គ្រូនិងសិស្សវិទ្យាល័យព្រះស៊ីសុវត្ថិពេញចិត្តការមិនដកនាយក តែស្នើឲ្យដកសាលារៀនជំនាន់ថ្មី
2018.09.20
រដ្ឋមន្ត្រីក្រសួងអប់រំ យុវជន និងកីឡា បានសម្រេចរក្សាទុកនាយកវិទ្យាល័យព្រះស៊ីសុវត្ថិ ឲ្យបន្តតួនាទី ដោយសារតែលទ្ធផលឆ្នោតរបស់ក្រុមគ្រូបង្រៀនបង្ហាញថា មិនពេញចិត្តនឹងការដកលោកនាយក ឈ្មោះ មូល ស៊ុយហេង ចេញពីវិទ្យាល័យនេះទេ។ ប៉ុន្តែក្រុមគ្រូបង្រៀននៅតែទាមទារឲ្យរដ្ឋមន្ត្រីក្រសួងអបរំ ដកសាលារៀនជំនាន់ថ្មីចេញពីវិទ្យាល័យព្រះស៊ីសុវត្ថិ។ សង្គមស៊ីវិល យល់ថា ក្រសួងអប់រំ គួរជ្រើសរើសសាលារៀនណាមួយ បង្កើតសាលារៀនជំនាន់ថ្មី ទាំងអស់តែម្ដង កុំបែងចែក ជាពីរ បែបនេះ។
ក្រុមគ្រូបង្រៀន និងសិស្សវិទ្យាល័យព្រះស៊ីសុវត្ថិ នៅរាជធានីភ្នំពេញ បានយល់ព្រមបញ្ឈប់សកម្មភាព តវ៉ានៅមុខវិទ្យាល័យហើយ ក្រោយពេល រដ្ឋមន្ត្រីក្រសួងអប់រំ លោក ហង់ ជួនណារ៉ុន បានសម្របសម្រួលឲ្យមានការបោះឆ្នោត នៅព្រឹកថ្ងៃទី២០ កញ្ញា ដើម្បីសម្រេចថា គួរបន្តទុក នាយកវិទ្យាល័យ លោក មូល ស៊ុយហេង ឲ្យដឹកនាំវិទ្យាល័យព្រះស៊ីសុវត្ថិជាបន្ត ឬ ផ្ទេរចេញទៅកាន់នាយកដ្ឋានចំណេះដឹងទូទៅវិញ។
គ្រូបង្រៀនរូបវិទ្យា នៅវិទ្យាល័យព្រះស៊ីសុវត្ថិ ម្នាក់សុំមិនបញ្ចេញឈ្មោះ ប្រាប់អាស៊ីសេរីថា ក្រុមគ្រូបង្រៀន និងសិស្សពេញចិត្តនឹងការសម្រេចចិត្តរបស់ រដ្ឋមន្ត្រីក្រសួងអប់រំ ដែលបើកឱកាសឲ្យក្រុមគ្រូបង្រៀន បានបង្ហាញឆន្ទៈរបស់ខ្លួន ជុំវិញការដោះដូរនាយកវិទ្យាល័យនេះ។ គ្រូបង្រៀនរូបវិទ្យារូបនេះ រំលឹកថា ដើមចមដែលបណ្ដាលឲ្យមានក្រុមគ្រូ និងសិស្ស នាំគ្នាចេញតវ៉ានៅមុខវិទ្យាល័យ គឺដោយសារតែខាងមន្ទីរអប់រំ យុវជន និង កីឡា រាជធានីភ្នំពេញ កាលពីប៉ុន្មានថ្ងៃមុននេះ បានចេញលិខិតផ្លាស់ប្ដូរនាយកវិទ្យាល័យចេញ ហើយកោះហៅគ្រូៗប្រជុំជាបន្ទាន់។ លោកគ្រូរូបនេះ បញ្ជាក់ថា ក្រុមគ្រូបង្រៀន មិនពេញចិត្តនឹងការដោះដូរនាយកវិទ្យាល័យទេ ព្រោះលោក មូល ស៊ុយហេង ជានាយកល្អ ធ្លាប់ដឹងសុខទុក្ខរបស់គ្រូបង្រៀន៖ «បុគ្គលិកម្នាក់ៗចាត់គាត់ ដូចមេនិងកូន។ ការធ្វើនេះ គឺដោយការគោរពរាប់អាន និងអត់ចង់ឲ្យគាត់ចេញ ឬដូរទេ»។
ក្នុងពេលនេះ បើទោះបីជាលោកគ្រូ អ្នកគ្រូវិទ្យាល័យស៊ីសុវត្ថិ ពេញចិត្ត ព្រោះជោគជ័យក្នុងការតវ៉ា មិនឲ្យដកលោក មូល ស៊ុយហេង យ៉ាងណាក៏ដោយ ក៏នាយកសាលារូបនេះ នឹងត្រូវប្រឈមលក្ខខណ្ឌតម្រូវជាច្រើនរបស់ក្រសួង។
អ្នកនាំពាក្យក្រសួងអប់រំ យុវជន និង កីឡា លោក ឌី ខាំបូលី ប្រាប់អាស៊ីសេរី នៅថ្ងៃទី២០ ខែកញ្ញា ថា ក្រសួងគោរពតាមឆន្ទៈរបស់គ្រូ ដែលចង់ឲ្យនាយកសាលានៅដដែល ប៉ុន្តែក្រសួងនឹងចាត់ការ ត្រួតពិនិត្យការដឹកនាំរបស់លោក មូល ស៊ុយហេង ដែលក្រសួងធ្លាប់រកឃើញរួចមកហើយ ថានៅមានបញ្ហាជាច្រើន ដែលត្រូវជម្រះបញ្ជី៖ «នៅក្នុងការដឹកនាំកន្លងមកនេះ គឺមានភាពមិនប្រក្រតី ក្នុងការប្រើប្រាស់ថវិកាសាលារៀន។ ដូច្នេះនឹងមានការធ្វើអធិការកិច្ច។ កន្លងមកមានការធ្វើអធិការកិច្ចរួចហើយ បានរកឃើញនូវភាពមិនប្រក្រតីក្នុងការប្រើប្រាស់ថវិកា។ លក្ខខណ្ឌមួយ គឺថាត្រូវតែដោះស្រាយ នូវបញ្ហាភាពមិនប្រក្រតីនៃថវិកានេះ»។
អាស៊ីសេរី មិនទាន់អាចសុំការបំភ្លឺ ពីលោក មូល ស៊ុយហេង ជុំវិញបញ្ហានេះ នៅឡើយទេ។
ក្រុមសិស្ស និងគ្រូបង្រៀន នៃវិទ្យាល័យព្រះស៊ីសុវត្ថិ បានប្រមូលផ្ដុំគ្នាឈរតវ៉ា លើកបដា នៅមុខក្លោងទា្វវិទ្យាល័យ ព្រះស៊ីសុវត្ថិ ជាច្រើនថ្ងៃហើយ ក្រោយពេល ដែលពួកគេ មិនពេញចិត្តនឹងការផ្លាស់ប្ដូរតំណែងនាយកវិទ្យាល័យ និងស្នើសុំឲ្យក្រសួងអប់រំពិចារណា ក្នុងការដកសាលារៀនជំនាន់ថ្មីចេញពីវិទ្យាល័យព្រះស៊ីសុវត្ថិ ព្រោះពួកគេអះអាងថា នេះជាគ្រឹះស្ថានឯកជន និងបានធ្វើឲ្យមានការរើសអើងគ្នា។ ក្រុមគ្រូបង្រៀន និងសិស្ស ប្រាប់ថាការបង្កើតសាលារៀនជំនាន់ថ្មី ក្នុងវិទ្យាល័យព្រះស៊ីសុវត្ថិបែបនេះ មិនមែនជាជម្រើសល្អ សម្រាប់វិស័យអប់រំទេ ផ្ទុយទៅវិញ គ្រូបង្រៀន និងសិស្សនៃសាលាទាំងពីរ មានការរើសអើងគ្នា។ បុគ្គលិកសិក្សាវិទ្យាល័យព្រះស៊ីសុវត្ថិ ពន្យល់ថា ការអប់រំគួរស្ថិតក្រោមរូបភាព និងប្រព័ន្ធតែមួយ កុំមានការបែងចែកគ្នា។
សាលាជំនាន់ថ្មី ជាឈ្មោះគ្រឹះស្ថានអប់រំមួយ ត្រូវបានដាក់ឲ្យស្ថិតនៅក្នុងបរិវេណនៃវិទ្យាល័យព្រះស៊ីសុវត្ថិ និងបានឲ្យដំណើរការ តាំងពីឆ្នាំ២០១៤មក ដោយទទួលបានជំនួយពីអង្គការឈ្មោះ ខេប (KAPE) ដែលធ្វើការលើវិស័យអប់រំ ដោយមានការសម្របសម្រួលពីក្រសួងអប់រំ។
នៅក្នុងសៀវភៅ ដែលមានចំណងជើងថា គោលនយោបាយស្ដីពីសាលារៀនជំនាន់ថ្មី រដ្ឋមន្ត្រីក្រសួងអប់រំ លោក ហង់ ជួនណារ៉ុន ពន្យល់ថា គោលបំណង នៃសាលារៀនជំនាន់ថ្មី គឺព្យាយាមបង្កើតគំរូអភិវឌ្ឍន៍ថ្មី នៅក្នុងប្រព័ន្ធអប់រំ សាធារណៈ ដែលនឹងនាំទៅដល់ការបង្កើតសាលារៀនសាធារណៈស្វយ័ត ដែលទទួលបានការវិនិយោគខ្ពស់ ផ្សារភ្ជាប់នឹងស្តង់ដារថ្មី មានគណនេយ្យភាព និងអភិបាលកិច្ចល្អ ព្រមទាំងស្តង់ដារវិជ្ជាជីវៈ សម្រាប់ការសិក្សា នៅសតវត្សទី២១។
បច្ចុប្បន្នក្រសួងអប់រំ បានដាក់ឲ្យអនុវត្តកម្មវិធីសិក្សាសាលារៀនជំនាន់ថ្មីនេះ ចំនួន១០សាលារៀនហើយ នៅទូទាំងប្រទេស។ ក្នុងនោះ បឋមសិក្សាមានចំនួន៤ និងមធ្យមសិក្សា មានអនុវិទ្យាល័យ និងវិទ្យាល័យ មានចំនួន៦។ សាលារៀនជំនាន់ថ្មី មាននៅវិទ្យាល័យព្រះស៊ីសុវត្ថិ វិទ្យាល័យ ហ៊ុន សែន កំពង់ចាម វិទ្យាល័យព្រែកលៀប វិទ្យាល័យសម្ដេច ជា ស៊ីម ព្រែកអញ្ចាញ វិទ្យាល័យហ៊ុន សែន ពាមជីកង អនុវិទ្យាល័យគោកព្រីង សាលាបឋមសិក្សា ហ៊ុន សែន កំពង់ចាម សាលាបឋមសិក្សាព្រះរាជអគ្គមហេសី សាលាបឋមសិក្សាអង្គរបាន និងសាលាបឋមសិក្សាព្រហូត។
បើទោះជាបែបណាក្ដី គ្រូបង្រៀននៅវិទ្យាល័យព្រះស៊ីសុវត្ថិ អះអាងថា វត្តមានសាលារៀនជំនាន់ថ្មី បានបំផ្លាញបេតិកភណ្ឌក្នុងវិទ្យាល័យព្រះស៊ីសុវត្ថិជាច្រើន ដូចជាការវាយកម្ទេចទ្វារបង្អួច នៃសំណង់អគារបុរាណ ឬសំណង់អគារសម័យបារាំង នៅក្នុងវិទ្យាល័យនេះ ដើម្បីកែច្នៃ តុបតែងទៅជាអគារសិក្សាថ្មី ដែលហាក់បីដូចជាផ្ទះល្វែង ឬផ្ទះបុរីក្នុងសម័យថ្មី។ គ្រូបង្រៀន បារម្ភថា ការតុបតែង កែច្នៃ អគារបុរាណ មកលំអរដាក់អំពូលភ្លើងជាដើម អាចបណ្ដាលឲ្យមានគ្រោះថ្នាក់ដល់សិស្ស។ គ្រូបង្រៀន អះអាងថា បើចង់ឲ្យសិស្សរៀនពូកែ មិនចាំបាច់ទៅវាយកម្ទេចទ្វារបង្អួចអគារបុរាណ បំពាក់កញ្ចក់ទេ ព្រោះអគារនេះ ស្ថាបត្យករសម័យបារាំង បានស្ថាបនាឡើង មានខ្យល់ចេញចូលគ្រប់គ្រាន់ និងសមល្មម នឹងការរៀនសូត្ររបស់សិស្ស។
គ្រូបង្រៀនរូបវិទ្យាដដែល ច្រានចោលការចុះផ្សាយរបស់ប្រព័ន្ធឃោសនារបស់លោក ហ៊ុន សែនឈ្មោះ ហ្វ្រេសញូវ (Fresh News) ដែលសង្ស័យថា ក្រុមគ្រូបង្រៀន ច្រណែននឹងកម្មវិធីសិក្សា សាលារៀនជំនាន់ថ្មី ដែលយកចិត្តទុកដាក់ខ្ពស់លើការ លុបបំបាត់ការរៀនក្រៅម៉ោង ឬហៅថារៀនគួរ និងការលក់ឯកសារផ្សេងៗ ដែលនាំឲ្យសិស្សចំណាយក្រៅផ្លូវការលើការសិក្សា៖ «ក្នុងការបង្រៀនគួរ គឺមិនមែនជាការចាប់បង្ខំទេ។ ភាគច្រើន នៃអ្នកដែលមករៀន គឺមកពីត្រើយម្ខាងឯណោះ អត់សូវមានអ្នកមានប៉ុន្មានទេ។ យើងមិនដាច់ចិត្តមេត្តា រឿងបង់លុយរៀនបន្ថែមនេះទេ។ សិស្សមានប៉ុនណា បង់ប៉ុណ្ណឹង។ លោករដ្ឋមន្ត្រី ថាបើឲ្យដាក់នៅហ្នឹង ក្រសួងនឹងយកទៅដាក់នៅសាលាបាក់ទូក។ ពូកយើងអរទះដៃប្រាវ ឲ្យដកទៅ។ យើងនាំគ្នាអរ»។
អ្នកនាំពាក្យក្រសួងអប់រំ យុវជន និងកីឡា លោក ឌី ខាំបូលី ប្រាប់អាស៊ីសេរីថា ទោះក្រសួងសម្រេចទុកនាយកសាលាដដែល តាមការចង់បានរបស់គ្រូបង្រៀនក្តី ក៏ក្រសួងមិនទាន់សម្រេចយ៉ាងណា ទៅតាមការស្នើឲ្យដកគម្រោងគោលនយោបាយសាលារៀនជំនាន់ថ្មី ពីវិទ្យាល័យស៊ីសុវត្ថិនោះនោះឡើយទេ។ ទោះជាយ៉ាងនេះក្តី អ្នកនាំពាក្យរូបនេះ ពន្យល់ថា ជាគោលការណ៍ សាលារៀនជំនាន់ថ្មី មិនតម្រូវឲ្យសិស្សបង់ថ្លៃសិក្សាទេ តែសិស្សអាចបង់ជាបដិភាគ ជួយសាលាបាន៖ «មិនតម្រូវឲ្យមានការបង់ប្រាក់ជាកំហិត ដូចសាលាឯកជនទេ។ ប៉ុន្តែ គ្រួសារដែលមានលទ្ធភាព អាចចូលបដិភាគ ដើម្បីជួយទ្រទ្រង់សាលាឲ្យមាននិរន្តរភាព»។
សាលារៀនជំនាន់ថ្មី បានតម្រូវឲ្យសិស្ស និងគ្រូ ដែលចង់រៀន និងបង្រៀននៅទីនោះ ត្រូវប្រលងចូល ដែលជាហេតុធ្វើឲ្យបែកបាក់គ្នា មានការរើសអើងគ្នា រវាងក្រុមសិស្ស និងគ្រូបង្រៀន នៃសាលាជំនាន់ចាស់ និងសាលាជំនាន់ថ្មី។ ការបង្កើតសាលារៀនជំនាន់ថ្មីនេះ ហាក់ដើរបញ្ច្រាសពីរដ្ឋធម្មនុញ្ញ នៅមាត្រា ៦៦ ចែងថា រដ្ឋកសាងប្រព័ន្ធអប់រំមួយពេញលេញ និងឯកភាពនៅទូទាំងប្រទេស ដែលធានាឱ្យបាននូវគោលការណ៍សេរីភាពខាងសិក្សាធិការ និងគោលការណ៍សមភាពក្នុងការអប់រំ ដើម្បីឱ្យប្រជាពលរដ្ឋគ្រប់រូបមានភ័ព្វសំណាងគ្រប់គ្រាន់ ស្មើគ្នាក្នុងការកសាងជីវិត។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយាវី បង្ហាញមោទនភាព ដែលនាយកសាលាមួយ ទទួលបានការគោរពស្រលាញ់យ៉ាងក្រាស់ក្រែលពីបុគ្គលិកសិក្សា។ អ្នកឃ្លាំមើលវិស័យអប់រំរូបនេះ សង្កេតឃើញថា កន្លងមក ក្រសួងអប់រំ មិនដែលបានរៀបចំការបោះឆ្នោត ឬពិភាក្សាជាមួយក្រុមបុគ្គលិកសិក្សា លើការសម្រេចចិត្តដោះដូរ ឬ ជ្រើសតាំងនាយកសាលា ឬ បណ្ដេញចេញបុគ្គលិកសិក្សាទេ ដូច្នេះអ្នកស្រី អ៊ុក ឆាយាវី ចង់ឲ្យក្រសួងអប់រំ មានការផ្លាស់ប្ដូរដោយធ្វើរបៀបនេះបន្តទៀត មុននឹងសម្រេចចិត្តធ្វើអ្វីមួយ។
ចំណែកឯករណីបង្កើតសាលារៀនជំនាន់ថ្មីវិញ អ្នកតាមដានវិស័យអប់រំរូបនេះ ផ្ដល់យោបល់ថា ក្រសួងអប់រំ មិនគួរបែកចែក ឬពុះសាលារៀនរបស់រដ្ឋជាពីរផ្នែក ដាក់ជាសាលារៀនជំនាន់ថ្មីទេ គឺក្រសួងអប់រំ គួរជ្រើសយកសាលារៀនណាមួយ ដាក់សាលារៀននោះទាំងមូល ជាសាលារៀនជំនាន់ថ្មី ទើបបញ្ចៀសពីការបែកបាក់ និងការរើសអើងគ្នា ក្នុងសាលារៀន៖ «ម្យ៉ាងត្រូវមានកិច្ចព្រមព្រៀងពីមាតាបិតាសិស្ស ព្រមទាំងសិស្សានុសិស្សផង។ បើពួកគាត់អត់សប្បាយចិត្ត មិនគួរមានសាលារៀនជំនាន់ថ្មី ដែលបង្កើតរូបភាពសាលាក្នុងសាលាបែបនេះនោះទេ»។
ទោះយ៉ាងណា ក្រុមគ្រូបង្រៀននៃវិទ្យាល័យព្រះស៊ីសុវត្ថិ អះអាងថា ពួកគេនឹងធ្វើញ្ញត្តិមួយ ដើម្បី ដាក់ជូនរដ្ឋមន្ត្រីក្រសួងអប់រំ ដើម្បីឲ្យមានការពិចារណា ដកសាលារៀនជំនាន់ថ្មី ចេញពីវិទ្យាល័យព្រះស៊ីសុវត្តិ។ អ្នកនាំពាក្យក្រសួងអប់រំ ប្រាប់ថា លោកគ្រូ អ្នកគ្រូ មានសិទ្ធិពេញទី ក្នុងការដាក់ញ្ញត្តិស្នើសុំ ហើយខាងក្រសួងនឹងប្រជុំគ្នា ដើម្បីពិនិត្យ និងពិចារណា ឲ្យបានហ្មត់ចត់៕