ស.រ.អា.ប្រកាសប្រមូលថ្នាំ Tylenol សម្រាប់កុមារ
2010.05.06
ថ្នាំទីឡេណុល (Tylenol) សម្រាប់កុមារ និងថ្នាំប្រភេទផ្សេងទៀតដែលព្យាបាលជំងឺទូលំទូលាយ សម្រាប់បំបាត់រោគគ្រុនផ្ដាសាយ និងបំបាត់ការឈឺចាប់ ត្រូវបានគេឃើញមានលក់គ្រប់ទីកន្លែងនៅប្រទេសកម្ពុជាមកដល់ពេលនេះ បើទោះបីជារដ្ឋបាលផ្នែកម្ហូបអាហារ និងឱសថរបស់សហរដ្ឋអាមេរិក (ស.រ.អា.) កំពុងចាប់ផ្ដើមប្រកាសប្រមូលថ្នាំនេះមិនឲ្យប្រើប្រាស់ក៏ដោយ។
អ្នកលក់ថ្នាំពេទ្យមួយរូបនៅក្នុងក្រុងភ្នំពេញ ឈ្មោះ រ៉ា វួច បានសម្ដែងថា អ្នកស្រីនៅមិនទាន់ដឹងដំណឹងនេះនៅឡើយទេ ៖ «ខ្ញុំអត់ដឹងផង! តែបើសិនជាគេចេញប្រកាស គឺត្រូវក្រសួងចេញបម្រាមមកខាងយើងហើយ ប៉ុន្តែក្រសួងអត់ទាន់បានចេញ គេចេញតែថ្នាំចិនប៉ុន្មានមុខ!»។
ទាក់ទងទៅនឹងបញ្ហានេះដែរ អ្នកជំនាញផ្នែកឱសថរបស់អង្គការសុខភាពពិភពលោកប្រចាំនៅប្រទេសកម្ពុជា លោក វីលៀម មុហ៊្វក (William Mfuko) មានប្រសាសន៍ថា លោកទើបតែបានដឹងព័ត៌មាននេះពីក្រុមហ៊ុន McNeil ផលិតថ្នាំពេទ្យនោះ ដោយគេអះអាងថា ការផលិតនោះមិនត្រឹមត្រូវតាមស្តង់ដារ ទើបគេចាប់ផ្ដើមប្រមូលទុកទៅវិញ។
លោក វីលៀម មុហ៊្វក បញ្ជាក់បន្តទៀតថា ៖ «អ្វីដែលខ្ញុំចង់និយាយ គឺខ្ញុំនឹងសំណូមពរទៅសហសេវិករបស់ខ្ញុំនៅក្រសួងសុខាភិបាល ដើម្បីឲ្យស៊ើបអង្កេតស្រាវជ្រាវរកព័ត៌មាននោះបន្ថែមទៀត ថាតើថ្នាំ Tylenol ប្រភេទទាំងអស់នោះមាននៅក្នុងប្រទេសកម្ពុជាដែរ ឬអត់? យើងធ្វើរឿងនេះឲ្យចប់សិន មុននឹងចាត់វិធានការយ៉ាងណានោះ»។
កាសែត Washington Post ដែលចេញផ្សាយនៅថ្ងៃពុធ ទី៥ ឧសភានេះ បានសរសេរថា ក្រុមអធិការកិច្ចផ្នែកម្ហូបអាហារ និងឱសថរបស់សហរដ្ឋអាមេរិក កាលពីពេលថ្មីៗនេះ បានប្រកាសប្រមូលថ្នាំ Tylenol របស់កុមារ និងប្រភេទថ្នាំផ្សេងទៀតសម្រាប់កុមារដែលគេអាចរកទិញបានដោយគ្មានវេជ្ជបញ្ជា ប្រមូលទុកវិញ ក្រោយពីបានរកឃើញថា ក្រុមហ៊ុនផលិតថ្នាំពេទ្យឈ្មោះ McNeil ខ្វះការត្រួតពិនិត្យគុណភាព។
នៅក្នុងការចុះធ្វើអធិការកិច្ចរយៈពេល ១០ថ្ងៃ គេបានរកឃើញថា ការផលិតថ្នាំនោះបានប្រើប្រាស់នូវវត្ថុធាតុដើមដែលមានប្រឡាក់ប្រឡូកជាមួយនឹងមេរោគ ហើយក្រុមហ៊ុន McNeil បានបរាជ័យនៅក្នុងការស៊ើបអង្កេតបណ្ដឹងរបស់អ្នកប្រើប្រាស់ ហើយក៏មិនបានកែតម្រូវផងដែរ។
ដោយស្រង់សម្ដីមន្ត្រីជាន់ខ្ពស់នៃរដ្ឋបាលម្ហូបអាហារ និងឱសថរបស់សហរដ្ឋអាមេរិក អ្នកស្រី ដេបូរ៉ា អឹមអូធ័រ (Deborah M Autor) ដែលអះអាងថា គេនឹងចាត់វិធានការជាមួយនឹងក្រុមហ៊ុនផលិតថ្នាំពេទ្យឈ្មោះ McNeil នៅពេលគេបញ្ចប់ការស៊ើបអង្កេតនោះ។ មន្ត្រីដដែលក៏បានបញ្ជាក់ថា គេបានប្រកាសប្រមូលថ្នាំចំនួន ៤៣ប្រភេទដែលអាចទិញបានដោយគ្មានវេជ្ជបញ្ជា ដោយស្ម័គ្រចិត្ត នៅក្នុងសហរដ្ឋអាមេរិក និងនៅប្រទេសចំនួន ៩ផ្សេងទៀត។
ប្រភេទថ្នាំដែលគេកំពុងតែប្រមូលនោះ មានឈ្មោះ Tylenol, Motrin, Zytec និង Benadryl ព្រមទាំងប្រភេទថ្នាំផ្សេងទៀតដែលប្រើប្រាស់ទូលំទូលាយសម្រាប់បំបាត់ការឈឺចាប់ ជំងឺគ្រុនផ្ដាសាយ និងជំងឺប្រតិកម្ម។
ក្រសួងសុខាភិបាលនៃប្រទេសកម្ពុជានៅមិនទាន់មានដំណឹង ឬក៏ចាត់វិធានការណាមួយទេ ចំពោះដំណឹងទាក់ទងនឹងថ្នាំទាំងអស់នេះ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ