បក្សកាន់អំណាចថា មិនទារ EBA ២០% ពីអឺរ៉ុបទៀតឡើយ ខណៈឱសានវាទកាន់តែខើច
2020.08.10
គណបក្សកាន់អំណាចអះអាងជាថ្មីទៀតថា រដ្ឋាភិបាលនឹងមិនទាមទារប្រព័ន្ធអនុគ្រោះ EBA ចំនួន ២០% ដែលសហភាពអឺរ៉ុបបានដកនោះ ត្រឡប់មកវិញឡើយ។ ការលើកឡើងបែបនេះ គឺនៅស្របពេលសេចក្ដីសម្រេចដកហូតប្រព័ន្ធអនុគ្រោះពន្ធ EBA ចំនួន ២០% នឹងចូលជាធរមាននៅថ្ងៃពុធ ទី១២ សីហាខាងមុខនេះ។ អង្គការសង្គមស៊ីវិលថា នេះជាជំហរធ្វើឱ្យបាត់ប្រយោជន៍កម្មករ។
មន្ត្រីជាន់ខ្ពស់របបលោក ហ៊ុន សែន លើកឡើងថា ការបង់ពន្ធ ២០% លើមុខទំនិញដែលត្រូវនាំទៅសហភាពអឺរ៉ុបនោះ មិនមែនជារឿងធំដុំឡើយ ហើយកម្ពុជាមានលទ្ធភាពបង់ពន្ធទៅតាមការកំណត់របស់សហភាពអឺរ៉ុប។
អ្នកនាំពាក្យគណបក្សកាន់អំណាច លោក សុខ ឥសាន អះអាងនៅថ្ងៃទី១០ សីហាថា កម្ពុជានៅតែនាំទំនិញទៅសហភាពអឺរ៉ុបដដែល ទោះជាត្រូវពង់ពន្ធក៏ដោយ។ លោកបន្តថា ការបង់ពន្ធ គឺជាបន្ទុកសម្រាប់អ្នកនាំចេញ មិនពាក់ព័ន្ធនឹងអត្ថប្រយោជន៍ដែលកម្មករត្រូវទទួលបាននោះឡើយ៖ «អត់មានឆ្លើយតប អត់មានទៅទាមទារស្អីទេ អត់មានធ្វើបាតុកម្មទៅ EU ដើម្បីទុកអា ២០% ហ្នឹងទេ។ គេទារពន្ធ ២០% យើងបង់ឱ្យគេទៅ វាមានអ្វី។ អាហ្នឹងវាជារឿងធម្មតាតើ ការធ្វើជំនួញ។ បើគេអនុគ្រោះពន្ធឱ្យយើង យើងអត់បង់ទៅ បើគេយកពន្ធ យើងបង់ឱ្យគេទៅ»។
គណៈកម្មការអឺរ៉ុបបានសម្រេចចិត្តដកហូតប្រព័ន្ធអនុគ្រោះពន្ធ EBA ចំនួន ២០% ពីកម្ពុជា កាលពីថ្ងៃទី១២ កុម្ភៈ ហើយសេចក្ដីសម្រេចនេះនឹងត្រូវចូលជាធរមាននៅថ្ងៃទី១២ សីហា។ គណៈកម្មការអឺរ៉ុបសម្រេចចិត្តបែបនេះ បន្ទាប់ពីពិនិត្យយ៉ាងដិតដល់ ដោយរកឃើញថា របបលោក ហ៊ុន សែន បានរំលោភសិទ្ធិមនុស្សធ្ងន់ធ្ងរ និងជាប្រព័ន្ធ ផ្ទុយពីគោលការណ៍ពាណិជ្ជកម្មអឺរ៉ុប។
ការរំលោភសិទ្ធិមនុស្សធ្ងន់ធ្ងរទាំងនោះ មានជាអាទិ៍ ការចាប់ខ្លួនលោក កឹម សុខា ការរំលាយគណបក្សសង្គ្រោះជាតិ និងផាត់គណបក្សនេះចេញពីការបោះឆ្នោត ការយកអាសនៈរបស់បក្សប្រឆាំងទៅចែកគ្នាកាន់កាប់ ការគាបសង្កត់លើសិទ្ធិសេរីភាពមូលដ្ឋានរបស់ពលរដ្ឋ និងការបង្ក្រាបឥតស្រាកសាន្តលើមេដឹកនាំសហជីព អង្គការសង្គមស៊ីវិល និងអ្នកសារព័ត៌មានឯករាជ្យ ជាដើម។
គណៈកម្មការអឺរ៉ុបបានទុកពេលជាច្រើនខែឱ្យរបបលោក ហ៊ុន សែន ស្ដារស្ថានភាពទាំងនេះឱ្យល្អប្រសើរឡើងវិញ ប្រសិនបើចង់រក្សាឋានៈអនុគ្រោះពន្ធ EBA នេះបន្តទៅទៀត។ ទោះជាយ៉ាងណា រដ្ឋាភិបាលលោក ហ៊ុន សែន មិនអនុវត្តតាមសំណើរបស់សហភាពអឺរ៉ុបឡើយ ដោយសម្អាងថា សំណើនេះប៉ះពាល់ដល់អធិបតេយ្យជាតិ ហើយបានទៅស្រវ៉ាចុះកិច្ចព្រមព្រៀងពាណិជ្ជកម្មសេរីទ្វេភាគីជាមួយប្រទេសចិនវិញ។ កិច្ចព្រមព្រៀង ដែលនឹងលើកចោលរនាំងពន្ធគយរវាងកម្ពុជា និងចិននេះ ទំនងជាត្រូវចុះហត្ថលេខាដោយមេដឹកនាំប្រទេសទាំងពីរក្នុងពេលឆាប់ៗ ខាងមុខ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) លោក មឿន តុលា អះអាងថា សំណើរបស់សហភាពអឺរ៉ុបមិនធ្វើឱ្យកម្ពុជាខូចខាតអ្វីឡើយ ពោលគឺមិនធ្វើឱ្យកម្ពុជាបាត់ទឹកដី ហើយក៏មិនមែនឱ្យកម្ពុជា ផ្តល់ដីសម្បទានសេដ្ឋកិច្ច ឬព្រៃឈើទៅក្រុមហ៊ុនអឺរ៉ុបនោះដែរ។ ផ្ទុយទៅវិញ សំណើទាំងនោះ គឺស្របទៅតាមរដ្ឋធម្មនុញ្ញ និងច្បាប់របស់កម្ពុជា។ លោកយល់ថា សហភាពអឺរ៉ុបកំពុងតែជួយរក្សាទីផ្សារសម្រាប់កម្ពុជា ហើយកិច្ចព្រមព្រៀងពាណិជ្ជកម្មសេរីជាមួយចិន នឹងមិនផ្តល់ប្រយោជន៍ច្រើនដូចប្រព័ន្ធអនុគ្រោះពន្ធ EBA ឡើយ។
លោក មឿន តុលា បន្ថែមថា ជំហររបស់រដ្ឋាភិបាលរឿង EBA នេះ អាចឱ្យសាធារណជនវាយតម្លៃយ៉ាងច្បាស់ថា តើរដ្ឋាភិបាលបច្ចុប្បន្នកំពុងគិតគូរប្រយោជន៍ពលរដ្ឋជាធំ ឬក៏គិត ពីអំណាចរបស់ខ្លួនជាធំ៖ «បើទោះជាវា២០% ក៏ដោយ ក៏ប៉ុន្តែមូលហេតុដែលសហភាពអឺរ៉ុបបានប្រកាសថា គេដកហ្នឹង គឺដោយសារយើងមិនបានគោរពសិទ្ធិកម្មករ មិនបានគោរពសិទ្ធិពលរដ្ឋរបស់ខ្លួន ដើរចេញឆ្ងាយពីគន្លងប្រជាធិបតេយ្យជាដើម។ នេះជាចំណុចមួយដែលអាចងាយនឹងមានផលប៉ះពាល់ជាអវិជ្ជមានដល់អនាគតនៃទីផ្សារទំនិញរបស់យើងដែរ ហើយគេដក ២០% នេះ ខ្ញុំជឿថា ប្រហែលជាមិនចប់ត្រឹមហ្នឹងទេ។ បើយើងមិនត្រឡប់មកគន្លងប្រជាធិបតេយ្យ គោរពសិទ្ធិពលរដ្ឋយើង គោរពសិទ្ធិការងាររបស់យើងវិញហ្នឹង មិនដឹងថា ថ្ងៃក្រោយវាអាចមានភាគរយណាទៀត ដែលអាចបាត់បង់ទៀត»។
ក្រុមហ៊ុនបញ្ជាទិញធំៗ និងម៉ាកយីហោល្បីៗ បានប្រកាសរួចហើយថា ប្រសិនបើកម្ពុជាអនុវត្តតាមលក្ខខណ្ឌរបស់សហភាពអឺរ៉ុប និងគំនិតផ្ដួចផ្ដើមជាយុទ្ធសាស្ត្រមួយចំនួនទាក់ទងនឹងឧស្សាហកម្មកាត់ដេរតាមបែបទំនើប នោះកម្ពុជានឹងនៅតែជាគោលដៅដ៏ទាក់ទាញនៃការផ្គត់ផ្គង់ទំនិញ។ ផ្ទុយទៅវិញ បើគ្មានការអនុគ្រោះពន្ធ EBA ទេ នោះកម្ពុជានឹងពិបាកផ្លាស់ប្ដូរឧស្សាហកម្មវាយនភណ្ឌរបស់ខ្លួន។ ជាពិសេស ករណីនេះនឹងប៉ះពាល់ជាអវិជ្ជមានដល់ការវិនិយោគក្នុងថ្ងៃអនាគត ព្រមទាំងការរំពឹងទុក និងជំនឿចិត្ត ដែលជាធាតុផ្សំពីរដ៏សំខាន់នៃឧស្សាហកម្មប្រកបដោយការទទួលខុសត្រូវខ្ពស់។
មន្ត្រីជាន់ខ្ពស់សហភាពអឺរ៉ុប ទាំងនៅក្នុងគណៈកម្មការជំនាញ និងសភាអឺរ៉ុប នៅតែដាស់តឿនរបបលោក ហ៊ុន សែន ម្ដងហើយម្ដងទៀតឱ្យស្ដារស្ថានការណ៍កម្ពុជាឡើងវិញ ទោះជាឱសានវាទកាន់តែខើចក៏ដោយ។ កាយវិការបែបនេះ ធ្វើឱ្យក្រុមអ្នកសង្កេតការណ៍វាយតម្លៃបានថា សហភាពអឺរ៉ុបមិនចង់ដកផ្នែកណាមួយនៃប្រព័ន្ធអនុគ្រោះពន្ធ EBA ពីកម្ពុជាឡើយ។ តែគឺរបបលោក ហ៊ុន សែន ទៅវិញទេ ដែលបង្ខំឱ្យសហភាពអឺរ៉ុបគ្មានផ្លូវជ្រើសរើស ដើម្បីរក្សាគុណតម្លៃរបស់ខ្លួន ក្នុងនាមជាក្រុមប្រទេសគោរពសិទ្ធិមនុស្ស និងលទ្ធិប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។