គម្រោងសម្លេងសហគ្រិនស្ត្រីវ័យក្មេងនិងយុវជនដើម្បីបរិយាកាសអាជីវកម្មកាន់តែប្រសើរ
2021.07.10
អង្គការសម្ព័ន្ធគណនេយ្យភាពសង្គមកម្ពុជា (ANSA) កាលពីថ្ងៃទី៩ ខែកក្កដា ប្រកាសពីគម្រោងសំឡេងសហគ្រិនស្ត្រីវ័យក្មេងនិងយុវជន ដើម្បីបរិយាកាសអាជីវកម្មកាន់តែប្រសើរ។ គម្រោងនេះផ្តល់មូលនិធិដោយទីភ្នាក់ងារជំនួយសហរដ្ឋអាមេរិក (USAID) តាមរយៈគម្រោងសហគ្រិននារីសកម្ម WE Act របស់អង្គការផេកកម្ពុជា។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ប្រាប់អាស៊ីសេរីថា គោលបំណងសំខាន់នៃគម្រោងនេះ គឺកសាងសមត្ថភាពប្រជាពលរដ្ឋ ជាពិសេសពង្រឹងសិទ្ធិអំណាចស្ត្រីនិងយុវជន ដែលជាក្រុមទន់ខ្សោយ និងងាយរងគ្រោះ ដើម្បីបង្កើនសមត្ថភាពពួកគេ ក្នុងការចូលរួមអភិបាលកិច្ច កែលម្អការផ្តល់សេវាសាធារណៈប្រកបដោយសមធម៌ ព្រមទាំងការគ្រប់គ្រងធនធានសាធារណៈ និងធនធានធម្មជាតិជាដើម៖ «នៅក្នុងបរិបទកូវីដ១៩នេះ ក្រុមសហគ្រិនស្ត្រីវ័យក្មេងនិងយុវជន គេបានប្រឈមការខាតបង់ និងខ្វះការគាំទ្រ ទៅលើគំនិតនិងចក្ខុវិស័យវែងឆ្ងាយ សំរាប់ដំណើរការអាជីវកម្មទៅថ្ងៃមុខ។ ពួកគេគួរតែត្រូវបានលើកទឹកចិត្ត និងទទួលបានបន្ថែមទៀតនូវគាំទ្រពីរដ្ឋាភិបាល វិស័យឯកជន និងសង្គមស៊ីវិល សំរាប់អាជីវកម្មកាន់តែប្រសើរ..»។
លោកបន្តថា គម្រោងនេះកំពុងអនុវត្តលើក្រុមគោលដៅចំនួន ១១៥នាក់ នៅរាជធានីភ្នំពេញ ដែលមានរយៈពេលមួយឆ្នាំ គឺចាប់ពីខែមីនា ២០២១ រហូតដល់ខែមីនា ឆ្នាំ២០២២ ដើម្បីបណ្តុះបណ្តាល ពួកគេអំពីគំនិតច្នៃប្រឌិត ផែនការអាជីវកម្ម ការចែករំលែកបទពិសោធន៍ និងពង្រឹងយន្តការចូលរួមបែបស្ថាបនារបស់ប្រជាពលរដ្ឋប្រកបដោយប្រសិទ្ធភាព ដើម្បីផ្តល់លទ្ធភាពឲ្យសហគ្រិនស្ត្រីវ័យក្មេងនិងយុវជន បានរួមចំណែកស្វែងរកការគាំទ្រ ជុំវិញបញ្ហាចម្បងៗទាក់ទងទៅនឹងសហគ្រិនភាព ឬអភិបាលកិច្ចអាជីវកម្ម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។