រូបត្លុកនយោបាយ៖ កិច្ចសហប្រតិបត្តិការមេគង្គ-ឡានឆាង
2018.05.24
ទន្លេមេគង្គ ឬហៅជាភាសាចិនថា ទន្លេឡានឆាង គឺជាបេះដូងនៃតំបន់អាស៊ីអាគ្នេយ៍ដីគោក ដែលមានប្រជាជនសរុបជាង ៦០លាននាក់ និងជាទន្លេដែលវែងជាងគេទី១២ នៅលើពិភពលោក មានប្រវែងប្រមាណជិត ៥ពាន់គីឡូម៉ែត្រ។
កាលពីដើមខែមករានេះ មេដឹកនាំមកពីប្រទេសចំនួន៦ នៃតំបន់ទន្លេមេគង្គ រួមមាន កម្ពុជា វៀតណាម ឡាវ ថៃ មីយ៉ាន់ម៉ា ឬភូមា និងចិន បានរៀបចំកិច្ចប្រជុំកំពូលកិច្ចសហប្រតិបត្តិការមេគង្គ-ឡានឆាង លើកទី២ នៅក្រុងភ្នំពេញ ដែលធ្វើឡើងក្រោមមូលបទ «ទន្លេរបស់យើងដើម្បីសន្តិភាព និងការអភិវឌ្ឍប្រកបដោយចិរភាព»។
យន្តការកិច្ចសហប្រតិបត្តិការមេគង្គ-ឡានឆាងនេះ ទទួលរងនូវការរិះគន់ថា អាចជាផ្នែកមួយនៃយុទ្ធសាស្ត្ររបស់ប្រទេសចិន ដើម្បីប្រើប្រាស់ឥទ្ធិពលរបស់ខ្លួន ក្នុងការដោះស្រាយវិវាទនានានៅលើតំបន់ទន្លេមេគង្គ ដែលកើតចេញពីការសាងសង់ ឬអភិវឌ្ឍទំនប់វារីអគ្គិសនីរបស់បណ្ដាប្រទេសជាប់ទន្លេមេគង្គ និងការចែករំលែកអត្ថប្រយោជន៍រួមរវាងបណ្ដាប្រទេសខ្សែទឹកខាងលើ និងខ្សែទឹកខាងក្រោមនៃទន្លេមេគង្គ។ ប្រទេសចិន ដែលជាប្រទេសស្ថិតនៅខ្សែទឹកខាងលើនៃទន្លេមេគង្គ បានសាងសង់ទំនប់វារីអគ្គិសនីធំបំផុតចំនួន៧ ហើយគ្រោងនឹងសង់វារីអគ្គិសនីជាង ២០ ទៀត នៅលើផ្ទៃអាងទន្លេមេគង្គនេះ។ ប្រទេសចិន ក៏គ្រោងនឹងស្នើឲ្យមានការស្តាផ្ទៃអាងទន្លេមេគង្គកាត់តាមប្រទេសទាំង៦នេះ ដើម្បីបើកផ្លូវឲ្យនាវាដឹកជញ្ជូនទំនិញ អាចធ្វើដំណើរបានតាមទន្លេនេះនាពេលអនាគត។ ក្រុមអ្នកបរិស្ថាន និងរដ្ឋាភិបាលប្រទេសខ្សែទឹកខាងក្រោម ជាពិសេសប្រទេសវៀតណាម ធ្លាប់បានព្រមានពីផលប៉ះពាល់លើប្រព័ន្ធអេកូឡូស៊ី ដោយសារតែមហិច្ឆតាអនុវត្តគម្រោងអភិវឌ្ឍន៍វារីអគ្គិសនីទាំងនេះរបស់ប្រទេសចិន៕