ប៉ូលិស​ឃាត់​ខ្លួន​ជន​សង្ស័យ​ជួញដូរ​គ្រឿង​ញៀន​១​នាក់​នៅ​ស្ទឹងត្រែង

នៅ​ឯ​ស្រុក​សៀមប៉ាង ខេត្ត​ស្ទឹងត្រែង នៅ​ថ្ងៃ​ទី​៩ ខែ​សីហា សមត្ថកិច្ច​ប៉ូលិស​បាន​ឃាត់​ខ្លួន​ជន​សង្ស័យ​ជួញដូរ​គ្រឿង​ញៀន​នាំ​ចូល​ពី​ប្រទេស​ឡាវ ម្នាក់​ថ្មី​ទៀត​ហើយ និង​រឹប​អូស​បាន​គ្រឿង​ញៀន​ប្រភេទ​មេតំហ្វេតាមីន​ចំនួន ២០០​គ្រាប់។
ដោយ រដ្ឋា វីសាល
2011.08.09
Share on WhatsApp
Share on WhatsApp

ប៉ូលិស​ខេត្ត​ស្ទឹងត្រែង បាន​ឃាត់​ខ្លួន​ជន​សង្ស័យ ឈ្មោះ វ៉ាន់ ឌីតេង អាយុ ២៥​ឆ្នាំ រស់​នៅ​ភូមិ​ស្រែពោធិ សង្កាត់​ស្រះ​ឫស្សី ក្រុង​ស្ទឹងត្រែង ខេត្ត​ស្ទឹងត្រែង ខណៈ​ពេល​ជន​សង្ស័យ​កំពុង​នាំ​គ្រឿង​ញៀន​នេះ​ពី​តំបន់​ព្រំដែន​ឡាវ ក្នុង​ស្រុក​ថាឡាបរិវ៉ាត់ ខេត្ត​ស្ទឹងត្រែង បំណង​នាំ​ចូល​មក​ទី​រួម​ខេត្ត ហើយ​ត្រូវ​ប៉ូលិស​ដាក់​កម្លាំង​ចាប់​បាន។

នាយ​ការិយាល័យ​ប៉ូលិស​ប្រឆាំង​ការ​ជួញដូរ​គ្រឿង​ញៀន​នៃ​ស្នងការដ្ឋាន​នគរបាល​ខេត្ត​ស្ទឹងត្រែង  លោក នូ ហួរ មាន​ប្រសាសន៍​បញ្ជាក់​ថា ជនសង្ស័យ​គឺ​ជា​អតីត​ពិរុទ្ធជន​ក្នុង​បទ​ជួញដូរ​ថ្នាំ​ញៀន​ទើប​ចេញ​ពី​ពន្ធនាគារ ហើយ​បាន​បន្ត​សកម្មភាព​ជួញដូរ​គ្រឿង​ញៀន​នេះ​ជា​ថ្មី​ទៀត។

លោក​បន្ត​ថា ប៉ូលិស​បាន​ចាប់​ខ្លួន​ជនសង្ស័យ​កាល​ពី​ថ្ងៃ​ច័ន្ទ ទី​៨ ខែ​សីហា ឆ្នាំ​២០១១ ហើយ​ប៉ូលិស​កំពុង​រៀបចំ​សំណុំ​រឿង​ហ្នឹង​បញ្ជូន​ជន​សង្ស័យ​ទៅ​តុលាការ​ដើម្បី​ចាត់​វិធានការ​តាម​ផ្លូវ​ច្បាប់ ៖ «ព្រោះ​យើង​ចាប់​តាំង​ពី​ឆ្នាំ​២០០៣ ទើប​នឹង​ចេញ​ប្រហែល​ជា ៨​ខែ​ទេ។ យើង​តាម​តាំង​ពី​អូរស្វាយ មក​រហូត​មក​ដល់​ជិត​ខេត្ត​បាន​យើង​ដាក់​ស្ទាក់​សុំ​ត្រួត​ពិនិត្យ តែ​វា​មិន​ឈប់​ឲ្យ​យើង​ត្រួត​ពិនិត្យ វា​បាន​បើក​ឡាន​កាន់​តែ​លឿន​ទៅៗ ហើយ​រត់​ចូល​ផ្ទះ ដល់​យើង​តាម​ទាន់​ក៏​រក​ឃើញ​វត្ថុតាង»

វិទ្យុ​អាស៊ីសេរី មិន​មាន​ការ​អនុញ្ញាត​ឲ្យ​ធ្វើ​បទសម្ភាសន៍​ជាមួយ​ជន​សង្ស័យ​ដែល​ប៉ូលិស​បាន​ឃាត់​ខ្លួន​ជុំវិញ​ករណី​ជួញដូរ​គ្រឿង​ញៀន​នោះ​ទេ។

របាយការណ៍​របស់​ការិយាល័យ​ប៉ូលិស​ប្រឆាំង​គ្រឿង​ញៀន​ខេត្ត​ឲ្យ​ដឹង​ថា នៅ​ចាប់​ពី​ខែ​កក្កដា ឆ្នាំ​២០១១ រហូត​បច្ចុប្បន្ន ការ​បង្ក្រាប​ការ​ជួញដូរ​គ្រឿង​ញៀន​ក្នុង​ខេត្ត​នេះ​បាន ៥​ករណី និង​រឹប​អូស​បាន​គ្រឿង​ញៀន​ប្រភេទ​មេតំហ្វេតាមីន​ជាង ៩០០​គ្រាប់ និង​មេតំហ្វេតាមីន​ប្រភេទ​ទឹក​កក​បាន ១,៤​ក្រាម៕

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។