ពលរដ្ឋត្អូញត្អែររឿងតម្លៃសាំងបន្តឡើងថ្លៃខ្លាំង ខណៈជីវភាពពួកគាត់រងគ្រោះដោយសារវិបត្តិជំងឺកូវីដ-១៩
2021.07.24
តារាងតម្លៃសាំងកំណត់ដោយក្រសួងពាណិជ្ជកម្ម។
Photo Screenshot
ប្រជាពលរដ្ឋមួយចំនួនត្អូញត្អែររឿងតម្លៃសាំងបន្តឡើងថ្លៃខ្លាំងដែលបណ្ដាលឱ្យប៉ះពាល់ដល់ជីវភាព ខណៈពេលពួកគាត់កំពុងរងគ្រោះដោយសារវិបត្តិជំងឺកូវីដ១៩ អូសបន្លាយ។ មន្ត្រីសង្គមស៊ីវិលជំរុញឱ្យរដ្ឋាភិបាលត្រូវរកយន្តការដោះស្រាយតម្លៃសាំងឡើងថ្លៃ ដើម្បីជួយសម្រួលបន្ទុកជីវភាពលរដ្ឋក្នុងស្ថានភាពដ៏លំបាកនេះ។
ប្រជាពលរដ្ឋថាតម្លៃសាំងឡើងថ្លៃជាចំណែកមួយដែលធ្វើឱ្យជីវភាពពួកគាត់ក្រីក្រ ព្រោះវាបានធ្វើឱ្យមុខរបរ អាជីវកម្ម និងតម្លៃទំនិញលើទីផ្សារឡើងថ្លៃដែលកាត់ផ្ដាច់ប្រាក់ចំណូលពលរដ្ឋ។ ពួកគាត់ស្នើឱ្យរដ្ឋាភិបាលរកមធ្យោបាយដោះស្រាយតម្លៃសាំងកើនឡើងនេះបន្ទាន់ ដើម្បីធានានូវជីវភាពរស់នៅពួកគាត់អំឡុងពេលរីករាលដាលជំងឺកូវីដ១៩នេះ។
អាជីវករលក់ដូរតាមរ៉ឺម៉កម៉ូតូ នៅរាជធានីភ្នំពេញ លោកស្រី ពុត កញ្ញា លើកឡើងថា បច្ចុប្បន្នមុខរបរលក់ភេសជ្ជៈរបស់លោកស្រីលក់ដូរពុំសូវដាច់នោះទេ ព្រោះពលរដ្ឋភាគច្រើនមិនសូវចំណាយប្រាក់ដើម្បីទិញចំណីអាហារហូមចុកដូចមុនពេលផ្ទុះជំងឺកូវីដ១៩នោះទេ។ លោកស្រីបន្តថា តម្លៃសាំងឡើងថ្លៃក៏ជាបញ្ហាមួយដែលធ្វើឱ្យប៉ះពាល់ដល់មុខរបរ និងជីវិភាពគ្រួសារលោកស្រីផងដែរ ព្រោះប្រាក់ដែលលោកស្រីចំណេញបន្តិចបន្តួចត្រូវទូទាត់ថ្លៃសាំងចាក់រឺម៉ក់ម៉ូតូជាង១ម៉ឺន ៣ពាន់ (១៣.០០០)រៀលក្នុងមួយថ្ងៃ ហើយវាជាអម្រែកមួយដ៏ធ្ងន់សម្រាប់គ្រួសារលោកស្រីក្នុងស្ថានភាពនេះ។ អាជីវកររូបនេះបានឱ្យដឹងទៀតថា លោកស្រីបារម្ភឆ្លងជំងឺកូវីដ១៩ ប៉ុន្តែ បញ្ហាទុក្ខលំបាកជីវភាពនៅក្នុងគ្រួសារដូចជាថ្លៃផ្ទះជួល ទឹកភ្លើង និងបំណុលធនាគារបានវណ្ឌកមិនអាចរារាំងលោកស្រីស្នាក់នៅផ្ទះបានទេ៖ «ទំនិញអីប្រេងសាំងអីឱ្យវាចុះថោកដូចមុនសល់ប្រមាណ២ពាន់ជាងឥឡូវឡើងដល់ជិត៥ពាន់រៀល ប្តីខ្ញុំរត់ផាសអាប់ចាក់ហ្គាសក៏ហ្គាសឡើងថ្លៃ ហើយតម្លៃដែលយើងយកពីគេបានដដែលៗ អីវ៉ាន់យើងទិញលក់ចេះតែឡើងម្ដងប្រាំកាក់ម្ដងពីរកាក់អ៊ីចឹងអី សាំងឡើងម្ដង៥រយរៀលម្ដង ១ពាន់រៀលរហូតអ៊ីចឹង»។
ក្តីបារម្ភរបស់ពលរដ្ឋនេះ កើតឡើងក្រោយពេល ក្រសួងពាណិជ្ជកម្មបានជូនដំណឹងពីថ្លៃលក់រាយប្រេងឥន្ធនៈនៅតាមស្ថានីយ៍ ដោយផ្អែកតាមតម្លៃមធ្យមប្រេងឥន្ធនៈលើទីផ្សារអន្តរជាតិពីថ្ងៃទី១៦ ដល់៣១ កក្កដា នឹងត្រូវលក់សម្រាប់សាំងធម្មតា ៤ពាន់១រយរៀល (៤.១០០) ក្នុងមួយលីត្រនិងសម្រាប់ម៉ាសូត ៣ពាន់៦៥០រៀល (៣.៦៥០) ក្នុងមួយលីត្រ ហើយបើធៀបទៅនឹងខែមិថុនា សាំងធម្មតា៣ពាន់ ៩រយរៀល (៣.៩០០) រយៈពេល១ខែកើនតម្លៃ២រយរៀលក្នុងមួយលីត្រ និងម៉ាស៊ូត៣ពាន់៥៥០រៀល (៣.៥៥០) រយៈពេល១ខែកើន១រយរៀលក្នុងមួយលីត្រ។ សេចក្ដីជូនដំណឹងក៏បានបញ្ជាក់ថា ក្រសួងមិនមែនជាអ្នកកំណត់ថ្លៃលក់ប្រេងឥន្ធនៈនៅកម្ពុជាទេ គឺក្រសួងគ្រាន់តែស្រង់តម្លៃឡើង-ចុះ នៃប្រេងតាមទីផ្សារអន្តរជាតិមកគណនាប៉ុណ្ណោះ។ ប៉ុន្តែអង្គការសង្គមស៊ីវិលនិងប្រជាពលរដ្ឋអះអាងដូចៗ គ្នាថា រដ្ឋាភិបាលមានតួនាទី បញ្ចុះតម្លៃប្រេងសាំងដើម្បីធានានូវប្រក្រតីភាពមុខរបរនិងជីវភាពលរដ្ឋឡើងវិញ។ ម្យ៉ាងវិញទៀតពួកគាត់យល់ថា រដ្ឋាភិបាលអាចប្រើប្រាស់យន្តការបន្ធូរបន្ថយតម្លៃពន្ធលើសាំងនាំចូលដែលជាចំណែកមួយដើម្បីបញ្ចុះតម្លៃប្រេងសាំងផងដែរ។
អ្នករត់តុកតុកនៅរាជធានីភ្នំពេញ លោក ឈាង ស៊ីណាត ថា តម្លៃសាំងនៅលើទីផ្សារហក់ឡើងថ្លៃនៅឆ្នាំ២០២១នេះ បណ្ដាលឱ្យប៉ះពាល់ដល់អ្នករត់ម៉ូតូឌុប រម៉ក់កង់បី អ្នករត់ផាសអាប់ និងឡានឈ្នួលជាដើម ហើយចំណែកទំនិញលើទីផ្សារជាពិសេសម្ហូបអាហារហូបចុកប្រចាំថ្ងៃវិញក៏ឡើងថ្លៃផងដែរ។ លោកថា ស្ថានភាពរីករាលជំងឺកូវីដ១៩នេះ អ្នកដឹងជញ្ជូនរកប្រាក់ចំណូលបានមួយថ្ងៃហូបមួយថ្ងៃ តែប៉ុណ្ណោះ ហើយគួបផ្សំនឹងតម្លៃសាំងថ្លៃធ្វើឱ្យគ្រួសារលោកមិនអាចទប់ទល់តម្រូវការជីវភាពបានទេ។ លោកថា រដ្ឋាភិបាលហាក់មិនជួយដោះស្រាយទុក្ខកង្វល់របស់ពលរដ្ឋដែលកំពុងរងគ្រោះឡើយ។ លោកស្នើឱ្យរដ្ឋាភិបាលជួយបញ្ចុះតម្លៃសាំងនិងទំនិញនៅលើទីផ្សារ ដើម្បីពួកគាត់អាចផ្គត់ផ្គង់ជីវភាពគ្រួសារ៖ «បញ្ហាម្ហូបអាហារឡើងថ្លៃ សាច់គាត់ត្រូវឡើងថ្លៃហើយព្រោះសាំងឡើងថ្លៃ យើងដឹងហើយគាត់ត្រូវលក់ទំនិញម្ហូបអាហារ ត្រី សាច់ ត្រូវឡើងតាមហ្នឹងដែរ សម័យកាលនេះឈឺលែងទៅពេទ្យហើយអត់លុយ ហើយខ្លាចគេមើលទៅឃើញកូវីដផ្សេងៗ បើយើងអត់មានកូវីដមើលសំណាកមុនព្យាបាលជំងឺត្រូវបង់ប្រាក់ទៀត អ៊ីចឹងអត់ហ៊ានទៅទេ ល្មមៗនៅផ្ទះត្អូញត្អែរនៅផ្ទះ កោសខ្យល់អីចឹងសុទ្ធតែប៉ះពាល់ធ្ងន់ធ្ងរមែនទែនហើយពាក់ព័ន្ធតែសាំងមួយមុខគឺប៉ះពាល់គ្រប់មុខ»។
ស្រដៀងគ្នានេះដែរ កសិករនៅខេត្តបាត់ដំបង លោក ជា រ៉ាវី ត្អូញត្អែរពីតម្លៃប្រេងម៉ាស៊ូតនិងសាំងឡើងថ្លៃជាបន្តបន្ទាប់ដែលប៉ះពាល់ដល់តម្លៃស្រូវរបស់លោកនិងពលរដ្ឋផ្សេងទៀតនៅលើទីផ្សារ ព្រោះលោកត្រូវចំណាយខ្ពស់លើកប្រេងម៉ាស៊ូតដើម្បីចាក់ម៉ាស៊ីនបូមទឹកបញ្ជូលស្រែរហូតដល់ពេលច្រូតកាត់ ខណៈលោកត្រូវបង់បំណុលធនាគារជិត៣រយដុល្លារក្នុងមួយខែ។ កសិកររូបនេះបន្តថាពលរដ្ឋនៅក្នុងឃុំរបស់លោកមិនសូវចេញទៅប្រកបមុខរបរឆ្ងាយនោះទេ ព្រោះពួកគាត់បារម្ភសាំងឡើងថ្លៃ៖ «សំណូមពរដល់រដ្ឋាភិបាលនិងស្ថាប័ននានា បើអាចសម្រួលបានជួយសម្រួលសាំងឱ្យចុះមកនៅល្មមអាចទទួលយកបាន ហើយធនាគារអីក៏ដោយរដ្ឋាភិបាលជួយសម្រួលពន្យារខ្លះក៏ល្អព្រោះឥឡូវមិនដឹងរកអីបាន ទៅណាក៏គេបិទមិនឱ្យដើរនៅតែផ្ទះ»។
វិទ្យុអាស៊ីសេរីមិនអាចទាក់ទងអ្នកនាំពាក្យ ក្រសួងពាណិជ្ជកម្មលោក ស៊ាង ថៃ ដើម្បីសុំការឆ្លើយតបបានទេនៅថ្ងៃទី២៣ កក្កដា ដោយទូរស័ព្ទចូលពុំមានអ្នកទទួល។ តែអ្នកនាំពាក្យក្រសួងពាណិជ្ជកម្មលោក ឡុង កែវិចិត្រ ប្រាប់ថា លោកមិនអធិប្បាយបានទេ ដោយលើកហេតុផលថាជាប់រវល់ប្រជុំ ហើយលោករុញឱ្យផ្ញើសំនួរតាមប្រព័ន្ធតេឡេក្រាម (Telegram)វិញ។ វិទ្យុអាស៊ីសេរីបានផ្ញើសំណួរតាមប្រព័ន្ធតេឡេក្រាម ប៉ុន្តែអ្នកនាំពាក្យរូបនេះ មិនទាន់ឆ្លើយតបជុំវិញរឿងនេះនៅឡើយទេ គិតត្រឹមល្ងាចថ្ងៃទី២៣ កក្កដា។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វន់ ពៅ មានប្រសាសន៍ថា ស្ថានភាពរីករាលដាលជំងឺកូវីដ១៩នេះ សង្គមស៊ីវិលព្រួយបារម្ភការបាត់បង់ប្រាក់ចំណូល និងបញ្ហាជីវភាពអាជីវករ និងអ្នកប្រកបមុខរបរដឹកជញ្ជូន។ លោកថា តម្លៃសាំងឡើងថ្លៃក៏ជាបន្ទុកបន្ថែមទៀតដែលទាញជីវភាពគ្រួសារពលរដ្ឋខ្មែរឱ្យយ៉ាប់យ៉ឺនបន្តទៀតដែរ។ លោកសង្កេតឃើញថា រដ្ឋាភិបាលមិនទាន់ប្រើប្រាស់យន្តការឆ្លើយតបដើម្បីដោះស្រាយជុំវិញទុក្ខលំបាករបស់ពលរដ្ឋនៅឡើយទេ។ មន្ត្រីសង្គមស៊ីវិលរូបនេះថា តម្លៃសាំងនិងទំនិញដែលកំពុងឡើងថ្លៃមិនឆ្លុះបញ្ចាំងពីតុល្យភាពនៃប្រាក់ចំណូលរបស់ពលរដ្ឋនោះទេ ដូច្នេះរដ្ឋាភិបាលគួរជជែកជាមួយភាគីពាក់ព័ន្ធរកវិធីបញ្ចុះតម្លៃសាំង ដើម្បីធានានូវសិទ្ធិនិងជីវភាពរបស់ពលរដ្ឋរស់នៅសមរម្យក្នុងស្ថានភាពលំបាកនេះ៖ «រៀបចំយន្តការទាក់ទងទៅនឹងកូវីដដែរ ព្រោះកាលណាស្ថានភាពកូវីដស្រុកយើងចាក់វ៉ាក់សាំងហើយ វ៉ាក់សាំងមានប្រសិទ្ធភាពមិនអាចឆ្លងទៅដល់ប្រជាពលរដ្ឋផ្សេងៗវាជាកត្តាមួយដែលអាចទាក់ទាញភ្ញៀវទេសចរណ៍បាន អ៊ីចឹងឱ្យអ្នកប្រកបមុខរបរក្រៅប្រព័ន្ធអាច មានដង្ហើមរស់ក្នុងការអាស្រ័យផលលើភ្ញៀវទេសចរណ៍ហ្នឹងដែរ ប៉ុន្តែតួលេខអ្នកឆ្លងកូវីដឡើងខ្ពស់ហើយចាក់វ៉ាក់សាំងក៏មានចំនួនច្រើនដែរ តែតួលេខចំនួនឆ្លងអត់មានការថមថយ អាហ្នឹងរឹងរឹតធ្វើឱ្យពលរដ្ឋមិនហ៊ានចេញដំណើរទៅមកណា សាំងឡើងថ្លៃទៀត អាហ្នឹងជាកត្តាមួយដែលធ្វើឱ្យយើងពិបាកក្នុងការរស់ក្នុងស្ថានភាពបែបនេះ»។
កាលពីឆ្នាំ២០២០ តម្លៃប្រេងសាំងធ្លាក់ចុះបានជួយសម្រួលដល់ជីវភាពពលរដ្ឋក្នុងវិបត្តិជំងឺកូវីដ១៩ខ្លះដែរ ប៉ុន្តែចាប់ពីដើមឆ្នាំ២០២១នេះ តម្លៃប្រេងសាំងចាប់ផ្ដើមហក់ឡើងខ្លាំងស្របទៅនឹងជំងឺកាចសាហាវបន្តរីករាលដាលខ្លាំង។ ចំណែកតម្លៃប្រេងសាំង និងម៉ាស៊ូតលក់ចាប់ពីថ្ងៃទី១៦ កក្កដាឆ្នាំ២០២០ សម្រាប់សាំងធម្មតាក្នុងមួយលីត្រ ៣ពាន់រៀល(៣.០០០) សម្រាប់ម៉ាស៊ូតក្នុងមួយលីត្រ២ពាន់៧៥០រៀល (២.៧៥០) ។ រីឯតម្លៃប្រេងសាំង និងម៉ាស៊ូតចាប់ពី១៦ កក្កដា ឆ្នាំ២០២១ វិញសម្រាប់សាំងធម្មតា ៤ពាន់១រយរៀល(៤.១០០)ក្នុងមួយលីត្រ សម្រាប់ម៉ាស៊ូត ៣ពាន់៦៥០រៀល (៣.៦៥០) ក្នុងមួយលីត្រ។ ដូច្នេះបើគិតក្នុងរយៈពេល១ឆ្នាំធៀបនឹងតម្លៃប្រេងសាំង និងម៉ាស៊ូតនៅខែកក្កដាដូចគ្នា តម្លៃប្រេងសាំងកើនឡើងក្នុងមួយលីត្រ១ពាន់១រយ (១.១០០) និងប្រេងម៉ាស៊ូតកើនឡើងក្នុងមួយលីត្រ ៩រយរៀល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
