ជំងឺ​គ្រុនឈាម​រាតត្បាត​នៅ​ខេត្ត​រតនគិរី

កុមារ និង​មនុស្ស​ចាស់​ជាង ១០​នាក់​បន្ថែម​ទៀត បាន​រង​ការ​រាតត្បាត​នៃ​ជំងឺ​គ្រុន​ឈាម​ចាប់​ពី​ដើម​ខែ​​កក្កដា ឆ្នាំ​២០១១ រហូត​បច្ចុប្បន្ន​នេះ នៅ​ភូមិ​បី ក្នុង​ឃុំ​កាចាញ ក្រុង​បានលុង ខេត្ត​រតនគិរី។
ដោយ រដ្ឋា វីសាល
2011.07.09
Share on WhatsApp
Share on WhatsApp

មេ​ឃុំ​កាចាញ លោក ទន់ ពៅ នៅ​ថ្ងៃ​សៅរ៍ ទី​៩ ខែ​កក្កដា ឆ្នាំ​២០១១ មាន​ប្រសាសន៍​បញ្ជាក់​ថា ជំងឺ​នេះ​រាតត្បាត​ទៅ​លើ​មនុស្ស​ចាស់​ប្រមាណ ៥០% និង​ក្មេង​ប្រមាណ ៥០​% ក៏​ប៉ុន្តែ​អ្នក​ជំងឺ​ត្រូវ​បាន​ក្រុម​គ្រួសារ​នាំ​យក​ទៅ​សង្គ្រោះ​នៅ​មន្ទីរពេទ្យ​បាន​ទាន់​ពេល​វេលា។

លោក​បន្ត​ថា ក្រុម​មន្ត្រី​អាជ្ញាធរ​មូលដ្ឋាន​កំពុង​ស្វែង​រក​កិច្ច​អន្តរាគមន៍​ពី​ក្រុម​មន្ត្រី​សុខាភិបាល​ដើម្បី​ចុះ​ទៅ​កាន់​ទី​កើត​ជំងឺ​រាតត្បាត ដើម្បី​ចាត់​វិធានការ​ទប់ស្កាត់​បញ្ឈប់​កុំ​ឲ្យ​មាន​ការ​រាតត្បាត​ដោយសារ​ជំងឺ​នេះ ៖ «រហូត​ដល់​អនុ​ប្រធាន​ភូមិ​វា​គ្រុន​ឈាម​ដែរ​ហ្នុង! ខ្ញុំ​បាន​រាយការណ៍​ទៅ​ខាង​មណ្ឌល​សុខភាព​ហើយ តែ​ការ​ឆ្លើយ​តប​របស់​មណ្ឌល​សុខភាព​មិន​ដឹង​ជា​យ៉ាង​ម៉េច»

កាល​ពី​ពាក់​កណ្ដាល​ខែ​មិថុនា ឆ្នាំ​២០១១ មន្ត្រី​ក្រុម​ឆ្លើយ​តប​រហ័ស​ជំងឺ​រាតត្បាត​នៃ​មន្ទីរ​សុខាភិបាល​ខេត្ត​រតនគិរី ឲ្យ​ដឹង​ថា មន្ត្រី​សុខាភិបាល​បាន​រក​ឃើញ​សញ្ញាណ​មេរោគ​ជំងឺ​គ្រុន​ឈាម​ចាប់​ផ្ដើម​រាតត្បាត នៅ​ក្នុង​ភូមិ​មួយ​ចំនួន​ក្នុង​ស្រុក​ចំនួន​បី គឺ​ស្រុក​កូនមុំ ស្រុក​វ៉ឺនសៃ និង​ក្រុង​បានលុង តាម​រយៈ​ការ​ពិនិត្យ​ឈាម​ទៅ​លើ​មនុស្ស​ដែល​គេ​សង្ស័យ​ថា មាន​ជំងឺ​គ្រុនឈាម។

តួលេខ​ផ្ដល់​ដោយ​អង្គភាព​ដដែល​ឲ្យ​ដឹង​ថា ចាប់​ពី​ចុង​ខែ​ឧសភា រហូត​ពាក់​កណ្ដាល​ខែ​មិថុនា ឆ្នាំ​២០១១ គេ​បាន​រក​ឃើញ​ករណី​ជំងឺ​គ្រុនឈាម​ចំនួន ៨៨​ករណី ក្នុង​នោះ​ម្នាក់​បាន​ស្លាប់។

ប្រធាន​មន្ទីរពេទ្យ​បង្អែក​ខេត្ត​រតនគិរី លោក ហ៊ីង ផានសុគន្ធា មាន​ប្រសាសន៍​បញ្ជាក់​ថា មន្ទីរពេទ្យ​ខេត្ត​ទទួល​បាន​អ្នក​ជំងឺ​គ្រុនឈាម​កម្រិត​ស្រាល និង​មាន​ចំនួន​តិច​ដែល​បាន​ចូល​មក​ព្យាបាល​នៅ​មន្ទីរពេទ្យ​សម្រាប់​ខែ​កក្កដា ឆ្នាំ​២០១១។

លោក​បន្ត​ថា មិន​មាន​អ្នក​ជំងឺ​គ្រុនឈាម​ថ្មី​ណា​មាន​គ្រោះថ្នាក់​ដល់​អាយុ​ជីវិត​នៅ​មន្ទីរពេទ្យ​នោះ​ទេ ៖ «មិន​ដឹង​គេ​ទៅ​ដេក​ឯ​ណា​ផង ឃើញ​មក​ពេទ្យ​តែ​ប៉ុន្មាន​នាក់​ហ្នឹង។ គ្រាន់​តែ​ស្ថានភាព​គ្រុនឈាម ក៏​ប៉ុន្តែ​វា​ស្រាលៗ វា​អត់​មាន​អី​ដល់​បែក​គ្រាប់​ឈាម​ផង​អត់​ផង»

មន្ទីរ​សុខាភិបាល​ខេត្ត​បាន​រៀបចំ​ឲ្យ​ប៉ុស្តិ៍​សុខភាព​នៅ​តាម​តំបន់​ងាយ​រង​ការ​ឆ្លង​ជំងឺ​គ្រុនចាញ់ និង​ជំងឺ​គ្រុនឈាម​ធ្វើការ​ចែក​មុង​ជ្រលក់​ថ្នាំ​ការពារ​មូស​ប្រមាណ ២០.០០០​មុង​ដល់​ប្រជាពលរដ្ឋ​ឲ្យ​បាន​រួច​រាល់​នៅ​ចុង​ខែ​មិថុនា ឆ្នាំ​២០១១ កន្លង​ទៅ និង​ធ្វើ​ការ​ផ្សព្វផ្សាយ​តាម​រថយន្ត​ប្រដាប់​ដោយ​ឧបករណ៍​បំពង​សំឡេង​ឲ្យ​ប្រជាពលរដ្ឋ​បង្កើន​ការ​ប្រុង​ប្រយ័ត្ន​ការពារ​ពី​ការ​ចម្លង​មេរោគ​គ្រុនឈាម​ដោយសារ​មូស​ខាំ​ប្រយោជន៍​ការពារ​សុវត្ថិភាព​សុខភាព​ជូន​ប្រជាពលរដ្ឋ និង​ជា​ផ្នែក​ជួយ​លុប​បំបាត់​ជំងឺ​​គ្រុន​ចាញ់ និង​ជំងឺ​គ្រុនឈាម​ឲ្យ​បាន​កាន់​តែ​ប្រសើរ។

អនុ​ប្រធាន​មន្ទីរ​សុខាភិបាល ខេត្ត​រតនគិរី និង​ជា​អនុ​ប្រធាន​ក្រុម​ឆ្លើយ​តប​រហ័ស​ជំងឺ​រាតត្បាត លោក​វេជ្ជបណ្ឌិត អ៊ុង រតនា មាន​ប្រសាសន៍​បញ្ជាក់​ថា មន្ត្រី​សុខាភិបាល​កំពុង​ធ្វើ​ការងារ​នេះ​ជា​ប្រចាំ ដើម្បី​ទប់ស្កាត់​ករណី​រាតត្បាត​នេះ។ លោក​បន្ត​ថា ការ​ប្រយុទ្ធ​ប្រឆាំង​នឹង​ជំងឺ​គ្រុន​ឈាម​អាច​ធ្វើ​បាន​លទ្ធផល​ល្អ​អាស្រ័យ​លើ​ការ​ចូល​រួម​ថែ​រក្សា​អនាម័យ និង​កិច្ច​ការពារ​សុវត្ថិភាព​ពី​ការ​ចម្លង​មេរោគ​ដោយ​មូស​ខ្លា​ពី​សំណាក់​ប្រជាពលរដ្ឋ​រស់​នៅ​មូលដ្ឋាន​ឲ្យ​បាន​ជាក់លាក់។

លោក អ៊ុង រតនា បន្ថែម​ដូច្នេះ ៖ «ភាគ​ច្រើន​គឺ​ចូល​មក​មន្ទីរពេទ្យ​ឯកជន​ច្រើន មិន​មែន​ត្រឹម​តែ ១០​នាក់​នោះ​ទេ ច្រើន​ជាង​ហ្នឹង​ទៀត។ មន្ត្រី​សុខាភិបាល​យើង​នៅ​តែ​ផ្ដល់​លទ្ធភាព ផ្ដល់​ជំនួយ ទាំង​ស្មារតី ទាំង​សម្ភារៈ​ទាំង​ការ​ព្យាបាល​ជូន​គាត់​ហ្នឹង»

តួលេខ​ផ្ដល់​ដោយ​មន្ត្រី​សុខាភិបាល​ដដែល​ឲ្យ​ដឹង​ថា ចាប់​ពី​ខែ​ឧសភា ឆ្នាំ​២០១១ រហូត​បច្ចុប្បន្ន មាន​ករណី​រាតត្បាត​ជំងឺ​គ្រុនឈាម​កើន​ឡើង​ដល់​ជាង ១០០​ករណី ហើយ​និង​ធ្វើ​ឲ្យ​កុមារ​ពីរ​នាក់​ស្លាប់៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
លោក ហ៊ុន សែន បន្ត​ប្រកាស​ថា ​​​នឹង​ការពារ​មិន​ឱ្យ​មាន​​​រដ្ឋប្រហារ​ ដើម្បី​​​អភិវឌ្ឍប្រទេស​ឱ្យ​រីក​ចំរើន
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Jul 10, 2011 09:14 PM

មន្ទីរពេទ្យខេត្តរតនគីរី ជាមន្ទីរពេទ្យដែលអន់បំផុត។
ក្រុមគ្រូពេទ្យគ្មានវិជ្ជាជីវៈគ្រប់គ្រាន់ និងមួយចំនួនថែមទាំង​គ្មានសីលធម៌។​​ អាជ្ញាធរដែនដី មិនសូវយកចិត្តទុកដាក់ គិតតែពីខ្លួនឯង។ ខ្ញុំធ្លាប់បានប្រាប់ទៅលោកអភិបាលខេត្ត ដែរ ប៉ុន្តែពួកគេបានត្រឹមតែអ៊ឺអើ ជាលទ្ធផលគឺ ធ្វើមិនបាន!!