ប្រធាន​សហជីព​កម្មករ​ព្រមាន​ពី​ភាព​វឹកវរ​ក្នុង​វិស័យ​កាត់ដេរ​នៅ​ពេល​អន្តរជាតិ​ឈប់​អនុគ្រោះ​ពន្ធ

ដោយ មួង ណារ៉េត
2017-12-01
អ៊ីម៉ែល
មតិ
Share
បោះពុម្ព
ក្រុម​កម្មករ​ហែ​ក្បួន​ប្រារព្ធ​ទិវា​ពលកម្ម​អន្តរជាតិ លើក​ទី​១៣០ នៅ​រាជធានី​ភ្នំពេញ កាល​ពី​​ថ្ងៃ​ទី​១ ខែ​ឧសភា ឆ្នាំ​២០១៦។
ក្រុម​កម្មករ​ហែ​ក្បួន​ប្រារព្ធ​ទិវា​ពលកម្ម​អន្តរជាតិ លើក​ទី​១៣០ នៅ​រាជធានី​ភ្នំពេញ កាល​ពី​​ថ្ងៃ​ទី​១ ខែ​ឧសភា ឆ្នាំ​២០១៦។
Photo: RFA

ប្រធាន​សហជីព​កម្មករ ព្រមាន​ពី​ភាព​វឹកវរ​ក្នុង​វិស័យ​រោងចក្រ​កាត់ដេរ នៅ​ពេល​អន្តរជាតិ​ឈប់​អនុគ្រោះ​ពន្ធ​នាំ​ចេញ​សម្លៀកបំពាក់ ប្រសិនបើ​អ្នក​នយោបាយ​ខ្មែរ​នៅ​តែ​បណ្ដែតបណ្ដោយ​ឲ្យ​ស្ថានការណ៍​នយោបាយ​សព្វថ្ងៃ​គ្មាន​ដំណោះស្រាយ​បែប​នេះ។

​បញ្ហា​វឹកវរ​ធំ​ដែល​នឹង​អាច​កើត​មាន​ជាយថាហេតុ នៅ​ពេល​ឆាប់ៗ​ខាង​មុខ​នេះ ត្រូវ​បាន​តំណាង​សហជីព​កម្មករ​មើល​ឃើញ​ថា នឹង​ប៉ះពាល់​យ៉ាងខ្លាំង​ដល់​វិស័យ​ឧស្សាហកម្ម​កាត់​ដេរ។

ប្រធាន​សហជីព​កម្មក​រលោក អាត់ ធន់ បញ្ជាក់​ថា ពេល​ដែល​មាន​ទណ្ឌកម្ម​សេដ្ឋកិច្ច ថៅកែ​រោងចក្រ​មិន​ដាច់​បាយ​ស្លាប់​នោះ​ទេ គឺ​គ្រាន់តែ​ខាត​ចំណេញ​មិន​បាន​ធ្វើ​សេដ្ឋី និង​រក្សា​ចំណូល​កប់​ក្តោង​ដដែល។ ប៉ុន្តែ អ្នក​ដែល​លំបាក​វេទនា​បំផុត គឺ​កម្មករ​ជិត​មួយ​លាន​នាក់ និង​អ្នក​ទទួល​ផល​ពី​វិស័យ​កាត់​ដេរ​នេះ​ជិត​ពីរ​លាន​ផ្សេង​ទៀត៖ «ហើយ​អ្វី​ដែល​ជា​បញ្ហា​ធំ​បំផុត​នោះ​គឺ​កម្មករ​ភាព​ច្រើន​សុទ្ធតែ​ខ្ចីលុយ​ធនាគារ ក្នុង​គោលបំណង​ប្រើប្រាស់​សម្រាប់​ការងារ​មួយ​ចំនួន និង​ការងារ​ផ្ទាល់ខ្លួន​របស់គាត់។ គាត់​ពឹង​ពាក់​ទាំង​ស្រុង​លើ​ចំណូល​ពី​ការងារ​ក្នុង​វិស័យ​ឧស្សាហកម្ម​កាត់​ដេរ​នេះ។ នេះ​ជា​ឧបសគ្គ និង​ហានិភ័យ ព្រោះ​ការ​ជំពាក់​ធនាគារ អាច​ឈាន​ទៅ​ដល់​ការ​រឹបអូស​ទ្រព្យ​របស់​គាត់»

​អតីត​ប្រធាន​សហជីព​សេរី​កម្មករ នៃ​ព្រះរាជាណាចក្រ​កម្ពុជា ឯ​ណោះ​វិញ ក៏​យល់​មិន​ខុស​ពី​នេះ​ដែរ។ លោក ជា មុនី សមាជិក​ក្រុមប្រឹក្សា​ឃ្លាំមើល​ពហុ​វិស័យ​នៅ​កម្ពុជា ប្រមើល​ឃើញ​ភាព​កើត​កលិយុគ ប្រសិនបើ​នៅតែ​ទុក​ស្ថានការណ៍​បែប​សព្វថ្ងៃ​ ឲ្យ​នៅ​គ្មាន​ដំណោះស្រាយ​ដូច្នេះ។ លោក​ជឿ​ថា នៅ​ពេល​កម្មករ​បាត់​ប្រាក់​ចំណូល​ប្រចាំថ្ងៃ ដែល​ជា​ប្រភព​តែមួយគត់​សម្រាប់​ផ្គត់​ជីវភាព​គ្រួសារ ពួកគាត់​ច្បាស់​ជា​ក្រោក​តវ៉ា លែង​ខ្លាច​ការ​បង្ក្រាប លែង​ខ្លាច​ស្លាប់​អ្វី​ទាំង​អស់៖ «ពេល​ដែល​អត់​បាយ​អត់​ទឹក គឺ​មនុស្ស​អាច​ផ្តុំគ្នា​មូលគ្នា​តាម​ផ្លូវ។ ពេល​ដែល​គាត់​អត់ គាត់​លែង​ខ្វល់ បើ​គាត់​ជំពាក់​គេ​ដល់​ក គាត់​លែង​ខ្លាច​ស្លាប់ បើ​សង្គ្រាម​ក៏​មិន​ខ្លាច គាត់​លែង​ស្តាប់​អ្នក​ណា​ទាំង​អស់។ មិន​មែន​មនុស្ស​ម្នាក់​ទេ គឺ​មនុស្ស​រាប់​លាន​នាក់ ដែល​ផ្ទុះ​បាតុកម្ម​នេះ»

​ប៉ុន្តែ​លោក​នាយករដ្ឋមន្ត្រី ហ៊ុន សែន មិន​ខ្វល់​ពី​ការ​គម្រាម​ដាក់​ទណ្ឌកម្ម​សេដ្ឋកិច្ច​ពី​សំណាក់​សហគមន៍​អន្តរជាតិ​នេះ​ទេ ព្រោះ​លោក​អះអាង​ថា កម្ពុជា​បច្ចុប្បន្ន មិន​ដូច​កម្ពុជា កាល​ពី​ប្រមាណ ៣០​ឆ្នាំ​មុន​នោះ​ឡើយ។ ថ្លែង​នៅ​ចំពោះ​កម្មករ​រោងចក្រ​កាត់​ដែរ​រាប់​ពាន់​នាក់​នៅ​សង្កាត់​ភ្នំពេញ​ថ្មី កាល​ពី​ថ្ងៃ​ទី​២២ ខែ​វិច្ឆិកា លោក ហ៊ុន សែន បញ្ជាក់​ថា កាលពីមុន​កម្ពុជា រង​ការ​ដាក់​ទណ្ឌកម្ម​សេដ្ឋកិច្ច​ជុំ​ទិស​ម្តេច​រស់​បាន ចុះ​ឥឡូវ​នេះ​ម្តេច​រស់​មិន​បាន៖ «ការ​សម្លាប់​សេដ្ឋកិច្ចរ​បស់​កម្ពុជា វា​មិន​មែន​ងាយស្រួល​ដូច​បក​ចេក​នោះ​ទេ។ ពិត​មែន​តែ​កម្លាំង​យើង​តូច យើង​ក៏​ជា​ប្រភព​ទីផ្សារ​របស់​គេ​ដែរ»

​កំណើន​សេដ្ឋកិច្ច​កម្ពុជា ពឹង​អាស្រ័យ​យ៉ាង​ខ្លាំង​ទៅ​លើ​ការ​នាំ​ចេញ​ផលិតផល​វិស័យ​កាត់​ដេរ ដែល​ទីផ្សារ​ធំ​បំផុត​របស់​កម្ពុជា ក្នុង​វិស័យ​នេះ គឺ​សហគមន៍​អឺរ៉ុប និង​សហរដ្ឋអាមេរិក។ ជាង ៦០% នៃ​ការ​នាំ​ចេញ​ផលិតផល​វិស័យ​វាយនភ័ណ្ឌ​របស់​កម្ពុជា ទៅ​ពិភពលោក គឺ​នាំ​ចេញ​ទៅ​ទីផ្សារ​អឺរ៉ុប និង​សហរដ្ឋអាមេរិក ដែល​មាន​ទំហំ​ទឹក​ប្រាក់​ប្រហែល ៦​ពាន់​លាន​ដុល្លារ​ក្នុង​មួយ​ឆ្នាំៗ។ ការ​រីក​លូតលាស់​វិស័យ​កាត់ដេរ និង​រោងចក្រ​នៅ​កម្ពុជា ក៏​ដោយសារ​តែ​ការអនុគ្រោះ​ពន្ធ​ពី​សហគមន៍​អឺរ៉ុប និង​សហរដ្ឋអាមេរិក​នេះ​ដែរ។ ប៉ុន្តែ ដោយសារ​តែ​រដ្ឋាភិបាល​លោក ហ៊ុន សែន ធ្វើ​ទុក្ខបុកម្នេញ​លើ​គណបក្ស​ប្រឆាំង អង្គការ​សង្គម​ស៊ីវិល និង​ប្រព័ន្ធ​ផ្សព្វផ្សាយ​ឯករាជ្យ​នៅ​កម្ពុជា យ៉ាង​សន្ធាប់ ទើប​ប្រទេស​ទាំង​នោះ​ព្រមាន​កាត់​ផ្តាច់​ការ​អនុគ្រោះ​ពន្ធ​នេះ។

​ទោះ​ជា​យ៉ាង​នេះ​ក្តី លោក ហ៊ុន សែន ហាក់​ដូចជា​ខំប្រឹង​បង្ហាញ​ភាព​មិន​ខ្លាច​ការ​គំរាម​នេះ។ នៅ​ចំពោះ​មុខ​កម្មករ​រោងចក្រ​រាប់​ពាន់​នាក់​នៅ​កោះពេជ្រ នៅ​ថ្ងៃ​ទី​១៩ ខែ​វិច្ឆិកា លោក​ថែម​ទាំង​ហ៊ាន​គំរាម​បក​ទៅ​សហគមន៍​អន្តរជាតិ ឲ្យ​ដាក់ទណ្ឌកម្ម​សេដ្ឋកិច្ច​លើ​កម្ពុជា ទៀត​ផង៖ «អ្នក​ឯង​បិទ​ល​មើល! អ្នក​ឯង​បិទ អ្នក​ឯង​ត្រូវ​ទទួល​ខុស​ត្រូវ​ចំពោះ​មុខ​វិស័យ​ឯកជន​របស់​អ្នក​ឯង ដែល​បាន​ចុះ​កុង​ត្រា​ទិញ​រួច​ហើយ។ អ្នក​ឯង​បិទ បិទ​ជា​នយោបាយ ប៉ុន្តែ អនុវត្ត​មិន​បាន​ទេ»

​លោក ហ៊ុន សែន ថា បើ​នៅ​ទីបំផុត​សហគមន៍​អន្តរជាតិ នៅ​តែ​ហ៊ាន​ដាក់​ទណ្ឌកម្ម​សេដ្ឋកិច្ច​មក​លើ​កម្ពុជា មែន កំហុស​គឺ​ធ្លាក់​ទៅលើ​បក្ស​ប្រឆាំង​ដែល​លោក​អះអាង​ថា ប៉ិន​ខាង​ដើរ​ប្រកូក​ប្រកាស​ឲ្យ​បរទេស​ផ្តាច់​ជំនួយ និង​ដាក់​ទណ្ឌកម្ម​ខ្មែរ។ ប៉ុន្តែ ការ​លើក​ឡើង​បែប​នេះ ត្រូវ​បាន​មន្ត្រី​បក្ស​ប្រឆាំង​ច្រាន​ចោល​ទាំង​ស្រុង។ មន្ត្រី​គណបក្ស​សង្គ្រោះ​ជាតិ ថា​ទង្វើ​លោក ហ៊ុន សែន និង​គណបក្ស​កាន់​អំណាច​ឯ​ណោះ​ទៅ​វិញ​ទេ ដែល​កំពុង​នាំ​ប្រទេស​កម្ពុជា ឲ្យ​ស្ថិត​ក្នុង​ស្ថានភាព​គ្រោះថ្នាក់ និង​ឯកោ​ពី​ពិភពលោក។

ទាំង​លោក អាត់ ធន់ និង​លោក ជា មុនី សុទ្ធតែ​យល់​ឃើញ​ដូច​គ្នា​ថា ការ​ដាក់ទណ្ឌកម្ម​ណា​មួយ​គឺ​វា​ផ្សាភ្ជាប់​គ្នា​ទៅ​ទង្វើ​របស់​រដ្ឋាភិបាល​លោក ហ៊ុន សែន ក្នុង​ការគោរព​សិទ្ធិមនុស្ស និង​លទ្ធិប្រជាធិបតេយ្យ​នៅ​កម្ពុជា។

លោក អាត់ ធន់ ស្នើ​ឲ្យ​អ្នក​នយោបាយ​ខ្មែរ​ងាក​មក​រក​ការ​ចរចា​គ្នា​រវាង​ខ្មែរ​និង​ខ្មែរ ដើម្បី​ឲ្យ​មាន​ដំណោះស្រាយ​នយោបាយ​សមស្រប​មួយ ចៀសវាង​ការ​ដាក់​ទណ្ឌកម្ម​ពី​អន្តរជាតិ​ណា​មួយ៖ «ប្រសិនបើ​គណបក្ស​ធំៗ​ទាំង​ពីរ​អាច​ជជែក​គ្នា​រវាង​ខ្មែរ និង​ខ្មែរ​តែមួយ ដើម្បី​បញ្ចប់​បញ្ហា​ទាំង​អស់​ហ្នឹង និង​ឈាន​ទៅ​ការ​រៀបចំ​ស្រុក​ទេស​យើង​ឲ្យ​បាន​ប្រសើរ​ឡើង​វិញ និង​មាន​ស្ថិរភាព នោះ​គឺ​ជា​ការ​ប្រសើរ​មែន​ទែន»

​លោក ជា មុនី ក៏​ស្នើ​ឲ្យ​លោក ហ៊ុន សែន ពិចារណា​ឡើង​វិញ​នូវ​ចំណាត់ការ​ទាំង​ឡាយ​របស់​លោក​ដើម្បី​កុំ​ឲ្យ​ប្រវត្តិសាស្ត្រ​ចារ​ទុក​នូវ​ទង្វើ​អាក្រក់​របស់​នាយករដ្ឋមន្ត្រី៖ «បើ​នាយករដ្ឋមន្ត្រី​ផ្លាស់ប្តូរ​អារម្មណ៍ ផ្លាស់ប្តូរ​ចិត្ត ធ្វើ​ឲ្យ​អន្តរជាតិ​គេ​សប្បាយចិត្ត និង​ទុកចិត្ត​គាត់ នោះ​ឧស្សាហកម្ម​កាត់​ដេរ នឹង​ដំណើរ​ការ​ល្អ។ បើ​ស្ថានការណ៍​ដុនដាប កើត​កលិយុគ រដ្ឋាភិបាល​លោក ហ៊ុន សែន ត្រូវ​ទទួល​ខុស​ត្រូវ​ក្នុង​ប្រវត្តិសាស្ត្រ»

​សមាគម​រោងចក្រ​កាត់ដេរ​នៅ​កម្ពុជា (GMAC) នៅ​ថ្ងៃ​សុក្រ ទី​១ ខែ​ធ្នូ ​នេះ បាន​អំពាវនាវ​ឲ្យ​អ្នកទិញ​កុំ​បញ្ឈប់​ការ​ទិញ​សម្លៀកបំពាក់ និង​ទំនិញ​ក្រោម​ការ​អនុគ្រោះ​ពន្ធ។ ចំណែក​ឯ​ក្រុមប្រឹក្សា​សហជីព​កម្ពុជា ក៏​បាន​សរសេរ​លិខិត​កាល​ពី​ថ្ងៃ​ទី​២៩ ខែ​វិច្ឆិកា សុំ​ជួប​ឯកអគ្គ​រដ្ឋទូត​សហរដ្ឋអាមេរិក​ប្រចាំ​នៅ​កម្ពុជា ដោយ​សំណូមពរ​ឲ្យ​អាមេរិក កុំ​បញ្ឈប់​ការ​ទិញ​ផលិតផល​សម្លៀកបំពាក់​កាត់ដេរ និង​ស្បែក​ជើង រួមទាំង​ផលិតផល​ផ្សេងៗ​ទៀត​ពី​កម្ពុជា ចូល​ទីផ្សារ​សហរដ្ឋអាមេរិក។

​អ្នក​វិភាគ​ព្យាករ​ថា បើ​ស្ថានការណ៍​នយោបាយ​បច្ចុប្បន្ន មិន​ធូរស្រាល ប្រទេស​កម្ពុជា នឹង​ចៀស​មិន​ផុត​ការ​រង​ការ​ដាក់​ទណ្ឌកម្ម​សេដ្ឋកិច្ច​នោះ​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

អ្នក​អាន​អនាមិក

ប្រជាជនខ្មែរត្រូវយល់ដឹងអំពីប្រទេសដទៃទៀតបញ្ឈប់ការគាំទ្រដល់ឧស្សាហកម្មកាត់ដេរ។ ឥឡូវនេះពួកគេចង់អោយកម្មករប្រឆាំងនឹងលោកហ៊ុនសែនឥឡូវនេះ។ ឬកម្មកររង់ចាំរហូតដល់មិនមានការងារធ្វើជិតស្លាប់ហើយប្រឆាំងលោកហ៊ុនសែន។ ដូច្នេះវាជាជម្រើសរបស់អ្នក។ ប្រឆាំងនឹងលោកហ៊ុនសែនឥឡូវនេះ,ឬរង់ចាំរហូតដល់ជិតស្លាប់។

Dec 06, 2017 03:24 AM

អ្នក​អាន​អនាមិក

If workers starving, Hun Sen will be killed by workers because starving don't die quick, starving still have time and strength to execute the desperate attempt. And this is not a thread, it is just a reminder !

Dec 02, 2017 10:54 AM

កូនកម្ពុជា

តាមសង្កេតមើល រយៈកាលកន្លងមក លោក ហ៑ុន សែន គាត់ធ្វើនយោបាយ គឹតប្រយោជន៍ផ្ទាល់ខ្លួន ធំជាងប្រយោជន៍ជាតិ ប្រយោជន៍ប្រជាជន ( ប្រជាជនក្រល្ហេមល្ហាម រដ្ឋក្រជំពាក់លុយបរទេស ក៏លោក ហ៑ុន សែន មិនខ្វល់ )

Dec 01, 2017 11:20 PM

អ្នក​អាន​អនាមិក

This is KHMER POLITICIANS identity !

Dec 02, 2017 10:56 AM

គេហទំព័រ​ទាំងមូល