តំណាងរាស្ត្របក្សប្រឆាំងប្ដឹងអគ្គនាយករងនៃអគ្គនាយកដ្ឋានអន្តោប្រវេសន៍ពីបទជេរប្រមាថ
2015.05.05
តំណាងរាស្ត្រគណបក្សសង្គ្រោះជាតិ មណ្ឌលសៀមរាប លោក អ៊ុំ សំអាន បានដាក់ពាក្យប្ដឹងអគ្គនាយករងនៃអគ្គនាយកដ្ឋានអន្តោប្រវេសន៍ លោក នៅ លក្ខិណា ទៅក្រសួងមហាផ្ទៃ ដើម្បីឲ្យដាក់ពិន័យចំពោះមន្ត្រីរាជការរបស់ខ្លួនកុំអោយប្រើអំណាចរបស់ខ្លួនរំលោភសិទ្ធិអ្នកដទៃ និងជេរប្រមាថ។
លោក អ៊ុំ សំអាន មានប្រសាសន៍នៅថ្ងៃទី៥ ខែឧសភា ថា មូលហេតុដែលលោកដាក់ពាក្យប្ដឹងលោក នៅ លក្ខិណា អគ្គនាយករងនៃអគ្គនាយកដ្ឋានអន្តោប្រវេសន៍នៅពេលនេះ ដោយសារតែកាលពីថ្ងៃទី២៣ ខែកុម្ភៈ ឆ្នាំ២០១៥ កន្លងទៅនេះ លោក នៅ លក្ខិណា នឹងគូកនបានជេរប្រមាថ និងប្រើពាក្យសម្ដីមិនសមរម្យជាច្រើនទៀតមកលើរូបលោក។
លោកបញ្ជាក់ទៀតថា លោក នៅ លក្ខិណា មានចេតនាចង់បណ្ដេញលោកចេញនៅពេលដែលរូបលោកកំពុងឃ្លាំមើលការបញ្ជូនខ្លួនលោក អាឡិក ហាន់ដ្រូ ហ្គន់ហ្សាឡេស ដេវិតសឹន (Alejandro Gonzalez Davison) ស្ថាបនិកនៃអង្គការមាតាធម្មជាតិ នៅខាងមុខអគ្គនាយកដ្ឋានអន្តោប្រវេសន៍៖ «ខ្ញុំជាតំណាងរាស្ត្រម្នាក់ដែរ គាត់គួរតែគោរពសិទ្ធិខ្ញុំ គាត់មិនគួរណាជេរប្រមាថខ្ញុំ ដោយប្រើពាក្យសម្ដីមិនសមរម្យ អាងអំណាចខ្លួនជាមន្ត្រីរាជការនោះទេ។ ខ្ញុំសូមឲ្យលោក នៅ លក្ខិណា គិតពិចារណាឡើងវិញពីពាក្យសម្ដីរបស់ខ្លួន ហើយខ្ញុំក៏សូមអំពាវនាវដល់រដ្ឋមន្ត្រីក្រសួងមហាផ្ទៃ ដាក់ពិន័យទៅលើលោក នៅ លក្ខិណា អោយបានធ្ងន់ធ្ងរ ដើម្បីជាការព្រមានដល់មន្ត្រីដទៃទៀតកុំឲ្យរំលោភច្បាប់ អាងអំណាចខ្លួន ដូច្នេះគាត់ត្រូវតែទទួលទោស»។
ទាក់ទងនឹងការចោទប្រកាន់នេះ វិទ្យុអាស៊ីសេរី មិនអាចសុំការឆ្លើយតបពីអ្នកនាំពាក្យក្រសួងមហាផ្ទៃ លោក ខៀវ សុភ័គ និងលោក នៅ លក្ខិណា ឲ្យបំភ្លឺបានទេ នៅថ្ងៃទី៥ ខែឧសភា នេះ។
ពាក្យបណ្ដឹងដែលបានដាក់ទៅកាន់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃទី៥ ខែឧសភា បានសរសេរថា លោក នៅ លក្ខិណា ក្នុងនាមមន្ត្រីរាជការបានអាងអំណាចប្រើពាក្យសម្ដីមិនសមរម្យមកកាន់រូបលោកជាតំណាងរាស្ត្រ ដែលធ្វើនេះផ្ទុយពីមាត្រា ៨០ នៃរដ្ឋធម្មនុញ្ញមាត្រា ៤០ នៃច្បាប់ស្ដីពីសហលក្ខន្តិកៈមន្ត្រីរាជការស៊ីវិល និងមាត្រា ៣០៧ នៃក្រមព្រហ្មទណ្ឌ នៃព្រះរាជាណាចក្រកម្ពុជា៕