ពលរដ្ឋមានជម្លោះដីនៅក្នុងតំបន់បឹងកក់ យកញត្តិរបស់ខ្លួនដាក់ជូនរដ្ឋមន្ត្រីការបរទេសសហរដ្ឋអាមេរិក លោក ចន ឃែរី (John Kerry) កាលពីព្រឹកថ្ងៃទី២៦ ខែមករា។
ពលរដ្ឋមានជម្លោះដីនៅក្នុងតំបន់បឹងកក់ ដែលយកញត្តិរបស់ខ្លួនដាក់ជូនរដ្ឋមន្ត្រីការបរទេសសហរដ្ឋអាមេរិក លោក ចន ឃែរី ត្រូវបានសមត្ថកិច្ចរារាំង កាលពីព្រឹកថ្ងៃទី២៦ ខែមករា។
នៅថ្ងៃទី៣ ខែកុម្ភៈ ពលរដ្ឋជាច្រើនគ្រួសារនៅអមសងខាងប្រឡាយបង្ហូរទឹកស្អុយបឹងក្រពើ ស្ថិតសង្កាត់ស្ទឹងមានជ័យ តវ៉ាទៅអាជ្ញាធរមូលដ្ឋានឲ្យជួយទប់ស្កាត់ករណីក្រុមហ៊ុនដឹកអាចម៍ដីយកទៅចាក់លុបបឹង បណ្ដាលឲ្យទឹកជន់លិចផ្ទះ។
ក្រុមនិស្សិតនៃសាកលវិទ្យាល័យភូមិន្ទភ្នំពេញ ប្រារព្ធទិវាវប្បធម៌ ឆ្នាំ២០១៦ ដើម្បីអបអរពិធីបុណ្យចូលឆ្នាំប្រពៃណីជាតិ ដែលខិតជិតចូលមកដល់។ កម្មវិធីនេះធ្វើនៅថ្ងៃ២០ ខែមីនា ដែលមានមនុស្សប្រមាណ ១ពាន់នាក់ចូលរួម។
ពលរដ្ឋនៅជុំវិញតំបន់សាងសង់ទំនប់វារីអគ្គិសនីសេសានក្រោម២ ស្ថិតក្នុងស្រុកសេសាន ខេត្តស្ទឹងត្រែង។ សំណង់ទំនប់វារីអគ្គិសនីនេះ គឺជាចម្រូងចម្រាសមួយរវាងអាជ្ញាធរ និងអ្នកភូមិ ដោយសារទំនប់នេះធ្វើឲ្យប៉ះពាល់ដល់ជីវភាពពលរដ្ឋ។ រូបថតថ្ងៃទី២៧ ខែមីនា ឆ្នាំ២០១៦
អ្នកភូមិក្នុងស្រុកថាឡាបរិវ៉ាត់ ខេត្តស្ទឹងត្រែង ដងទឹកពីរណ្ដៅតាមអូរដើម្បីប្រើប្រាស់ កាលពីថ្ងៃទី២៩ ខែមេសា ឆ្នាំ២០១៦។ ពលរដ្ឋស្រុកនេះជួបគ្រោះរាំងស្ងួត ហើយទឹកអណ្ដូងភាគច្រើនរីងខះ ពុំមានទឹក។
មន្ត្រីសិទ្ធិមនុស្ស ៤នាក់ និងមន្ត្រីគ.ជ.ប ម្នាក់ ត្រូវបានអង្គភាពប្រឆាំងអំពើពុករលួយឃាត់ខ្លួនកាលពីចុងខែមេសា។ អ្នកទាំង៥ ត្រូវបានតុលាការឃុំខ្លួនកាលពីដើមខែឧសភា ទាក់ទងនឹងអំពើពុករលួយ។
ក្រុមសមត្ថកិច្ចប្រដាប់ដោយដំបង និងខែល រារាំងមិនឲ្យក្រុមអ្នកតវ៉ាដែលគាំទ្រមន្ត្រីសិទ្ធិមនុស្ស និងមន្ត្រី គ.ជ.ប ស្រែកតវ៉ានៅខាងមុខសាលាដំបូងរាជធានីភ្នំពេញ កាលពីថ្ងៃទី១ ឧសភា។
មន្ត្រីជាន់ខ្ពស់គណបក្សសង្គ្រោះជាតិ និងអ្នកគាំទ្រ ហែញត្តិស្នាមមេដៃទៅថ្វាយព្រះមហាក្សត្រ កាលពីថ្ងៃទី៣០ ឧសភា ដើម្បីសុំព្រះរាជអន្តរាគមន៍ពីព្រះមហាក្សត្រ ជួយដោះលែងមន្ត្រីសិទ្ធិមនុស្ស មន្ត្រីគ.ជ.ប និងមន្ត្រីបក្សប្រឆាំងដែលកំពុងជាប់ឃុំ។
កងកម្លាំងរក្សាសន្តិភាពកម្ពុជា ៣៩០នាក់ នៅដើមខែមិថុនា បានវិលត្រឡប់មកដល់កម្ពុជាវិញ បន្ទាប់ពីចូលរួមបំពេញបេសកកម្មរបស់អង្គការសហប្រជាជាតិនៅទ្វីបអាហ្វ្រិក។
នៅក្នុងខែមិថុនា នេះដែរ អង្គការសម្ព័ន្ធមិត្តខ្មែរ-អាមេរិកាំង ដឹកនាំធ្វើបាតុកម្មនៅមុខរដ្ឋសភាសហរដ្ឋអាមេរិក ដើម្បីទាមទារឲ្យរដ្ឋាភិបាលអាមេរិក ដាក់ទណ្ឌកម្មផ្នែកសេដ្ឋកិច្ច និងការទូតទៅលើរដ្ឋាភិបាលលោកនាយករដ្ឋមន្ត្រី ហ៊ុន សែន រហូតដល់មានការដោះលែងអ្នកទោសនយោបាយ។
លោក កែម ឡី អ្នកស្រាវជ្រាវការអភិវឌ្ឍសង្គម ត្រូវបានឃាតកបាញ់សម្លាប់នៅ Star Mart ស្តុបបូកគោ ក្នុងខណ្ឌចំការមន នៅម៉ោងប្រមាណជិត ៩ព្រឹក ថ្ងៃទី១០ ខែកក្កដា ឆ្នាំ២០១៦។
នៅក្នុងថ្ងៃដដែល សពលោកបណ្ឌិត កែម ឡី ត្រូវបានពលរដ្ឋដង្ហែយកទៅតម្កល់នៅវត្តចាស់ ស្ថិតក្នុងសង្កាត់ជ្រោយចង្វារ។
បន្ទាប់ពីតម្កល់ធ្វើបុណ្យនៅវត្តចាស់ បានពីរសប្ដាហ៍ សពបណ្ឌិត កែម ឡី ត្រូវបានក្រុមគ្រួសារ និងពលរដ្ឋមកពីគ្រប់ទិសទីរាប់សែននាក់ ដង្ហែទៅបញ្ចុះនៅខេត្តតាកែវ ជាស្រុកកំណើតរបស់លោក។
តំណាងសហគមន៍បឹងកក់ អ្នកស្រី ទេព វន្នី និង បូវ សោភា ត្រូវបានសមត្ថកិច្ចចាប់បញ្ជូនមកកាន់សាលាដំបូងរាជធានីភ្នំពេញ កាលពីថ្ងៃទី១៧ សីហា ទាក់ទងនឹងសកម្មភាពថ្ងៃច័ន្ទពណ៌ខ្មៅ។ សកម្មជនតវ៉ារឿងដីធ្លី មកគាំទ្រ និងស្រែកទាមទារឲ្យតុលាការដោះលែងអ្នកទាំង២។
នៅថ្ងៃទី៣១ ខែសីហា ដដែល កងកម្លាំងចម្រុះរបស់រដ្ឋាភិបាល ប្រើបើកអូប័រល្បាតក្នុងទន្លេ ខាងក្រោយទីស្នាក់ការគណបក្សសង្គ្រោះជាតិ នាសង្កាត់ចាក់អង្រែលើ។
នៅថ្ងៃ៣១ សីហា ដដែល ក៏មានឧទ្ធម្ភាគចក្រ ហោះឆ្វែលជុំវិញ និងបើកល្បាតទៅវិញទៅមកកាត់មុខទីស្នាក់ការគណបក្សសង្គ្រោះជាតិ នោះដែរ។ ទោះយ៉ាងណាមន្ត្រីរដ្ឋាភិបាលអះអាងថា នោះគឺជាការធ្វើសមយុទ្ធរបស់កងទ័ព។
មនុស្សរាប់ពាន់នាក់ចូលរួមដង្ហែសពលោក គ្រីស្យង់ ហ្គោកឺឡាំង ដេប៉ាលីយ៉ែរ (Christian GAUQUELIN des PALLIERES) ស្ថាបនិកអង្គការដើម្បីភាពញញឹមនៃកុមារ (PSE) យកទៅបូជានៅវត្តឫស្សីសាញ់ ក្នុងខណ្ឌដង្កោ កាលពីថ្ងៃទី២៦ ខែកញ្ញា។ លោកទទួលមរណភាពនៅថ្ងៃទី២៤ ខែកញ្ញា។
ចំណែកនៅឯដើមខែតុលា វិញ មានពលរដ្ឋខ្មែររស់នៅអូស្ត្រាលី ប្រមាណ ៥០០នាក់ នាំគ្នាតវ៉ាប្រឆាំងនឹងវត្តមានកូនប្រុសច្បងលោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ាណែត។
ក្នុងខែតុលា នេះដែរ ប្រធានាធិបតីចិន លោក ស៊ី ជីនពីង (Xi Jinping) បានមកដល់ប្រទេសកម្ពុជា ដើម្បីធ្វើទស្សនកិច្ចផ្លូវរដ្ឋរយៈពេល ២ថ្ងៃ គឺចាប់ពីថ្ងៃទី១៣ ដល់ថ្ងៃទី១៤។
គណៈកម្មការរៀបចំបុណ្យ ១០០ថ្ងៃ សពបណ្ឌិត កែម ឡី នៅព្រឹកថ្ងៃទី១៤ ខែតុលា ចាប់ផ្ដើមរៀបចំលើកបដា តាំងរូបថត និងគំនូរផ្សេងៗទាក់ទងនឹងលោកបណ្ឌិតនៅវត្តចាស់ ដើម្បីធ្វើពិធីបុណ្យខួប ១០០ថ្ងៃសពលោកបណ្ឌិត ដែលចាប់ផ្ដើមពីថ្ងៃទី១៤ ដល់ថ្ងៃទី១៧ ខែតុលា។
នៅថ្ងៃទី១៥ ខែតុលា មន្ត្រីជាន់ខ្ពស់រដ្ឋាភិបាល និងមន្ត្រីស្ថាប័នកំពូលៗជាច្រើននាក់ ធ្វើពិធីដាក់កម្រងផ្កា គោរពវិញ្ញាណក្ខន្ធព្រះបរមរតនកោដ្ឋ នរោត្ដម សីហនុ ក្នុងខួប ៤ឆ្នាំនៃថ្ងៃសោយទិវង្គតរបស់ព្រះអង្គ នាព្រះបរមរូបក្បែរវិមានឯករាជ្យ។
មន្ត្រីបរិស្ថានខេត្តព្រះវិហារ បណ្ដាញព្រះសង្ឃឯករាជ្យ និងសហគមន៍ ចុះល្បាតព្រៃព្រះរកា មានទីតាំងជាប់ស្រុក៤ ក្នុងខេត្តព្រះវិហារ គឺស្រុកឆែប ត្បែងមានជ័យ ជាំក្សាន្ត និងស្រុកជ័យសែន ចាប់ផ្ដើមពីថ្ងៃទី២៩ ដល់ថ្ងៃទី៣១ តុលា។ ពួកគេបានប្រទះឃើញគំនរឈើមួយចំនួន។
ព្រះមហាក្សត្រ ព្រះករុណា ព្រះបាទសម្ដេច នរោត្ដម សីហមុនី បានយាងចូលរួមទិវាបុណ្យខួបឯករាជ្យជាតិលើកទី៦៣ នាវិមានឯករាជ្យ កាលពីថ្ងៃទី៩ ខែវិច្ឆិកា។
នៅក្នុងខែវិច្ឆិកានេះដែរ កម្ពុជាប្រារព្ធព្រះរាជពិធីបុណ្យអុំទូកឡើងវិញ គឺចាប់ផ្ដើមពីថ្ងៃទី១៣ ដល់ថ្ងៃទី១៥។ ពិធីបុណ្យនេះ ត្រូវបានរដ្ឋាភិបាលផ្អាកអស់រយៈពេល ៤ឆ្នាំ។
ព្រះសពព្រះតេជព្រះគុណ សំ ប៊ុនធឿន ត្រូវបានបូជានៅទី៣ ខែធ្នូ នៅភ្នំព្រះរាជទ្រព្យ (ភ្នំឧត្ដុង្គ)។ ពិធីបូជាព្រះសពនេះ មានព្រះសង្ឃ និងពលរដ្ឋជាច្រើនចូលរួម។ ព្រះអង្គត្រូវបានឃាតកបាញ់ប្រហារកាលពីដើមឆ្នាំ២០០៣ ក្នុងបរិវេណវត្តលង្កា នារាជធានីភ្នំពេញ។
ព្រះសពព្រះតេជព្រះគុណ សំ ប៊ុនធឿន ត្រូវបានបូជានៅទី៣ ខែធ្នូ នៅភ្នំព្រះរាជទ្រព្យ (ភ្នំឧត្ដុង្គ)។ ពិធីបូជាព្រះសពនេះ មានព្រះសង្ឃ និងពលរដ្ឋជាច្រើនចូលរួម។ ព្រះអង្គត្រូវបានឃាតកបាញ់ប្រហារកាលពីដើមឆ្នាំ២០០៣ ក្នុងបរិវេណវត្តលង្កា នារាជធានីភ្នំពេញ។
នៅខាងចុងខែធ្នូ កម្ពុជា-ចិន ធ្វើលំហាត់យោធារួមគ្នា (លំហាត់នាគមាសលើកទី១) នាវិទ្យាស្ថានកងទ័ពជើងគោក ខេត្តកំពង់ស្ពឺ។
នៅក្នុងពិធីបិទលំហាត់នាគមាសលើកទី១ នៅថ្ងៃទី២៣ ខែធ្នូ រដ្ឋាភិបាលកម្ពុជា និងចិន លើកឡើងថា ទំនាក់ទំនងផ្នែកយោធាទ្វេភាគីកំពុងរីកចម្រើនដល់ចំណុចថ្មីមួយ។ ភាគីទាំងពីរប្ដេជ្ញាពង្រឹងចំណងការទូតយោធានេះឲ្យកាន់តែរឹងមាំ។