ផលខូចខាតពីការទប់ទឹកទន្លេឱ្យ ស៊ី ជីនពីង
2021.08.12
យោងតាមរបាយការណ៍របស់អង្គការឃ្លាំមើលសិទ្ធិមនុស្ស យូមែន រ៉ៃស៍ វ៉ច្ឆ (HRW) ផ្សាយកាលពីថ្ងៃទី១០ ខែសីហា ទំនប់វារីអគ្គិសនីសេសានក្រោម ២ ដែលផ្តល់មូលនិធិដោយចិន បានធ្វើឱ្យពលរដ្ឋជនជាតិដើមភាគតិចរាប់ពាន់នាក់បាត់បង់ទីជម្រក និងបំផ្លាញជីវភាពរស់នៅរបស់ពលរដ្ឋជាច្រើនគ្រួសារផ្សេងទៀត។ អង្គការនេះ រកឃើញថា រដ្ឋាភិបាលកម្ពុជា និងចិន បានខកខានមិនបានផ្តល់សំណងសមរម្យដល់អ្នកភូមិដែលរងផលប៉ះពាល់ពីការខូចខាតដ៏ធំធេងបណ្តាលមកពីការសាងសង់ទំនប់វារីអគ្គិសនីនេះ ដែលជាគម្រោងមួយក្រោមគំនិតផ្តួចផ្តើមវិនិយោគលើហេដ្ឋារចនាសម្ព័ន្ធ «ខ្សែក្រវ៉ាត់ និងផ្លូវ» (BRI) របស់ប្រធានាធិបតីចិន លោក ស៊ី ជីនពីង (Xi Jinping)។ អង្គការដែលមានមូលដ្ឋាននៅបូរីញូវយ៉ក (New York) នេះ ក៏រកឃើញដែរថា ផលខូចខាតផ្នែកបរិស្ថាន និងបញ្ហានៃការធ្វើឱ្យអ្នកភូមិបាត់បង់ទីជម្រក ក៏ឆ្លុះបញ្ចាំងដែរថា ការផ្តល់មូលនិធិដោយគម្រោងខ្សែក្រវ៉ាត់ និងផ្លូវរបស់ចិន ធ្វើឡើងដោយ «ធ្វេសប្រហែស» គ្មានការត្រួតពិនិត្យត្រឹមត្រូវ។ ប៉ុន្តែ មន្ត្រីរដ្ឋាភិបាលកម្ពុជា ហៅរបាយការណ៍នេះថា មានចរិកបម្រើឱ្យប្រយោជន៍ «ភូមិសាស្ត្រនយោបាយ» និង ធ្វើ «វិទ្ធង្សនា» ប្រឆាំងទៅនឹងការអភិវឌ្ឍរបស់កម្ពុជា ដើម្បីបម្រើរបៀបវារៈនយោបាយមួយពិតប្រាកដតែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។