កម្ពុជា​នឹង​រៀបចំ​ប្រកួត​រត់​ពាក់​កណ្ដាល​ម៉ារ៉ាតុង​អន្តរជាតិ​​នៅ​​ដើម​ខែ​មីនា

ដោយ ដែន អយុធ្យា
2014.02.27
Share on WhatsApp
Share on WhatsApp
ម៉ារ៉ាតុង សៀមរាប ៦១០ អ្នក​ចូល​រួម​រត់​ប្រណាំង​ម៉ារ៉ាតុង នៅ​សៀមរាប នៅ​ថ្ងៃ​ទី​១ ធ្នូ ឆ្នាំ​២០១៣។
RFA/Hang Savyouth

ប្រទេស​កម្ពុជា ត្រៀម​រៀបចំ​ព្រឹត្តិការណ៍​ប្រកួត​រត់​ពាក់​កណ្ដាល​ម៉ារ៉ាតុង​អន្តរជាតិ នៅ​ខេត្ត​ព្រះសីហនុ នា​ដើម​ខែ​មីនា ឆ្នាំ​២០១៤ ដើម្បី​ប្រមូល​ថវិកា​មនុស្ស​ធម៌​ជូន​ដល់​កុមារ​កំព្រា និង​អភិវឌ្ឍន៍​ឆ្នេរ​សមុទ្រ​កម្ពុជា។ ប៉ុន្តែ​មន្ត្រី​រៀបចំ​ការ​ប្រកួត​ថ្លែង​ថា ឆ្នាំ​នេះ​ទំនង​ជា​មិន​សូវ​មាន​កីឡា​អាជីព​អន្តរជាតិ មក​ចុះ​ឈ្មោះ​​​ចូល​រួម​ប្រកួត​ច្រើន​ទេ ដោយ​ពួកគេ​រអ៊ូរទាំ​​អំពី​ការ​គ្មាន​ជើង​យន្តហោះ ហោះ​ត្រង់​​មក​​កម្ពុជា​​។

​គណៈកម្មាធិការ​ជាតិ​អូឡាំពិក​កម្ពុជា​ បាន​ឲ្យ​ដឹង​ថា ឆ្នាំ​នេះ ប្រទេស​កម្ពុជា បាន​យក​ថ្ងៃ​ទី​៩ ខែ​មីនា ដើម្បី​រៀបចំ​ប្រកួត​រត់​ពាក់​កណ្ដាល​ម៉ារ៉ាតុង​អន្តរជាតិ នា​ខេត្ត​ព្រះសីហនុ។ មន្ត្រី​រៀបចំ​ការ​ប្រកួត​រំពឹង​ថា ព្រឹត្តិការណ៍​នេះ​នឹង​មាន​កីឡាករ​​​កីឡា​ការិនី​ជាតិ និង​អន្តរជាតិ ចូល​រួម​ជាង ២​ពាន់​នាក់។

លោក វ៉ាត់ ចំរើន ជា​អគ្គលេខាធិការ​គណៈកម្មាធិការ​ជាតិ​អូឡាំពិក​កម្ពុជា និង​ជា​អ្នក​រៀបចំ​ការ​ព្រឹត្តិការណ៍​ប្រកួត​​​​​​​រត់​ម៉ារ៉ាតុង។ លោក​បាន​ឲ្យ​ដឹង​ថា ការ​ប្រកួត​រត់​ម៉ារ៉ាតុង​ឆ្នាំ​នេះ មាន​គោលបំណង​​ផ្សព្វផ្សាយ​​អប់រំ​ឲ្យ​ប្រជាពលរដ្ឋ ឬ​អ្នក​ពាក់ព័ន្ធ ចូល​រួម​ការ​ពារ​ធម្មជាតិ សង្គ្រោះ​​ផែនដី និង​សុខុមាលភាព​មនុស្ស​លោក។

​លោក​បន្ត​ថា មក​ដល់​ពេល​នេះ​មាន​កីឡាករ​កីឡា​ការិនី​ជាតិ និង​អន្តរជាតិ​ជាង ១.៥០០​នាក់ ​បាន​​ចុះ​ឈ្មោះ​ចូល​រួម​ប្រកួត។ ក្នុង​នោះ​មាន​កីឡាករ​អន្តរជាតិ​ជាង ២០​ប្រទេស​​​ និង​មាន​ចំនួន​ជាង ៣០០​នាក់។

​​លោក វ៉ាត់ ចំរើន បញ្ជាក់​ថា ការ​ប្រកួត​ឆ្នាំ​នេះ​ទំនង​ជា​មិន​សូវ​មាន​កីឡាករ​អាជីព​អន្តរជាតិ​មក​ចូល​រួម​ច្រើន​ទេ ដោយសារ​ពួកគេ​រអ៊ូរទាំ​អំពី​បញ្ហា​ពិបាក​ធ្វើ​ដំណើរ ព្រោះ​មិន​មាន​ជើង​យន្តហោះ​ត្រង់​ពី​ប្រទេស​​គេ​ទៅ​ដល់​ទីតាំង​រៀបចំ​ការ​ប្រកួត។

​​ព្រឹត្តិការណ៍​រត់​ប្រណាំង​ពាក់​កណ្ដាល​ម៉ារ៉ាតុង ក្នុង​ឆ្នាំ​២០១៣ កន្លង​ទៅ នា​ខេត្ត​សៀមរាប មាន​កីឡាករ កីឡា​ការិនី​ជាតិ​និង​អន្តរជាតិ​ជាង ៧.០០០​នាក់ មក​​ពី ៧៥​​ប្រទេស​ចូល​រួម​ប្រកួត។

​​មាន​វិញ្ញាសា ៣​ប្រភេទ​ដែល​គណៈកម្មការ​រៀបចំ​ការ​ប្រកួត​ដាក់​នៅ​ក្នុង​ព្រឹត្តិការណ៍​​​រត់​ពាក់​កណ្ដាល​​ម៉ារ៉ាតុង​ឆ្នាំ​នេះ។ មាន​រត់​ចម្ងាយ ២១​គីឡូម៉ែត្រ រត់​ចម្ងាយ ១០​គីឡូម៉ែត្រ និង​រត់​ជា​លក្ខណៈ​​គ្រួសារ​​ចម្ងាយ ៣​គីឡូម៉ែត្រ​។

​លោក វ៉ាត់ ចំរើន បញ្ជាក់​ថា ថវិកា​ដែល​ទទួល​បាន​ពី​ព្រឹត្តិការណ៍​ប្រកួត​នេះ ​នឹង​បែងចែក​ជួយ​ដល់​មន្ទីរពេទ្យ​កុមារ ផ្តល់​ជូន​​​កុមារ​ក្រីក្រ​ខេត្ត​ព្រះសីហនុ​ និង​ឧបត្ថម្ភ​ដល់​ឆ្មាំ​ថែ​រក្សា​​​តំបន់​ឆ្នេរ​អូឈើទាល ខេត្ត​ព្រះសីហនុ។

​ប្រធាន​សមាគម​ទីភ្នាក់ងារ​ទេសចរណ៍​កម្ពុជា លោក អាង គឹមអៀង បាន​ទទួល​ស្គាល់​ថា កម្ពុជា​នៅ​មិន​ទាន់​មាន​​​ជើង​ហោះហើរ​ត្រង់​ពី​ក្រៅ​ប្រទេស​បាន​ទូលំ​ទូលាយ​ទេ ប៉ុន្តែ​លោក​ថា បច្ចុប្បន្ន​​​កម្ពុជា បាន​ពង្រីក​ឲ្យ​មាន​ជើង​ហោះហើរ​ត្រង់​បាន​ច្រើន។

លោក​បន្ត​ថា មិន​មែន​តែ​ក្រុម​កីឡាករ​ទេ សូម្បី​តែ​ភ្ញៀវ​ទេសចរ​អន្តរជាតិ ក៏​ចង់​ឲ្យ​មាន​ការ​ហោះហើរ​​ត្រង់​ពី​​ប្រទេស​គេ​មក​កម្ពុជា ​ដែរ ដើម្បី​ជួយ​សម្រួល​ដល់​ដំណើរ​ទេសចរណ៍​របស់​​ពួកគេ៖ «បើ​ប្រៀបធៀប​ប្រទេស​គេ យើង​មាន​ការ​ខ្វះខាត​ហើយ។ ប៉ុន្តែ​ខ្ញុំ​គិត​ថា សម្រាប់​ភ្ញៀវ​ទេសចរ​សម្រាប់​កីឡាករ​ដែល​គាត់​បាន​ទទួល​ដំណឹង​នូវ​ព្រឹត្តិការណ៍​របស់​យើង​ល្បី​ខ្លាំង គាត់​មាន​ការ​ពិបាក​ធ្វើ​ដំណើរ​មក​បន្តិច ប៉ុន្តែ​ខ្ញុំ​គិត​ថា បើ​គាត់​មាន​ចេតនា​ច្រើន គាត់​គង់​នឹង​មក​ដល់​ដូច​គ្នា។ ប៉ុន្តែ​ជា​រួម​ខ្ញុំ​ទទួល​ស្គាល់​ថា យើង​មិន​ទាន់​មាន​មាន​ការ​ហោះហើរ​ច្រើន​ដូច​ប្រទេស​អភិវឌ្ឍន៍​ធំៗ​នៅ​ក្នុង​បណ្ដា​ប្រទេស​អាស៊ាន គឺ​យើង​មិន​ទាន់​មាន​ច្រើន​ដូច​គេ​ទេ»

លោក ម៉ៅ ហាស់វណ្ណាល់ រដ្ឋលេខាធិការ​នៃ​រដ្ឋលេខាធិការដ្ឋាន​អាកាសចរណ៍​ស៊ីវិល បាន​ឲ្យ​ដឹង​ក្នុង​សិក្ខាសាលា​​​ស្ដីពី​ផល​ប៉ះពាល់​សេដ្ឋកិច្ច​នៃ​ការ​ដឹក​ជញ្ជូន​តាម​ផ្លូវ​អាកាស​នៅ​កម្ពុជា កាល​ពី​ថ្ងៃ​ពុធ ទី​២៦ ខែ​កុម្ភៈ ថា បច្ចុប្បន្ន​នេះ​កម្ពុជា មាន​ក្រុមហ៊ុន​អាកាសចរណ៍​បរទេស​ចំនួន ២៣ ​និង​ក្រុមហ៊ុន​អាកាសចរណ៍​ក្នុង​ស្រុក​ចំនួន​២។ ក្រុមហ៊ុន​ទាំង​នេះ ​មាន​កាលវិភាគ​ហោះហើរ​ជា​ប្រក្រតី គិត​ជា​​មធ្យម​ភាគ ៨០​ជើង​ក្នុង​១​ថ្ងៃ ដោយ​មិន​គិត​ការ​ហោះ​ហើរ​ជា​​លក្ខណៈ​ជួល​ម្ដងម្កាល ឬ​ហៅ​ថា Charter Flights ប្រមាណ​ពី ​៥ ទៅ ១០​ជើង​ ក្នុង​១​ថ្ងៃ​នោះ​ទេ។

​ក្នុង​ឆ្នាំ​២០១៣ កន្លង​ទៅ មាន​អ្នក​ធ្វើ​ដំណើរ​តាម​ផ្លូវ​អាកាស​ប្រមាណ ​៥.១លាន​នាក់​តាម​អាកាសយានដ្ឋាន​អន្តរជាតិ​​​​ភ្នំពេញ សៀមរាប និង​ខេត្ត​ព្រះសីហនុ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល