ពលរដ្ឋ​ប្រារព្ធ​ពិធី​បុណ្យ​ពិសាខ​បូជា​នៅ​សៀមរាប

មហា​ជន​រាប់​ម៉ឺន​នាក់​មក​ពី​បណ្ដា​ខេត្ត​ក្រុង​ជា​ច្រើន បានចូល​​​មក​កាន់​ខេត្ត​សៀមរាប​ដើម្បី​ចូលរួម​ការ​ប្រារព្ធ​ពិធី​រាប់​បាត្រ​ព្រះ​សង្ឃ​ចំនួន ២៥៥៤​អង្គ ក្នុង​ឱកាស​រៀបចំ​បុណ្យ​ពិសាខ​បូជា​នៅ​ទី​នោះ។
ដោយ ហង្ស សាវយុត
2010-04-28
អ៊ីម៉ែល
មតិ
Share
បោះពុម្ព
ទិដ្ឋភាព​នៃ​ហ្វូង​មហាជន​មក​ពី​គ្រប់​ទិស​ទី ដើម្បី​ចូលរួម​ពិធី​រាប់​បាត្រ​ព្រះ​សង្ឃ​ចំនួន ២៥៥៤​អង្គ នៅ​មុខ​ប្រាសាទ​អង្គរវត្ត ក្នុង​ខេត្ត​សៀមរាប នៅ​ព្រឹក​ថ្ងៃ​ទី​២៨ ខែ​មេសា ឆ្នាំ​២០១០។
ទិដ្ឋភាព​នៃ​ហ្វូង​មហាជន​មក​ពី​គ្រប់​ទិស​ទី ដើម្បី​ចូលរួម​ពិធី​រាប់​បាត្រ​ព្រះ​សង្ឃ​ចំនួន ២៥៥៤​អង្គ នៅ​មុខ​ប្រាសាទ​អង្គរវត្ត ក្នុង​ខេត្ត​សៀមរាប នៅ​ព្រឹក​ថ្ងៃ​ទី​២៨ ខែ​មេសា ឆ្នាំ​២០១០។
RFA/Hang Savyouth

ការ​មាន​មនុស្ស​ចូលរួម​កុះ​ករ​នេះ​បាន​បណ្ដាល​ឲ្យ​មាន​ការ​លំបាក​ក្នុង​ការ​ធ្វើ​ដំណើរ ដោយសារ​ផ្លូវ​ក្នុង​ខេត្ត​មាន​ទំហំ​តូច។

ផ្លូវ​ជា​ច្រើន​ខ្សែ​ចេញ​ពី​ទីរួមខេត្ត​សៀមរាប​ទៅ​កាន់​តំបន់​អង្គរ​វត្ត និង​ប្រាសាទ​បាយ័ន​នៃ​ប្រាសាទ​អង្គរ​ធំ ត្រូវ​បាន​កក​ស្ទុះ​ចរាចរណ៍​រយៈ​ពេល​ប្រមាណ​ជា ២​ម៉ោង កាល​ពី​ព្រឹក​ថ្ងៃ​ពុធ ទី​២៨ ខែ​មេសា នៅ​ពេល​ដែល​ពិធី​រាប់​បាត​ព្រះ​សង្ឃ​នៃ​ព្រះ​ពុទ្ធ​សាសនា​ចំនួន ២៥៥៤​អង្គ ក្នុង​បុណ្យ​ពិសាខ​បូជា បាន​ចាប់ផ្ដើម ហើយ​មាន​មហាជន​មក​ពី​ខេត្ត​ក្រុង​នានា​រាប់​ម៉ឺន​នាក់​ធ្វើ​ដំណើរ​ដោយ​រថយន្ត ម៉ូតូ និង​រ៉ឺម៉ក ជញ្ជូន​គ្នា​កក​កុញ​ទៅ​ចូលរួម​ធ្វើ​បុណ្យ​នោះ។

លោក​វរ​សេនីយ៍​ឯក ឡាច សាវិន ស្នងការ​រង​នគរបាល​ខេត្ត​សៀមរាប ទទួល​បន្ទុក​ការិយាល័យ​កណ្ដាល​សណ្ដាប់ធ្នាប់​ចរាចរណ៍ បាន​មាន​ប្រសាសន៍​កាល​ពី​ព្រឹក​ថ្ងៃ​ពុធ ទី​២៨ ខែ​មេសា នៅ​ពេល​លោក​ចុះ​ពិនិត្យ​ស្ថានភាព​ចរាចរណ៍​តាម​ដង​ផ្លូវ​ថា ប្រជា​ពលរដ្ឋ​ខ្មែរ​រាប់​ម៉ឺន​នាក់​មក​ពី​តាម​បណ្ដា​​ខេត្ត​ក្រុង​បាន​ជួប​ជុំ​គ្នា​នៅ​តំបន់​អង្គរ ដែល​ធ្វើ​ឲ្យ​ចរាចរណ៍​មាន​ការ​កក​ស្ទះ​យ៉ាង​សម្បើម។

លោក ឡាច សាវិន បាន​មាន​ប្រសាសន៍​ទៀត​ថា ចំនួន​មហា​ជន​ទៅ​កាន់​តំបន់​អង្គរ​លើក​នេះ​មាន​​ចំនួន​ច្រើន​លើស​លុប ដែល​ចំនួន​នេះ​លើស​កាល​ពី​ពិធី​បុណ្យ​ឆ្លង​សហស្សវត្ស​កាល​ពី​ឆ្នាំ​២០០០​កន្លង​ទៅ​ទៀត។

លោក ឡាច សាវិន បាន​បញ្ជាក់​ថា ៖ «ប្រជា​ពលរដ្ឋ​ក្នុង​តំបន់​អង្គរ​មិន​ខុស​ពី ២​ម៉ឺន​ទេ គិត​ទាំង​ព្រះ​សង្ឃ ២៥៥៤​អង្គ​ផង ហើយ​ការ​ដាក់​បាត្រ​នេះ​ឲ្យ​រៀប​បាត្រ​រហូត​មក​ដល់​ផ្លូវ​កូបៃ បត់​មក​ចំបក់​កំណប់​នេះ​ទៀត។ យើង​ឲ្យ​ឆ្វែល​ទៅ​ផ្លូវ​វង់​តូច បើ​ថា​ចាល់​វង់​តូច យើង​ឲ្យ​ទៅ​វង់​ធំ​ទៀត​បត់​មក​ប្រាសាទ​បាយ័ន។ គណៈកម្មការ​ដែល​ត្រូវ​ទៅ​រៀបចំ​នៅ​ប្រាសាទ​បាយ័ន​នោះ​តាម​ផ្លូវ​មុខ​អង្គរ​ទៅ​អត់​រួច​ទេ។ នេះ​គឺ​ស្ទះ​មិន​ដែល​មាន​ទេ​ក្នុង​ខេត្ត​សៀមរាប ក្រុង​សៀមរាប។ តាំង​ពី​ជំនាន់​សហស្សវត្ស​រហូត​ដល់​ក្រុម​ខារីរ៉ាស់​អ្នក​ចម្រៀង​ពិភពលោក​មក​ច្រៀង​ក៏​មិន​ដល់​ប៉ុណ្ណឹង​ដែរ»

ក្រុម​មហាជន​ខ្មែរ​ដែល​ខំ​ស្កាត់​មក​ពី​ខេត្ត​ឆ្ងាយ​ៗ បាន​និយាយ​ថា បើ​ទោះ​ជា​ចរាចរណ៍​កក​ស្ទះ ហើយ​ពួក​គេ​បាន​ចុះ​ដើរ​ក្រោម​ផ្ទៃ​មេឃ​ក្ដៅ​ខ្លាំង​ពិបាក​ទ្រាំ​ក៏​ដោយ ក៏​ពួក​គេ​នៅតែ​សប្បាយ​ចិត្ត​ទៅ​ចូលរួម​ធ្វើ​បុណ្យ​ដ៏​ធំ​សម្បើម​ដែល​គេ​ពុំ​ធ្លាប់​ជួប​ប្រទះ​ពី​មុន​មក​នោះ។

អ្នក​ស្រី វណ្ណ ហេងលី ដែល​មាន​ទី​លំនៅ​នៅ​សង្កាត់​ទួល​សង្កែ ក្នុង​ទីក្រុង​ភ្នំពេញ បាន​មាន​ប្រសាសន៍​ថា គាត់​សប្បាយ​ចិត្ត​បំផុត បើ​ទោះ​បី​ជា​ចរាចរណ៍​កក​ស្ទះ និង​ហ្វូង​មនុស្ស​ចង្អៀត ប៉ុន្តែ​គាត់​បាន​ចូលរួម​ធ្វើ​បុណ្យ​ដ៏​ធំ។

អ្នក​ស្រី វណ្ណ ហេងលី បាន​ឲ្យ​ដឹង​ថា ៖ «ប្រជ្រៀត ហើយ​រាប់​បាត្រ​ក៏​ប្រជ្រៀត​ដែរ ពិបាក​ដែរ! ប៉ុន្តែ​នៅតែ​សប្បាយ​ចិត្ត ព្រោះ​ចង់​ធ្វើ​បុណ្យ។ ទើប​ជួប​លើក​ទី​១​ហើយ​ដែល​ច្រើន! រាប់​បាត្រ​លោក ២៥៥៤​អង្គ។ ក្ដៅ​យ៉ាង​ណា ចង្អៀត​យ៉ាង​ណា​ក៏​សប្បាយ​ចិត្ត​ដែរ​ដែល​បាន​ធ្វើ​បុណ្យ»

អ្នក​ស្រី ធឿន ស៊ីមេត ដែល​រស់​នៅ​ក្នុង​ទី​រួម​ខេត្ត​សៀមរាប​ខំ​ចូល​ទៅ​ធ្វើ​បុណ្យ​រាប់​បាត្រ​ទី​នោះ​បន្ថែម ៖ «សប្បាយ​នឹង​ធ្វើ​បុណ្យ​ណា​មិន​ដែល​ឃើញ​លោក​ច្រើន​អង្គ​អ៊ីចឹង ទើប​ឃើញ​ថ្ងៃ​ហ្នឹង​សប្បាយ។ ខំ​ក្រោក​ដាំ​បាយ​តាំង​ពី​យប់​យក​មក​រាប់​បាត្រ​នឹង​គេ»

ពិធី​បុណ្យ​ពិសាខ​បូជា​ដោយ​មាន​មនុស្ស​រាប់​ពាន់​នាក់​ត្រៀម​ដង្ហែ​ក្បួន​លំអាន​អរិយធម៌ និង​ទស្សនីយភាព​ដែល​ប្រទេស​ចំនួន ១៣​ចូលរួម និង​សម្ដែង​សិល្បៈ​ពុទ្ធ​ប្រវត្តិ តាម​ប្រទេស​នីមួយ​ៗ​ដែល​មាន​អរិយធម៌​ផ្សេង​គ្នា​ផង​នោះ គ្រោង​នឹង​ចាប់ផ្ដើម​យ៉ាង​អធិក​អធម​នៅ​ក្នុង​បរិវេណ​ប្រាសាទ​បាយ័ន នៅ​វេលា​ល្ងាច​ថ្ងៃ​ពុធ ទី​២៨ ខែ​មេសា៕

ព័ត៌មាន (0)
Share
គេហទំព័រ​ទាំងមូល