ខេត្តកំពត និងខេត្តកែប ទទួលបានភ្ញៀវទេសចរច្រើនក្នុងពិធីបុណ្យអុំទូក
2012.11.30
ពិសេសទៅទៀត ភ្នំបូកគោ មានអាកាសធាតុត្រជាក់ និងមានខ្យល់ល្អបរិសុទ្ធ។ ចំណែកអាជ្ញាធរខេត្តនៅតំបន់ឆ្នេរ ក្នុងខេត្តកែប អះអាងថា ភ្ញៀវទៅកម្សាន្តនៅខេត្តនេះបានកើនឡើងដល់ទៅជាង ៤ម៉ឺននាក់ ក្នុងរយៈពេល ៣ថ្ងៃ នៃបុណ្យអុំទូកឆ្នាំ២០១២ នេះ។
មន្ត្រីទេសចរ និងអ្នករកស៊ីក្នុងវិស័យទេសចរណ៍ សុទ្ធតែលើកឡើងដូចគ្នាថា រមណីយដ្ឋានបូកគោ ជាគោលដៅទេសចរណ៍ថ្មីដ៏ទាក់ទាញ សម្រាប់ដំណើរកម្សាន្តក្នុងអំឡុងថ្ងៃឈប់សម្រាក។
មន្ត្រីទេសចរខេត្តកំពត លោក សយ ស៊ីណុល អះអាងថា ថ្ងៃឈប់សម្រាកព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ឆ្នាំ២០១២ ចំនួន ៣ថ្ងៃ ភ្ញៀវជាតិ និងអន្តរជាតិ បានមកកម្សាន្តនៅរមណីយដ្ឋានភ្នំបូកគោ ច្រើនជាងរមណីយដ្ឋាន ១៣កន្លែងផ្សេងទៀត ក្នុងខេត្តកំពត។
លោកបន្ថែមថា ភ្ញៀវបានមកកម្សាន្តនៅក្នុងខេត្តកំពត រយៈពេល ៣ថ្ងៃ នៃព្រះរាជពិធីបុណ្យអុំទូក កើនលើសប្រមាណ ៣០% បើធៀបនឹងឆ្នាំ២០១១ កន្លងទៅ៖ «ភ្ញៀវទាំងអស់មកកាន់ខេត្តកំពត មាន ៣ម៉ឺន ៧ពាន់នាក់។ រយៈពេល ៣ថ្ងៃនេះ យើង បើធៀបពីឆ្នាំទៅ កើនឡើងជាង ៣០%»។
ប្រភពដដែលបន្តថា នៅក្នុងរមណីយដ្ឋានបូកគោ មានអាហារដ្ឋាននៅតំបន់ទឹកធ្លាក់។
ភ្ញៀវទេសចរដែលទៅកម្សាន្តនៅភ្នំបូកគោ លោក សេដ្ឋា ថ្លែងថា រមណីយដ្ឋានភ្នំបូកគោ បច្ចុប្បន្ន មានការរៀបចំសណ្ដាប់ធ្នាប់ល្អជាងឆ្នាំមុន ក្នុងនោះមានភោជនីយដ្ឋាន មានបង្គន់អនាម័យ មានធុងសំរាម មានកន្លែងចតរថយន្តយ៉ាងមានរបៀបទៀតផង៖ «បញ្ហារមណីយដ្ឋានបូកគោ ឡើងទៅខាងក្រុមហ៊ុន គេយកថ្លៃសេវា ១ម៉ឺន វាសមរម្យ គឺគេទប់ទល់អនាម័យ សេវាគេថែទាំផ្លូវអីហ្នឹង។ ម្យ៉ាង ទៅដល់ទីនោះ វាប្លែកជាងមុន ពីមុនវាអនាធិបតេយ្យ ឥឡូវគេរៀបចំតាំងពីបង្គន់អនាម័យ សន្តិសុខ ដាក់ចំណតឡានអី ស្រួលបួលឲ្យយើងចតមានសណ្ដាប់ធ្នាប់ ហើយមានអ្នកដើរប្រមូលសំរាម នៅពេលដែលយើងងើបចេញ គេមានក្រុមគេដើរប្រមូល មានថង់ខ្មៅ ហើយគេដើរប្រមូលសំរាម អ្នកដែលទៅអង្គុយលេង ញ៉ាំអី យកឥវ៉ាន់ ខ្ចប់ទៅញ៉ាំហ្នឹង គេប្រមូលសំរាមអីវ៉ាន់ហ្នឹង ដាក់ចូលក្នុងថង់អីយ៉ាងមានសណ្ដាប់ធ្នាប់ យកទៅទុកនៅកន្លែងធុងសំរាមរបស់គេ»។
ក្រៅពីរមណីយដ្ឋានភ្នំបូកគោ នៅឯរមណីយដ្ឋានប្រាសាទភ្នំខ្យង ស្រុកកំពង់ត្រាច ក៏មានការអះអាងថា ភ្ញៀវអន្តរជាតិ នៅតែមានជាធម្មតា ប៉ុន្តែភ្ញៀវជាតិមិនសូវឡើងទៅកម្សាន្តនៅភ្នំនោះទេ។
មេឃុំប្រាសាទភ្នំខ្យង លោក ហ៊ុន តេង លោកមេឃុំបន្ថែមថា រយៈពេល ៣ថ្ងៃនៃបុណ្យអុំទូកនេះ ភ្ញៀវទេសចរអន្តរជាតិ ឡើងទៅកម្សាន្តនៅប្រាសាទភ្នំខ្យង កើនឡើង បើធៀបឆ្នាំមុនៗ៖ «ប្រហែលជាប៉ុន្មានមុននេះ ក៏មិនទាន់មានកំណើនភ្ញៀវទេសចរអីដែរ ព្រោះគេមិនទាន់ដឹងថា ជណ្ដើរយើងធ្វើឡើងហើយ អីចឹងក្រោយពីមន្ទីរបានកសាងនោះទៅ កំណើនភ្ញៀវទេសចរកើន»។
នៅឯខេត្តកែប វិញ អភិបាលរងខេត្ត អ្នកស្រី គង់ ចំរើន ថ្លែងថា រយៈពេល ៣ថ្ងៃឈប់សម្រាកបុណ្យអុំទូក មានភ្ញៀវទៅកម្សាន្តនៅតំបន់ឆ្នេរជាង ៤ម៉ឺន ៥ពាន់នាក់៖ «ពេលដែលហេដ្ឋារចនាសម្ព័ន្ធគមនាគមន៍មានភាពងាយស្រួល គឺថាភ្ញៀវគាត់អញ្ជើញមក គាត់ចង់សម្រាកក៏បាន គាត់ចង់វិលល្ងាចក៏បាន ហើយមួយទៀត វាជាចំណងតភ្ជាប់រវាងកែប បូកគោ កំពង់សោម»។
អ្នកស្រីបន្តថា ខេត្តកែប ឆ្នាំនេះ មិនបានរៀបពិធីបុណ្យអុំទូកកាចា ដូចឆ្នាំកន្លងទៅឡើយ ព្រោះបុណ្យសមុទ្រត្រូវបានផ្អាក ដោយពលរដ្ឋចូលរួមកាន់ទុក្ខព្រះបរមសព ព្រះមហាវីរក្សត្រ ព្រះបាទសម្ដេចព្រះ នរោត្តម សីហនុ។ ប៉ុន្តែ ការតាំងពិព័រណ៍ភូមិមួយ ផលិតផលមួយ នឹងរៀបចំធ្វើនៅចុងខែធ្នូ ចាប់ពីថ្ងៃទី២៧ តទៅ៖ «ម្ហូបអាហារមិនមានតម្លៃឡើងទេ ព្រោះលក់តាមបញ្ជីរាយមុខម្ហូប ដូចថា ក្តាមអីទៅ វាខុសតម្លៃគ្នា ១គីឡូ ៥ពាន់អីដែរ ព្រោះថាក្តាម គឺជាផលិតផលរស់ វាខុសពីបង្គា មឹកអី យើងក្លាសេបាន មាន់អី យើងក្លាសេបាន»។
ក្រុមអាជីវករខេត្តកំពត និងខេត្តកែប បានឲ្យដឹងថា ក្នុងរយៈពេល ៣ថ្ងៃ នៃព្រះរាជពិធីបុណ្យអុំទូក ភ្ញៀវទេសចរមកកម្សាន្តច្រើន ពួកគាត់លក់ផ្លែឈើ ម្រេច ទឹកត្រី គ្រឿងសមុទ្រក្រៀម និងស្រស់ ជាដើម ដាច់ច្រើន ព្រោះជាផលិតផលដែលបានល្បីយូរលង់មកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។