អ្នកវិភាគនយោបាយជឿថា គណៈកម្មការអឺរ៉ុប នឹងមិនប្ដូរជំហរយកពន្ធអង្ករនាំចេញរបស់កម្ពុជាទេ
2019.01.18
អ្នកវិភាគនយោបាយលោក គឹម សុខ មានជំនឿថា របបលោក ហ៊ុន សែន នឹងមិនអាចទៅតវ៉ាឈ្នះគណៈកម្មការអឺរ៉ុប ដែលបានសម្រេចគិតពន្ធអង្ករកម្ពុជារយៈពេល ៣ឆ្នាំ គិតចាប់ពីថ្ងៃទី១៨ ខែមករានេះតទៅនោះទេ។ លោកថា របបលោក ហ៊ុន សែន គ្រាន់តែចង់បង្កើតឱកាសដើម្បីឲ្យមានការចរចាជាមួយអឺរ៉ុប ក្នុងគោលដៅកុំឲ្យមានទណ្ឌកម្មសេដ្ឋកិច្ចធ្ងន់ធ្ងរបន្ថែមទៀតមកលើរបបនេះតែប៉ុណ្ណោះ។
ក្រសួងពាណិជ្ជកម្ម បានអំពាវនាវឲ្យគណៈកម្មការអឺរ៉ុបពិនិត្យឡើងវិញនូវការសម្រេចរបស់ខ្លួន ផ្អែកលើវិធានពាណិជ្ជកម្មអន្តរជាតិ និងកិច្ចសហប្រតិបត្តិការល្អជាប្រពៃណីរវាងកម្ពុជា និងអឺរ៉ុប។ ក្រសួងថា ខ្លួនកំពុងពិនិត្យលើការសម្រេចនេះ ហើយនឹងតវ៉ាប្រឆាំងសេចក្ដីសម្រេចនេះ ដែលក្រសួងថា ប្រជាជនកម្ពុជាយល់ថា ជារឿងគ្មានសុក្រឹតភាព និងសច្ចភាពសង្គម និងសេដ្ឋកិច្ច។ ការអំពាវនាវរបស់កម្ពុជានេះ ដោយសារតែកាលពីថ្ងៃទី១៧ មករា គណៈកម្មការអឺរ៉ុបសម្រេចយកពន្ធលើអង្ករកម្ពុជាជាផ្លូវការក្នុងអត្រាជិត ២០០ដុល្លារអាមេរិកសម្រាប់អង្ករមួយតោនក្នុងឆ្នាំដំបូងនៃការគិតពន្ធនេះ ដែលអាចធ្វើកម្ពុជាខាតបង់យ៉ាងហោចណាស់ដល់ទៅជាង ៥០លានដុល្លារក្នុងមួយឆ្នាំ។
រដ្ឋលេខាធិការក្រសួងពាណិជ្ជកម្ម លោក សុខ សុភ័ក្រ្ត ថ្លែងក្នុងសន្និសីទសារកាសែតនៅថ្ងៃទី១៨ មករាថា លោកនៅតែមានសង្ឃឹមថា នឹងមានដំណោះស្រាយលើបញ្ហានេះ នៅពេលកម្ពុជាតវ៉ាទាស់ទៅនឹងការសម្រេចនេះទៅអង្គការពាណិជ្ជកម្មពិភពលោក។ ក៏ប៉ុន្តែលោកក៏បានចោទសហរដ្ឋអាមេរិក និងប្រទេសលោកខាងលិចមួយចំនួនថា ជាអ្នកធ្វើឲ្យខ្ទាស់អង្គភាពដោះស្រាយវិវាទនៅអង្គការពាណិជ្ជកម្មពិភពលោក៖ «យើងនឹងតវ៉ា ប៉ុន្តែតវ៉ា ដូចខ្ញុំជម្រាបជូនអ៊ីចឹងថា ចៃដន្យអីប្រទេសធំមួយពីរហ្នឹង វាខ្ទាស់ជីពចរនៅ WTO តាមរយៈការធ្វើឲ្យវាគាំងនៃអង្គភាពដោះស្រាយវិវាទ។ អ៊ីចឹងយើងសង្ឃឹមថា ដោះអាហ្នុងលឿន បូកជាមួយយើងតវ៉ាអ៊ីចឹងទៅ វារួចបញ្ហាហើយ»។
ផ្ទុយពីការអះអាងរបស់រដ្ឋលេខាធិការក្រសួងពាណិជ្ជកម្មរូបនេះ ត្រូវបានអ្នកវិភាគនយោបាយលោក គឹម សុខ ថា ការតវ៉ារបស់របបនេះ គ្រាន់តែជាលេសដើម្បីចង់ឲ្យមានការចរចាជាមួយអឺរ៉ុបប៉ុណ្ណោះ និងដើម្បីបញ្ចៀសកុំឲ្យមានទណ្ឌកម្មសេដ្ឋកិច្ចបន្ថែមទៀតពីអឺរ៉ុបប៉ុណ្ណោះ។ លោកថា កម្ពុជានឹងមិនឈ្នះការប្ដឹងផ្ដល់នេះឡើយ ព្រោះមុននឹងគណៈកម្មការអឺរ៉ុបសម្រេចយ៉ាងដូច្នេះ គេបានធ្វើការស្រាវជ្រាវ និងស៊ើបអង្កេតយ៉ាងហ្មត់ចត់ស្ទើរពេញមួយឆ្នាំ២០១៨ មកហើយ។ ម្យ៉ាងវិញទៀត លោក គឹម សុខ បន្តថា សហភាពអឺរ៉ុបដឹងច្បាស់ណាស់ថា អ្នកដែលទទួលប្រយោជន៍ពីការមិនយកពន្ធលើអង្ករពីអឺរ៉ុបនេះ គឺមិនមែនជាប្រជាកសិករក្រីក្រនោះទេ តែគឺជាក្រុមបក្ខពួក កូនប្រសារបស់លោក ហ៊ុន សែន ជាពិសេស គឺលោក សុខ ពុទ្ធិវុធ ដែលជាប្រធានសហព័ន្ធស្រូវអង្ករកម្ពុជា និងបក្ខពួក បានឆ្លៀតកេងប្រវ័ញ្ច និងយកចំណេញពីលើខ្នងពលរដ្ឋខ្មែរ តាមរយៈការទិញស្រូវពីកសិករក្នុងតម្លៃថោកៗ ហើយយកទៅកែច្នៃជាអង្ករនាំចេញទៅលក់ឲ្យអឺរ៉ុប ចំណេញកប់ក្ដោង ដោយមិនបាច់បង់ពន្ធ៖ «កម្មវិធីដែលគេអនុគ្រោះឲ្យនោះ វាមិនបានផលទៅដល់កសិករទេ តែវាបានផលទៅដល់ក្រុមអ្នកដឹកនាំ ប្រមូលកើបផលពីកសិករផង ប្រមូលកើបផលពីលក្ខខណ្ឌអនុគ្រោះរបស់គេផង ទាំងការឃុបឃិតជាមួយនឹងឈ្មួញទុច្ចរិត ក្នុងការប្រើកម្មវិធីរបស់គេលក់ដូរ ចែកផលគ្នាផង។ ដូច្នេះគេដឹងរឿងហ្នុងច្បាស់ណាស់។ ទៅតវ៉ាជាមួយហ្នឹងគេយ៉ាងម៉េច? ហើយគេដឹងតាមរយៈការស្រាវជ្រាវរកការពិតរបស់គេច្បាស់លាស់។ តវ៉ាជាមួយគេអត់ឈ្នះទេ។ តាមពិតទៅ វាគ្រាន់តែជាការបង្កើតឱកាសឲ្យមានការជួបជជែកគ្នា រកឱកាសជួបជជែកគ្នារវាងក្រុងភ្នំពេញ និងអន្តរជាតិ ដោយ (ពួកគេ) បារម្ភខ្លាចមានការដាក់ទណ្ឌកម្មលើវិស័យផ្សេងៗ ទៀតដែលប៉ះពាល់ទៅដល់ដំណើរការដឹកនាំរបស់ខ្លួនតែប៉ុណ្ណឹងទេ មិនមែនជាការរកខុសរកត្រូវទេ»។
បន្ថែមពីលើការគ្រោងប្ដឹងផ្ដល់ទៅអង្គការពាណិជ្ជកម្មពិភពលោកដោយក្រសួងពាណិជ្ជកម្មនេះ ក្រសួងពាណិជ្ជកម្មបានប្រើពាក្យធ្ងន់ៗថា ការសម្រេចវិធានការណ៍គិតពន្ធរបស់អឺរ៉ុបនេះ បានដកហូតចំណូលពីកសិករក្រីក្រកម្ពុជា ហើយជាអាវុធសម្រាប់ធ្វើឃាតពួកគាត់ និងក្រុមគ្រួសារ ដែលជាប់បំណុលជាមួយមីក្រូហិរញ្ញវត្ថុ ដែលបានផ្ដល់កម្ចីដល់ពួកគាត់។ លោក គឹម សុខ មិនយល់ដូច្នេះឡើយ លោកថា ផ្ទុយទៅវិញទេ ការសម្រេចរបស់អឺរ៉ុបដូច្នេះ គឺជាអាវុធ សម្លាប់ក្រុមលោក ហ៊ុន សែន និងបក្ខពួកទៅវិញទេ ដែលពួកគេបានកេងប្រវ័ញ្ចលើកកសិករក្រីក្រ៖ «មែនទែន អាហ្នុងមិនមែនជាអាវុធសម្លាប់ពលរដ្ឋទេ សម្លាប់កសិករទេ វាជាអាវុធសម្លាប់អំណាចក្រុមលោក ហ៊ុន សែន សម្លាប់ឱកាសកេងប្រវ័ញ្ចក្រុមលោក ហ៊ុន សែន ទៅវិញទេ ពីព្រោះក្រុមលោក ហ៊ុន សែន បានប្រយោជន៍ពីកសិករក្នុងការទិញថោកៗ គាបសង្កត់អីចឹងទៅ។ របៀបធ្វើទីផ្សារសេរី ប៉ុន្តែល្បិចគាបសង្កត់ កេងប្រវ័ញ្ច ហើយនឹងបានផលអំពីការកេងប្រវ័ញ្ចផលនៃការមិនបង់ពន្ធ ផលនៃការឃុបឃិតគ្នាជាមួយនឹងអ្នកវិនិយោគ ចែកផលគ្នា រហូតដល់ទៅបង្កើតក្រុមហ៊ុនកូនលោក ហ៊ុន សែន ... បង្កើតក្រុមហ៊ុនខ្លួនឯងរកស៊ីទៀត។
គម្រោងរបស់ក្រសួងពាណិជ្ជកម្ម ប្ដឹងផ្ដល់គណៈកម្មការអឺរ៉ុបទៅអង្គការពាណិជ្ជកម្មពិភពលោករឿងគិតពន្ធអង្ករនេះ គឺជាវិធានការណ៍មួយផ្ទុយស្រឡះ និងជាការទះកំផ្លៀងទៅលោក ហ៊ុន សែន ដែលធ្លាប់បានអួតអាងក្តែងៗ ជំរុញឲ្យអឺរ៉ុប និងក្រុមប្រទេសលោកខាងលិច យកពន្ធលើកម្ពុជាកាន់តែឆាប់ កាន់តែល្អ និងថាមិនខ្ចីឱនក្បាលយកអធិបតេយ្យទៅដោះដូរនឹងជំនួយ នោះឡើយ ឬក៏ថា ការធ្វើដូច្នេះជាបច្ច័យល្អសម្រាប់កម្ពុជា ឲ្យកាន់តែខ្លាំង និងមានឯករាជ្យភាពផ្នែកសេដ្ឋកិច្ចនោះផង៖ «កាត់ទៅ លោកឯងកាត់ទៅ! លោកឯងជ្រើសរើសមនុស្សប៉ុន្មាននាក់ ឬជ្រើសរើសប្រជាជន ១៥ លាននាក់? លោកឯងជ្រើសរើសទំនាក់ទំនងជាមួយបុគ្គលមួយក្រុម ឬលោកឯងជ្រើសរើសទំនាក់ទំនងរវាងប្រទេសនិងប្រទេស? ធ្វើទៅ! ធ្វើឲ្យវាអស់សេចក្ដីទៅ! ... កុំយកអធិបតេយ្យជាតិទៅដូរជាមួយជំនួយ! កុំយកសន្តិភាពរបស់ប្រទេសទៅដូរជាមួយជំនួយ! កុំយកសន្តិភាពរបស់ប្រទេសទៅដូរជាមួយជំនួយ! ចង់ឲ្យបង់ពន្ធ បង់ពន្ធ! សូមផ្ដាំណា ឱនក្បាលម្ដង ត្រូវជំពាក់ ឱនពីរដងជំពាក់ ឱនបីដងជំពាក់ ឱនមួយជីវិត ខ្មែរអត់ឯករាជ្យទេ។ ប្រឹងរស់ ងើបឈរឡើងដើម្បីការពារឯករាជ្យអធិបតេយ្យរបស់ប្រទេស»។
បើទោះជាសំណុំរឿងយកពន្ធលើអង្ករនេះ ជាសំណុំរឿងមួយផ្សេងដាច់ដោយឡែកពីចំណាត់ការដកហូតប្រព័ន្ធអនុគ្រោះពន្ធគ្រប់មុខទំនិញទាំងអស់លើកលែងតែអាវុធ ឬ EBA ក៏ដោយ ក៏ប៉ុន្តែការគិតពន្ធលើអង្ករនេះ កំពុងក្លាយជាបន្ទុកថ្មីមួយបន្ថែមទៀតសម្រាប់របបក្រុងភ្នំពេញ ដែលត្រូវដោះស្រាយនៅចំពោះមុខមិនអាចមើលរំលងបាន ព្រោះថាភាគច្រើនលើសលប់នៃពលរដ្ឋខ្មែរជាកសិករ ខណៈដែលពួកគេអាចនឹងងើបតវ៉ា ឬបះបោរឡើង ប្រសិនបើរបបនេះពុំអាចស្វែងរកទីផ្សារស្រូវអង្ករជូនពួកគេបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។