មន្ត្រីកសិកម្មព្រួយបារម្ភពីការលក់សាច់គោឈឺនៅព្រះវិហារ
2011.06.13
ប៉ុន្តែ ទោះយ៉ាងណាក្ដី រហូតមកដល់ពេលនេះគេ មិនទាន់មានភស្តុតាងណាមួយ ដែលអាចឈានទៅដល់ការរារាំង និងបញ្ឈប់ទៅលើការលក់សាច់គោងាប់ដោយសារជំងឺ នៅក្នុងទីផ្សារនោះនៅឡើយទេ។
ក្រុមប្រជាពលរដ្ឋមួយចំនួន នៅក្នុងស្រុករវៀងចម្ងាយប្រមាណជាង ៤០ គីឡូម៉ែត្រភាគខាងកើតពីទីរួមខេត្តព្រះវិហារ បានសំដែងការព្រួយបារម្ភចំពោះការ ដែលអាចឆ្លងមេរោគពីសាច់គោដែលងាប់ដោយសារជំងឺ ទៅមនុស្សនៅពេលណាមួយ ប្រសិនបើអាជ្ញាធរពាក់ព័ន្ធមិនបង្ក្រាបពួកឈ្មួញខ្លះ ដែលចង់ចំណេញប្រាក់ ហើយយកសាច់គោ ដែលឈឺងាប់ទៅដាក់លក់ឱ្យប្រជាពលរដ្ឋ ដែលមិនដឹងហើយទិញយកទៅចម្អិនទទួលទាននោះ។
លោក ម៉ី ប៊ុនណី ប្រធានផ្សាររវៀង នៅក្នុងទីប្រជុំជនស្រុករវៀង មានប្រសាសន៍កាលពីល្ងាចថ្ងៃសៅរ៍ទី ១១ ខែមិថុនាថា នៅក្នុងផ្សារដែលលោកគ្រប់គ្រង គឺមានឈ្មួញខ្លះបានយកសាច់គោ ដែលឈឺងាប់ ទៅដាក់លក់ជាហូរហែ ក្នុងរយៈពេលជាង ១ ខែកន្លះជាប់ៗ គ្នាមកនេះ។
អ្នកគ្រប់គ្រងផ្សារដដែលថ្លែងទៀតថា យ៉ាងហោចណាស់លោកបានឃើញគោពី ៣ ទៅ ៤ ក្បាល ដែលងាប់ដោយសារជំងឺក្នុងមួយថ្ងៃៗ ដែលពួកឈ្មួញបានយកសាច់ទៅដាក់លក់ឱ្យប្រជាពលរដ្ឋទិញយកទៅចម្អិនបរិភោគ។ ក៏ប៉ុន្តែ លោកពុំមានលទ្ធភាពរារាំងការលក់ដូរសាច់សត្វបែបនោះទេ។
លោក ម៉ី ប៊ុនណី ៖ «ពួកឈ្មួញហ្នឹងយកមកបោះឱ្យវា ៩.០០០ រៀល ហើយទៅដល់លក់ចេញទៅវិញ ១.៥០០០ ឬ ១.៤០០០ ក្នុង ១ គីឡូក្រាម។ ប្រជាជនពីចុងកាត់មាត់ញកគ្នាអត់ដឹងចេះតែទិញទៅ។ ខ្ញុំប្រាប់គេដែរហើយ តែគេធ្វើអត់ដឹងឮ។ ដល់អ៊ីចឹងគេចេះតែមកប្ដឹងខ្ញុំដែរដល់ខ្ញុំដោះស្រាយអត់ចេញ»។
មន្ត្រីមន្ទីរកសិកម្មខេត្តព្រះវិហារ បានបញ្ជាក់ថា គេបានដឹងអំពីបញ្ហាដែលកំពុងកើតឡើងនៅផ្សារនៃស្រុករវៀងនោះ។
លោក ពឹង ទ្រីដា ប្រធានមន្ទីរកសិកម្មប្រចាំខេត្តព្រះវិហារ មានប្រសាសន៍ថា កន្លងមកលោកតែងឮព័ត៌មានថា មានការយកសាច់គោដែលឈឺងាប់ ទៅលក់នៅផ្សារស្រុករវៀងជាហូរហែ។ ប៉ុន្តែ អាជ្ញាធរមិនទាន់រកឃើញប្រភព និងភស្តុតាងច្បាស់លាស់ ដើម្បីបង្ក្រាបការលក់ដូរបែបនោះនៅឡើយទេ។
លោក ពឹង ទ្រីដា ៖ «ខ្ញុំឱ្យខាងកសិកម្មស្រុកហ្នឹងសហការជាមួយអាជ្ញាធរអីរួចអស់ហើយ។ ប៉ុន្មានអាទិត្យមុននេះឱ្យមើលកន្លែងណា ដែលមានគោស្លាប់គោអី។ យើងណែនាំអត់ឱ្យយកមកបរិភោគអ៊ីចឹងណា។ គោកាលណាវាមានជំងឺអ៊ីចឹង ជាទូទៅគេហាមអត់ឱ្យយើងយកទៅបរិភោគទេ។ ខ្លាចមានបញ្ហាអីប៉ះពាល់ដល់សុខភាពបងប្អូន។ យើងហាមអត់ឱ្យគាត់បរិភោគទេ។ ណែនាំគាត់ជាទូទៅអាហ្នឹងអីចឹង»។
លោកប៉ិច ហ៊ុយគឹង ជាសមាជិកក្រុមប្រឹក្សាស្រុករវៀង មានប្រសាសន៍ថា ការដាក់លក់សាច់គោដែលឈឺងាប់ ទៅឱ្យប្រជាពលរដ្ឋចម្អិនទទួលទាននោះ គឺក្រុមប្រឹក្សាស្រុករវៀងធ្លាប់បានសំដែងការព្រួយបារម្ភចំពោះបញ្ហា ដែលអាចនឹងប៉ះពាល់ដល់សុខភាពសាធារណ ហើយក៏ធ្លាប់បានលើកបញ្ហានោះដាក់បញ្ចូលទៅក្នុងរបៀបវារៈនៃការប្រជុំក្រុមប្រឹក្សាផងដែរ។ ក៏ប៉ុន្តែ បញ្ហានោះនៅតែគ្មានចំណាត់ការរារាំង ឬធ្វើការបង្ក្រាបណាមួយពីអាជ្ញាធរនៅក្នុងតំបន់នោះទេ៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ