របាយការណ៍ក្រសួងសេដ្ឋកិច្ច៖ ចិនមិនបានផ្ដល់កម្ចីណាមួយឱ្យកម្ពុជាឡើយក្នុងឆ្នាំ២០២៤នេះ
2024.12.12
ប្រធានព្រឹទ្ធសភា លោក ហ៊ុន សែន (ឆ្វេង) ជួបប្រធានាធិបតីចិន លោក ស៊ី ជីនពីង (Xi Jinping) នៅប្រទេសចិន គាលពីថ្ងៃទី៣ ធ្នូ ២០២៤។
រូប៖ ហ្វេសប៊ុកលោក ហ៊ុន សែន
ប្រទេសចិនមិនបានផ្ដល់កម្ចីថ្មីណាមួយឱ្យកម្ពុជាទេ នៅក្នុងអំឡុងពេលជិត ១ឆ្នាំ ២០២៤នេះ។
សារព័ត៌មាន រ៉យទ័រស៍ (Reuters) ផ្សាយកាលពីថ្ងៃទី១១ ខែធ្នូ ឱ្យដឹងថា តាមទិន្នន័យពីក្រសួងសេដ្ឋកិច្ច និងហិរញ្ញវត្ថុ គឺពុំមានកម្ចីណាមួយ ដែលចិនផ្ដល់ឱ្យកម្ពុជាទេ រាប់ចាប់តាំងពីខែមករា ទៅដល់ខែកញ្ញា បើទោះបីជាចិនជាម្ចាស់បំណុលធំជាងគេរបស់កម្ពុជាក៏ដោយ។ ក្នុងរយៈពេលដូចគ្នានេះ កាលពីឆ្នាំ២០២៣ ចិនបានផ្ដល់កម្ចី ដល់កម្ពុជាចំនួនជិត ២១២លានដុល្លារ ហើយក្នុងរយៈពេញមួយឆ្នាំ ចិនបានផ្ដល់កម្ចីចំនួនសរុបជាង ៣០០ លានដុល្លារ។
គិតមកដល់ពេលនេះបំណុលសាធារណៈរបស់កម្ពុជាឡើងដល់ជិត ១ម៉ឺន ២ពាន់លានដុល្លារ ក្នុងនោះកម្ពុជាជំពាក់ចិនស្ទើរតែជិតពាក់កណ្តាលគឺប្រមាណជាង ៤ពាន់លានដុល្លារ។
រ៉យទ័រស៍រាយការណ៍បន្តថា ការមិនផ្ដល់កម្ចីឱ្យកម្ពុជានេះ ជាសញ្ញាបង្ហាញថា ប្រទេសចិនកំពុងបង្កើនការប្រុងប្រយ័ត្នចំពោះការវិនិយោគនានាមកកម្ពុជា ក្នុងដំណាក់កាលដែលគម្រោងជាច្រើននៃគម្រោងហេដ្ឋារចនាសម្ព័ន្ធនៅក្នុងបណ្ដាប្រទេសនៅអាស៊ីអាគ្នេយ៍បានបរាជ័យជាបន្តបន្ទាប់គ្នា។
ទោះជាយ៉ាងណាក៏ដោយកម្ពុជាក៏បន្តទទួលបានកម្ចីមកពីបណ្ដាដៃគូអភិវឌ្ឍន៍ផ្សេងទៀតនៅក្នុងឆ្នាំ២០២៤ ដែលមានទំហំសរុបប្រមាណ ១ពាន់លានដុល្លារ។ ក្នុងនោះកម្ពុជាបានកម្ចីពីធនាគារពិភពលោកចំនួន ៥៦៤ លានដុល្លារ ជាម្ចាស់កម្ចីធំទី១ និង ២៦២លានដុល្លារ ពីប្រទេសជប៉ុនជាម្ចាស់កម្ចីធំទី២ ក្នុងឆ្នាំ២០២៤។
វិទ្យុអាស៊ីសេរីមិនទាន់អាចសុំការឆ្លើយតបរឿងនេះពីមន្ត្រីពាក់ព័ន្ធនៅក្រសួងហិរញ្ញវត្ថុបានទេកាលពីយប់ថ្ងៃទី១១ ខែធ្នូ។
ចំណែកអ្នកនាំពាក្យក្រសួងការបរទេសចិន ក៏មិនបានឆ្លើយនឹងសំណួររបស់រ៉យទ័រស៍ទាក់ទងនឹងកម្ចីចិនផ្ដល់ឱ្យកម្ពុជានេះទេ ដោយឆ្លើយថា កម្ពុជា និងចិនគឺជាមិត្តដែកថែប ហើយចិននឹងបន្តពង្រឹងទំនាក់ទំនងជាមួយកម្ពុជា ដោយផ្ដល់ការគាំទ្រកម្ពុជា ដោយជំរុញការអភិវឌ្ឍ និងកែលម្អជីវភាពរស់នៅរបស់ពលរដ្ឋ។
ក្នុងឆ្នាំ២០២២ ចិនបានផ្ដល់កម្ចីឱ្យកម្ពុជាច្រើនជាងគេក្នុងទំហំទឹកប្រាក់ ៥៦៧លានដុល្លារ។
ទាក់ទងនឹងកម្ចីចិននេះ លោក ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា ដែលបានទៅបំពេញទស្សនកិច្ចមិត្តភាព និងជាផ្លូវការនៅប្រទេសចិនទាំងប្រថុចញ៉ុច កាលពីដើមខែធ្នូ បានស្នើដល់ប្រធានាធិបតីចិន លោក ស៊ី ជីនពីង (Xi Jinping) ឱ្យជួយគាំទ្រផ្នែកសេដ្ឋកិច្ច ជាពិសេស ផ្ដល់ជំនួយ និងប្រាក់កម្ចីបន្ថែមដល់រដ្ឋាភិបាលកូនប្រុសរបស់លោក គឺលោក ហ៊ុន ម៉ាណែត។ ជាមួយគ្នានេះ លោក ហ៊ុន សែន អះអាងតែឯងដោយគ្មានភស្តុតាងនៅលើហ្វេសប៊ុកថា លោក ស៊ី ជីនពីង បានគាំទ្រគម្រោងសាងសង់ព្រែកជីកហ្វូណន ទាំងដែលភាគីចិនមិនបានលើកឡើងពីរឿងនេះទាល់តែសោះនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន