មន្ត្រី​សង្គម​ស៊ីវិល​ជំរុញ​រដ្ឋាភិបាល​លើកលែង​សង​បំណុល​សម្រាប់​អ្នករងគ្រោះ​ផ្សេងទៀត​ពេល​វិបត្តិ​កូវីដ

ដោយ សុជីវី
2021-04-08
Share
មន្ត្រី​សង្គម​ស៊ីវិល​ជំរុញ​រដ្ឋាភិបាល​លើកលែង​សង​បំណុល​សម្រាប់​អ្នករងគ្រោះ​ផ្សេងទៀត​ពេល​វិបត្តិ​កូវីដ បណ្ឌិត យ៉ង សាំងកុមារ អ្នក​ជំនាញ​កសិកម្ម និង​ជាអតីត​ប្រធាន​មជ្ឈមណ្ឌល​សិក្សា​និង​អភិវឌ្ឍន៍​កសិកម្ម​កម្ពុជា ឬ​អង្គការ​សេដាក (CEDAC) ក្នុង​វេទិកា​អ្នក​ស្ដាប់​វិទ្យុ​អាស៊ីសេរី នៅ​យប់​ថ្ងៃ​ទី​២២ ខែ​មករា ឆ្នាំ​២០១៦។
Photo: RFA

មន្ត្រី​អង្គការ​សង្គម​ស៊ីវិល​ទទូច​ឱ្យ​រដ្ឋាភិបាល ជួយ​ទៅ​ដល់​ផ្នែក​ធនាគារ និង​គ្រឹះស្ថាន​មីក្រូហិរញ្ញវត្ថុ ធ្វើ​យ៉ាង​ណា​ឱ្យ​ស្ថាប័ន​ម្ចាស់​បំណុល​អាច​ពន្យារ​ពេល​ឱ្យ​ពលរដ្ឋ​អាច​ផ្អាក​សងបំណុល​រយៈពេល​៣​ខែ​សិន។ ការ​ស្នើ​ជាថ្មី​នេះ​បន្ទាប់ពី​គ្រឹះស្ថាន​ម្ចាស់បំណុល​ទាំងនេះ​ប្រកាស​ថា អ្នក​ឆ្លង​ជំងឺ​កូវីដ-១៩ អាច​ពន្យារ​ការ​សង​ប្រាក់​ដើម​បំណុល​រយៈពេល ៣​ខែ និង​១​ខែ​សម្រាប់​អ្នកធ្វើ​ចត្តាឡីស័ក ព្រម​លើកលែង​ការប្រាក់ ព្រមទាំង​ការ​ផាក​ពិន័យ​។ អ្នកឃ្លាំមើល​ថា រដ្ឋាភិបាល​អាច​ដោះស្រាយ​តាម​សំណើ​នេះ​បាន​ដោយ​បញ្ចេញ​ថវិកា​ទៅ​ជួយ​ស្ថាប័ន​ម្ចាស់បំណុល ទប់ទល់​មិន​ឱ្យ​ស្ថាប័ន​ទាំងនោះ​ដួល​រលំ។

មន្ត្រី​អង្គការ​សង្គម​ស៊ីវិល​សាទរ​ចំពោះ​វិធានការ​របស់​គ្រឹះស្ថាន ធនាគារ និង​មីក្រូ​ហិរញ្ញ​វត្ថ ប៉ុន្តែ​ទទូច​ឱ្យ​មាន​ការពង្រីក​វិសាលភាព​បន្ថែម​ទៀត​ទៅ​ដល់​ក្រុម​អ្នក​ដែល​រងគ្រោះ​បាត់បង់​ប្រាក់ចំណូល ដោយសារ​វិធានការ​ទប់ស្កាត់​ជំងឺ​កូវីដ-១៩ របស់​រដ្ឋាភិបាល។

គ្រឹះស្ថាន​ធនាគារ និង​ហិរញ្ញវត្ថុ កាលពី​ថ្ងៃទី​៧ ខែមេសា បញ្ជាក់​រួមគ្នា​ថា អ្នក​ឆ្លង​ជំងឺ​កូ​វីដ​-១៩​អាច​ពន្យារ​ការ​សង​ប្រាក់​ដើម​បំណុល​រយៈពេល​៣​ខែ និង​លើកលែង​ការប្រាក់ ព្រមទាំង​ការ​ផាក​ពិន័យ​រយៈពេល​យ៉ាងតិច​១​ខែ។ ប្រភព​ដដែល​បញ្ជាក់​ថា អ្នកជំងឺ​កូវីដ-១៩ នឹង​ទទួល​បាន​ការ​រៀប​ចំ​ឥណទាន ឬ​ការ​កែ​សម្រួល​លក្ខខណ្ឌ​សងបំណុល ឬ​កម្ចី​នេះ​ដោយ​ស្វ័យប្រវត្តិ​។ ចំណែក​អ្នក​ដែល​ជាប់​ធ្វើ​ចត្តាឡីស័ក​ក៏បាន​ការ​ពន្យារ​ការ​សង​ត្រឡប់​ទាំង​ការ ទាំង​ដើម និង​លើកលែង​ការ​ពិន័យ​រយៈពេល​១​ខែ​ដែរ។

ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក (ADHOC) លោក នី សុខា មើលឃើញ​ថា វិធានការ​នេះ​នៅ​មិនទាន់​គ្រប់គ្រាន់​ទេ ព្រោះ​នៅ​មាន​ប្រជាពលរដ្ឋ​ជាច្រើន​ទៀត ដែល​រង​ផល​ប៉ះពាល់​គួរតែ​ទទួល​បាន​ជំនួយ​ពី​រដ្ឋាភិបាល​ដែរ។ លោក​ថា វិធានការ​របស់​រដ្ឋាភិបាល ដែល​បិទ​ការ​ធ្វើ​ដំណើរ​របស់​ពលរដ្ឋ និង​បម្រាម​គោចរ​ទៀតសោត​កំពុង​រុញ​ច្រាន​ពលរដ្ឋ​ដែល​បាត់បង់​ចំណូល​ពី​របរ​រក​ស៊ី​របស់​ពួកគេ​នោះ ឱ្យ​គ្មាន​លទ្ធភាព​សង​បំណុល​ឡើយ៖ «ឥឡូវនេះ​វា​ប៉ះពាល់​ស្ទើរ​តែ​ទៅលើ​ប្រជាពលរដ្ឋ​ទូទាំង​ប្រទេស​ទៅ​ហើយ បើ​តាម​យើង​មើល​ពី​បញ្ហា​បច្ចុប្បន្ន ពីព្រោះ​ថា វា​មានការ​រឹត​បន្តឹង​គ្រប់​តែ​កន្លែង​ទៅ​ហើយ​។ ដូច្នេះ​ខ្ញុំ​គិតថា​គួរតែ​ខាង​ធនាគារ លោក​ពិចារណា​ក្នុង​ការ​ឱ្យ​សម្រាក​ការ​បង់​ប្រាក់​ក្នុង​រយៈពេល​ណាមួយ ដែល​កំណត់​ជាទូទៅ​ទៅ គឺជា​រឿង​មួយ​ដែល​ជួយ​សម្រាល​ទៅ​ដល់​បន្ទុក​របស់​បង​ប្អូន​ប្រជាពលរដ្ឋ​យើង​បាន​មួយ​ចំនួន​ធំ​ដែរ»

សង្គម​ស៊ីវិល និង​សហគមន៍​ចំនួន​ជាង​១០០​ស្ថាប័ន​កាលពី​ថ្ងៃទី​៦ ខែមេសា បាន​ចេញ​សេចក្ដីថ្លែងការណ៍​រួម​ស្នើ​ឱ្យ​ផ្អាក​បង់​សង​ប្រាក់​កម្ចី និង​ប្រាក់​បង្គរ​ទៅ​គ្រឹះស្ថាន​មីក្រូហិរញ្ញវត្ថុ និង​ធនាគារ​រយៈពេល​៣​ខែ ដើម្បី​ឱ្យ​ប្រជាពលរដ្ឋ​បាន​ស្នាក់​នៅផ្ទះ​ការពារ​កុំឱ្យ​ឆ្លង​ជំងឺ​កូ​វីដ ហើយ​ទុក​លទ្ធភាព​ឱ្យ​ពួកគេ​រក​ប្រាក់​សងបំណុល​ធនាគារ​នៅ​ពេល​ក្រោយ​វិញ។

អ្នកនាំពាក្យ​គ្រឹះស្ថាន​មីក្រូហិរញ្ញវត្ថុ លោក កាំង តុងងី ឱ្យ​អាស៊ីសេរី​ដឹង​ថា គ្រឹះស្ថាន​មិនអាច​ផ្ដល់​ដំណោះស្រាយ​រួម​ទៅ​គ្រប់​ករណី​ទាំងអស់​បាន​ទេ​។ គ្រឹះស្ថាន​ផ្ដល់​លទ្ធភាព​សម្របសម្រួល​ទៅតាម​ករណី​ជាក់ស្ដែង​របស់​អតិថិជន​។ លោក​ថា​អតិថិជន ឬ​កូនបំណុល​អាច​ដាក់​សំណើ សុំ​ផ្អាក​សង ឬ​សុំ​ពន្យារ​ពេល ឬ​កែសម្រួល​យ៉ាងណា​ទៅ​តាម​ស្ថានភាព ដែល​ពួកគេ​ជួបប្រទះ៖ «ករណី​ទី​៣​ចំពោះ​អតិថិជន ដែល​គាត់​មាន​ផល​ប៉ះពាល់​ខ្លាំង អ៊ីចឹង​គ្រឹះស្ថាន​នឹង​ផ្ដល់​ជម្រើស​ឱ្យ​គាត់​ធ្វើការ​ផ្អាក​សង ទាំង​ការ​ទាំង​ដើម​រយៈពេល​ពី ៣ ទៅ ៦​ខែ គឺ​គាត់​អាច​ផ្អាក​បង់​ទាំងស្រុង​តែម្ដង»

សេចក្ដីថ្លែងការណ៍​របស់​គ្រឹះស្ថាន​ធនាគារ និង​មីក្រូហិរញ្ញវត្ថុ​អះអាង​ដែរ​ថា​ស្ថាប័ន​នេះ​នឹង​បញ្ចេញ​ឥណទាន​សង្គ្រោះ​បន្ទាន់ ឬ​បន្ថែម ដោយ​បន្ធូរបន្ថយ​លក្ខខណ្ឌ ព្រមទាំង​កាត់បន្ថយ អត្រា​ការប្រាក់ ដើម្បី​ជួយ​បន្ត និង​ស្តារ​ឡើង​វិញ​នូវ​សេដ្ឋកិច្ច​គ្រួសារ និង​អាជីវកម្ម​ទាំង​មុន និង​ក្រោយពេល​មាន​វិបត្តិ​។ ក្រៅពីនោះ ស្ថាប័ន​គ្រឹះស្ថាន​ធនាគារ និង​ហិរញ្ញវត្ថុ នឹង​ទទួល រៀបចំ​ឥណទាន​ឡើងវិញ និង​លើកលែង​រាល់​ការ​ផាកពិន័យ​ទាំងអស់​សម្រាប់​អតិថិជន ដែល​ទិញ​ផ្ទះ​ផ្ទាល់ខ្លួន​ជា​លើកដំបូង​សម្រាប់​រស់នៅ (First Home Owner)

តែ​ទោះជា​យ៉ាងណា លោក នី សុខា មើល​ឃើញ​ថា ក្នុង​ការ​អនុវត្ត​ជាក់ស្ដែង​ទំនង​មិន​ដូច​ទាំងស្រុង​នឹង​អ្វី​ដែល​អះអាង​ទាំង​នេះ​ឡើយ៖ «ការ​រីក​រាលដាល​កូវីដ មួយ​សារ​កាលពី​លើក​ទី​១​ហ្នឹង​ក៏​មាន​ការ​និយាយ​បែប​ហ្នឹង​ដែរ ប៉ុន្តែ​កត្តា​ជាក់ស្ដែង​ការដែល​អនុវត្ត​ជាក់ស្ដែង​មែនទែន​នោះ​ក៏​យើង​មើលឃើញ​អ៊ីចឹង​ដែរ ឃើញថា​នៅតែ​មានការ​រអ៊ូរទាំ​ពី​អ្នក​ដែល​ខ្ចីបុល​អ៊ីចឹង​ដែរ មិន​ទាន់​មាន​ឃើញ​អី​ឱ្យ​បាន​ជា​ដុំកំភួន តែ​ផ្នែក​ខាង​ធនាគារ​គាត់​មាន​ទិន្នន័យ​អី​យ៉ាងម៉េច​ហ្នឹង​ប្រហែលជា​យើង​មិន​ច្បាស់»

ចំពោះ​អ្នកជំនាញ​ផ្នែក​កសិកម្ម និង​ជា​មន្ត្រីជាន់ខ្ពស់​គណបក្ស​ប្រជាធិបតេយ្យ​មូលដ្ឋាន លោក យ៉ង សាំងកុមារ វិញ លោក​ថា រដ្ឋាភិបាល​មាន​តួនាទី​ដោះស្រាយ​រឿង​នេះ ដោយ​ត្រូវ​បញ្ចេញ​ទុនបម្រុង ដែល​មាន​ជួយ​ដល់​ស្ថាប័ន​ផ្ដល់​កម្ចី​។ លោក​បន្ត​ថា បើ​ពុំនោះសោត​ស្ថាប័ន​នេះ​អាច​នឹង​ជួប​បញ្ហា ឬ​ដួល​រលំ ប្រសិនបើ​ផល​ប៉ះពាល់​ពី​ជំងឺ​កូ​វីដ​-១៩​កាន់​រីក​រាលដាល​ខ្លាំង​ថែមទៀត៖ «មិនមែន​ចេញ​សង​ជំនួស​ប្រជាពលរដ្ឋ​ទេ គឺ​ឱ្យ​ដើមទុន​ទៅ​គាត់​ឱ្យ​ស្ថាប័ន​មីក្រូហិរញ្ញវត្ថុ​ហ្នឹង​ខ្ចី ដើម្បី​គាត់​យក​ប្រាក់​ហ្នឹង​ទប់​ចរន្ត​សាច់ប្រាក់​របស់​គាត់​។ គឺ​ទំហំ​ហ្នឹង​វា​មិន​ទាន់​ធំដុំ​ទេ ទំហំ​ពី​២០ ទៅ ៣០%​នៃ​អតិថិជន​១​លាន​ជាង ហើយ​អ្នក​ដែល​គាត់​ជួប​ការ​លំបាក​ហ្នឹង​ភាគច្រើន​គាត់​ត្រូវ​សង​វិញ​មួយ​ខែ​ពី ៣០០ ទៅ​៤០០(​ដុល្លារ​) គឺ​ពី​មួយ​លាន​(​រៀល​) ទៅ​មួយ​លាន​ជាង។ ចំពោះ​ខ្ញុំ​ជា​គោលនយោបាយ​គឺ​គួរតែ​មាន​ការ​ទម្លាក់​ទុន​ក្នុង​រយៈពេល​ពី ៣ ទៅ ៦​ខែ​ហ្នឹង​ក្នុង​១​ខែ ២០០​លាន​ដុល្លារ អ៊ីចឹង​ទៅ​ឱ្យ​ស្ថាប័ន​មីក្រូហិរញ្ញវត្ថុ​ហ្នឹង ដើម្បី​ជួយ​ទប់​ជំនួញ​របស់​គាត់ ដើម្បី​ផលប្រយោជន៍​ទាំងអស់គ្នា»

គិត​ត្រឹម​ដំណាច់ខែ​កុម្ភៈ ឆ្នាំ​២០២១ ស្ថាប័ន​ផ្ដល់​កម្ចី​បាន​រៀបចំ​ឥណទាន​ឡើងវិញ​ដល់​អតិថិជន​ប្រមាណ ៣៤​ម៉ឺន​នាក់ ក្នុង​ទំហំ​ឥណទាន​ប្រមាណ ៤​ប៊ី​លាន​ដុល្លារ​អាមេរិក​។ ក្នុង​នោះ​អតិថិជន ឬ​អ្នក​ជំពាក់​បំណុល​បាន​ជ្រើស​យក​ជម្រើស​បង់​តែ​ការប្រាក់​ក្នុង​រយៈពេល ៣​ទៅ ៦​ខែ ពន្យារ​រយៈពេល​សង​កម្ចី ឬ​ផ្អាក​បង់​ទាំង​ការប្រាក់ និង​ប្រាក់​ដើម​រយៈពេល ៣ ទៅ ៦​ខែ ក្នុង​ករណី​រង​ផល​ប៉ះពាល់​ខ្លាំង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល