ស.រ.អា.ផ្ដល់ជំនួយជាង៣៤លានដុល្លារដល់កម្ពុជា
2009.09.05
ទង់ជាតិរបស់សហរដ្ឋអាមេរិក
ក្នុងសេចក្តីប្រកាសព័ត៌មានរបស់ស្ថានទូតអាមេរិកប្រចាំប្រទេសកម្ពុជាកាលពីម្សិលមិញនេះបានឲ្យដឹងថា ពិធីចុះហត្ថលេខាលើវិសោធនកម្មក្នុងកិច្ចព្រមព្រៀងទ្វេភាគីចំនួនពីររវាងកម្ពុជានិងសហរដ្ឋអាមេរិកនេះ នឹងប្រព្រឹត្តធ្វើឡើងនៅថ្ងៃទី៨ ខែកញ្ញាខាងមុខនេះ រវាងលោក ហោ ណាំហុង រដ្ឋមន្ត្រីក្រសួងការបរទេសខ្មែរ និងលោក Flynn Fuller នាយកបេសកកម្មនៃអង្គការ USAID។
សេចក្តីប្រកាសព័ត៌មានដដែលនោះបន្តថា វិសោធនកម្មលើកិច្ចព្រមព្រៀងទី១ គឺផ្តល់ថវិកាសរុប៣១លាន៦សែនដុល្លារសម្រាប់ធ្វើឲ្យប្រសើរឡើងនូវរាល់សកម្មភាពដែលពាក់ព័ន្ធនឹងការកាត់បន្ថយអត្រាឆ្លងនិងផលប៉ះពាល់នៃជំងឺហ៊ីវឬអេដស៍ ការការពារនិងការកម្ចាត់ជំងឺឆ្លងធំៗ ដូចជាជំងឺរបេង ជំងឺផ្តាសាយបក្សី និងផ្តាសាយប្រភេទផ្សេងៗទៀត ហើយនិងធ្វើឲ្យប្រសើរឡើងនូវសុខភាពរបស់កុមារ មាតានិងសុខភាពបន្តពូជ ព្រមទាំងពង្រឹងប្រព័ន្ធសុខភាពសាធារណៈ។
វិសោធនកម្មលើកិច្ចព្រមព្រៀងទី២ ដែលមានថវិកាសរុប៣លាន២សែនដុល្លារអាមេរិកលើវិស័យអប់រំនោះ គឺបង្កើនគុណភាពនៃការបង្រៀន ការបណ្តុះបណ្តាលពីការគ្រប់គ្រងសាលា និងជាពិសេសគឺធ្វើឲ្យប្រសើរឡើងនូវគុណភាពនៃការអប់រំ ពង្រីកលទ្ធភាពនៃការចូលរៀនរបស់កុមារ ជនជាតិភាគតិច ជនពិការ និងកុមារក្រីក្រខ្លាំងបំផុត។ល។
សេចក្តីប្រកាសព័ត៌មានដដែលបន្តថា បន្ថែមពីជំនួយលើវិស័យសុខាភិបាលនិងអប់រំដែលមានទឹកប្រាក់ជិត៣៥លានដុល្លារនេះ អង្គការ USAID រំពឹងថានឹងផ្តល់ថវិកាប្រមាណ៦០លានដុល្លារអាមេរិកផ្សេងទៀតក្នុងកម្មវិធីឧបត្ថម្ភមួយចំនួន ដូចជាខាងផ្នែកសិទ្ធិមនុស្ស នីតិរដ្ឋ អភិបាលកិច្ចមូលដ្ឋាននិងវិមជ្ឈការ ការប្រឆាំងនឹងអំពើពុករលួយ និងប្រឆាំងការជួញដូរមនុស្ស ជាដើមនោះ សម្រាប់ឆ្នាំ២០០៩នេះដែរ៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ