មន្ត្រី​ធនាគារ​ជាតិ​ថា​ ប្រាក់​យ័ន​ចិន​អនុញ្ញាត​ឲ្យ​ចរាចរណ៍​តែ​ក្នុង​ធនាគារ​ និង​មីក្រូហិរញ្ញវត្ថុ​ តែ​អ្នក​ជំនាញ​សេដ្ឋកិច្ច​ថា​ ប៉ះពាល់​ប្រាក់​រៀល​ខ្មែរ​

ដោយ សុ ជីវី
2019.04.30
លុយ​យ័ន​ចិន ៦២២ ប្រាក់​យ័ន​ចិន។
screenshot

មន្ត្រី​ជាន់ខ្ពស់​ធនាគារ​ជាតិ​នៃ​កម្ពុជា អះអាង​ថា​ រូបិយប័ណ្ណ​ចិន​ ឬ​ប្រាក់​យ័ន​ ត្រូវ​បាន​អនុញ្ញាត​ឲ្យ​ធ្វើ​ចរាចរណ៍​តែ​ក្នុង​ធនាគារ​ និង​មីក្រូហិរញ្ញវត្ថុ​ក្នុង​ប្រទេស​កម្ពុជា​ប៉ុណ្ណោះ​ ពុំ​មែន​ចរាចរណ៍​ក្នុង​ទីផ្សារ​កម្ពុជា​ ដូច​ប្រាក់​ដុល្លារ​ និង​ប្រាក់​រៀល​ខ្មែរ​នោះ​ទេ។ ចំណែក​អ្នក​ជំនាញ​សេដ្ឋកិច្ច​ព្រួយបារម្ភ​ ពី​ផល​ប៉ះពាល់​ រូបិយប័ណ្ណ​ជាតិ​ ឬ​ប្រាក់​រៀល​។

អ្នក​ជំនាញ​សេដ្ឋកិច្ច​ និង​ហិរញ្ញវត្ថុ​ លោក​ ង៉ែ​ ជូ​ ឲ្យដឹង​នៅ​ថ្ងៃ​ទី២៩​ មេសា​ថា​ រដ្ឋាភិបាល​​អនុញ្ញាត​ឲ្យ​ចរាចរណ៍​ រូបិយប័ណ្ណ​ចិន​ ក្នុង​ធនាគារ​ និង​មីក្រូហិរញ្ញវត្ថុ​ នឹង​បង្ក​លក្ខណៈ​ងាយស្រួល​ ដល់​ប្រភព​ទុន​វិនិយោគ​ចិន​ធ្វើ​ពាណិជ្ជកម្ម​ឆ្លង​ដែន​មក​កម្ពុជា​ ក៏ប៉ុន្តែ​លោក​បារម្ភ​ថា​ បញ្ហា​នេះ​អាច​បង្ក​ភាព​អវិជ្ជមាន​មួយ​ចំនួន​ ប៉ះពាល់​ដល់​គោលនយោបាយ​លើកកម្ពស់​ការ​ប្រើ​ប្រាស់​ប្រាក់​រៀល​ខ្មែរ​របស់​ធនាគារ​ជាតិ​។ លោក​បញ្ជាក់​ថា​ កម្ពុជា​មាន​ទិសដៅ​កាត់បន្ថយ​ប្រាក់​បរទេស​ ជាពិសេស​ប្រាក់​ដុល្លារ​ ដែល​ធនាគារ​ជាតិ​បាន​រុញ​ឲ្យ​ប្រើប្រាស់​ប្រាក់​រៀល​ខ្មែរ​ ក៏​ប៉ុន្តែ​ប្រសិន​បើ​រដ្ឋាភិបាល​អនុញ្ញាត​ឲ្យ​ចរាចរណ៍​រូបិយប័ណ្ណ​ទី៣​ ឬ​ប្រាក់​យ័ន​ចិន​ វាយលុក​ក្នុង​ទីផ្សារ​កម្ពុជា​ មាន​ន័យ​ថា​ កិច្ច​ខំប្រឹង​ប្រែង​លើក​កម្ពស់​ប្រាក់​រៀល​ខ្មែរ​ នឹង​ជួប​ការ​លំបាក៖ «បញ្ច្រាស​ចរន្ត​បន្តិច ទាក់ទង​នឹង​ការ​ជំរុញ​ឲ្យ មាន​ការ​ប្រើប្រាស់​ប្រាក់​រៀល​ហ្នឹង។ យើង​កំពុង​តែ​កាត់​បន្ថយ​ការ​ប្រើ​ក្រដាស​ប្រាក់​បរទេស ជា​ពិសេស ដុល្លារ​ហើយ ជំរុញ​ការ​ប្រើប្រាស់​ក្រដាស​ក្នុង​ស្រុក​អីចឹង។ ប្រសិន​បើ​យើង​មាន​ក្រដាស​ប្រាក់​ទី ៣ ចូល​ក្នុង​ទីផ្សារ​គឺ កិច្ច​ខំ​ប្រឹងប្រែង​លើក​កម្ពស់​ប្រាក់​រៀល​ហ្នឹង វា​អាច​នឹង​មាន​ការ​លំបាក​ខ្លះ ដោយសារ​យើង​បាន​ណែនាំ​នូវ​ក្រដាស​ប្រាក់​ថ្មី»

អគ្គនាយក​បច្ចេកទេស​នៃ​ធនាគារជាតិនៃកម្ពុជា​លោកស្រី​ ជា​ សិរី​ បាន​ប្រាប់​កាសែត​ក្នុង​ស្រុក​នៅ​ថ្ងៃ​ទី២៩​ មេសា​ថា​ រូបិយប័ណ្ណ​ចិន​នឹង​មិន​អនុញ្ញាត​ឲ្យ​ប្រើប្រាស់​ក្នុង​ទីផ្សារ​កម្ពុជា ​ឬ​ទូទាត់​ទំនិញ​នានា​នោះ​ទេ​ គឺ​គ្រាន់តែ​​ទូទាត់​ក្នុង​ប្រព័ន្ធ​ធនាគារ​ និង​មីក្រូហិរញ្ញវត្ថុ​ ចំនួន១៥ ដែល​កំពុង​ប្រតិបត្តិ​ការ​ប្រាក់​យ័ន​ចិន​ក្នុង​ប្រទេស​កម្ពុជា។

កាលពី​ចុង​សប្ដាហ៍​មុន​ក្រសួង​ទេសចរ​កម្ពុជា​បាន​ចុះ​អនុស្សរណៈ​ យោគយល់​ជាមួយ​ធនាគារ​ចិន​(Bankof China) ក្នុង​ទិសដៅ​សម្រួល​បង្កើត​ការ​ទូទាត់​តាម​រូបិយប័ណ្ណ​ចិន​តាម​រយៈ​ប្រព័ន្ធ​អ៊ីនធើណិត ឬ​ប្រព័ន្ធ​អនឡាញ​សម្រាប់​ដោះ​ដូរ​ទំនិញ និង​សេវាកម្ម​ម្ហូបអាហារ សណ្ឋាគារ​ ភោជនីយដ្ឋាន​ និង​ទី​ភ្ញាក់​ងារ​ទេសចរណ៍​ផ្សេងៗ ជា​ដើម។

អ្នកនាំពាក្យ​រដ្ឋាភិបាល​លោក​ ផៃ​ ស៊ី​ផាន​ បាន​អះអាង​ប្រាប់​អាស៊ី​សេរី​កាលពី​ថ្ងៃ​ទី២៧ មេសា​ថា រូបិយប័ណ្ណ​ចិន ឬ​លុយ​យ័ន​ ត្រូវ​បាន​ធ្វើ​ចរាចរណ៍​ពាសពេញ​ទ្វីប​អាស៊ី ដូចជា កូរ៉េ និង​ថៃឡង់ដ៍​ ជា​ដើម។ លោក​ថា​ ការ​ធ្លាក់​លុយ​យ័ន​ចិន​មក​កម្ពុជា​នឹង​ធ្វើឲ្យ​កម្ពុជា​ទទួល​ប្រយោជន៍​ច្រើន​ជួយ​សេដ្ឋកិច្ច​ជាតិ​ ដែល​ជា​ផ្នែក​មួយ​ជួយ​ពង្រឹង​ការ​បណ្ដាក់​ទុន ​និង​ចរាចរណ៍​រូបិយប័ណ្ណ​ចិន​ក្នុង​វិស័យ​ពាណិជ្ជកម្ម​ឆ្លង​ដែន​ផង​ដែរ៖ «អ្នក​មក​វិនិយោគ​ទុន​ស្រុក​ខ្មែរ អ្នក​យក​លុយ​អាមេរិកកាំង​ក៏​បាន អ្នក​យក​លុយ​យ័ន​ក៏​បាន យក​យ៉េន​ក៏​បាន យក​លុយ​អី​ក៏​បាន​នេះ​ជា​ទូទៅ។ កម្ពុជា​ជា​ប្រជាជាតិ​អធិបតេយ្យ យើង​អត់​មាន​ខ្ញុំ​នរណា ត្រូវ​បម្រើ​នរណា ត្រូវ​តែ​ប្រើប្រាស់​ផ្ដាច់​មុខ​រូបិយវត្ថុ​របស់​នរណា អត់​មាន​ទេ។ ចរាចរណ៍​សេរី នៅ​លើ​ទីផ្សារ​កម្ពុជា។ អ្វី​ទៅ​ដែល​ជា​ការ​បើក​ចំហ​ជើង​មេឃ នៃ​ការ​បណ្ដាក់​ទុន ក៏​ដូច​ជា ពាណិជ្ជកម្ម ដែល​មិន​រើសអើង​នូវ​រូបិយវត្ថុ»

របាយការណ៍​ធនាគារជាតិនៃកម្ពុជា​បង្ហាញ​ថា បច្ចុប្បន្ន​កម្ពុជា​បាន​ចរាចរណ៍​ប្រាក់​រៀល​ខ្មែរ​ជិត ២០ភាគ​រយ​នៅ​ទូទាំង​ប្រទេស។ ចំណែក​លុយ​ដុល្លារ​អាមេរិច​មាន​ប្រមាណ ៨៣ភាគ​រយ​កំពុង​ធ្វើ​ចរាចរណ៍​ទូទាត់​ទំនិញ​ក្នុង​ប្រទេស​កម្ពុជា ​និង​ពាណិជ្ជកម្ម​ឆ្លង​ដែន​ជា​ដើម​។

ទោះ​យ៉ាង​ណា​យុវជន​ ដែល​ប្រកាស​ជំហរ​ព្រមាន​ធ្វើ​បាតុកម្ម​ បើ​រដ្ឋាភិបាល​អនុញ្ញាត​ឲ្យ​ចាយ​លុយ​យ័ន​ចិន​ក្នុង​ទីផ្សារ​កម្ពុជា​ គឺ​លោក​ ជុំ​ ហួត​  ទទូច​ឲ្យ​រដ្ឋាភិបាល​សិក្សា​ឲ្យ​បាន​ច្បាស់លាស់​ក្នុង​ការ​ចរាចរណ៍​លុយ​យ័ន​ក្នុង​ប្រទេស​កម្ពុជា ជៀសវាង​វិបត្តិសេដ្ឋកិច្ច ​ឬ​អតិផរណា​នៅ​ថ្ងៃ​ខាង​មុខ។ ​ លោក​បារម្ភ​ថា ការ​ចរាចរណ៍​លុយ​ចិន​ ដែល​ជា​ប្រទេស​កុម្មុយនិស្ត​ក្នុង​ប្រទេស​កម្ពុជា​ នឹង​បង្កើន​អំណាច​ ឬ​ឥទ្ធិពល​ដល់​អ្នក​វិនិយោគ​ចិន​ធ្វើ​ព្យុះ​ភ្លៀង​បង្ក​ផល​ប៉ះ​ពាល់​ដល់​បរិស្ថាន​ធម្មជាតិ​សន្តិសុខ​ជាតិ​ និង​ វិបត្តិ​សង្គម​ជាដើម៖ «ចិន​យក​លុយ​មក គេ​អាច​យក​កង្វក់​បន្ទាប់​មក គេ​ប្ដូរ​លុយ​មួយ ដែល​ស្អាត។ ចិន​មាន​គម្រោង​កសាង​ទំនប់​វារីអគ្គិសនី​ចុះ អីចឹង​វា​យក​លុយ​ហ្នឹង​ឯង សម្រាប់​កសាង។ មួយ​ទៀត​វា​បង្កើត​ឥទ្ធិពល ទៅ​ដល់​ប្រជាជន​ចិន​ដែល​មក​ខ្មែរ​យើង ជា​ពិសេស គឺ​ពួក​វិនិយោគ​ធំៗ ដូច​ជា ក្រុមហ៊ុន​ធំៗ គឺ​បង្កើត​ឲ្យ​ពួក​ហ្នឹង​មាន​អំណាច និង​មាន​ឥទ្ធិពល​ទៀត ដោយសារ​តែ​វា​ហ្នឹង ដែល​ខ្មែរ​យើង​មាន​ច្បាប់ MOU (អនុសារណៈ) សម្រាប់​ចាយ​លុយ​ចិន។ អីចឹង​វា​អាច​បង្វិល​សេដ្ឋកិច្ច​គ្រប់​រូបភាព មិន​ថា ទំនិញ​នាំ​ចេញ និង​ទំនិញ​នាំ​ចូល»

ចំណែក​អ្នក​វិភាគ​ឯករាជ្យ​លោក​ បណ្ឌិត​ ឡៅ​ ម៉ុង​ហៃ ​បាន​សរសេរ​ក្នុង​ហ្វេសបុក​របស់​ខ្លួន​ថា ​ជនជាតិ​ចិន​ប្រើប្រាស់​លុយ​ក្រៅ​ប្រព័ន្ធ​អាច​បញ្ចូល​ការ​ប្រើ​ប្រាស់​ប្រាក់​យ័ន​ចិន​ក្នុង​ប្រព័ន្ធ​របស់​ពួកគេ​ ធ្វើឲ្យ​លោក​បារម្ភ​ថា​ អាច​នឹង​បង្កើត​រដ្ឋ​ចិន​ក្នុង​រដ្ឋ​ខ្មែរ​ ដូច​សម័យ​បារាំង​ត្រួតត្រា​កម្ពុជា​ដូច្នោះ​ដែរ ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។