"ជំងឺចម្លែក"រាតត្បាតសិស្សសាសានៅខែត្រក្រចេះ
2010.01.22
ព្រះសង្ឃសូត្រមន្តរំដោះគ្រោះឲ្យសិស្សដែលកើតជំងឺចម្លែក នៅវិទ្យាល័យព្រះកុសុមៈ ខេត្តក្រចេះ កាលពីថ្ងៃ២២ មករា ២០១០។
លោក អ៊ឹម ម៉ង់ នាយករងនៃវិទ្យាល័យនេះ បានផ្តល់សម្ភាសន៍ផ្ទាល់ក្នុងទីធ្លាវិទ្យាល័យនេះថា សាលាបានសម្រេចឲ្យបិទទ្វារផ្អាកការសិក្សាបណ្តោះអាសន្ន ដើម្បីកុំឲ្យសិស្សជ្រួលច្របល់ បន្ទាប់ពីលោកបានជួយសង្គ្រោះដល់សិស្សស្រីពីរនាក់ដែលមានជំងឺចម្លែកនេះ តែលោកមិនអាចសន្និដ្ឋានថាជាជំងឺអ្វីឡើយ។
លោក អ៊ឹម ម៉ង់ បានបញ្ជាក់ថា ៖ «អង្គុយរៀនអ៊ីចឹង វាមានប្រតិកម្មអីទៅ វាស្ទុះហក់ កញ្ជ្រោលឡើងបណ្ដោយ។ ក្មេងហ្នឹងកម្លាំងពេញតែម្ដង ហើយវាយំរហូត ស្រែករហូត ភ្នែកវាដាលរហូត។ សិស្សទាំងអស់ដែលវាឈឺទាំងប៉ុន្មានហ្នឹងសុទ្ធតែជំងឺប្រភេទតែមួយ តែជំងឺវាប្លែក!»។
សាក្សីឃើញផ្ទាល់ភ្នែកបានផ្តល់សម្ភាសន៍ថា សិស្សស្រីពីរនាក់នោះត្រូវបានគេជួយសង្គ្រោះ ដោយមានទាំងនិមន្តព្រះសង្ឃឲ្យជួយសូត្រមន្តរំដោះគ្រោះតាមជំនឿអរូបីផង ៖ «លោកក៏បានសូត្រដេញៗអ៊ីចឹង ក្មេងហ្នឹងក៏បាត់ប្រកាច់បាត់អីទៅ ប៉ុន្តែមួយសន្ទុះអាម្នាក់ទៀតប្រកាច់ពេញសាលា សែងមកទៀតហើយ ស្រីដែរ ចាប់បួនដប់នាក់អត់ចង់ឈ្នះទេ! ក្មេងហ្នឹងខាំធ្មេញស្លេកស្លាំង របៀបដូចស្អីចូលអ៊ីចឹងណា៎! រួចក៏លោកសូត្រជះទឹកពីរធុង រួចទៅក្មេងហ្នឹងក៏វាដឹងខ្លួនធម្មតាវិញ តែវាអស់កម្លាំង រួចគេយកមកពេទ្យ ដាក់សេរ៉ូមដាក់អី!»។
លោក អ៊ូ ឃីឡាយ នាយកមន្ទីរពេទ្យបង្អែកខេត្ត ដែលទទួលសិស្សស្រីរងដោយជំងឺចម្លែកនេះតាំងពីថ្ងៃទី១៩ មករាមក បានឲ្យដឹងថា ថ្ងៃដំបូងលោកពិនិត្យឃើញថា សិស្សមានជំងឺខ្វះជាតិស្ករ តែនៅថ្ងៃនេះលោកថា សិស្សពុំមានខ្វះអ្វីទេ លោកបែរជាសង្ស័យមានជាតិពុលម្យ៉ាងដែលលោកពុំមានឧបករណ៍វិភាគ។
លោក អ៊ូ ឃីឡាយ បានអះអាងថា ៖ «ម្សិលមិញចូលពីរនាក់ ប៉ុន្តែពីរហ្នឹងសភាពវាដូចជាពិបាកជាងអាមុនៗ ហើយមើលឈាមមើលអីធម្មតាទាំងអស់ហ្នឹង ហើយធាតុអាកាសមិនពាក់ព័ន្ធអីធ្វើឲ្យប្រកាច់អ៊ីចឹងទេ! ខ្ញុំសង្ស័យក្រែងលោមានជាតិពុលអីក្នុងហ្នឹងក៏មិនដឹង! ដូចថា យើងអត់ឧបករណ៍អីសម្រាប់ស្រាវជ្រាវរកមើល។ ខាងមន្ទីរខ្ញុំរាយការណ៍ជូនទៅក្រសួងដែរ ប្រហែលជាគេមានវិធានការយ៉ាងម៉េច»។
លោក អ៊ូ ឃីឡាយ បានឲ្យដឹងបន្ថែមថា មានសិស្ស ១២នាក់ហើយដែលចូលទៅមន្ទីរពេទ្យបង្អែក ប៉ុន្តែនៅព្រឹកថ្ងៃទី២២ មករាដដែល ក៏មានសេចក្តីរាយការណ៍មកថា ក៏មានសិស្ស ៨នាក់ផ្សេងទៀតដែរនៅឯសាលាចំបក់ឫស្សីកែវ ស្រុកព្រែកប្រសព្វ ដែលទទួលរងនូវជំងឺចម្លែកនេះ។
អាណាព្យាបាលសិស្សមួយចំនួនបានឲ្យដឹងថា វិទ្យាល័យព្រះកុសុមៈត្រូវបានសាងសង់ឡើងនៅលើផ្នូរសាកសពដែលគេសម្លាប់ក្នុងគុកពីជំនាន់ ប៉ុល ពត ដែលគេបង្កើតនៅកន្លែងនោះពីមុន ហេតុនេះហើយគេចង់ឲ្យមានការនិមន្តព្រះសង្ឃសូត្រមន្តបណ្តោះគ្រោះដើម្បីឲ្យព្រលឹងសាកសពទាំងនោះបានស្ងាប់ទៅចាប់ជាតិជាថ្មី។ តែទោះជាយ៉ាងណាក្តីការគិតនេះវាគ្រាន់តែជាអបិយជំនឿប៉ុណ្ណោះ ប៉ុន្តែគេនៅរង់ចាំការវិភាគរោគមួយជាក់លាកពីអ្នកជំនាញ៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ