្នុងស្រុក និងឲ្យមានការទទួលស្គាល់កម្រិតពីប្រទេសនៅក្នុងតំបន់ផងដែរ។
លោក ថោង ខុន បានមានប្រសាសន៍ទៀតថា ដោយសារសារសំខាន់នៃវិស័យទេសចរណ៍ រដ្ឋាភិបាលបានតម្រូវឲ្យក្រសួងទេសចរណ៍បង្កើតសាកលវិទ្យាល័យទេសចរណ៍ បង្កើតវិទ្យាស្ថាន និងសាលាបណ្ដុះបណ្ដាលវិជ្ជាជីវៈផ្នែកទេសចរណ៍ជាដើម ហើយទន្ទឹមនិងនោះរដ្ឋក៏ទទួលស្គាល់តួនាទីដ៏មានតម្លៃរបស់ឯកជន ទើបចុះហត្ថលេខាលើកិច្ចព្រមព្រៀងជាមួយសាលាឯកជន១នោះ ក្នុងការឲ្យបណ្ដុះបណ្ដាលវិជ្ជាជីវៈមគ្គុទ្ទេសក៍ទេសចរណ៍ជាលើកដំបូង ដើម្បីសាកល្បងរយៈពេល២ឆ្នាំ។
លោក ថោង ខុន មានប្រសាសន៍ ៖ «មគ្គុទ្ទេសក៍កន្លងមកយើងអត់ដែលមានសាលាទេ យើងមានតែវគ្គទេខ្ចី Hotel គេធ្វើទៅ ខ្ចីសាលាខេត្តធ្វើទៅ បើកវគ្គ៣ខែៗ អ៊ីចឹងទៅ។ តែឥឡូវនេះយើងរៀបចំឲ្យមានសាលាមួយគ្រប់គ្រងត្រឹមត្រូវនៅតំបន់សៀមរាប ផ្អែកលើសាលានេះ ព្រោះយើងជឿលើសាលាហ្នឹងវាមានពិសោធន៍ មានគុណភាពល្អ។ អ៊ីចឹងយើងអាចធ្វើសាលាដទៃទៀត ប៉ុន្តែយើងសាកល្បងនេះ១សិន ព្រោះមគ្គុទ្ទេសក៍សំខាន់ណាស់»។
មន្ត្រីក្រសួងទេសចរណ៍ឲ្យដឹងថា នៅប្រទេសកម្ពុជាសាលាឯកដែលបង្រៀនជំនាញផ្នែកទេសចរណ៍ទើបតែមានចំនួន៩ប៉ុណ្ណោះ គឺនៅខេត្តសៀមរាបចំនួន៣ និងនៅទីក្រុងភ្នំពេញចំនួន៦។
លោក Gérald Hougardy ជនជាតិបារាំង ជានាយកសាលាបណ្ដុះបណ្ដាលជំនាញសណ្ឋាគារ និងទេសចរណ៍ (ប៉ូលឌុយប៊្រូល) ខេត្តសៀមរាប បានមានប្រសាសន៍ថា សាលារបស់លោកនឹងធ្វើការជិតស្និតជាមួយក្រសួងទេសចរណ៍ខ្មែរ ដែលនឹងទទួលខុសត្រូវលើការបណ្ដុះបណ្ដាលជំនាញផ្នែកមគ្គុទ្ទេសក៍ទេសចរណ៍ ជាលើកដំបូង ដោយចាប់ផ្ដើមនៅខែតុលាឆ្នាំនេះ។
លោក Gérald Hougardy មានប្រសាសន៍ ៖ «ការងារថ្មីរបស់យើង គឺជាការផ្ដល់ចំណេះដឹង និងជំនាញដល់មគ្គុទ្ទេសក៍ទេសចរណ៍នៅខេត្តសៀមរាប នូវកម្រិតសមត្ថភាពមួយ ដែលមានការទទួលស្គាល់ និងទៅតាមតម្រូវការទីផ្សារទេសចរណ៍នៅកម្ពុជា។ ពីព្រោះថា ដោយផ្អែកលើជីវចម្រុះ និងបរិស្ថានធម្មជាតិ អាចនិយាយបានថាវិស័យទេសចរណ៍នៅកម្ពុជា កំពុងបន្តរីកដុះដាលឡើងយ៉ាងឆាប់រហ័ស»។
មន្ត្រីក្រសួងទេសចរណ៍របស់ប្រទេសកម្ពុជាបានឲ្យដឹងថា ពេលបច្ចុប្បន្ន កម្ពុជាមានមគ្គុទ្ទេសក៍ទេសចរណ៍ចំនួនជាង៣០០០នាក់ ក៏ប៉ុន្តែចំនួននេះមិនទាន់គ្រប់គ្រាន់តាមតម្រូវការទីផ្សារទេសចរណ៍ទេ គឺមគ្គុទ្ទេសក៍ភាសាកូរ៉េ និងភាសាចិនកំពុងខ្វះ ស្របពេលដែលភ្ញៀវទេសចរណ៍ជនជាតិទាំងពីរនោះ មានកំណើនកើនឡើង៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ