ចាស់ព្រឹទ្ធាចារ្យ ជាជនជាតិដើមភាគតិចព្នង ២ រូប ទទួលបានគោរមងារ ពីព្រះមហាក្សត្រ ជាលើកដំបូង នៅខេត្តមណ្ឌលគិរី ក្នុងអាជីពសិល្បករ និងជាអ្នកលេងភ្លេងបុរាណលក្ខណៈប្រពៃណី បែបជនជាតិដើមភាគតិចព្នង ។
កាលពីដើមខែកុម្ភៈ ឆ្នាំ២០២៣ ព្រះមហាក្សត្រ ព្រះបាទ នរោត្តម សីហ មុនី បានប្រទានគោរមងារ ដល់ជនជាតិដើមភាគតិចព្នង ពីររូប ទី០១ លោកព្រឹទ្ធាចារ្យសិល្បៈ ញុច ហឿន ឱ្យទៅជា ពិភត្តិតន្ត្រី ញុច ហឿន និងទី២ ព្រឹទ្ធាចារ្យសិល្បៈគឺជាស្ត្រី ឈ្មោះ ណាន សាម័យ ឱ្យទៅជា នាដកីនិម្មិត ណា សាម័យ។
អតីតទីប្រឹក្សាបណ្ដាញសហគមន៍ជនជាតិដើមភាគតិចព្នង ខេត្តមណ្ឌលគិរី លោក គ្រើង តុលា ចាត់ទុកការប្រទានគោរមងារដល់មរតកមនុស្សរស់នេះ គឺជាការលើកទឹកចិត្តខ្ពស់ និងផ្តល់តម្លៃជនជាតិដើមភាគតិចគ្រប់ជាតិសាសន៍ ដែលប្រឹងប្រែងអភិរក្ស និងការពារភាសា សិល្បៈ វប្បធម៌ និងទំនៀមទម្លាប់ប្រពៃណី។
លោក គ្រើង តុលា៖ «ទន្ទឹមនឹងរដ្ឋាភិបាលគិតគូរ ខ្ញុំអំពាវនាវជនជាតិដើមភាគតិច ឱ្យគាត់ងើបឡើង ការពារប្រពៃណី សាសនា របស់គាត់ឱ្យបានច្រើន ដើម្បីស្មើមុខមាត់ ជាមួយជាតិសាសន៍ផ្សេង។ នេះជាសញ្ញាល្អ ហើយប្រសិនជារដ្ឋាភិបាល ឬអង្គព្រះមហាក្សត្រធ្វើកាន់តែច្រើនកាន់តែល្អ ជាសញ្ញាល្អបំផុត»។
លោក គ្រើង តុលា បន្ថែមថា គោរមងារនេះ នឹងដាស់ស្មារតីឱ្យជនជាតិដើមភាគតិចគ្រប់ជាតិសាសន៍ រស់នៅគ្រប់តំបន់ក្នុងប្រទេសកម្ពុជា ត្រូវប្រឹងប្រែង ថែរក្សា ប្រពៃណី សិល្បៈ វប្បធម៌ ភាសា និង ទំនៀមទម្លាប់ ដែលលោកចាត់ទុកថា ព្រះមហាក្សត្រកំពុងគិតគូរ ដល់សុខទុក្ខរបស់ជនជាតិដើមភាគតិច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។