ពិធីផ្ទេរតំណែងទេវតា និងប្រពៃណីទំនៀមទម្លាប់នៃការរៀបចំទទួលទេវតាឆ្នាំថ្មី
2018.04.14
ពិធីបុណ្យចូលឆ្នាំថ្មីប្រពៃណីជាតិ ឆ្នាំ២០១៨នេះ មានរយៈពេល ៣ថ្ងៃ គឺចាប់ពីថ្ងៃសៅរិ៍ ទី១៤ ដល់ថ្ងៃចន្ទទី១៦ ខែមេសា។
ទេវតាឆ្នាំថ្មីដែលនឹងចូលមកបន្តវេនថែរក្សាលោកក្នុងរយៈពេលមួយឆ្នាំបន្តទៀតនេះមាន «ព្រះនាម មហោធរៈទេវី » ជាបុត្រីទី៧ របស់ កបិលមហាព្រហ្ម។
ព្រះនាង បានយាងចុះមកដល់នៅវេលាម៉ោង ៩: ១២ ព្រឹក ថ្ងៃសៅរិ៍ ទី១៤រោច ខែចេត្រឆ្នាំថ្មី គឺឆ្នាំ «ច» សំរឹទ្ធិស័ក ពុទ្ធសករាជ ២៥៦២ គ្រឹស្តសករាជ២០១៨ មហាសករាជ ១៩៤០ និងចុល្លសករាជ១៣៨០។
តើគេនឹងរៀបចំពិធីផ្ទេរតំណែងទេវតា និងរៀបចំគ្រឿងរណ្ដាប់អ្វីខ្លះដើម្បីទទួលទេវតាឆ្នាំថ្មី ឲ្យត្រឹមត្រូវតាមក្បួនតម្រាប្រពៃណីទំនៀមទម្លាប់របស់ខ្មែរយើង ដើម្បីទទួលបានសេរីសួស្ដីបវរមហាប្រសើរនោះ?
សូមស្តាប់សេចក្តីរាយការណ៍ពិស្តារ របស់លោក សេក បណ្ឌិត ជុំវិញរឿងនេះដែលមានសេចក្ដីដូចតទៅ...
ពិធីបុណ្យចូលឆ្នាំថ្មីប្រពៃណីខ្មែរ គឺជាប់ទាក់ទងជាសំខាន់នឹងបុត្រីកបិលមហាព្រហ្មទាំង៧អង្គ ដែលយាងមកប្ដូរវេនគ្នារក្សាលោកយើងនេះ ទៅតាមជំនឿរបស់ខ្មែរតាំងពីបុរាណកាល រហូតដល់សព្វថ្ងៃនេះ។
តាមក្បួនតម្រាមហាសង្ក្រាន្តឆ្នាំថ្មី ឆ្នាំ «ច» សំរឹទ្ធិស័ក ពុទ្ធសករាជ ២៥៦២ គ្រឹស្តសករាជ២០១៨ មហាសករាជ ១៩៤០ និងចុល្លសករាជ១៣៨០នេះ គឺត្រូវវេនទេពធីតាព្រះនាម«មហោធរៈទេវី » ដែលជាបុត្រីទី៧ យាងមកទទួលតំណែងបន្តវេនពីទេពធីតាឆ្នាំចាស់ឆ្នាំរកា គឺព្រះទេពធីតាព្រះនាម«កិមិរាទេវី»ដែលជាបុត្រីច្បងទី៦របស់កបិលមហាព្រហ្ម។
តាម្រាពីបុរាណបានបង្ហាញនូវលក្ខណៈសម្គាល់ទេពធីតាព្រះនាម «មហោធរៈទេវី » គឺទ្រង់អម្ពរពណ៌ខៀវ លម្អដោយផ្កាត្រកៀត អភរណៈ និលរតន៍ ភក្សាហាទ្រង់ សោយ សាច់ ទ្រាយ ព្រះហស្តស្តាំទ្រង់កងចក្រ ព្រហស្តឆ្វេងទ្រង់ ត្រីសូល៍ ទ្រង់គង់រំពៃលើខ្នងស្តេចក្ងោក (មយូរា) ដែលជាពាហនៈ។
ទេពធីតាព្រះនាម «មហោធរៈទេវី » បាននាំអស់ទេវបុត្រ ទេវធីតា ទាំងមួយសែនកោដិ ហោះទៅកាន់គុហាកែវ ធម្មមាលី នាទីភ្នំកៃលាស ខេត្តហិមពាន្ត ជាទីតម្កល់ទុកនូវព្រះសិរសាកបិលមហាព្រហ្ម ដែលតម្កល់លើពានមាស នាំមកដង្ហែប្រទក្សិណភ្នំព្រះសុមេរុរាជចំនួន ៧ជុំ តាមផ្លូវព្រះអាទិត្យ ចរចំនួន ៦០នាទី ទើបនាំយកទៅតម្កល់ទុកកន្លែងដើមវិញតាមទំនាមតរៀងមក។
ទាក់ទងនឹងការរៀបចំពិធីផ្ទេរតំណែងទេវតា លោកសាស្ត្រាចារ្យបណ្ឌិត សួន ឱសថ អតីតទីប្រឹក្សាជុំនុំព្រះត្រៃបិដក មានប្រសាសន៍ថា ពីធីនេះ បុរាណតែងតែធ្វើជារៀងរាល់ឆ្នាំ និងមានរបៀបរៀបចំយ៉ាងគគ្រឹកគគ្រេង តាមទីវត្តអារាម និងតាមផ្ទះសម្បែងតាមភូមិឋាននានា របស់អ្នកភូមិ ក្រោមទិដ្ឋភាពសប្បាយរីករាយដោយម្នាក់ៗ ស្លៀកពាក់ល្អស្អាត ជាបៀបប្រពៃណីទំនៀមទម្លាប់ខ្មែរ ដោយមានលោកអាចារ្យ ចាស់ព្រឹទ្ធាចារ្យ ជាអ្នកដឹកនាំធ្វើពិធីនេះ៖ «គឺយើងធ្វើតាមដំណើររឿងរបស់ទេវកថា តាមដំណើររឿងកបិលមហាព្រហ្ម និងបុត្រីទាំង ៧អង្គ ដែលជាទេវតា បានដាក់វេនគ្នា មករក្សាលោកយើងនេះ ជំនួសព្រះបិតា។ ការផ្ទេរតំណែងនោះ មានរៀបចំពិធីប្រកាសហេតុ ដែលកើតមានក្នុងឆ្នាំចាស់ មានសេចក្តីរបាយការណ៍ផ្សេងៗ និងមានផែនការថ្មី ការសេសសល់គម្រោងចាស់ ដែលទេវតាឆ្នាំថ្មី ត្រូវអនុវត្តបន្តនោះជាដើម»។
ចំណែកប្រពៃណីទំនៀមទម្លាប់ នៃការរៀបចំទទួលទេវតាឆ្នាំថ្មីវិញ ចាស់ទុំពីបុរាណក៏បានទុកជាគំរូ ឬរបៀរបបយ៉ាងច្បាស់លាស់សម្រាប់កូនចៅគោរពតាមអស់រយៈពេលជាច្រើនជំនាន់មកហើយដែរ។
តាមទំនៀម ពលរដ្ឋខ្មែរតែងរៀបចំរណ្ដាប់សម្រាប់ទទួលទេវតាឆ្នាំថ្មី ដើម្បីទទួលបានសិរីសួស្ដីក្នុងឆ្នាំថ្មី។ ចាស់ទុំមួយចំនួន ដែលបានសិក្សាពីវប្បធម៌ ជំនឿ និងប្រពៃណី ទំនៀមទម្លាប់ខ្មែរបានឲ្យដឹងថា ពិធីទទួលទេវតាមិនមែនចេះតែរៀបចំទៅតាមការនឹកឃើញនោះទេ ពោលគឺវាមានក្បួនខ្នាតត្រឹមត្រូវទៅតាមលំអាននៃតម្រាមហាសង្ក្រាន្តខ្មែរ ដែលត្រូវបានកត់ចំណាំទុកជាច្រើនជំនាន់មកហើយ។
ក្បួនតម្រាចូលឆ្នាំថ្មី ដែលមានចែងនៅក្នុងសៀវភៅព្រះរាជពិធីទ្វាទសមាស ភាគទី១ បានបង្ហាញថា រណ្ដាប់ទទួលទេវតាមានរានទេវតា ៧ថ្នាក់មួយ សម្រាប់តាំងគ្រឿងដង្វាយ និងមានភ្លេងពិណពាទ្យ ១វង់ សម្រាប់លេងទទួលទេវតា។ គេត្រូវក្រាលសំពត់ដែលមានពណ៌ស ឬពណ៌ទៅតាមថ្ងៃខែឆ្នាំ និងឈ្មោះទេវតា ដោយក្រាលនៅលើរាន ឬតុស្រស់ស្អាតមួយ ឬគេហៅថា រានទេវតា។
រីឯរណ្ដាប់ ឬដង្វាយទទួលទេវតាវិញ មានបាយសីធំ ១គូ ស្លាធម៌ ១គូ ទឹកអប់ ១គូ ទៀន ៥ ធូប ៥ លាជ ៥កែវ ផ្កា ៥កែវ ឬថូ ស្លាបារី ដាក់លើជើងពាន ១គូ ចេកនួន ឬចេកណាំវ៉ា ដាក់លើជើងពាន ១គូ ដូងឡៅមួយគូ និងមានផ្លែឈើប្រណិត ១១មុខផ្សេងទៀត ទឹកស្អាតពីរកែវ ឬមួយផ្តិលធំ និងពែព្រះភូមិ១ ពែព្រះកេតុ១។
ចាស់ទុំបុរាណក៏បានអនុញ្ញាតឲ្យរៀបរណ្ដាប់ទទួលទេវតា ដោយសង្ខបទៅតាមធនធានដែលយើងមានជាក់ស្តែងក៏បានដែរ។
លោកសាស្ត្រាចារ្យបណ្ឌិត សួន ឱសថ មានប្រសាសន៍ថា ពលរដ្ឋសាមញ្ញ អាចធ្វើត្រឹមបាយសី ៥ថ្នាក់ចុះមក ឬរៀបត្រឹមគ្រឿងសក្ការបូជា ដែលមានទៀន៥ ធូប៥ ស្លាធម៌ កូនចេក ១គូ ទឹកមួយផ្តិលធំ។ ចំពោះផ្លែឈើអាចរៀបត្រឹម ៧មុខ ទៅតាមធនធានដែលខ្លួនមានឲ្យសមល្មម ប្រកបដោយចិត្តបរិសុទ្ធជ្រះថ្លា ក្នុងការបូជាចំពោះទេវតាឆ្នាំថ្មីនោះ ក៏ទទួលបាននូវសិរីសួស្តីក្នុងក្រុមគ្រួសារដែរ៖ «ទេវតាមានអាហារសម្រាប់ពួកទេវតានោះហើយ មិនចាំតែមកសោយដង្វាយអាហារ ដែលមនុស្សលោកថ្វាយនោះទេ។ ប៉ុន្តែដើម្បីឲ្យគាប់គួរនោះ គឺថាយើងបរិភោគអីដែលគិតថា វាប្រណិតៗ ល្អហ្នឹង គឺយើងយកផ្លែឈើនោះទៅបូជាថ្វាយទេវតា ធ្វើទៅតាមសទ្ធា ដែលយើងអាចធ្វើទៅបាននោះជាការប្រសើរហើយ»។
អ្នកជំនាញខាងវប្បធម៌ ទំនៀមទម្លាប់ប្រពៃណីជាតិ លោកអាចារ្យ វ៉ាយ វិបុល មានប្រសាសន៍ឲ្យដឹងដែរថា ការរៀបចំបាយសី ផ្លែឈើ និងផ្កាភ្ញី ដើម្បីទទួលទេវតាឆ្នាំថ្មីនៅពេលទេពធីតាចុះនោះ គឺធ្វើឡើងតាមបែបព្រហ្មញ្ញសាសនា និងពុទ្ធសាសនា ព្រោះពលរដ្ឋខ្មែរមានជំនឿថា ពិតជាមានទេវតាចុះមកផ្លាស់ប្ដូរគ្នាក្នុងមួយឆ្នាំម្ដង ដើម្បីថែរក្សាសត្វលោក និងទេវតាឱ្យមានសេចក្ដីសុខក្សេមក្សាន្តក្នុងឆ្នាំថ្មី។
នៅពេលជិតដល់ម៉ោងទេវតាយាងចុះ សមាជិកក្រុមគ្រួសារ តែងតែមកជួបជុំគ្នានៅមុខរានទេវតាដោយក្រាបថ្វាយបង្គំព្រះ ធ្វើបទនមស្សការព្រះរតនត្រ័យ សមាទានសីល តាំងចិត្តឲ្យបានស្អាត បរិសុទ្ធជ្រះស្រឡះនូវមន្ទិលសៅហ្មងទាំងពួង តម្កល់ចិត្តគិតទៅលើព្រះពុទ្ធ ព្រះធម៌ ព្រះសង្ឃ ជាទីពឹងនៃស្រែបុណ្យរបស់យើង រហូតដល់ពិធីទទួលទេវតាបានបញ្ចប់ដោយបរិបូរណ៍។
ព្រះមហាធម្មាលង្ការោ ចាន់ សុជន ព្រះចៅអធិការវត្តប្រាសាទកណ្តាល ហៅវត្តខា្ចស់ នៅខេត្តបន្ទាយមានជ័យ មានថេរដីកាពន្យល់ថា ការសម្អាតចិត្ត មុនចូលថ្វាយបង្គំព្រះរតនត្រ័យទទួលទេវតាឆ្នាំថ្មី គឺលះបង់គំនិត ដែលធ្លាប់ចង់សាងអំពើបាប ហិង្សា គំនុំ កុំកួន ព្យាបាទគ្នា តាំងពីឆ្នាំចាស់នោះឲ្យអស់ ហើយតាំងចិត្តប្រព្រឹត្តិល្អចាប់ពីឆ្នាំថ្មីនេះតទៅ៖ «ការសម្អាតចិត្តនៅពេលនេះគឺចម្រើនទៅដោយសេចក្តីល្អផ្សេងៗ ឆ្នាំថ្មី គឺអ្វីៗ ថ្មីទាំងអស់។ មានន័យថា ការគិតអាក្រក់ទាំងឡាយកន្លងមកហ្នឹង សូមឲ្យបញ្ចប់ត្រឹមឆ្នាំចាស់ហ្នឹងទៅ ហើយក្នុងឆ្នាំថ្មីសូមឲ្យការគិតនោះថ្មីៗ គោលដៅសំខាន់ការសម្អាតចិត្តនេះសំដៅសាងមេត្តាធម៌ឲ្យមកសណ្ឋិតក្នុងចិត្តយើងជារៀងរហូតចាប់ពីឆ្នាំថ្មីនេះតទៅ»។
លោក អាចារ្យ វ៉ាយ វិបុល មានប្រសាសន៍ពន្យល់ដែរថា អត្ថន័យរៀបចំបុណ្យចូលឆ្នាំថ្មី តាំងពីបុរាណកាលមកដោយពលរដ្ឋខ្មែរគោរពស្រលាញ់សាសនាបែបព្រហ្មញ្ញ ដែលមានជំនឿលើក្បួនហោរាសាស្ត្រ និងការផ្លាស់ប្ដូរទេវតាឆ្នាំថ្មី ហើយទេវតាឆ្នាំថ្មី នាំឱ្យពួកគេមានលាភជ័យ និងសុខទុក្ខតាមជំនឿឆ្នាំនីមួយៗ។
អ្នកជំនាញហោរាសាស្ត្របញ្ជាក់ថា ប្រសិនបើបុគ្គលណាតាំងចិត្តធ្វើតែអំពើល្អ និងរក្សាសីល ព្រមទាំងប្រកបដោយមេត្តា ករុណា មុទិតា ឧបេក្ខា នោះទេវតាឆ្នាំថ្មីនឹងតាមថែរក្សាឱ្យជួបតែសេចក្ដីសុខ សុភមង្គលគ្រប់វេលា។
រដូវកាលចូលឆ្នាំថ្មី ជាឱកាសមួយ ជម្រះ នូវឧបទ្រពចង្រៃនៅឆ្នាំចាស់អោយជ្រះស្រឡះ ដើម្បីទទួលយកនូវអ្វីដែលថ្មី ពីទេវតាឆ្នាំថ្មី ដោយក្តីសោមនស្សរីករាយក្សេមក្សាន្ត និងសុភមង្គល។
ក្រៅតែពីពិធីទទួលទេវតា ចាស់បុរាណ ក៏បានដឹកនាំកូនចៅ ឲ្យធ្វើពិធីសាសនាផ្សេងៗ ទៀតដែរ ដូចជា ការធ្វើបុណ្យដាក់ទាន និងការគោរពដឹងគុណ អ្នកមានគុណ មានមាតា បិតា ជីដូន ជីតា បុព្វការីជនទាំងឡាយ ទាំងអ្នកចែកឋាន ទៅហើយក្តី និងអ្នកនៅរមានជីវិតនៅឡើយក្តី។
ក្នុងឱកាសពិធីបុណ្យចូលឆ្នាំថ្មីប្រពៃណីខ្មែរ ឆ្នាំ «ច» សំរឹទ្ធិស័ក ពុទ្ធសករាជ ២៥៦២ គ្រឹស្តសករាជ ២០១៨នេះ ខ្ញុំបាទ សេក បណ្ឌិត ពីឯនាយសមុទ្រ រួមនឹងសហការីនៃអាស៊ីសេរី ទាំងអស់ ក៏សូមចូលរួមសប្បាយរីករាយជាមួយនឹងលោកអ្នកនាងពីចម្ងាយ និងសូមជូនពរឲ្យអ្នកនាងប្រាថ្នាអ្វីសូមឲ្យបានដូចសេចក្តីបំណង សូមឲ្យមានសេចក្តីរីករាយ សុភមង្គល គ្រប់ក្រុមគ្រួសារទាំងអស់ ក្នុងឆ្នាំថ្មីនេះ និងឆ្នាំខាងមុខៗ ទៀត។ ប្រសិនបើធ្វើដំណើរទៅកម្សាន្តសប្បាយនៅទីណា ក៏សូមអោយទេវតាឆ្នាំថ្មីជួយថែរក្សាលោកអ្នកនាងមានសុវត្ថិភាពល្អតាមផ្លូវ និងមានសេចក្ដីមេត្តា ករុណា មុទិតា ឧបេក្ខា និងបញ្ញា តាំងពីថ្ងៃចូលឆ្នាំនេះតរៀងទៅ៕