ពិព័រណ៍រូបថតអំពីស្ថានភាពពលរដ្ឋខ្មែរនៅជំរំជនភៀសខ្លួនលើទឹកដីថៃ
2016.12.06
នៅមជ្ឈមណ្ឌលបុប្ផាណា មានការដាក់តាំងរូបដែលថតដោយអ្នកកាសែតជនជាតិអាមេរិកាំងម្នាក់ បង្ហាញពីស្ថានភាពរស់នៅរបស់ពលរដ្ឋខ្មែររាប់ម៉ឺននាក់ ដែលភៀសខ្លួនទៅតាមជំរំលើទឹកដីថៃ ជាប់ព្រំដែន ក្រោយពីរបបខ្មែរក្រហមត្រូវបានផ្ដួលរំលំដោយក្រុមរណសិរ្សរួបរួមសង្គ្រោះជាតិកម្ពុជា ដែលគាំទ្រដោយកងទ័ពវៀតណាម នៅឆ្នាំ១៩៧៩។ ពិព័រណ៍រូបថតនេះចាប់ផ្ដើមពីថ្ងៃទី២ ខែធ្នូ ឆ្នាំ២០១៦ រហូតដល់ថ្ងៃទី១៦ ខែមករា ឆ្នាំ២០១៧។
លោក ស្ទេហ្វាន អេលីស៍ (Stefan A. Ellis) គឺជាអ្នកថតរូបជនជាតិអាមេរិកាំងម្នាក់កើតនៅឆ្នាំ១៩៦៥ នៅទីក្រុងវ៉ាស៊ីនតុន ហើយទទួលមរណភាពនៅឆ្នាំ១៩៩៦ ដោយធ្វើអត្តឃាត។ លោកធ្វើការជាអ្នកថតរូបឲ្យសារព័ត៌មាននៅអាស៊ីអាគ្នេយ៍ រុស្ស៊ី និងអ៊ីស្រាអែល។ លោកធ្លាប់ធ្វើជាអ្នកកែគុណភាពរូបថតសម្រាប់ទីភ្នាក់ងារសារព័ត៌មានបារាំង នៅទីក្រុងហុងកុង។ នៅឆ្នាំ១៩៩១ លោកបានមកបើកការិយាល័យទីភ្នាក់ងារនេះនៅទីក្រុងភ្នំពេញ៕