ប៉ូលិស​ខេត្ត​បាត់ដំបង​ឃាត់​ខ្លួន​មេខ្យល់​ម្នាក់​និង​ពលករ​ខ្មែរ​៣១​នាក់

នគរបាល​ខេត្ត​បាត់ដំបង បាន​​​ឃាត់​ខ្លួន​មេខ្យល់ ឬ​អ្នក​នាំ​មនុស្ស​ទៅ​ធ្វើ​ការ​ម្នាក់ និង​ពលករ​ខ្មែរ​​​​​ចំនួន ៣១​នាក់ ​​កាល​ពី​ថ្ងៃ​ទី​​​១៥ ខែ​សីហា នៅ​គ្រា​ដែល​​ក្រុម​ពលករ​ខ្មែរ​​​ទាំង​នោះ​ត្រូវ​បាន​មេខ្យល់​ព្យាយាម​នាំ​ពួកគេ​​​ឆ្លង​ដែន​ពី​ទឹក​ដី​ខ្មែរ​ក្នុង​ស្រុក​កំរៀង ខេត្ត​បាត់ដំបង ចូល​ទៅ​រក​ការងារ​ធ្វើ​នៅ​ប្រទេស​ថៃ ដោយ​ខុស​ច្បាប់។
ដោយ សួន សុផលមុន្នី
2011.08.17
Share on WhatsApp
Share on WhatsApp

ពលករ​ខ្មែរ​ចំនួន ៣១​នាក់ ត្រូវ​បាន​គេ​បញ្ជូន​ទៅ​ឲ្យ​តុលាការ​ខេត្ត​បាត់ដំបង សាកសួរ​នៅ​ថ្ងៃ​ពុធ ទី​១៧ ខែ​សីហា ឆ្នាំ​២០១១ នេះ ដើម្បី​ផ្ដល់​ចម្លើយ​ចោទ​ប្រកាន់​ទៅ​លើ​មេខ្យល់​ម្នាក់​ដែល​បាន​ព្យាយាម​នាំ​ពួកគេ​ឆ្លង​ដែន​ពី​ទឹក​ដី​ខ្មែរ​ទៅ​រក​ការងារ​ធ្វើ​នៅ​ក្នុង​ប្រទេស​ថៃ។

លោក​ឧត្ដមសេនីយ៍ ស ថេត ស្នងការ​នគរបាល​ខេត្ត​បាត់ដំបង បាន​បញ្ជាក់​ថា សមត្ថកិច្ច​ជំនាញ​បាន​កសាង​សំណុំ​រឿង​រួច​រាល់​ហើយ ដើម្បី​បញ្ជូន​អ្នក​ទាំង​នោះ​ទៅ​តុលាការ​ចាត់ការ​តាម​នីតិវិធី​ច្បាប់ ៖ «យើង​បញ្ជូន​ទាំង​អស់​ហ្នឹង​ទៅ ដើម្បី​គាត់​សាកសួរ​ព័ត៌មាន​បន្ថែម​ដើម្បី​ដាក់​បន្ទុក​ទៅ​លើ​មេខ្យល់​ហ្នឹង ពេល​សាកសួរ​ហើយ​បាន​បញ្ជូន​ទៅ​ឲ្យ​សង្គមកិច្ច ដើម្បី​អប់រំ​ឲ្យ​ទៅ​ផ្ទះ​វិញ អា​ហ្នឹង​ចំពោះ​ពលករ។ រី​ឯ​មេខ្យល់​វិញ​មិន​ដឹង​គាត់​មាន​ចំណាត់​ការ​យ៉ាង​ម៉េច​ទេ»

នាយ​ការិយាល័យ​ប្រឆាំង​ការ​ជួញដូរ និង​ការពារ​អនីតិជន លោក កុយ ហៀង បាន​មាន​ប្រសាសន៍​​ថា ពលករ​ទាំង​នោះ​ត្រូវ​បាន​មេខ្យល់​ឈ្មោះ សុវណ្ណ សុភា អាយុ ៣៦​ឆ្នាំ ប្រើប្រាស់​ឯកសារ​របស់​ក្រុមហ៊ុន​មួយ​ឈ្មោះ C.T. ASIA LABOR នាំ​​ឆ្លងដែន​​ទៅ​ធ្វើការ​នៅ​រោងចក្រ និង​ធ្វើ​ជា​​កម្មករ​ផ្លូវ​ដែក​នៅ​ប្រទេស​ថៃ ដោយ​ក្នុង​មួយ​ថ្ងៃ​ពលករ​ទាំង​នោះ​ត្រូវ​ទទួល​បាន​ប្រាក់​ឈ្នួល ២៣៥​បាត។ ពលករ​ទាំង ៣១​នោះ ពុំ​មាន​ឯកសារ និង​លិខិត​ឆ្លង​ដែន​ទេ តែ​មេខ្យល់​ឈ្មោះ សុវណ្ណ សុភា ប្រាប់​ពួក​គេ​ឲ្យ​រង់ចាំ​ធ្វើ​លិខិត​ឆ្លង​ដែន​នៅ​ក្នុង​ប្រទេស​ថៃ។

លោក​បន្ត​ថា មេខ្យល់​ឈ្មោះ សុវណ្ណ សុភា ធ្លាប់​បាន​នាំ​ពលករ​ឆ្លង​ដែន​ទៅ​ប្រទេស​ថៃ ចំនួន​ពីរ​ដង ក្នុង​មួយ​ដងៗ​មាន​មនុស្ស​ជាង ១០​នាក់ ៖ «ចោទ​ក្នុង​មាត្រា​១១ ស្ដីពី​នាំ​យក​ចេញ​ដោយ​មិន​ស្រប​ច្បាប់ សម្រាប់​នាំ​ឆ្លង​ដែន មួយ​ទៀត​នៅ​ក្នុង​មាត្រា ៣៧៧ និង ៣៧៨ ស្ដីពី​បទ​ឆបោក បើ​តាម​ស្ថាន​ទម្ងន់​ទោស​នៅ​ក្នុង​មាត្រា​ទី​១១ ពី ៧​ឆ្នាំ ទៅ ១៥​ឆ្នាំ បើ​សិន​ជា​នៅ​ក្នុង​មាត្រា​ទី​១១ បើ​សិន​ជា​មាន​អនីតិជន​ទៀត គឺ​មាន​ទោស​ពី ១៥​ឆ្នាំ ទៅ ២០​ឆ្នាំ»

លោក យិន ម៉េងលី ប្រធាន​សម្របសម្រួល​នៃ​សមាគម​អាដហុក ប្រចាំ​ខេត្ត​បាត់ដំបង បាន​ថ្លែង​ថា ការ​ទប់ស្កាត់​លំហូរ​ពលករ​ខ្មែរ​ឆ្លង​ដែន​ខុស​ច្បាប់​ទៅ​ក្រៅ​ប្រទេស គឺ​ការងារ​រួម​ទាំង​អស់​គ្នា ជា​ពិសេស​នៅ​តាម​ច្រក​ព្រំដែន​កម្ពុជា-​ថៃ ដែល​ការងារ​នេះ​ទាមទារ​ឲ្យ​មាន​វិធានការ​ទប់​ស្កាត់​ឲ្យ​បាន​តឹងរ៉ឹង ជៀស​វាង​ការ​យក​ថវិកា​បន្តិច​បន្តួច​ជា​កត្តា​សំខាន់។

លោក​បន្ត​ថា ៖ «ហើយ​ក៏​សូម​អំពាវនាវ​ដល់​ប្រជាពលរដ្ឋ​ធ្វើការ​ពិចារណា​ឲ្យ​មែនទែន​ក្នុង​ការ​ធ្វើ​ចំណាក​ស្រុក​នេះ បើ​កាលណា​យើង​ធ្វើ​ចំណាក​ស្រុក​មិន​បាន​ត្រឹមត្រូវ​ទេ វា​មិន​បាន​ផល​មក​លើ​យើង​វិញ​ទេ វា​មិន​មែន​ធ្វើ​ឲ្យ​ជីវភាព​យើង​បាន​ធូរធារ វា​ធ្វើ​ឲ្យ​យើង​ខូច​អនាគត ជួនកាល​អាច​បាត់បង់​អាយុ​ជីវិត​យើង​ថែម​ទៀត​ក៏​មាន​ដែរ»

លោក​បាន​បន្ត​ថា នៅ​ក្នុង​ឆ្នាំ​២០១១​នេះ សមាគម​អាដហុក បាន​ទទួល​ពាក្យ​បណ្ដឹង​ទាក់ទង​ករណី​ជួញដូរ​ចំនួន​បី​ករណី ក្នុង​នោះ​មាន​ពាក់ព័ន្ធ​ទៅ​នឹង​ការ​ធ្វើ​ចំណាកស្រុក ហើយ​ត្រូវ​បាន​មេខ្យល់​នាំ​យក​ទៅ​លក់​ធ្វើ​ជា​ទាសករ​នៅ​លើ​ទូក​ក្នុង​ប្រទេស​ម៉ាឡេស៊ី។ ករណី​២ គឺ​មាន​ពលករ​ខ្មែរ​ត្រូវ​ចាញ់​បោក​ជនជាតិ​ថៃ តាម​រយៈ​ការ​ធ្វើ​លិខិត​ឆ្លង​ដែន​ក្លែងក្លាយ​នាំ​ទៅ​ប្រទេស​ម៉ាឡេស៊ី និង​ករណី​ទី​៣ មាន​ពលករ​ខ្មែរ​ដែល​បាន​ទៅ​តាម​រយៈ​ក្រុមហ៊ុន ប៉ុន្តែ​រហូត​មក​ដល់​ពេល​នេះ​មាន​ការ​ផុត​កំណត់​ហើយ ឪពុក​ម្តាយ​របស់​ពួក​គេ​នៅ​មិន​ទាន់​ឃើញ​កូនៗ ​វិល​ត្រឡប់​ពី​ប្រទេស​ម៉ាឡេស៊ីម ក​ប្រទេស​កម្ពុជា​វិញ​នោះ​ឡើយ៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។