ក្រសួងសុខាភិបាលបើកយុទ្ធនាការចាក់ថ្នាំបង្ការជំងឺផ្ដាសាយថ្មី
2010.03.25
អ្នកដំណើរពាក់ម៉ាសមុខ ខណៈដើរកាត់ផ្សារមួយ នៅក្នុងរាជធានីភ្នំពេញ កាលពីថ្ងៃ៦ តុលា ២០០៩។
យុទ្ធនាការចាក់ថ្នាំបង្ការជំងឺផ្ដាសាយថ្មីរយៈពេល ១០ថ្ងៃនេះ ត្រូវបានប្រកាសធ្វើនៅឯមណ្ឌលសុខភាពចំការមន រាជធានីភ្នំពេញ ដោយមានការចាក់ថ្នាំបង្ការជានិមិត្តរូប ក្រោមអធិបតីភាពរដ្ឋមន្ត្រីសុខាភិបាល លោក ម៉ម ប៊ុនហេង អភិបាលរាជធានីភ្នំពេញ លោក កែប ជុតិមា និងតំណាងអង្គការសុខភាពពិភពលោក តំណាងទីភ្នាក់ងារ USAID និងតំណាងអង្គការពាក់ព័ន្ធមួយចំនួនទៀត។
អនុប្រធានការិយាល័យសុខាភិបាលស្រុកប្រតិបត្តិកណ្ដាល នៃមន្ទីរសុខាភិបាលរាជធានីភ្នំពេញ លោក យឹម ដេត មានប្រសាសន៍ឲ្យដឹងថា ពិធីប្រកាសបើកយុទ្ធនាការចាក់ថ្នាំបង្ការនេះ ជាយុទ្ធនាការជំហានទីមួយនៅទូទាំងប្រទេស ក៏ប៉ុន្តែលោកបញ្ជាក់បន្ថែមដូច្នេះ ៖ «យើងបើកនេះជាយុទ្ធនាការបើកទូទាំងប្រទេស ប៉ុន្តែជាជំហានមួយយើងចាក់ ៤ខេត្តក្រុងសិន គឺរាជធានី ខេត្តកណ្ដាល កំពង់ស្ពឺ កំពង់ឆ្នាំង។ ៤ខេត្តក្រុងសិន។ ចប់ជំហានមួយហ្នឹង ថ្នាក់ជាតិនឹងប្រមើលមើលថា គួរទៅខាងណាទៀត បន្តៗទៀត ព្រោះវ៉ាក់សាំងរបស់យើងដែលបានទទួលជំនួយពីគេមកហ្នឹងវាមានកម្រិត បានតិច។ ជាគម្រោងទូទាំងប្រទេសហ្នឹងវាត្រូវទទួលច្រើន វាជាងមួយលាន ១,៥លានដូសឯណោះ ប៉ុន្តែឥឡូវយើងបានទទួលតិចនៅឡើយ»។
លោក យឹម ដេត បានបន្តថា គម្រោងជំហានដំបូងរបស់ស្រុកប្រតិបត្តិកណ្ដាលនៃមន្ទីរសុខាភិបាលរាជធានីភ្នំពេញ ដែលគ្របដណ្ដប់ពីរខណ្ឌ គឺខណ្ឌចំការមន និងខណ្ឌ៧មករា មានគម្រោងផ្ដល់ថ្នាំបង្ការជំងឺផ្ដាសាយថ្មីនេះចំនួនប្រមាណ ១៦.០០០ដូសដល់មនុស្ស ១៦.០០០នាក់ ជាពិសេសមនុស្សទាំងឡាយណាដែលប្រឈមនឹងការឆ្លងជំងឺផ្ដាសាយថ្មីជាងគេ។
លោក យឹម ដេត មានប្រសាសន៍ដូច្នេះ ៖ «ក្រុមចំណុចយើងមានទី១ កុមារពីអាយុ ៦ខែទៅ ២ឆ្នាំ ទី២ ស្ត្រីមានផ្ទៃពោះ ទី៣ អ្នកមានជំងឺសួតរ៉ាំរ៉ៃ ហើយទី៤ មន្ត្រីសុខាភិបាល។ ទាំងមន្ត្រីសុខាភិបាលរដ្ឋ អង្គការ ឯកជន ឲ្យតែអ្នកហ្នឹងប្រតិបត្តិលើការងារសុខាភិបាលយើងចាក់ជូន ហើយទី៥ គឺអាជ្ញាធរមូលដ្ឋាននៅខណ្ឌ យើងផ្ដល់ជូនចំនួន ១០នាក់ នៅសង្កាត់យើងផ្ដល់ជូន ៥នាក់ក្នុងមួយសង្កាត់»។
របាយការណ៍របស់នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលកម្ពុជា បានបង្ហាញថា រហូតមកដល់ថ្ងៃទី១៨ ខែមីនា ឆ្នាំ២០១០ នៅប្រទេសកម្ពុជា មានអ្នកជំងឺផ្ដាសាយថ្មី A(H1N1) ចំនួន ៥៦៦នាក់ហើយ ហើយមានអ្នកស្លាប់ចំនួន ៦នាក់។
នៅក្នុងយុទ្ធនាការ ១០ថ្ងៃដែលចាប់ពីថ្ងៃទី២៤ ខែមីនា ដល់ថ្ងៃទី២ ខែមេសា ឆ្នាំ២០១០ លោក យឹម ដេត បានឱ្យដឹងថា មន្ទីរសុខាភិបាលរាជធានីភ្នំពេញនឹងបញ្ជូនមន្ត្រីសុខាភិបាលចំនួន ១០០ ក្រុមចុះផ្ដល់ថ្នាំបង្ការជំងឺផ្ដាសាយថ្មី នៅតាមភូមិនានាទូទាំងរាជធានីភ្នំពេញ ជារៀងរាល់ថ្ងៃ រាប់ទាំងថ្ងៃសៅរ៍ និងថ្ងៃអាទិត្យផង៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ