ភ្ញៀវទេសចរចិនទៅលេងប្រទេសថៃមានចំនួនច្រើនជាងមកកម្ពុជា
2023.12.14
យន្តហោះមកពីចិនចុះចតនៅខេត្តព្រះសីហនុលើកដំបូង នាំភ្ញៀវទេសចរចិនជាង១០០នាក់កាលពីថ្ងៃទី២៧ ខែមករា ឆ្នាំ២០២៣។
រូប៖ ក្រសួងទេសចរណ៍
រដ្ឋាភិបាលកម្ពុជាសម្លឹងឃើញភ្ញៀវទេសចរជនជាតិចិនថា មានសារសំខាន់បំផុតជាប្រភពរកចំណូលជួយលើកស្ទួយកំណើនសេដ្ឋកិច្ចដើម្បីកាត់បន្ថយភាពក្រីក្រហើយរដ្ឋាភិបាលកម្ពុជាក៏ដូចជាក្រសួងទេសចរណ៍កំពុងប្រឹងប្រែងយ៉ាងខ្លាំងក្នុងការទាក់ទាញជនជាតិចិនឱ្យមកទស្សនាកម្ពុជាឱ្យបានកាន់តែច្រើន។
ក៏ប៉ុន្តែភ្ញៀវទេសចរចិនហាក់មិនចាប់អារម្មណ៍ និងការកៀរគររបស់កម្ពុជាទេ ហើយពួកគេជាច្រើនបានទៅលេងប្រទេសថៃ ដែលជាប្រទេសជាប់គ្នាជាមួយកម្ពុជានេះ។
តើប្រទេសថៃមានសក្ដានុពលទេសចរណ៍អ្វីសំខាន់ជាងកម្ពុជាបានជាអាចទាក់ទាញភ្ញៀវទេសចរចិនយ៉ាងច្រើនឱ្យទៅទស្សនា...?
ពេលបច្ចុប្បន្នចំនួនភ្ញៀវទេសចរចិនដែលមកទស្សនាកម្ពុជាកំពុងធ្លាក់ចុះយ៉ាងខ្លាំងបើទោះបីជារដ្ឋាភិបាលកម្ពុជា ក្រសួងទេសចរណ៍ និងផ្នែកពាក់ព័ន្ធខ្លះទៀតកំពុងប្រឹងប្រែងធ្វើយុទ្ធនាការទាក់ទាញយ៉ាងណាក្តី។
អគ្គនាយកគ្រឹះស្ថានអង្គរដែលជាកន្លែងលក់សំបុត្រឱ្យភ្ញៀវចូលទស្សនាអង្គរលោក លី សែ ឱ្យដឹងថាក្នុងរយៈពេល១១ខែឆ្នាំ២០២៣នេះ ចំនួនភ្ញៀវទេសចរចិន ដែលមកកំសាន្តនៅរមណីយដ្ឋានអង្គរមានប្រមាណ៧ម៉ឺននាក់។ មន្ត្រីដដែលបានរំពឹងថា ពេញមួយឆ្នាំ២០២៣កម្ពុជាអាចនឹងទទួលបានភ្ញៀវទេសចរចិនមកទស្សនាអង្គរប្រហែលជាង ៨ម៉ឺននាក់ប៉ុណ្ណោះ។
ចំណែកក្រសួងទេសចរណ៍នៃប្រទេសកម្ពុជាឱ្យដឹងថា ក្នុងឆ្នាំ២០២៣កម្ពុជាអាចនឹងទទួលភ្ញៀវទេសចរចិននៅទូទាំងប្រទេសប្រមាណ ៦០ម៉ឺននាក់។
តួលេខអ្នកទេសចរចិនដែលមកទស្សនាកម្ពុជានេះ គឺខុសគ្នាឆ្ងាយបើប្រៀបធៀបជាមួយប្រទេសថៃក្នុងរយៈពេលជាង១០ខែទទួលបានភ្ញៀវទេសចរចិនប្រមាណជាង ៣លាននាក់នោះ។
អាជ្ញាធរទេសចរណ៍ថៃ (TAT) បានរំពឹងទុកទៀតថា ពេញមួយឆ្នាំ២០២៣នេះប្រទេសថៃអាចនឹងទទួលបានភ្ញៀវទេសចរជនជាតិចិនប្រមាណពី ៣លាន ៤សែន ទៅ ៣លាន ៥សែននាក់។
តើប្រទេសថៃមានសក្ដានុពលទេសចរណ៍អ្វីសំខាន់ជាងកម្ពុជាបានជាអាចទាក់ទាញភ្ញៀវទេសចរចិនយ៉ាងច្រើនឱ្យទៅកំសាន្ត ចំណែកឯកម្ពុជាដែលជាមិត្តដែកថែបជាមួយចិនហេតុអ្វី បានជាមិនអាចទាក់ទាញអ្នកទេសចរចិនឱ្យមកទស្សនាបានច្រើនដូចជាថៃដែរ?។
អ្នកតាមដានភូមិសាស្ត្រតំបន់អាស៊ីអាគ្នេយ៍ និងប៉ាស៊ីហ្វិកលោក សេង វណ្ណលី មើលឃើញថា បើនិយាយពីប្រាង្គប្រាសាទ តំបន់វប្បធម៌គឺប្រទេសថៃមិនអាចប្រៀបផ្ទឹមស្មើកម្ពុជាបានទេក៏ប៉ុន្តែប្រទេសថៃដែលអាចទាក់ទាញភ្ញៀវទេសចរចិន និងបរទេសចម្រុះជាតិសាសន៍ឱ្យទៅកំសាន្តបានច្រើនដោយសារតែថៃមិនផ្ដោតលើវិស័យទេសចរណ៍ តែតំបន់ប្រវត្តិសាស្ត្រទេ គឺគេមានវិស័យចម្រុះជាច្រើនទៀតដូចជាតំបន់ភ្នំ មាត់សមុទ្រតំបន់ទេសចរណ៍កំសាន្តពេលរាត្រីរួមទាំងគោលនយោបាយនៃសេវាកម្មទេសចរណ៍ និងសន្តិសុខរបស់ប្រទេសគេល្អផងធ្វើឱ្យអ្នកទេសចរជឿជាក់និងចូលចិត្តទៅកំសាន្ត។
លោក សេង វណ្ណលី៖ «គោលនយោបាយអំណោយផលដល់វិស័យទេសចរណ៍របស់ថៃក៏រួមចំណែកធ្វើឱ្យកំណើនទេសចរបរទេសជាពិសេស គឺចិនកើនឡើងខ្លាំងដែរ។ វិលមកកម្ពុជាវិញដោយសារវិស័យទេសចរណ៍របស់យើងផ្ដោតសំខាន់ទៅលើទីតាំងប្រវត្តិសាស្ត្រភាគច្រើនហើយវិស័យសេវាកម្មទេសចរណ៍គឺនៅមិនទាន់មានភាពសំបូរបែបនៅឡើយទេ ហើយមួយទៀតខ្ញុំមើលឃើញដោយសារតែវិបត្តិសេដ្ឋកិច្ចសកលវាធ្វើឱ្យប៉ះពាល់ដល់ជីវភាពការរស់នៅរបស់ប្រជាពលរដ្ឋចិន អីចឹងហើយពេលចុងក្រោយនេះជនជាតិចិនមិនសូវផ្ដោតលើការធ្វើដំណើរកំសាន្តនៅតាមប្រទេសជិតខាងទេ។ នេះជាបញ្ហាមួយដែលធ្វើឱ្យកំណើនសេដ្ឋកិច្ចដែលពឹងផ្អែកលើវិស័យទេសចរណ៍ដូចជាកម្ពុជាជួបការពិបាក»។
នាយករដ្ឋមន្ត្រីលោក ហ៊ុន ម៉ាណែត បានថ្លែងក្នុងពិធីបុណ្យសមុទ្រលើកទី១០ នៅខេត្តកែប កាលពីថ្ងៃទី៣ ខែធ្នូ ថា វិស័យទេសចរណ៍កម្ពុជាបានរងការប៉ះពាល់យ៉ាងខ្លាំងចាប់តាំងតែពីកើតជំងឺកូវីដ-១៩ ដោយធ្វើឱ្យការធ្វើដំណើរទាំងក្នុង និងក្រៅប្រទេសផ្អាកស្ទើរតែទាំងស្រុងបង្ខំឱ្យអាជីវកម្មទេសចរណ៍ និងធុរកិច្ចពាក់ព័ន្ធជាច្រើនបិទទ្វារ និងរុញច្រានបុគ្គលិករាប់ពាន់នាក់ឱ្យបាត់បង់ការងារ។
លោក ហ៊ុន ម៉ាណែត៖ «ក្នុងឆ្នាំ២០២៤គឺជាវិស័យអាទិភាពមួយដែលរាជរដ្ឋាភិបាលបានដាក់គោលនយោបាយជាបន្តបន្ទាប់។ នៅក្នុងវេទិកាជួបជាមួយវិស័យឯកជន ខ្ញុំបានដាក់ចេញវិធានការមុតស្រួចមួយចំនួនដើម្បីជួយទោះបីជាយើងដាក់ឆ្នាំ២០២៤ ជាឆ្នាំទស្សនាសៀមរាបក៏ដោយប៉ុន្តែវិស័យទេសចរណ៍មិនមែនយើងយកចិត្តទុកដាក់ជួយ តែវិស័យទេសចរណ៍នៅសៀមរាបនោះទេ។ វិស័យទេសចរណ៍គឺត្រូវគិតគ្រប់ទីកន្លែងហើយមិនត្រូវគិតតែសម្រាប់ទេសចរណ៍ពីក្រៅប្រទេសនោះទេ យើងត្រូវគិតទាំងទេសចរនៅក្នុងប្រទេសផង»។
រដ្ឋាភិបាលកម្ពុជាកំពុងប្រឹងប្រែងស្ដារវិស័យទេសចរណ៍ឡើងវិញដោយដាក់ចេញគោលនយោបាយមួយចំនួនដូចជាថែរក្សាសន្តិភាព រួមគ្នាថែរក្សាឆ្នេរសមុទ្រឱ្យស្អាតបំផុតស័ក្តិសមជា «តារារះនាទិសនារតី» បន្តការអភិវឌ្ឍន៍តំបន់ឆ្នេរ និងកសាងហេដ្ឋារចនាសម្ព័ន្ធចាំបាច់សម្រាប់បម្រើឱ្យវិស័យទេសចរណ៍ការយកចិត្តទុកដាក់ខ្ពស់ថែរក្សាសន្តិសុខ និងសុវត្ថិភាពភ្ញៀវទេសចរណ៍នៅគ្រប់គោលដៅព្រមទាំងទាក់ទាញប្រទេសមួយចំនួនឱ្យបង្កើតជើងហោះហើរត្រង់ឆ្ពោះមកទីក្រុងភ្នំពេញនិងខេត្តសៀមរាបជាដើម។
អ្នកសិក្សាកិច្ចការសង្គមយល់ឃើញថា ថ្វីបើកម្ពុជាមានកន្លែងល្អសម្រាប់បង្ហាញទៅកាន់អ្នកទេសចរពិភពលោកក្តី ក៏កម្ពុជាមិនអាចទាក់ទាញអ្នកទេសចរបរទេសឱ្យចូលមកកម្សាន្តបានច្រើនទេប្រសិនបើកម្ពុជាមិនបំបាត់អំពើពុករលួយនៅតាមច្រកទ្វារព្រំដែន ទាក់ទងនឹងផ្នែកសេវាកម្មបំរើ និងរដ្ឋបាល ដើម្បីលើកទឹកចិត្តអ្នកទេសចរឱ្យបានប្រសើរទេនោះ។
អ្នកសិក្សាកិច្ចការសង្គម និងនយោបាយលោក ប៉ោ មករា មានប្រសាសន៍ថា បើក្រឡេកមើលទៅប្រទេសថៃបច្ចុប្បន្នការបំរើសេវាទេសចរណ៍របស់គេគឺមានសក្ដានុពលខ្ពស់ជាងកម្ពុជា។ គេមិនសូវមានអំពើពុករលួយក្នុងការទារលុយពីទេសចរណ៍ក្រៅគោលការណ៍ហើយការបំពេញសំណុំបែបបទសម្រាប់ទេសចរណ៍ទៀតសោត គឺធ្វើបានលឿនមិនសាំញ៉ាំ ឯកម្ពុជាវិញនៅមានបញ្ហាច្រើនក្នុងរឿងនេះដូចជាមន្ត្រីនៅច្រកទ្វារព្រំដែនទារលុយពីភ្ញៀវ នៅពេលបោះត្រាលើលិខិតឆ្លងដែនជាដើម។
លោក ប៉ោ មករា៖ «បើយើងចង់ប្រកួតប្រជែងជាមួយប្រទេសជិតខាងដូចជាថៃ និងវៀតណាមជាដើម កម្ពុជាគួរតែផ្ដើមបោសសំអាតសេវាសាធារណៈពិសេសពាក់ព័ន្ធ និងសេវារដ្ឋបាល លិខិតឆ្លងដែនសេវាចេញចូលសេវាកម្មហូបអាហារ នៅតំបន់ទេសចរណ៍នីមួយៗកុំឱ្យមានភាពសាំញ៉ាំ និងអំពើពុករលួយ។ បើសិនរដ្ឋាភិបាលបង្ក្រាប ឬក៏លុបបំបាត់អំពើពុករលួយគ្រប់ទីកន្លែងពាក់ព័ន្ធនិងតំបន់ទេសចរណ៍ក្តីស្ថាប័នរដ្ឋក្តីនោះកម្ពុជានឹងមានប្រៀបឡើងវិញ កម្ពុជានឹងទទួលបានភ្ញៀវទេសចរណ៍ច្រើន»។
បញ្ហាសំខាន់មួយទៀតដែលភ្ញៀវទេសចរចិន និងបរទេសមិនចង់មកលេងដោយសារតែកម្ពុជាបានជាប់ឈ្មោះជាជម្រកក្រុមជនឆបោកតាមអ៊ីនធឺណិត រួមទាំងការជួញដូរមនុស្ស អំពើចាប់ជំរិតមនុស្សទារប្រាក់ជាដើម។
កាលពីខែកញ្ញា សារព័ត៌មានបរទេសឈ្មោះ ណៃ គីអេស៊ា (NikkeiAsia) ធ្លាប់ចុះផ្សាយថា ប្រទេសកម្ពុជាគឺជាជម្រកសម្រាប់ក្រុមជនឆបោកតាមអ៊ីនធឺណិតដែលមានទាំងការជួញដូរមនុស្សអំពើចាប់ជំរិតមនុស្សទារប្រាក់ ព្រមទាំងការបាញ់សម្លាប់មនុស្ស។ បន្ថែមលើនេះភាពយន្តចិនដែលមានចំណងជើងថា (No More Bets) ក៏បាននិយាយអាក្រក់ពីកម្ពុជា និងចាត់ទុកកម្ពុជាជាប្រទេសម៉ាហ្វៀ (MAFIA) ជាកន្លែងចាប់ជំរិត និងធ្វើទារុណកម្មមនុស្ស គួរឱ្យភ័យខ្លាចដែលបញ្ហាទាំងនេះកំពុងធ្វើឱ្យកម្ពុជាជាប់កេរ្តិ៍ឈ្មោះយ៉ាងអាក្រក់ព្រមទាំងប៉ះពាល់ដល់កិច្ចខិតខំប្រឹងប្រែងក្នុងការស្ដារវិស័យឧស្សាហកម្មទេសចរណ៍ឡើងវិញយ៉ាងខ្លាំង។
ប្រធានសហភាពការងារកម្ពុជាលោក អាត់ ធន់ ឱ្យដឹងថា ការបាត់បង់ភ្ញៀវទេសចរជនជាតិចិន និងបរទេសនៅទូទាំងកម្ពុជាបានធ្វើឱ្យអ្នកពាក់ព័ន្ធប្រមាណជាង ១០ម៉ឺននាក់ ដូចជាផ្នែកបំរើសេវាកម្មទេសចរណ៍នៅតាមសណ្ឋាគារ និងភោជនីយដ្ឋានផ្នែកដឹកជញ្ជូនព្រមទាំងកសិករដែលជាអ្នកផ្គត់ផ្គង់ផលិតផលផងបានបាត់បង់ការងារ និងប្រាក់ចំណូល។
លោក អាត់ ធន់៖ «សេវាកម្មទេសចរណ៍បច្ចុប្បន្ននេះ បើយើងមើលទៅ មិនទាន់បាន ៤០ភាគរយឡើងវិញផង។ សណ្ឋាគារជាច្រើននៅខេត្តសៀមរាប និងខេត្តគោលដៅឥឡូវទទួលបានតែភ្ញៀវខ្មែរ ឯភ្ញៀវបរទេស គឺតិចតួចមែនទែន។ បុគ្គលិកដូចសណ្ឋាគារធំៗឥឡូវទើបតែរើសមនុស្សចូលធ្វើការវិញមិនទាន់បាន ៥០%វិញផង ព្រោះភ្ញៀវវាមិនទៀង។ និយាយពីកម្មករអ្នកចូលធ្វើការបានប្រហែល២០-៣០ភាគរយ ហើយគ្មានកិច្ចសន្យាត្រឹមត្រូវគ្មានប្រាក់ខែទៀងទាត់អ្នកខ្លះគេឱ្យធ្វើតាមស៊ីថ្ងៃ ស៊ីពេលនៅពិបាកណាស់ផ្នែកទេសចរណ៍»។
អ្នកនាំពាក្យក្រសួងទេសចរណ៍លោក តុប សុភ័ក ធ្លាប់ប្រាប់ទីភ្នាក់ងារព័តមានចិនស៊ិនហួ (Xinhuo) ថា កាលពីអំឡុង ឆ្នាំ២០១៩ នៅមុនពេលជំងឺកូវីដ-១៩ កម្ពុជាធ្លាប់បានទទួលភ្ញៀវទេសចរចិនប្រមាណជាង ២លាន ៣៦ម៉ឺននាក់។
ក៏ប៉ុន្តែសម្រាប់ឆ្នាំ២០២៣នេះចំនួនភ្ញៀវទេសចរចិនបានធ្លាក់ចុះយ៉ាងខ្លាំងដោយកម្ពុជារំពឹងថាអាចនឹងទទួលបានភ្ញៀវទេសចរចិនតែជាង ៦០ម៉ឺននាក់ប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- សមាគមឧកញ៉ារំឭកឧកញ៉ាឱ្យបង់វិភាគទានប្រចាំឆ្នាំ