វិនិយោគិនជំរុញឲ្យដាំដំណាំល្ម៉ើនៅកម្ពុជាដើម្បីបំពេញតម្រូវការទីផ្សារតំបន់អាស៊ី
2016.10.27
វិនិយោគិនជាតិ និងអន្តរជាតិ ឲ្យដឹងថា បច្ចុប្បន្នល្ម៉ើកម្ពុជា មានតម្រូវការកើនឡើងពីមួយឆ្នាំទៅមួយឆ្នាំពីទីផ្សារតំបន់អាស៊ី។ ទន្ទឹមគ្នានេះ ក្រុមវិនិយោគិនបានជំរុញឲ្យកសិករកម្ពុជា ដាំដំណាំល្ម៉ើឲ្យបានកាន់តែច្រើនថែមទៀតសម្រាប់នាំចេញទៅកាន់ទីផ្សារក្រៅប្រទេស។
វិនិយោគិនជាតិ និងអន្តរជាតិអះអាងថា តម្រូវការផលិតផលល្ម៉ើកម្ពុជា ពីទីផ្សារតំបន់អាស៊ាន ក៏ដូចជាក្នុងតំបន់អាស៊ី មានការកើនឡើងនេះ ដោយសារតែលក្ខខណ្ឌភូមិសាស្ត្រនៅប្រទេសក្នុងតំបន់អាស៊ីមួយចំនួនមិនអាចដាំបាន ព្រមទាំងមានការទុកចិត្តលើគុណភាពផលិតផលល្ម៉ើពីសំណាក់អតិថិជន។
ការលើកឡើងរបស់ក្រុមវិនិយោគិនធ្វើឡើងនៅក្នុងកិច្ចប្រជុំប្រចាំឆមាសស្ដីអំពីការពង្រឹងគុណភាពបច្ចេកទេសដំណាំល្ម៉ើនៅកម្ពុជា រវាងក្រុមហ៊ុន អ៊ឹង សុទ្ធី គ្រុប និងក្រុមហ៊ុនប្រទេសថៃ ព្រមទាំងក្រុមហ៊ុនប្រទេសអ៊ីស្រាអែល (Israel) ដែលរៀបចំឡើងនៅថ្ងៃទី២៦ ខែតុលា នារាជធានីភ្នំពេញ។
ប្រធានគ្រប់គ្រងទូទៅនៃក្រុមហ៊ុន អ៊ឹង សុទ្ធី គ្រុប (OENG SOTHY Group Co., Ltd) លោក ឡេង មុនីនាថ លើកឡើងថា ដំណាំល្ម៉ើត្រូវបានប្រជាជនបណ្ដាប្រទេសនៅតំបន់អាស៊ី ចាត់ទុកជាផ្លែឈើមួយប្រភេទ ដែលមានគុណប្រយោជន៍ខ្ពស់ដល់សុខភាព។ ជាងនេះទៀត ល្ម៉ើកម្ពុជា ក្នុងមួយឆ្នាំៗមានតម្រូវការច្រើនពីទីផ្សារអាស៊ាន ក្នុងនោះមាន ប្រទេសថៃ ប្រទេសហ្វីលីពីន ប្រទេសឥណ្ឌូនេស៊ី និងប្រទេសម៉ាឡេស៊ី កំពុងត្រូវការផលិតផលល្ម៉ើ ខណៈប្រជាជនកម្ពុជា មិនទាន់ដឹង និងដាំដំណាំល្ម៉ើបានតិចតួចនៅឡើយ បើធៀបនឹងបណ្ដាប្រទេសជិតខាង៖ «ជនជាតិឥស្លាមនៅលើពិភពលោក មានទាំងពីឥណ្ឌូនេស៊ី ម៉ាឡេស៊ី ហ្វីលីពីន អ៊ីចឹងសួរថា តំបន់ទាំងនេះដាំល្ម៉ើអត់បាន។ ប្រទេសដែលមានតម្រូវការទាំងនេះ នឹងងាកមកតិចល្ម៉ើកម្ពុជា ព្រោះនៅអាស៊ានដាំបានតែ ៤ប្រទេសប៉ុណ្ណោះ ក្នុងនោះមានថៃ កម្ពុជា ចំណែកភូមា និងវៀតណាម ដាំបានតិចតួចប៉ុណ្ណោះ»។
តំណាងក្រុមហ៊ុនរូបនេះអះអាងថា ដោយសម្លឹងឃើញពីសក្ដានុពលក្នុងការនាំចេញផលិតផលល្ម៉ើទៅទីផ្សារអាស៊ាន ក្រុមហ៊ុនលោកបានសម្រេចចុះអនុស្សរណៈជាមួយប្រទេសថៃ និងអ៊ីស្រាអែល ដែលជាប្រទេសដាំ និងកែច្នៃផលិតផលដំណាំល្ម៉ើធម្មជាតិល្អជាងគេ ដើម្បីជំរុញឲ្យមានការវិយោគដាំដំណាំល្ម៉ើឲ្យបានកាន់តែច្រើននៅកម្ពុជា៖ «បើសិនជាល្ម៉ើមានអត្ថប្រយោជន៍បែបហ្នឹង មិនភ័យខ្វះទីផ្សារនោះទេ ហើយបច្ចុប្បន្នកម្ពុជា យើងបានសហការជាមួយប្រទេសថៃ ធ្វើជាទឹកផ្លែឈើល្ម៉ើ និងកែច្នៃល្ម៉ើផ្សេងៗ ហើយបានចូលទៅដល់ទីផ្សារប្រទេសថៃ ម៉ាឡេស៊ី ហ្វីលីពីន និងឥណ្ឌូនេស៊ី ហើយនៅពេលល្ម៉ើយើងបានអាយុ ៣ឆ្នាំ អាចប្រមូលផលបានហើយ យើងនាំចេញទៅវៀតណាម និងចិន ដូច្នេះប្រជាពលរដ្ឋកុំបារម្ភរឿងទីផ្សារ»។
ទន្ទឹមគ្នានេះ អគ្គនាយកក្រុមហ៊ុន កញ្ចនៈបូរី (Kachanaburi) ប្រទេសថៃ លោក អានូរ៉ាក់ ប៊ុនលឺ (Anurak Boonlue) ដែលជាក្រុមហ៊ុនដាំដំណាំល្ម៉ើធំមួយប្រចាំប្រទេសថៃ និងតំបន់អាស៊ាន ហើយដែលបានចុះអនុស្សរណៈជាមួយកម្ពុជា មានប្រសាសន៍ថា ប្រទេសថៃ ដាំដំណាំល្ម៉ើជាច្រើនឆ្នាំមកហើយ និងបានចាត់ទុកជាដំណាំមួយដែលជួយជំរុញការអភិវឌ្ឍន៍សេដ្ឋកិច្ចប្រទេសថៃ ដែរ។
លោកជំរុញឲ្យរដ្ឋាភិបាល និងកសិករកម្ពុជា គួរងាកវិនិយោគដាំដំណាំល្ម៉ើឲ្យបានច្រើន ព្រោះកម្ពុជា មានទីតាំងភូមិសាស្ត្រ និងអាកាសធាតុដូចប្រទេសថៃ ផ្ទុយពីប្រទេសឥណ្ឌូនេស៊ី និងម៉ាឡេស៊ី ដែលមានតម្រូវការខ្លាំង តែមិនអាចដាំបាន។ បន្ថែមពីនេះ លោក អានូរ៉ាក់ ប៊ុនលឺ អះអាងថា ក្រុមហ៊ុនលោកនឹងជួយបច្ចេកទេស និងពូជល្ម៉ើដែលមានគុណភាពល្អដល់កសិករកម្ពុជា ដើម្បីទាញយកឱកាសនាំចេញផលិតផលល្ម៉ើទៅកាន់ទីផ្សារអាស៊ានកាន់តែខ្លាំងថែមទៀត។
ចំណែកឯកសិករដាំដំណាំល្ម៉ើមកខេត្តពោធិ៍សាត់ លោក ស្រ៊ាង វណ្ណរ័ត្ន លើកឡើងដែរថា លោកសាកល្បងដាំដំណាំល្ម៉ើនៅលើផ្ទៃដី ២ហិកតារ។ លោកយល់ថា ដំណាំល្ម៉ើងាយស្រួលដាំ និងថែទាំជាងដំណាំក្រូចពោធិ៍សាត់ ពិសេសអាចទទួលផលច្រើនជាងដំណាំម្រេច។ លោកចង់ឃើញរដ្ឋាភិបាល ពិសេសក្រសួងកសិកម្ម ជំរុញផ្សព្វផ្សាយពីអត្ថប្រយោជន៍ដំណាំប្រភេទឧស្សាហកម្មនេះឲ្យកាន់តែច្រើនថែមទៀត៖ «ស្រូវដាំ និងថែទាំជាងក្រូច ដូច្នេះធ្វើឲ្យខ្ញុំជាកសិករ អ៊ីចឹងមិនសូវហត់នឿយ និងបានផលច្រើន»។
អាស៊ីសេរី មិនអាចសុំការឆ្លើយតបបន្ថែមពីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ម៉ាក់ សឿន ដើម្បីដឹងពីផែនការរបស់ក្រសួងចំពោះដំណាំល្ម៉ើយ៉ាងណាបាននៅឡើងនៅថ្ងៃទី២៦ ខែតុលា។ ប៉ុន្តែបើតាមប្រធានគ្រប់គ្រងទូទៅនៃក្រុមហ៊ុន អ៊ឹង សុទ្ធី គ្រុប លោក ឡេង មុនីនាថ អះអាងថា នៅជំនួបរវាងក្រុមហ៊ុន និងលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗនេះ លោក វេង សាខុន ក៏បានជំរុញឱ្យប្រជាកសិករខ្មែរងាកទៅចាប់អារម្មណ៍ដាំដុះដំណាំល្ម៉ើនៅក្នុងប្រទេសកម្ពុជា ឲ្យបានច្រើន ដោយលោកអះអាងថា ដំណាំប្រភេទនេះកំពុងមានទីផ្សារខ្ពស់នៅលើពិភពលោក ជាពិសេសនៅក្នុងតំបន់អាស៊ី។
វិនិយោគិនជាតិ និងអន្តរជាតិ អះអាងថា ដំណាំល្ម៉ើជាឈើមួយប្រភេទសន្តានត្នោត តែមានស្លឹក និងបន្លាផ្សេងគ្នាពីត្នោត មានផ្លែតូចៗ មានរសជាតិផ្អែម គេអាចប្រើវាធ្វើជាបង្អែម ដំណាប់ ភេសជ្ជៈ ទឹកឃ្មុំល្ម៉ើ ជាតែល្ម៉ើ និងស្ករល្ម៉ើជាដើម។
បច្ចុប្បន្ន ផលិតផលល្ម៉ើត្រូវបានក្លាយវាជាអាហារពេញនិយមបំផុតសម្រាប់ប្រជាជនឥស្លាមនៅលើពិភពលោក។ ជាងនេះ ដំណាំល្ម៉ើជាដំណាំដែលមិនរើសប្រភេទដី ធននឹងអាកាសធាតុក្ដៅខ្លាំងក្រោយដាំ ៣ឆ្នាំ អាចប្រមូលផលបានក្នុងមួយដើម ចាប់ពី ៤០គីឡូ ទៅ ១០០គីឡូក្រាម។
ទន្ទឹមគ្នានេះដែរ វិនិយោគិនជាតិ និងអន្តរជាតិយល់ថា ខណៈពិភពលោកកំពុងជួបវិបត្តិប្រែប្រួលអាកាសធាតុ ពិសេសគ្រោះរាំងស្ងួតខ្លាំង ហេតុនេះវាជាទិសដៅដំណាំប្រភេទថ្មីសម្រាប់វិនិយោគិនក្នុងតំបន់អាស៊ី។
បន្ថែមពីនេះទៀតវិនិយោគិនជាតិ និងអន្តរជាតិ ក៏បង្ហាញក្តីរំពឹងដែរថា ប្រសិនបើមានការជំរុញឲ្យមានការដាំដុះ ដំណាំល្ម៉ើពីរដ្ឋាភិបាល និងស្ថាប័នពាក់ព័ន្ធកាន់តែទូលាយថែមទៀតនោះដំណាំល្ម៉ើនឹងក្លាយជាដំណាំឧស្សាហកម្មដ៏សំខាន់ទី២ បន្ទាប់ពីអង្ករ ដែលជួយទ្រទ្រង់កំណើនសេដ្ឋកិច្ចកម្ពុជា ក៏ដូចជាអាស៊ាន៕