សម្ពោធ​ការិយាល័យ​តំណាង​វិទ្យុ​វៀតណាម​នៅ​កម្ពុជា​

ការិយាល័យ​តំណាង​វិទ្យុ​សំឡេង​វៀតណាម​ប្រចាំ​នៅ​កម្ពុជា ត្រូវ​បាន​បើក​សម្ពោធ​ជា​ផ្លូវការ នៅ​ថ្ងៃ​ទី​២៧ ខែ​សីហា ឆ្នាំ​២០១០ ដែល​មាន​ប្រធាន​រដ្ឋ​នៃ​សាធារណរដ្ឋ​សង្គម​និយម​វៀតណាម និង​មន្ត្រី​រដ្ឋាភិបាល​ខ្មែរ​ចូល​រួម​ផង។
ដោយ ដែន អយុធ្យា
2010-08-27
អ៊ីម៉ែល
មតិ
Share
បោះពុម្ព
២៧-សីហា-២០១០: ពិធី​សម្ពោធ​ការិយាល័យ​តំណាង​វិទ្យុ​សំឡេង​វៀតណាម ​ប្រចាំ​នៅ​កម្ពុជា នៅ​សណ្ឋាគារ អ៊ិនធឺខនធីណិនថល (Intercontinental Hotel) ក្នុង​រាជធានី​ភ្នំពេញ។
២៧-សីហា-២០១០: ពិធី​សម្ពោធ​ការិយាល័យ​តំណាង​វិទ្យុ​សំឡេង​វៀតណាម ​ប្រចាំ​នៅ​កម្ពុជា នៅ​សណ្ឋាគារ អ៊ិនធឺខនធីណិនថល (Intercontinental Hotel) ក្នុង​រាជធានី​ភ្នំពេញ។
RFA/Quoc Viet

លោក ប៉ុក ហាក់ មន្ត្រី​ក្រសួង​ព័ត៌មាន​ឲ្យ​ដឹង​ថា វិទ្យុ​សំឡេង​វៀតណាម ដែល​ទើប​សម្ពោធ​ការិយាល័យ​តំណាង​ប្រចាំ​កម្ពុជា នា​ថ្ងៃ​ទី​២៧ ខែ​សីហា​នឹង​ចាប់​ផ្ដើម​ផ្សាយ​ផ្ទាល់​ជា​ភាសា​វៀតណាម ពី​ទីក្រុង​ហា​ណូយ ដោយ​មាន​​សេចក្ដី​រាយការណ៍​ព័ត៌មាន​ពី​ប្រទេស​កម្ពុជា​ផង នៅ​​ដំណាច់​ខែ​សីហា ឬ​ដើម​ខែ​កញ្ញា ឆ្នាំ​២០១០​នេះ។ ការិយាល័យ​តំណាង​វិទ្យុ​សំឡេង​វៀតណាម ប្រចាំ​កម្ពុជា​ មាន​ទីតាំង​ស្ថិត​ក្នុង​ខណ្ឌ​ដូនពេញ ក្រុង​ភ្នំពេញ។

មន្ត្រី​ដដែល​ឲ្យ​ដឹង​ថា វិទ្យុ​សំឡេង​វៀតណាម​មិន​មាន​ស្ថានីយ​ផ្សាយ​បន្ត​ផ្ទាល់​នៅ​​​កម្ពុជា​ទេ ហើយ​ក៏​មិន​ដឹង​ថា ការ​ផ្សាយ​មាន​​ភាសា​អ្វី​ខ្លះ​ដែរ ព្រោះ​ស្ថានីយ​ផ្សាយ​នៅ​ប្រទេស​វៀតណាម។ ចំណែក​នៅ​កម្ពុជា​គ្រាន់​តែ​ជា​ការិយាល័យ​តំណាង​វិទ្យុ​នេះ សម្រាប់​ឲ្យ​បុគ្គលិក​រាយ​ការណ៍​ព័ត៌មាន​ចេញ​ពី​កម្ពុជា​ប៉ុណ្ណោះ។

ថ្លែង​ក្នុង​ពិធី​សម្ពោធ លោក វូ វ៉ាន់​ហៀន អគ្គ​នាយក​វិទ្យុ​សំឡេង​វៀតណាម​បាន​ឲ្យ​ដឹង​ថា វិទ្យុ​សំឡេង​វៀតណាម គឺ​ជា​ស្ថាប័ន​១ ក្នុង​ចំណោម​ប្រព័ន្ធ​ផ្សព្វ​ផ្សាយ​​សំខាន់​ជួរ​មុខ​នៃ​​ប្រទេស​វៀតណាម។

លោក ថាច់ សេដ្ឋា ប្រធាន​សហគមន៍​ខ្មែរ​កម្ពុជា​ក្រោម បាន​រិះគន់​រដ្ឋាភិបាល​កម្ពុជា ចំពោះ​ការ​អនុញ្ញាត​ឲ្យ​ ការិយាល័យ​​វិទ្យុ​សំឡេង​វៀតណាម​ប្រចាំ​កម្ពុជា​ពេល​នេះ។ លោក​ថា រដ្ឋាភិបាល​បាន​យក​ចិត្ត​ទុក​ដាក់​តែ​ជាតិ​សាសន៍​​ដទៃ ប៉ុន្តែ​មិន​បាន​គិត​ដល់​សុខ​ទុក្ខ​ពល​រដ្ឋ​ខ្មែរ​កម្ពុជា​ក្រោម ដែល​ចង់​បាន​ប្រព័ន្ធ​ផ្សព្វ​ផ្សាយ​​​សំឡេង​វិទ្យុ​ខ្មែរ​ក្រោម បែរ​ជា​​រដ្ឋាភិបាល​បដិសេធន៍​ទៅ​វិញ។

ពល​រដ្ឋ​រស់​នៅ​ទីក្រុង​ភ្នំពេញ ឈ្មោះ ជួប វិសាល មាន​ប្រសាសន៍​ថា រូប​លោក​មិន​បាន​ចាប់​អារម្ភ​ចំពោះ​​ការ​បើក​​ការិយាល័យ​វិទ្យុ​វៀតណាម​នៅ​កម្ពុជា​នោះ​ទេ ព្រោះ​លោក​យល់​ថា វិទ្យុ​នេះ​មិន​បាន​បម្រើ​ដល់​ផល​ប្រយោជន៍​ពល​រដ្ឋ​ខ្មែរ​នោះ​ទេ។

ចំណែក​ពល​រដ្ឋ​ឈ្មោះ ថេង វិចិត្រ មាន​ប្រសាសន៍​ដូច្នេះ ៖ «បើ​សិន​ជា​វិទ្យុ​ហ្នឹង​លើក​ពី​ព័ត៌មាន និយាយ​ពី​ភាសា​ខ្មែរ ខ្ញុំ​មាន​ចំណាប់​អារម្ភ​ដែរ»

លោក សាន ពុទ្ធារី ប្រធាន​នាយកដ្ឋាន​សោត​ទស្សន៍ នៃ​ក្រសួង​ព័ត៌មាន​បាន​ឲ្យ​ដឹង​ថា​ប្រទេស​កម្ពុជា​មាន​វិទ្យុ​បរទេស​មាន​ស្ថានីយ​ផ្សាយ​បន្ត​នៅ​កម្ពុជា ដូច​ជា​វិទ្យុ​បារាំង​អន្តរ​ជាតិ RFI វិទ្យុ​អូស្ត្រាលី ABC និង​វិទ្យុ​អង់គ្លេស​ BBC និង​វិទ្យុ​ផ្សាយ​សំឡេង​ភាសា​ចិន​ប្រជា​មានិត​ជា​ដើម។

លោក ង្វៀន វ៉ាន់​ហៀប (Nguyen វan Hiep) ប្រធាន​ការិយាល័យ​តំណាង​វិទ្យុ​សំឡេង​វៀតណាម​ប្រចាំ​កម្ពុជា មាន​មូលដ្ឋាន​នៅ​ទីក្រុង​ហាណូយ ដែល​បាន​ចូល​រួម​សម្ពោធ​​ឲ្យ​ដឹង​ថា វិទ្យុ​សំឡេង​វៀតណាម បាន​នឹង​កំពុង​ពង្រីក​ការិយាល័យ​ច្រើន​ទៀត នៅ​លើ​ពិភព​លោក ដូច​ជា​នៅ​ប្រទេស​ថៃ បារាំង រុស្ស៊ី ចិន ជប៉ុន អេហ្សីប អាមេរិក និង​ប្រទេស​ឡាវ។

លោក​ថា​វិទ្យុ​សំឡេង​វៀតណាម​បាន​បង្កើត​ឡើង​តាំង​ពី​ឆ្នាំ​១៩៤៥ មក​ម្ល៉េះ។ វិទ្យុ​សំឡេង​វៀតណាម​មាន​កា​ណាល់​​ផ្សាយ​សំឡេង​ចំនួន​៦ មាន​បុគ្គលិក​សរុប​២​ពាន់​នាក់ ផ្សាយ​ជា​ភាសា​បរទេស​ចំនួន​១២​ភាសា និង​ភាសា​ជន​ជាតិ​ភាគ​តិច​ចំនួន​១២​ភាសា។ ការ​ផ្សាយ​សរុប​ទាំង​២៤​ភាសា​ក្នុង​១​ថ្ងៃ ២០០​ម៉ោង៕

ព័ត៌មាន (1)
Share

អ្នក​អាន​អនាមិក

Is it normal !!!?

Aug 27, 2010 10:52 AM

គេហទំព័រ​ទាំងមូល