បទវិភាគ៖ តើក្រុមហ៊ុនផានអ៊ីមិចឬអ្នកបុរីកីឡាជាអ្នកបំពានច្បាប់?
2014.01.03
ក្រុមពលរដ្ឋដែលមានជំនឿមាំថា ពួកគេមានសិទ្ធិស្របច្បាប់ ដើម្បីទទួលបានអគារ ២ខ្នងសាងសង់ដោយក្រុមហ៊ុន ផាន អ៊ីមិច តាមកិច្ចសន្យានោះ ប្រកាសថានឹងហ៊ានប្ដូរជីវិតដើម្បីការពារកម្មសិទ្ធិស្របច្បាប់របស់ខ្លួន។ ចំណែកភាគីក្រុមហ៊ុន ផាន អ៊ីមិច ដែលមាននាយករដ្ឋមន្ត្រី និងអតីតអភិបាលក្រុងភ្នំពេញ ជួយពីក្រោយខ្នងអោយបំពានកិច្ចសន្យានោះ ចោទពលរដ្ឋបុរីកីឡា វិញថា ជាអ្នកខុសច្បាប់។
តើភាគីក្រុមហ៊ុន ផាន អ៊ីមិច ឬភាគីពលរដ្ឋជាអ្នកបំពានច្បាប់ ក្នុងវិវាទដីធ្លីសហគមន៍បុរីកីឡា?
ចូលដល់ឆ្នាំទី២ហើយដែលពលរដ្ឋតំបន់បុរីកីឡា ចំនួនជាង ១០០គ្រួសារ ទ្រាំតស៊ូរស់នៅក្នុងសភាពចង្អៀតណែនណាន់តាន់តាប់ក្បែរគំនរសំរាម ហ៊ុំព័ទ្ធទៅដោយក្លិនស្អុយអសោចក្បែរទីតាំងដីចាស់ដែលខ្លួនធ្លាប់រស់នៅ បន្ទាប់ពីត្រូវបានបណ្ដេញចេញពីបុរីកីឡា ក្រោមហេតុផលថា រស់នៅដោយខុសច្បាប់។
ការអូសបន្លាយជម្លោះដីធ្លីនៅសហគមន៍បុរីកីឡា រហូតមកដល់ពេលនេះ ក៏ដោយសារតែតុលាការមិនហ៊ានបើកសវនាការកាត់សេចក្តីលើបណ្ដឹងរបស់អ្នកភូមិបុរីកីឡា។ តុលាការ មិនហ៊ានកាត់សេចក្តីដោះស្រាយរឿងក្តីដ៏រសើបមួយនេះ ក៏ប្រហែលជាដោយសារតែសំណុំរឿងមួយនេះមានជាប់ពាក់ព័ន្ធនឹងលោកនាយករដ្ឋមន្ត្រី ហ៊ុន សែន ដែលជាអ្នកគាំទ្រក្រុមហ៊ុន ផាន អ៊ីមិច អោយប្រព្រឹត្តអំពើដែលគេចាត់ទុកថារំលោភច្បាប់។
កិច្ចសន្យាសាងសង់អគាររវាងក្រុមហ៊ុន ផាន អ៊ីម៉ិច និងពលរដ្ឋបុរីកីឡា ចុះកាលបរិច្ឆេទថ្ងៃទី៥ ខែមករា ឆ្នាំ២០០៤ មានស្នាមផ្ដិតមេដៃរបស់ អ្នកស្រី ស៊ុយ សុផាន ម្ចាស់ក្រុមហ៊ុន ផាន អ៊ីមិច និងស្នាមផ្ដិតមេដៃតំណាងសហគមន៍បុរីកីឡា ចំនួន ១២នាក់។ កាន់តែរឹងមាំនៃភាពស្របច្បាប់ទៅទៀតនោះ គឺកិច្ចសន្យានេះក៏មានស្នាមមេដៃ លោក កែប ជុតិមា ដែលពេលនោះជាអភិបាលរាជធានីភ្នំពេញ ធ្វើជាសាក្សី។ កិច្ចសន្យានិយាយថា ក្រុមហ៊ុន ផាន អ៊ីម៉ិច ត្រូវសង់អគារចំនួន ១០ខ្នងអោយទៅអ្នកភូមិបុរីកីឡា រស់នៅ។ ជាថ្នូរនឹងការសាងសង់នេះ ក្រុមហ៊ុន ផាន អ៊ីម៉ិច ទទួលបានដីទំហំជាង ២ហិកតារកន្លះពីរដ្ឋ សម្រាប់សាងសង់ផ្ទះល្វែងជាកម្មសិទ្ធិផ្ទាល់ខ្លួននៅក្នុងសហគមន៍បុរីកីឡា ដដែលនោះ។
កិច្ចសន្យាមានកម្រាស់ ៤ទំព័រ ដែលវិទ្យុអាស៊ីសេរី ទទួលបានសរសេរថា៖ «ក្រុមហ៊ុន ផាន អ៊ីមិច សាងសង់អគារចំនួន ១០អគារ រួមមានជាល្វែងស្នាក់នៅជូនពលរដ្ឋសហគមន៍បុរីកីឡា ចំនួន ១.៧៧៦គ្រួសារ។ អគារចំនួន ១០អគារ មានកម្ពស់ ៦ជាន់ សាងសង់នៅលើផ្ទៃដី ២ហិកតារ ស្ថិតនៅក្នុងទីតាំងបុរីកីឡា ដូចមាននៅក្នុងប្លង់ចែករំលែកដីធ្លីរបស់មន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ ចុះថ្ងៃទី២១ ខែតុលា ឆ្នាំ២០០៣ ដែលចាត់ទុកជាផ្នែកមួយនៃកិច្ចសន្យា»។
ដើម្បីធានានូវការប្ដេជ្ញាចិត្ត និងភាពប្រាកដប្រជារបស់ក្រុមហ៊ុន កិច្ចសន្យាបញ្ជាក់ទៀតថា ភាគីក្រុមហ៊ុនធានាបញ្ចប់ការសាងសង់អោយបានចប់សព្វគ្រប់ក្នុងរយៈពេល ៣០ខែ។ ក្នុងប្រការ៤ នៃកិច្ចសន្យាដាក់កំហិតថា៖ «ករណីដែលមានការយឺតយ៉ាវក្នុងការសាងសង់ ដែលបណ្ដាលមកពីភាគី "ខ" ឬភាគីក្រុមហ៊ុន ក្រុមហ៊ុន ផាន អ៊ីមិច ត្រូវបង់ប្រាក់ពិន័យជូនភាគី "ក" ឬសហគមន៍បុរីកីឡា ចំនួន ១០លានរៀលក្នុងមួយខែ»។
បើទោះជាកិច្ចសន្យានេះបានចែងយ៉ាងច្បាស់អំពីកាតព្វកិច្ចផ្លូវច្បាប់ ដែលក្រុមហ៊ុនត្រូវសង់អោយបាន ១០អគារក៏ដោយ ប៉ុន្តែក្រោយពេលសង់បានតែ ៨អគារ ក្រុមហ៊ុន ផាន អ៊ីម៉ិច បានប្រកាសថា ខាតបង់ជាង ៣លានដុល្លារអាមេរិក នាំអោយមិនអាចសាងសង់ ២ខ្នងទៀតបានឡើយ។
ទោះជាយ៉ាងណា គ្មានការត្រួតពិនិត្យណាមួយសោះឡើយពីសមត្ថកិច្ចរដ្ឋ ឬតុលាការ ដើម្បីបញ្ជាក់ថា ក្រុមហ៊ុនពិតជាមានការខាតបង់មែនឬទេ។
ប្រការដែលក្រុមហ៊ុន ផាន អ៊ីម៉ិច ប្រកាសថា មិនអាចសាងសង់អគារពីរខ្នងទៀត ជូនសហគមន៍បុរីកីឡា បាន វាជាការបំពានកិច្ចសន្យាមួយរួចទៅហើយ។ ប៉ុន្តែអ្វីដែលអាចជាការបំពានច្បាប់ធ្ងន់ធ្ងរជាងនេះទៀតនោះ គឺក្រុមហ៊ុនដ៏មានខ្នងបង្អែកក្រាស់មួយនេះ បានទាមទារយកដីសម្រាប់សង់អគារ ២ខ្នងនោះ ជាកម្មសិទ្ធិខ្លួនថែមទៀត។ ហើយអ្វីដែលធ្វើអោយពលរដ្ឋ និងអ្នកសង្កេតការណ៍កាន់តែភ្ញាក់ផ្អើល និងស្លុតចិត្តនោះ គឺការទាមទារទាំងបំពានច្បាប់របស់ក្រុមហ៊ុន ផាន អ៊ីមិច ត្រូវបានលោកនាយករដ្ឋមន្ត្រី ហ៊ុន សែន យល់ព្រម។
ក្នុងលិខិតចុះកាលបរិច្ឆេទថ្ងៃទី១១ ខែមករា ឆ្នាំ២០១១ លោក កែប ជុតិមា ដែលកាលណោះជាអភិបាលក្រុងភ្នំពេញ បានផ្ញើទៅកាន់លោកនាយករដ្ឋមន្ត្រី ហ៊ុន សែន មានខ្លឹមសារយ៉ាងដូច្នេះ៖ «ខ្ញុំបាទសូមគោរពជូនសម្ដេចនាយករដ្ឋមន្ត្រី មេត្តាជ្រាបថា ក្រុមហ៊ុន ផាន អ៊ីមិច ជាក្រុមហ៊ុនទី១ដែលបានអនុវត្តគោលនយោបាយរបស់រាជរដ្ឋាភិបាល ក្នុងការអភិវឌ្ឍនៅនឹងកន្លែងបានជោគជ័យ នៅរាជធានីភ្នំពេញ។ ទោះបីគ្រឿងសម្ភារៈបរិក្ខារសំណង់ឡើងថ្លៃឥតឈប់ឈរលើសពីការកំណត់តម្លៃក្នុងកិច្ចសន្យា ស្របតាមការអភិវឌ្ឍសេដ្ឋកិច្ចក៏ដោយ ក៏ក្រុមហ៊ុននៅតែបន្តពុះពារសាងសង់បានចំនួន ៨អគារ គ្រប់តម្រូវការរបស់សហគមន៍។ តាមយោបល់របស់ខ្ញុំបាទយល់ឃើញថា ដើម្បីលើកទឹកចិត្តដល់ក្រុមហ៊ុនដែលបានអនុវត្តគោលនយោបាយរបស់រាជរដ្ឋាភិបាលល្អប្រសើរនោះ គួរប្រគល់ទីតាំងសម្រាប់សាងសង់អគារទី៩ និងទី១០ បួនពាន់បីរយម៉ែត្រការ៉េ (៤.៣០០) ជូនក្រុមហ៊ុន ផាន អ៊ីមិច ធ្វើការអភិវឌ្ឍផ្សេងៗ។ សេចក្តីដូចបានគោរពជម្រាបជូនខាងលើ សូមសម្ដេចនាយករដ្ឋមន្ត្រី មេត្តាជ្រាប និងសុំមតិណែនាំដោយអនុគ្រោះ។ ហត្ថលេខា និងត្រា អភិបាលរាជធានីភ្នំពេញ កែប ជុតិមា»។
ហើយនៅខាងស្តាំដៃក្រោមទំព័រ គេឃើញមានចំណារ និងហត្ថលេខារបស់លោកនាយករដ្ឋមន្ត្រី ហ៊ុន សែន ដែលបានឯកភាពតាមការចង់បានរបស់ លោក កែប ជុតិមា មានខ្លឹមសារយ៉ាងខ្លីថា៖ «យល់ព្រមតាមសំណើ ដោយចុះកាលបរិច្ឆេទក្នុងថ្ងៃដដែល គឺថ្ងៃទី១១ ខែមករា ឆ្នាំ២០១១»។
ក្នុងលិខិតរបស់ លោក កែប ជុតិមា ដាក់ជូនទៅលោកនាយករដ្ឋមន្ត្រី ហ៊ុន សែន មានបញ្ហា២ចំណុចយ៉ាងតិច។ ចំណុចទី១ គឺលោក កែប ជុតិមា ចេញមុខការពារក្រុមហ៊ុន ផាន អ៊ីមិច ដោយអះអាងថា សម្ភារៈសំណង់ឡើងថ្លៃ ដូច្នេះអាចសង់បានតែ ៨អគារប៉ុណ្ណោះ។ ក្នុងកិច្ចសន្យារវាងក្រុមហ៊ុន និងពលរដ្ឋបុរីកីឡា បានបញ្ជាក់យ៉ាងច្បាស់ថា ក្រុមហ៊ុនត្រូវសង់ ១០អគារ។ កិច្ចសន្យាមិនបាននិយាយអំពីថា ប្រសិនបើសម្ភារៈសំណង់ឡើងថ្លៃ ត្រូវសង់ត្រឹមតែ ៨អគារនោះទេ។ បញ្ហាទី២ គឺប្រហែលជា លោក កែប ជុតិមា ឃុបឃិតជាមួយក្រុមហ៊ុន ផាន អ៊ីមិច និយាយកុហកលោកនាយករដ្ឋមន្ត្រី ហ៊ុន សែន នៅពេលអតីតអភិបាលក្រុងភ្នំពេញរូបនេះ សរសេរប្រាប់លោកនាយករដ្ឋមន្ត្រីថា ចំនួនត្រឹម ៨អគារ ដែលក្រុមហ៊ុន ផាន អ៊ីមិច បានសាងសង់រួចនោះ គឺគ្រប់តម្រូវការរបស់សហគមន៍។
គេអាចលើកសំណួរមួយយ៉ាងសាមញ្ញថា ប្រសិនបើសហគមន៍បុរីកីឡា ត្រូវការត្រឹមតែ ៨អគារប៉ុណ្ណោះ ហេតុអ្វីបានជាកម្លាំងអាជ្ញាធររបស់ លោក កែប ជុតិមា ចាំបាច់ត្រូវចាប់បង្ខំដឹកពលរដ្ឋសហគមន៍បុរីកីឡា រាប់រយគ្រួសារអោយទៅនៅទីកន្លែងផ្សេង? មិនតែប៉ុណ្ណោះ ក៏នៅសល់អ្នកស៊ូស្លាប់មិនព្រមចេញចំនួនជាង ១០០គ្រួសារ ស្មើនឹងជាង ៥០០នាក់ទៀត ដែលកំពុងរស់នៅក្បែរទីកន្លែងចាស់របស់ពួកគាត់។
លើសពីនេះទៀត ខ្លឹមសារក្នុងលិខិតមួយចុះកាលបរិច្ឆេទថ្ងៃទី១៦ ខែមករា ឆ្នាំ២០០៤ ស្ដីពីការអភិវឌ្ឍលំនៅឋានជូនប្រជាពលរដ្ឋក្រីក្រនៅបុរីកីឡា ចំនួន ១.៧៧៦គ្រួសារ គឺជិត ២ពាន់គ្រួសារ ផ្ញើជូនលោកនាយករដ្ឋមន្ត្រី ហ៊ុន សែន លោក កែប ជុតិមា បានរៀបរាប់យ៉ាងលម្អិតអំពីការសិក្សាវាស់វែងប្លង់ដោយអ្នកជំនាញ និងស្ថាប័នពាក់ព័ន្ធយ៉ាងហ្មត់ចត់ ដែលចេញជាលទ្ធផលបញ្ជាក់ថា ប្រជាពលរដ្ឋបុរីកីឡា ចំនួន ១.៧៧៦គ្រួសារ ត្រូវការអគារចំនួន ១០ ដែលត្រូវសង់ដោយក្រុមហ៊ុន ផាន អ៊ីមិច។
ដូច្នេះ ការសាងសង់តែ ៨អគារ ហើយប្រើហិង្សាបណ្ដេញពលរដ្ឋចេញពីទីតាំងដីសម្រាប់អគារ២ ទៀតនោះ គឺផ្ទុយពីការសិក្សារបស់ លោក កែប ជុតិមា ខ្លួនឯងផង និងបំពានច្បាប់ផង ហាក់ដូចជាមានការឃុបឃិតគ្នាជាមួយក្រុមហ៊ុន ដើម្បីយកដីដ៏មានតម្លៃនៅកណ្ដាលរាជធានី ដែលជាកម្មសិទ្ធិរបស់ពលរដ្ឋសហគមន៍បុរីកីឡា។
យោងតាមក្រមរដ្ឋប្បវេណី រដ្ឋាភិបាល ឬភ្នាក់ងាររដ្ឋាភិបាល មិនមានសិទ្ធិអំណាចលូកដៃចូលជ្រៀតជ្រែកក្នុងជម្លោះដែលកើតចេញពីទំនាស់កិច្ចសន្យារវាងភាគីពលរដ្ឋឡើយ មានតែតុលាការប៉ុណ្ណោះដែលមានសិទ្ធិសម្រេចថា ភាគីណាត្រូវ ឬខុស។
វាកាន់តែច្បាស់ទៅទៀតនោះ ក្នុងកិច្ចសន្យាសាងសង់អគារ ១០ខ្នងរវាងក្រុមហ៊ុន ផាន អ៊ីម៉ិច និងប្រជាពលរដ្ឋសហគមន៍បុរីកីឡា ត្រង់ប្រការ៦ ស្ដីពីករណីវិវាទបានបញ្ជាក់ថា៖ «រាល់ការវិវាទដែលកើតក្នុងរយៈពេលអនុវត្តកិច្ចសន្យា ភាគីទាំងពីរនឹងសម្រុះសម្រួល ពិភាក្សាដោយសន្តិវិធី។ ករណីមិនមានការឯកភាពគ្នា ត្រូវកសាងសំណុំរឿងជូនតុលាការ ដើម្បីដោះស្រាយតាមផ្លូវច្បាប់»។
ប៉ុន្តែ ប្រធានក្រុមហ៊ុន ផាន អ៊ីម៉ិច លោកស្រី ស៊ុយ សុផាន ដែលស្និទ្ធនឹងគ្រួសាររបស់លោកនាយករដ្ឋមន្ត្រី ហ៊ុន សែន មិនបានទៅរកតុលាការទេ បែរជាទៅរកលោកនាយករដ្ឋមន្ត្រី។ ហើយលោកនាយករដ្ឋមន្ត្រី ហ៊ុន សែន ក៏បានសម្រេចយល់ព្រមតាមសំណើដែលបំពានច្បាប់នោះ។ បន្ទាប់មក ព្រឹត្តិការណ៍ហិង្សាបានប្រើគ្រឿងចក្រអមដោយកម្លាំងប្រដាប់អាវុធ ឈូសកម្ទេចផ្ទះសម្បែងរបស់ពលរដ្ឋបុរីកីឡា រាបដល់ដីនៅថ្ងៃទី៣ ខែមករា ឆ្នាំ២០១២ ដើម្បីបង្ខំអោយពួកគេចាកចេញដោយគ្មានដីកាពីតុលាការ។ ការប៉ះទង្គិចដោយហិង្សារវាងពលរដ្ឋ និងអាជ្ញាធរ ក៏បានផ្ទុះឡើងនាពេលនោះ។ ប៉ុន្តែ ពលរដ្ឋភាគច្រើនត្រូវបានបង្ខំចិត្តចាកចេញដោយត្រូវបានអាជ្ញាធរក្រុងដឹកទៅអោយរស់នៅទួលសំបូរ និងភ្នំបាត ក្បែរភ្នំឧត្តុង្គ ជាទីកន្លែងគ្មានការងារធ្វើ និងគ្មានហេដ្ឋារចនាសម្ព័ន្ធសម្រាប់រស់នៅសមរម្យ។
ប៉ុន្តែ ពលរដ្ឋប្រមាណជាង ១០០គ្រួសារ មិនព្រមចាកចេញ ស៊ូខាំស្មៅទ្រាំរស់នៅក្បែរដីចាស់ ក្រោមបរិយាកាសខ្វះអនាម័យធ្ងន់ធ្ងរ រហូតមកដល់សព្វថ្ងៃ ដើម្បីបន្តទាមទារអគារ ២ខ្នងទៀត ដូចមានក្នុងកិច្ចសន្យា។ អ្នកខ្លះប្ដេជ្ញាស៊ូស្លាប់នៅទីនោះ ប្រសិនបើមានការប្រើអំពើហិង្សាចាប់បង្ខំអោយពួកគេចាកចេញ។
ស៊ូទ្រាំរស់ក្នុងលក្ខខណ្ឌបែបនេះ ក៏ព្រោះតែពលរដ្ឋអ្នកបុរីកីឡា ទាំងនេះ នៅតែមានក្តីសង្ឃឹមថា យុត្តិធម៌ពិតជាកើតមាននៅថ្ងៃណាមួយ។ ប៉ុន្តែ ពួកគេក៏មិនដេករង់ចាំភ័ព្វសំណាង ឬចាំទេវតាចុះពីលើមេឃមកជួយពួកគេទេ។ ក្រៅតែពីដាក់ពាក្យបណ្ដឹងទៅតុលាការដែលមិនឃើញចាត់ការសោះនោះ គេឃើញប្រជាពលរដ្ឋទាំងនេះជាញឹកញាប់ចេញដើរចេញសម្ដែងមតិ តវ៉ាតាមទីកន្លែងនានា ជួបអ្នកសារព័ត៌មាន ហែក្បួនដាក់ញត្តិនៅតាមស្ថាប័នពាក់ព័ន្ធ តាមស្ថានទូតបរទេស និងអំពាវនាវសុំអោយព្រះមហាក្សត្រអោយជួយ ប៉ុន្តែគ្មានប្រយោជន៍ គ្មានលទ្ធផលផ្លែផ្កាអ្វីទាំងអស់ក្នុងរយៈកាលពីរឆ្នាំកន្លងមកនេះ។
គ្មានជម្រើសផ្សេងទៀតទេ នៅពេលក្តីសង្ឃឹមកាន់តែរួមតូចនោះ ពលរដ្ឋសហគមន៍បុរីកីឡា ទាំងនេះក៏តែងតែហែក្បួនទៅសុំអោយលោកនាយករដ្ឋមន្ត្រី ហ៊ុន សែន ជួយ បើទោះជាដឹងច្បាស់ថា ពួកគេហាក់ដូចជាកំពុងតែទៅសុំភ្លើងយក្សក៏ដោយចុះ។ ហាក់ដូចជាទៅសុំភ្លើងយក្ស ក៏ព្រោះតែគ្មានលទ្ធផល ហើយដឹងថា លោកនាយករដ្ឋមន្ត្រីរូបនេះឯង ជាអ្នកធ្វើអោយពួកគេជួបគ្រោះលំបាកក្នុងរយៈពីរឆ្នាំមកនេះ បន្ទាប់ពីលោកយល់ព្រមអនុញ្ញាតអោយក្រុមហ៊ុន ផាន អ៊ីមិច សាងសង់តែ ៨អគារ និងបណ្ដេញពួកគេចេញ ដែលជាការរំលោភកិច្ចសន្យាផង និងរំលោភក្រមរដ្ឋប្បវេណីផង។
ដោយមិនអាចពឹងផ្អែកលើប្រព័ន្ធច្បាប់ និងមនុស្សលោកគ្នាឯងបាន ពួកអ្នកស្រុកដែលមានកំហឹងក្នុងដើមទ្រូងទាំងនេះ បានងាកទៅពឹងពាក់ខ្មោចព្រាយបិសាចវិញម្តង។ ពួកគេបានបន់ស្រន់ដល់វត្ថុស័ក្តិសិទ្ធិដែលមានឫទ្ធានុភាព អោយជួយរកយុត្តិធម៌ដល់ពួកគេ។ ទន្ទឹមគ្នានោះ ក៏បានរៀបចំពិធីគួរអោយព្រឺព្រួចបែបអប្បិយជំនឿ ដាក់បណ្ដាសាដល់មន្ត្រីតុលាការ និងជនទាំងឡាយណាដែលពុករលួយ ធ្វើបាបរាស្ត្រ អោយជួបប្រទះតែគ្រោះមហន្តរាយដល់ខ្លួន និងក្រុមគ្រួសារ កើតជាតិណាៗអោយរងទុក្ខវេទនាអស់មួយជីវិត។
និយាយអំពី លោក កែប ជុតិមា ដែលជាតួអង្គសំខាន់ម្នាក់ក្នុងការបង្កើតអោយមានព្រឹត្តិការណ៍ប្រវត្តិសាស្ត្រនេះឡើងវិញម្តង។ អតីតអភិបាលក្រុងភ្នំពេញរូបនេះ បានដើរតួជាឈ្មួញកណ្ដាលសុំអោយលោកនាយករដ្ឋមន្ត្រី ហ៊ុន សែន យល់ព្រមតាមសំណើរបស់ប្រធានក្រុមហ៊ុន ផាន អ៊ីមិច ដែលបានស្នើសុំសង់ត្រឹមតែ ៨អគារ ហើយទម្លាក់ចោលការសាងសង់ពីរអគារទៀត។ ក្នុងន័យនេះ លោក កែប ជុតិមា បានជួយក្រុមហ៊ុនរឹបអូសយកដីសម្រាប់សង់ ២អគារនោះពីពលរដ្ឋ។ បន្ទាប់មក ក្រោយពីឃើញបាតុកម្មតវ៉ារបស់អ្នកភូមិបុរីកីឡា កាន់តែខ្លាំង លោក កែប ជុតិមា បែរជាចោទថា ទំនាស់ដីធ្លីនៅសហគមន៍បុរីកីឡា បានក្លាយជារឿងនយោបាយទៅវិញ។ នេះប្រហែលជាដូចពាក្យស្លោកខ្មែរពោលថា «ឆ្កែស៊ីបាយលាបមាត់ពពែ» ឬ «ចោររួចខ្លួនម្ចាស់ជាប់គុក» ដូច្នេះដែរ។
ចំណែកអភិបាលក្រុងភ្នំពេញថ្មី លោក ប៉ា សុជាតិវង្ស វិញ បន្ទាប់ពីបានឡើងកាន់តំណែងជំនួស លោក កែប ជុតិមា លោកហាក់ដូចជាផ្តល់ក្តីសង្ឃឹមខ្លះដល់សហគមន៍បុរីកីឡា និងបឹងកក់។ លោកបានប្រកាសថា នឹងដោះស្រាយបញ្ចប់ជម្លោះដីធ្លីនៅសហគមន៍ទាំងពីរនេះ ដោយលែងអោយមាននៅលើទំព័រកាសែតតទៅទៀត។ លើសពីនេះទៀត ប្រហែលជាលោកមានចិត្តចង់ជួយលុបលាងកំហុស ឬបាបកម្មខ្លះរបស់ លោក កែប ជុតិមា ដែលជាអតីតមេកើយរបស់លោកផង ទើបក្រោយការបោះឆ្នោតសភាជាតិឆ្នាំ២០១៣ លោក ប៉ា សុជាតិវង្ស បានយកស្បៀង មានអង្ករ និងមីកញ្ចប់ខ្លះ ទៅចែកជូនពលរដ្ឋសហគមន៍បុរីកីឡា ដែលកំពុងរស់នៅក្នុងភាពលំបាកលំបិន ខ្វះការហូបចុក ដែលជាសញ្ញាវិជ្ជមានមួយដល់អ្នកបុរីកីឡា។
ទោះជាយ៉ាងណា ទាំងក្រុមអ្នកច្បាប់ និងក្រុមសកម្មជនសិទ្ធិមនុស្ស ដែលបានតាមដានបញ្ហានេះសុទ្ធតែអះអាងថា វិវាទនេះ គឺជាជម្លោះទាក់ទងនឹងផ្លូវច្បាប់ មិនមែនជារឿងនយោបាយស្អីទេ ហើយភាគីពលរដ្ឋសហគមន៍បុរីកីឡា គឺជាអ្នកមានប្រៀបស្របច្បាប់ក្នុងជម្លោះនេះ គឺដោយសារតែពួកគេមានភស្តុតាងផ្លូវច្បាប់យ៉ាងរឹងមាំ។ ប្រហែលជាដោយសារតែហេតុផលនេះហើយ ទើបពីរឆ្នាំកន្លងមកនេះ តុលាការដែលមានកាតព្វកិច្ចផ្តល់យុត្តិធម៌មិនរើសមុខ បែរជាមិនហ៊ានបើកសវនាការចាត់ការបណ្ដឹងរបស់ពលរដ្ឋសហគមន៍បុរីកីឡា ទាល់តែសោះ។ ការមិនចាត់ការលើពាក្យបណ្ដឹងរបស់រាស្ត្របែបនេះ ក៏កាន់តែបញ្ជាក់ច្បាស់ថា តុលាការលម្អៀង និងបំពាននីតិវិធីតុលាការខ្លួនឯង។ ផ្ទុយទៅវិញ នៅពេលក្រុមហ៊ុន ផាន អ៊ីមិច ដាក់ពាក្យបណ្ដឹងមកម្តងៗ តុលាការតែងតែចាត់ការយ៉ាងប្រញាប់ប្រញាល់ ហាក់ដូចជាខ្លាចផង ដើម្បីផ្គាប់ផ្គុនម្ចាស់ក្រុមហ៊ុនផង និងលោកនាយករដ្ឋមន្ត្រី ហ៊ុន សែន ផង។
ចំណែកអ្នកភូមិបុរីកីឡា ជាង ១០០គ្រួសារ ស្មើនឹងជាង ៥០០នាក់ ដែលក្រីក្រគ្មានអំណាច និងមានអ្នកខ្លះជាមន្ត្រីរាជការ ប៉ូលិស ទាហានផងនោះ កំពុងរស់នៅប្រជ្រៀតគ្នាក្បែរគំនរសំរាមក្បែរដីចាស់ ដែលមានជម្លោះបន្តទៀត រង់ចាំក្រែងតុលាការភ្ញាក់ខ្លួនហ៊ានក្រោកឈររកយុត្តិធម៌ជូនពួកគេ។
រីឯសហគមន៍សិទ្ធិមនុស្សជាតិ និងអន្តរជាតិ ព្រមទាំងតំណាងសិទ្ធិមនុស្សអង្គការសហប្រជាជាតិផង បានថ្កោលទោសថា ជាអំពើរំលោភសិទ្ធិមនុស្សយ៉ាងធ្ងន់ធ្ងរ ហើយបន្តរង់ចាំមើលចំណាត់ការរបស់ លោក ប៉ា សុជាតិវង្ស អភិបាលរាជធានីភ្នំពេញថ្មី ដោយយកចិត្តទុកដាក់។
លោក កែប ជុតិមា អតីតអភិបាលរាជធានីភ្នំពេញ បដិសេធមិនធ្វើអត្ថាធិបាយជុំវិញជម្លោះដីធ្លីនៅសហគមន៍បុរីកីឡា ទេ ដោយលោកបានប្រាប់វិទ្យុអាស៊ីសេរី អោយសាកសួរបញ្ហានេះទៅអភិបាលរាជធានីភ្នំពេញថ្មី គឺលោក ប៉ា សុជាតិវង្ស វិញ៕